ပီတႆး 2109 ၼႆႉ လႆႈဝႃႈပဵၼ်ပီမုၼ်းႁိူင်းၶိုၵ်ႉၶၢႆး တႃႇၸိူဝ်ႉၸၢတ်ႈတႆး ပဵၼ်ပီတႆးႁၵ်ႉပႅင်းၶွၼ်ႈႁႅင်း လူင်ႉလႅင်း ႁူမ်ႈပွင်သၢင်ႈတႃႇၸိူဝ်ႉၶိူဝ်း၊ ပဵၼ်ပီတႆးတူင်ႉတိုၼ်ႇ ႁူမ်ႈၵၼ်ႁဵတ်းသၢင်ႈပၢင်ပွႆးယႂ်ႇ ၵိုၵ်းပိုၼ်း 3 ပၢင်- 1.ပွႆးပီမႂ်ႇတႆးတီႈတူၼ်ႈတီး။ 2.ပွႆးၶိုၼ်ႈႁေႃၶမ်းၶုၼ်သၢင်ႇတူၼ်ႈႁုင်း တဵမ် 100 ပီ တီႈသႅၼ်ဝီ။ 3.ပွႆးပီၵွၼ်းၶမ်း ဝၼ်းၵိူတ်ႇၸဝ်ႈၶူးလူင် တွၵ်ႊတိူဝ်ႊၶမ်းမၢႆ ထမ်မသႃမိ တီႈလၢႆးၶႃႈ။ ပၢင်ပွႆးယႂ်ႇ 3 ပွႆးၼႆႉ မီးတီႈပွင်ႇ မီးၼမ်ႉတွၼ်းၽွၼ်းလီ ႁႃတီႈဝႃႈ ဢမ်ႇမီး။

ၸၢႆးမူး- မေႃသွၼ်ႁူၺ်ႈၸွႆး

ဢွၼ်ၼႃႈၼႆႉ မိူဝ်ႈမွၵ်ႈၵၢင်ပီ ၽူႈတႅမ်ႈ လႆႈတူၵ်ႇလၢတ်ႈတိုၵ်းသူၼ်းဢူၺ်းၵေႃႉၵူၺ်းသေႈ ႁူမ်ႈပႃးၽူႈၸိူဝ်းမိုတ်ႈသူင်ၵႂၢမ်းၸၢႆးမူးလၢႆၵေႃႉ ၶႂ်ႈႁူမ်ႈႁႅင်းၵၼ် ၸတ်းပၢင်ပွႆးၶုၵ်းထူပ်း 20 ပီ ၸၢႆးမူး တီႈဝဵင်းမိူင်းပၼ်ႇ ႁႂ်ႈပဵၼ်တီႈမၢႆတွင်း လႄႈ ယုၵ်ႉယွင်ႈၸဝ်ႈပၢႆးမွၼ်း (ၸၢႆးမူး) ဢၼ်လႆႈႁဵတ်းၽွၼ်းလီ တႃႇၸိူဝ်ႉၸၢတ်ႈမႃး၊ လွင်ႈၼႆႉ လၢႆၵေႃႉလၢႆၸဝ်ႈႁၼ်လီၵမ်ႉထႅမ်ၵၼ်။ ၵူၺ်းၵႃႈ ၽိူဝ်ႇမႃးၼပ်ႉသွၼ်ႇတူၺ်းဝၼ်း/ၶၢဝ်းယၢမ်းမၼ်းသမ်ႉ ၶူပ်းမႅၼ်ႈဝၼ်းပၢင်ပွႆးယႂ်ႇပီၵွၼ်းၶမ်း ၸဝ်ႈၶူးၻွၵ်ႊတိူဝ်ႊၶမ်းမၢႆ ထမ်မသႃမိ တီႈဝဵင်းလၢႆးၶႃႈလႄႈ ၸင်ႇလႆႈၵိုတ်းဝႆႉလွင်ႈႁၢင်ႈႁႅၼ်း ၶပ်းၶိုင်ၼႆႉသေ ၶိုၼ်းၶႆႈၸႂ်ဝႃႈ တေၸတ်းႁူမ်ႈပွႆးပီၵွၼ်းၶမ်း ပရိယတ်ႉတိမိူင်းပၼ်ႇ ၼႂ်းလိူၼ်ႁူၵ်းမႂ်ႇၼႆႉ- ဝႃႈၼႆ။

