ဢိင်ၼိူဝ်ပီႈၼွင်ႉၵူၼ်းမိူင်းထႆး ၵဵင်းမႆႇ လၢႆၾၢႆႇ ႁူမ်ႈၵၼ်ၸတ်းဝၼ်းပေႃႈ၊ ၶုၵ်းထူပ်းယုၵ်ႉယွင်ႈ ယေႃးမုၼ် ၸဝ်ႈႁေႃၶမ်းထႆး လူင်ႈၼႃႈသေ ပီႈၼွင်ႉတႆး ၼႂ်းၵဵင်းမႆႇ ၶဝ်ႈႁူမ်ႈယွင်ႈၵုၼ်းမုၼ် ၵႃရဝ ၸုတ်ႇတႆႈတဵၼ်းၸႆး။

ဝၼ်းတီႈ 03/12/2014 ယၢမ်းဝၢႆးဝၼ်းတေႃႇထိုင်ႁူဝ်ၶမ်ႈ သမႃးၶူမ်းပၢႆးပၺ်ၺႃတႆး ၵဵင်းမႆႇ၊ ၵေႃလိၵ်ႈလၢႆး လႄႈၾိင်ႈငႄႈတႆး ၵဵင်းမႆႇ ဢွၼ်ႁူဝ်ပီႈၼွင်ႉတႆးၼႂ်းၵဵင်းမႆႇလၢႆၸုမ်းသေ ႁူမ်ႈၵၼ်ၶဝ်ႈႁူမ်ႈ ပၢင်ယုၵ်ႉယွင်ႈ ၶုၵ်းထူပ်း ယုၵ်ႉယွင်ႈၵုၼ်းမုၼ် ယွၼ်းပွၼ်းမွပ်ႈတၢၼ်း ဝၼ်းၵိူတ်ႇၸဝ်ႈမုၼ်ယႂ်ႇႁေႃၶမ်းထႆး၊ ဢၼ်ပီႈၼွင်ႉ ၵူၼ်းမိူင်းထႆး လၢႆၾၢႆႇ ပႃးၸဵမ်ၸုမ်းၵူၼ်းမိူင်း၊ ၾၢႆႇပလိၵ်ႈ၊ ၾၢႆႇသိုၵ်း ဢိၵ်ႇ ၶႃႈႁၢပ်ႇၵၢၼ်ၶုၼ် ၸိူဝ်းၼႆႉ ႁူမ်ႈၵၼ်ၸတ်းတီႈ ၽၵ်းတူတႃႈၽႄး ဝဵင်းၵဵင်းမႆႇ မိူင်းထႆး။
ၵၢၼ်ၶဝ်ႈႁူမ်ႈ ပၢင်ယုၵ်ႉယွင်ႈ ယွၼ်းပွၼ်းပွၵ်ႈၼႆႉ မီးပီႈၼွင်ႉၵူၼ်းမိူင်းထႆး ဢိၵ်ႇပီႈၼွင်ႉလၢႆလၢႆၸၢဝ်းၶိူဝ်း လႄႈ ၸၢဝ်းတၢင်ႇၸၢတ်ႈတင်းၼမ်။ တင်ႈတႄႇယၢမ်းဝၢႆးဝၼ်း ဢွၼ်ၵၼ်ၵႂႃႇၶွၼ်ႈတုမ်ၵၼ်တီႈ ၵၢတ်ႇၶူင်းၵၢၼ်ၸိင်ႊၸႆႊ ႁိုဝ် (JJ Market) လင်လူဝ်ႊတတ်ႉသ် (Lotus) ၶမ်းတဵင်ႈသေ ၸတ်းထႅဝ ၸုမ်းၽႂ်/ ၸၢတ်ႈမၼ်းယဝ်ႉ ႁႄႇပႆလဵပ်ႈမႃးၼႂ်းဝဵင်း ႁၢၼ်ႉတေႃႇပေႃးထိုင်ၽၵ်းတူ တႃႈပႄး။
ဝၼ်းတီႈ 05/12/2014 ၼႆႉ ဢႃႇယုၸဝ်ႈႁေႃၶမ်းမိူင်းထႆး ႁိုဝ် ၾႃႉၸဝ်ႈယူႇႁူဝ်ထႆး ၶွပ်ႈတဵမ် 87 ပီ။ ပေႃးထိုင်မႃးဝၼ်းပေႃႈၵူႈပီ ပီႈၼွင်ႉၵူၼ်းမိူင်းထႆး ၸတ်းပၢင်ယွင်ႈယေႃး ၶုၵ်းထူပ်း ယွၼ်းပွၼ်း ၸုတ်ႇတႆႈ တဵၼ်းၸႆး မွပ်ႈၼွပ်ႇတၢၼ်းပၼ်ၸဝ်ႈမုၼ်ယႂ်ႇ ၶုၼ်ႁေႃၶမ်း (ၾႃႉၸဝ်ႈယူႇႁူဝ်) ဢႃႇယုယိုၼ်းယၢဝ်း၊ တူဝ်ၶိင်းၶႅင်ႁႅင်း၊ ပၢႆးယူႇလီၶႅမ်ႉလႅပ်ႈလႄႈသိုပ်ႇပဵၼ်ႁူမ်ႈႁုင်းႁူမ်ႈႁႆး တႃႇၵူၼ်းမိူင်းၵႂႃႇထႅင်ႈၶၢဝ်းႁိုင် ။
ပေႃးထိုင်မႃးဝၼ်းတီႈ 05/12/2014 ၼႆႉ ၾၢႆႇၽွင်းငမ်းၸႄႈတွၼ်ႈၵဵင်းမႆႇ ႁိုဝ် လူင်ပွင်ၸိုင်ႈထႆး တေဢွၼ်ႁူဝ် ၸတ်းႁဵတ်းတီႈ လုမ်းၵွၼ်းၸႄႈတွၼ်ႈၵဵင်းမႆႇ (သႃလႃးၵၢင်) ၼႂ်းၵဵင်းမႆႇ။ ၼႆႉၵေႃႈ သမႃးၶူမ်းလႄႈ ပၢႆးပၺ်ၺႃတႆး လႄႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ တေၶဝ်ႈႁူမ်ႈပၢင်ယွင်ႈယေႃး ၶုၵ်းထူပ်း ယွၼ်းပွၼ်းၸုတ်ႇတဵၼ်းၸႆးထႅင်ႈလႄႈလႆႈၼတ်ႉၽတ်းၵၼ်ဝႆႉ တီႈလုမ်းၵေႃလိၵ်ႈလၢႆးၾိင်ႈငႄႈတႆး (ၵဵင်းမႆႇ) တင်ႈတႄႇၶၢဝ်းယၢမ်း 5 မူင်းႁူဝ်ၶမ်ႈသေတေဢွၼ်ၵၼ်ၵႂႃႇၶဝ်ႈႁူမ်ႈ ဢမ်ႇၼၼ် ၸိူဝ်းယူႇႁိမ်းၸမ် လႄႈသၢင်ႇတေႃႇတၢင်း သႃလႃးၵၢင် (လုမ်းၽွင်းငမ်းၸႄႈတွၼ်ႈ ၵဵင်းမႆႇ) ၼၼ်ႉ ၵႂႃႇပႂ်ႉထႃႈတီႈ သႃလႃးၵၢင် (လုမ်းၽွင်းငမ်းၸႄႈတွၼ်ႈ ၵဵင်းမႆႇ) ၼႆယဝ်ႉ။