ပၢင်ပွႆးၸဝ်ႈတူၼ်ၶူးလူင် ထမ်မသႃမိ ဢၼ်တႄႇမႃး မိူဝ်ႈဝၼ်းတီႈ 20/12/2014 တေႃႇထိုင်ဝၼ်းမိူဝ်ႈၼႆႉ 26/12/2014 မီးပီႈၼွင်ႉတၵ်ႉၵႃႇသတ်ႉထႃး တူဝ်ႈမိူင်းတႆး ပႃးၸဵမ်ၼွၵ်ႈမိူင်း ၶဝ်ႈႁူမ်ႈၵိုၼ်းၶွၼ်ႈၼမ်။

ၵူၺ်းၵႃႈ မိူဝ်ႈဝၼ်းတီႈ 24/12/2014 ၼၼ်ႉ မီးလွင်ႈဢမ်ႇထၢင်ႇ ဢမ်ႇမုင်ႈမွင်းသေ မီးၵူၼ်းမႃးၸႅၵ်ႇပၼ်ၽြႃး တီႈၸဝ်ႈသင်ၶလႄႈ ၵူၼ်းထဝ်ႈၼႂ်းပၢင်ပွႆး။ မီးၸဝ်ႈသင်ၶလႆႈဢဝ်မိူဝ်းသေ မီးလွင်ႈလၢၵ်ႇလၢႆးလႄႈ ယႃႉတူၺ်းတၢင်းၼႂ်း၊ ၽိူဝ်ႇယႃႉတူၺ်း သမ်ႉမီးပဵၼ်ႁၢင်ႈယိူဝ်ႇမႆႉလႄႈ မိူၼ်ၸွၵ်းထူင်သင်ဢမ်ႇႁူႉ၊ မီးဢၢႆမဵၼ်တူႇ။ လိူဝ်သေၼၼ်ႉၵေႃႈ မီးပႃးလိၵ်ႈတႅမ်ႈဝႆႉ သူၺ်ႇတိၵူင်ႇၸေႇတီႇပၢၼ်းပွင်း ဝႃႈၼင်ႇၼႆ။

ႁုၼ်ႇႁၢင်ႈၽြႃး ဢၼ်မႃးၸႅၵ်ႇၼႂ်းပၢင်ပွႆး

ၾၢင်ႁၢင်ႈၽြႃး ဢၼ်ၸႅၵ်ႇၼႂ်းပၢင်ပွႆးၼၼ်ႉ ဢဝ်ၵေႃႇႁဵတ်းသေတႃးသီၶမ်း၊ တၢင်းၼႂ်းပဵၼ်ၵူင်သေ သႂ်ႇဝႆႉယုၵ်းယၵ်း၊ လႆႈႁူႉဝႃႈ ၽြႃးဢၼ်ဢဝ်မႃးၸႅၵ်ႇပၼ် ၽူႈမႃးပွႆးၼၼ်ႉ မီး 700 သူႇ။ ၽူႈဢၼ်ပဵၼ်ၸဝ်ႈတႃႇၼၼၼ်ႉ ပဵၼ်ၵူၼ်းလူင်ၼႂ်းလူင်ပွင်ၸိုင်ႈမၢၼ်ႈၵေႃႉၼိုင်ႈ။ ၵူၺ်းၵႃႈ တူဝ်မၼ်းတႄႉဢမ်ႇမႃး၊ ပဵၼ်လုၵ်ႈၼွင်ႉမၼ်းမႃးၸႅၵ်ႇပၼ် ဝႃႈၼင်ႇၼႆ။

မႄႈထဝ်ႈၵေႃႉၼိုင်ႈ ဢႃႇယုလႆႈ 76 ပီ၊ ယူႇတီႈဝဵင်းလၢႆးၶႃႈ ဢၼ်လႆႈႁၼ်ၽြႃး ဢၼ်ပိူၼ်ႈမႃးၸႅၵ်ႇပၼ်ၼၼ်ႉ လၢတ်ႈဝႃႈ- ၼႂ်းၽြႃး ဢၼ်ယႃႉတူၺ်းၼၼ်ႉ မီးဢၢႆမဵၼ်ႁႅင်းၼႅၼ်ႇ၊ သုတ်ႇၼူမ်တူၺ်းဢၢႆမဵၼ်ၼၼ်ႉ ႁူဝ်ပေႃးမဝ်း- ဝႃႈၼႆ။

ႁုၼ်ႇႁၢင်ႈၽြႃး ဢၼ်မႃးၸႅၵ်ႇၼႂ်းပၢင်ပွႆး

ၵဵဝ်ႇလူၺ်ႈလွင်ႈၼႆႉ ၸဝ်ႈသင်ၶလၢႆတူၼ်လႄႈ ၵူၼ်းထဝ်ႈလၢႆၵေႃႉ လႆႈပၼ်တၢင်းႁၼ်ထိုင်ဝႃႈ- ၽြႃးဢၼ်ပိူၼ်ႈမႃးၸႅၵ်ႇပၼ်ၼႆႉ ထၢင်ႇဢမ်ႇၸႂ်ႈပဵၼ်လွင်ႈမင်ႇၵလႃႇလီ။ မိူဝ်ႈလဵဝ်ၼႆႉ ၽြႃးၼႆႉ ၸႅၵ်ႇၵႂႃႇယဝ်ႉမွၵ်ႈ 500 သူႇ၊ ၵိုတ်းဝႆႉမွၵ်ႈထႅင်ႈ 200 သူႇ ဢမ်ႇပႆႇလႆႈၸႅၵ်ႇ မီးယူႇတီႈဝတ်ႉႁူဝ်လွႆ- ဝႃႈၼႆ။

ၵဵဝ်ႇလူၺ်ႈလွင်ႈ ၽြႃးဢမ်ႇလီၼၼ်ႉ လႆႈႁူႉဝႃႈတီႈဝဵင်းလၢႆးၶႃႈ မီးမႃးယဝ်ႉလၢႆပွၵ်ႈ။ မိူဝ်ႈပူၼ်ႉမႃးဢမ်ႇႁိုင်ၼၼ်ႉ မီးၵူၼ်းဢဝ်ႁုၼ်ႇႁၢင်ႈၽြႃး မႃးၸႅၵ်ႇ လၢတ်ႈဝႃႈ- ပဵၼ်ၽြႃးလီ။ မီးသွင်ပူႇဢွၵ်ႇႁိူၼ်းၼိုင်ႈ တီႈပွၵ်ႉႁူဝ်ၼွင်လူင် ဝဵင်းလၢႆးၶႃႈ ၵႂႃႇယွၼ်းဢဝ်ၽြႃးဢၼ်ပိူၼ်ႈမႃးၸႅၵ်ႇ၊ လႆႈႁူႉဝႃႈသွင်ပူႇဢွၵ်ႇၼၼ်ႉ ဢမ်ႇယၢမ်ႈမေႃးမႄးၵၼ်သေပွၵ်ႈ၊ ၽိူဝ်ႇဝၢႆးၸႅၵ်ႇၽြႃးမႃးယဝ်ႉ သွင်ပူႇဢွၵ်ႇၼၼ်ႉၵေႃႈ ၵႆႉၽိတ်းမေႃးၵၼ်ၶိူဝ်းၶိူဝ်းယႂ်းယႂ်း- ဝႃႈၼႆ။

ၵူၼ်းၶဝ်ႈႁူမ်ႈပၢင်ပွႆးၵေႃႉၼိုင်ႈ