ၸၢႆးမူး (မေႃသွၼ်ႁူၺ်ႈၸွႆး) ပဵၼ်ၵူၼ်းၸႃတိမိူင်းပၼ်ႇ၊ ပဵၼ်လုၵ်ႈလုင်းၸၢႆး (လူႉယဝ်ႉ) လႄႈ ပႃႈဢူင်းၺုၼ်ႉ (မိူဝ်ႈလဵဝ်ဢႃယု 83 ပီ ယူႇမိူင်းပၼ်ႇ)၊ ၸၢႆးမူးၵိူတ်ႇမိူဝ်ႈ 15/01/1960 ၊ တႄႇၼႃႈႁိူၼ်း ႁူမ်ႈၵၼ်တင်းၼၢင်းပႅင်း (လူႉမိူဝ်ႈ 20/10/2014) မီးလုၵ်ႈလၢင်းႁူမ်ႈၵၼ် 3 ၵေႃႉ 1. ၼၢင်းၸၢမ်ၶမ်း၊ 2.ၸၢႆးၸိူင်းမႂ်ႇ၊ 3.ၼၢင်းသႅင်ဢိုၼ်းမိူင်း။ ဝၢႆးယဝ်ႉႁူင်းႁဵၼ်းၸၼ်ႉသုင်ႁူင်းမုၼ်းလႅင်း တီႈၸႄႈၵႅင်း တႄႇပီ 1979-1994 (တေႃႇပေႃးလူႉၶွႆႈ) ၸၢႆးမူး ၸွႆႈႁၢပ်ႇၵၢၼ်ၸိူဝ်ႉၸၢတ်ႈ ပဵၼ်မေႃသွၼ်၊ တႅမ်ႈလိၵ်ႈ၊ တႅမ်ႈၵႂၢမ်း၊ ႁွင်ႉၵႂၢမ်းပူၵ်းတိုၼ်ႇၸႂ်ႁၵ်ႉၸၢတ်ႈ၊ ႁၢပ်ႇၵၢၼ်လုၵ်ႉၽိုၼ်ႉပၢၼ်သိုၵ်း SURA, TRA, MTA ၊ ပဵၼ်ၽူႈႁူမ်ႈၵေႃႇတင်ႈၸုမ်းၸိူင်းလႅဝ်း Freedom’s Way band ႁူမ်ႈၵၼ်တင်း သၶႁ လႄႈၸၢႆးၶုၼ်သိူဝ် မိူဝ်ႈပီ 1984 ။

ၸၢႆးမူး ၸၢႆးသၼ်လွႆ လႄႈ သၶႁ

မိူဝ်ႈဝၼ်းထီႉ 22/09/2014 ၽူႈတႅမ်ႈလႆႈႁူပ်ႉဢုပ်ႇမႄႈၸၢႆးမူး (မႄႈထဝ်ႈဢူင်းၺုၼ်ႉ) မိူဝ်ႈလဵဝ် ဢႃယု 83 ပီ တီႈဝဵင်းမိူင်းပၼ်ႇ၊ ဢုပ်ႇၶႆႈလွင်ႈၸၢႆးမူး၊ မႄႈထဝ်ႈၶႆႈၼႄဝႃႈ ၸၢႆးမူး ပဵၼ်ၵူၼ်းလၢၵ်ႇလၢႆးၸဵမ်လဵၵ်ႉ၊ မိူဝ်ႈၵိူတ်ႇၵေႃႈမီးသၢႆႁူၵ်ႉႁႄႇၶဵၼ်းၶေႃးသေဢွၵ်ႇမႃး၊ မိူဝ်ႈလဵၵ်ႉဢွၼ်ႇ ၵႆႉၵႆႉဢမ်ႇယူႇလီလႄႈ လႆႈမွပ်ႈပၼ်မိတ်ႉသူၺ်ႇပီႈၼွင်ႉယဝ်ႉ ၵႂႃႇသိုဝ်ႉဢဝ်ၶိုၼ်းငိုၼ်း 1 မူး ၸင်ႇသႂ်ႇၸိုဝ်ႈဢၢႆႈမူး၊ ဝၢႆးယႂ်ႇမႃးႁဵတ်းဝႂ်ၵပ်းတူဝ် (မၢတ်ႈပူင်ႇတိၼ်ႇ) သႂ်ႇၸိုဝ်ႈမႂ်ႇ ပဵၼ်ၸၢႆးတၢၼ်းၽေႇလေး၊ ဝၢႆးၵႂႃႇႁဵတ်းမေႃသွၼ်တီႈဝၢၼ်ႈႁူၺ်ႈၸွႆး သႂ်ႇၸိုဝ်ႈႁွင်ႉမေႃသွၼ်ႁူၺ်ႈၸွႆး၊ တႄႇၸဵမ်မိူဝ်ႈလဵၵ်ႉ ၸၢႆးမူး သူင်လွင်ႈတွႆႇတိင်ႇႁွင်ႉၵႂၢမ်း၊ သူင်လွင်ႈလဵပ်ႈႁဵၼ်းလၢႆးၵႃႈလၢႆး၊ ၵၢင်ၶမ်ႈၵၢင်ၶိုၼ်း ၵုမ်ႇမိုင်ႉတွႆႇတိင်ႇႁွင်ႉၵႂၢမ်း မၢင်ပွၵ်ႈမႄႈၵႆႉပွင်ႉလႃႇမၼ်း “မႂ်းတေၵိၼ်ယွၼ်ႉတိင်ႇမႂ်းယဝ်ႉၼႄႇ- မႂ်းၵုမ်ႇတွႆႇတိင်ႇမႂ်းတေလႆႈၵိၼ်ၼႄႇ” ႁဵတ်းၵႂႃႇႁဵတ်းမႃးသမ်ႉမီးၸိုဝ်ႈသဵင်ယႂ်ႇ လႆႈၵိၼ်ယွၼ်ႉၵၢၼ်တွႆႇတိင်ႇၼင်ႇၵဝ်ႇ။

