ပီႈၼွင်ႉ ၸဝ်ႈၽူႈၵူၼ်းလီ ဝဵင်းမူႇၸေႈ ႁႃတၢင်းလီ ၼႃးမုၼ် ဢွၵ်ႇၶၢဝ်းတၢင်း ပိူဝ်ႈတႃႇၶဝ်ႈႁူမ်ႈ ႁွမ်းတၢၼ်း ပၢင်ပွႆးၸဝ်ႈတူၼ်ၶူးလူင် ထမ်မသႃမိ တီႈဝဵင်းလၢႆးၶႃႈ၊ ထူပ်းၺႃးၽေးဢုပၢတ်ႈ လူတ်ႉၵႃးပိၼ်ႈၸွမ်းတၢင်း၊ လူႉသဵင်ႈသုတ်းမုၼ်ၵႂႃႇ 3 ၵေႃႉ။

မိူဝ်ႈဝၼ်းတီႈ 23/12/2014 ယၢမ်းၵၢင်ၶမ်ႈ ၼႂ်းၵႄႈ 7-8 မူင်း၊ ပီႈၼွင်ႉဝဵင်းမူႇၸေႈ ၸိုင်ႈတႆးပွတ်းႁွင်ႇ ဢွၵ်ႇၶၢဝ်းတၢင်းၶီႇလူတ်ႉၵႃး ပိူဝ်ႈတႃႇ မႃးၶဝ်ႈႁူမ်ႈပၢင်ပွႆး ဝၼ်းၵိူတ်ႇၶွပ်ႈၶူပ်ႇ 50 (ပီၵွၼ်းၶမ်း) ၸဝ်ႈတူၼ်ၶူးလူင် ထမ်မသႃမိ တီႈဝဵင်းလၢႆးၶႃႈ၊ မႃးထူပ်းၽေးဢုပၢတ်ႈ ၵႃးပိၼ်ႈပွတ်းတၢင်း ႁိမ်းၶူဝ်မႂ်ႇ ၼႂ်းၵႄႈၵၢင်မိူင်းၵိုင် တင်း လၢႆးၶႃႈ။ လႆႈႁူႉဝႃႈ ၽူႈဢွၵ်ႇၶၢဝ်းတၢင်း လႆႈလူႉသဵင်ႈမုၼ်ၵႂႃႇထင်တီႈ 2 ၵေႃႉ၊ ထႅင်ႈၵေႃႉၼိုင်ႈ ဝၢတ်ႇၸဵပ်းလိူဝ်ႁႅင်းသေ ၵႂႃႇလူႉသဵင်ႈထႅင်ႈ တီႈႁူင်းယႃဝဵင်းမိူင်းၵိုင်၊ ႁူမ်ႈလႆႈလူႉသဵင်ႈၵႂႃႇ 3 ၵေႃႉ- ၼႆယဝ်ႉ။

လူတ်ႉၵႃး ဢၼ်ၵိူတ်ႇၽေးဢုပၢတ်ႈပွၵ်ႈၼႆႉ မၢႆပၢႆႉလူတ်ႉ 9A6893 သႅၼ်း မၢၵ်ႊထူႊ။ ၵူၼ်းၶီႇၵႃးမႃးတင်းမူတ်းမီး 6 ၵေႃႉ ပႃးၵူၼ်းႁေႃႈၵႃး၊ ၸၢႆး 1 ၵေႃႉ ၼၢင်းယိင်း 5 ၵေႃႉ။ မိူဝ်ႈလဵဝ် ၵူၼ်းဝၢတ်ႇၸဵပ်းထႅင်ႈ 3 ၵေႃႉၼၼ်ႉ တိုၵ်းၶဝ်ႈႁူင်းယႃဝႆႉယူႇတီႈမိူင်းၵိုင်- ၼႆယဝ်ႉ။

ၸိုဝ်ႈသဵင်ၽူႈၵေႃႉၸိူဝ်းလူႉသဵင်ႈမုၼ်ၵႂႃႇၼၼ်ႉ 1.ပႃႈထွၼ်း ဢႃႇယု 55 ပီ။ 2.ပႃႈဢွၼ်ႇၶမ်းၸိင်ႇ ဢႃႇယု 69 ပီ။ 3.ပႃႈဢေးၸိင်ႇ ဢႃႇယု 58 ပီ။ ပႃႈဢေးၸိင်ႇၼႆႉ ပဵၼ်ၸဝ်ႈလူတ်ႉၵႃး၊ ပဵၼ်မႄႈၵူၼ်းႁေႃႈလူတ်ႉၵႃး  (ၸိုဝ်ႈၸၢႆးၵျေႃႇၵျေႃႇမူဝ်း) လႄႈ  ပဵၼ်ၵေႃႉဢၼ်မႃးလူႉသဵင်ႈမုၼ်ၵႂႃႇတီႈ ႁူင်းယႃမိူင်းၵိုင်။ မိူဝ်လဵဝ် ၵူၼ်းႁေႃႈၵႃး ၸၢႆးၵျေႃႇၵျေႃႇမူဝ်း ဢိၵ်ႇၵူၼ်းဝၢတ်ႇၸဵပ်းထႅင်ႈ 2 ၵေႃႉ တိုၵ်ႉၶဝ်ႈႁူင်းယႃဝႆႉ တီႈမိူင်းၵိုင်၊ ၸၢႆးၵျေႃႇၵျေႃႇမူဝ်းၼႆႉ ၸဵပ်းဝႆႉတီႈၼႃႈဢူၵ်း- ၼႆယဝ်ႉ။

လွင်ႈတၢင်းဢၼ်လူတ်ႉၵႃးပိၼ်ႈၼႆႉ မၢင်ၵေႃႉလၢတ်ႈဝႃႈ- ႁၢမ်ႈလေႃႉ (ပရဵၵ်ႊ) မၼ်းၵွႆ။ မၢင်ၵေႃႉလၢမ်းၶၢတ်ႈဝႃႈ- ဢၼ်ၵႃးပိၼ်ႈၼႆႉ ယွၼ်ႉပိူဝ်ႈၶဝ်ႁဵတ်းၶူဝ်မႂ်ႇ သမ်ႉဢမ်ႇၼႄပၢႆႉလိၵ်ႈသဵၼ်ႈတၢင်း၊ ၼႄၵေႃႈပဵၼ်ပၢႆႉဢၼ်လဵၵ်ႉလဵၵ်ႉၵူၺ်း။ ၵမ်ႈၽွင်ႈၵေႃႈဝႃႈ ဢမ်ႇမီးၾႆးၼႄပၼ်ၵေႃႈ ၸၢင်ႈပဵၼ်လႆႈ။ မၢင်ၵေႃႉဝႃႈ- လူတ်ႉၵႃးဢၼ်လုၵ်ႉတၢင်းလၢႆးၶႃႈၵႂႃႇ ပိုတ်ႇၾႆးၵႃးသုင်လႄႈ ႁဵတ်းႁႂ်ႈၵူၼ်းႁေႃႈၵႃးဢမ်ႇႁၼ်တႃ ၼႆၵေႃႈမီး။