ၸၢႆးမူး လပ်းလူႉၶွႆႈၵႂႃႇမိူဝ်ႈ 26/12/1994 (ဢမ်ႇၸႂ်ႈ 1995 ပီ ၸွမ်းၼင်ႇၼႂ်းၵႂၢမ်းၸၢႆးလၢဝ်သႂ်တႅမ်ႈႁွင်ႉ) တီႈဢွင်ႈႁိူၼ်းၵဝ်ႇ တီႈဝၢၼ်ႈလၵ်းတႅင်ႇ လႅၼ်လိၼ်ထႆး-တႆး၊ ဢိူင်ႇပဵင်းလူင်၊ တူင်ႇဝဵင်းဝဵင်းႁႅင်၊ ၸႄႈတွၼ်ႈၵဵင်းမႆႇ၊ ၽွင်းဢႃယုလႆႈ 35 ပီ၊ ၶုမ်ၵုတ်း (ဢူးမၢင်ႇ) ၸၢႆးမူး မီးယူႇတီႈၵွင်းသၼ်လွႆ ၾၢႆႇဢွၵ်ႇဝၢၼ်ႈလၵ်းတႅင်ႇ၊ မီးဝႆႉၸွမ်းၵၼ်တင်းၶုမ်ၵုတ်း ၸၢႆးသၼ်လွႆ လႄႈ သၶႁ ။ လၢႆပီပူၼ်ႉမႃး ၽူႈတႅမ်ႈၵႆႉလႆႈၶဝ်ႈႁူမ်ႈပၢင်လူႇတၢၼ်း ၶုၵ်းထူပ်းၸၢႆးမူး - ၸၢႆးသၼ်လွႆ တီႈၶုမ်ၵုတ်းၶဝ်ၸဝ်ႈ၊ ၼႂ်းသွင်ပီ (ပီၵၢႆလႄႈပီၼႆႉ) ဢမ်ႇလႆႈၶဝ်ႈႁူမ်ႈ ၵွပ်ႈဢိင်ၼိူဝ်ၼႃႈၵၢၼ်ပုၼ်ႈၽွၼ်းတူၵ်းယူႇ ၼႂ်းမိူင်း။

ၶုမ်ၵုတ်း ၸၢႆးမူး ၸၢႆးသၼ်လွႆ လႄႈ သၶႁ

ၼႂ်းတိုဝ်ႉတၢင်းၼႆႉ ဢဝ်ၵုၼ်းမုၼ်ၸၢႆးမူး ၵူၼ်းၵိုၵ်းပိုၼ်း တူဝ်တၢႆၸိုဝ်ႈဢမ်ႇႁၢႆသေ ယူႇတီႈပွႆးပီၵွၼ်းၶမ်း ၸဝ်ႈၶူးထမ်မသႃမိ တီႈဝဵင်းလၢႆးၶႃႈ ၼွမ်းတူဝ်ၶုၵ်းထူပ်းၼပ်ႉယမ် ယွၼ်းသူးႁႂ်ႈၶႂၼ်ငဝ်း ၸၢႆးမူး ဢိၵ်ႇၶႂၼ်ငဝ်း ၽူႈႁၵ်ႉၸၢတ်ႈတႆးတင်းလၢႆ ႁွတ်ႈထိုင်တီႈသုၶၵတ်းယဵၼ် လႄႈ ယွၼ်းႁႂ်ႈပီတႆး 2109 (ပီပႄႉ) ပဵၼ်ပီတႄႇပူၵ်းၶိုၼ်းငဝ်းမုၼ်းႁိူင်းတႆး မီးမင်ၵလလီ၊ မီးတိုဝ်ႉတၢင်းငဝ်းလၢႆးလီသိုပ်ႇၵႂႃႇသေၵမ်း။

ဢၢၼ်းတႆး ၶႆးၶၢၼ်ႇၾႃႉ
26/12/2014 (ဝဵင်းလၢႆးၶႃႈ)