သိုၵ်းမၢၼ်ႈတီႈတႃႈၽႃသွင်ႇတႅမ်ႈလိၵ်ႈ ႁႂ်ႈသိုၵ်းတႆး ထွၼ်ဢွၵ်ႇ
သိုၵ်းမၢၼ်ႈဢၼ်ပၵ်းတီႈတႃႈၽႃသွင်ႇ တႅမ်ႈလိၵ်ႈပၼ် ၵူၼ်းဝၢၼ်ႈလူင်းလၢႆးမိုဝ်း၊
ၸႂ်ႉႁႂ်ႈသိုၵ်းတႆးထွၼ်ဢွၵ်ႇ၊ လၢတ်ႈဝႃႈ ၵူၼ်းဝၢၼ်ႈ ဢမ်ႇႁပ်ႉသိုၵ်းတႆး၊
ၵွပ်ႈပဵၼ်လွင်ႈၵိတ်ႇၶႂၢင် ႁဵတ်းႁႂ်ႈၵူၼ်းဝၢၼ်ႈ ႁႃၵိၼ်လဵင်ႉတွင်ႉယၢပ်ႇ။
သိုၵ်းမၢၼ်ႈဢွၵ်ႇၶၢဝ်းတၢင်းတီႈၼိုင်ႈ |
ဝၼ်းတီႈ 29¬/09/2014
ၼႆႉသိုၵ်းမၢၼ်ႈဢၼ်မႃးပၵ်း တီႈတႃႈၽႃသွင်ႇၸႄႈဝဵင်းၵေးသီး
ၸိုင်ႈတႆးပွတ်းၸၢၼ်း၊ တႅမ်ႈလိၵ်ႈပၼ်ၵူၼ်းဝၢၼ်ႈ ဝၢၼ်ႈတိုင်းတႅၵ်ႇ၊
ဝၢၼ်ႈၼွင်ႁိူဝ်းၸိူဝ်းၼႆႉ ႁႂ်ႈၵူၼ်းဝၢၼ်ႈလူင်းလၢႆးမိုဝ်းသၢၼ်ၶတ်းလွင်ႈ တပ်ႉ
သိုၵ်းၸိုင်ႈတႆး (SSPP/SSA) ပၵ်းယူႇတီႈတီႈတႃႈၽႃသွင်ႇ။
ၼႂ်းလိၵ်ႈတႅမ်ႈဝႃႈ-
တီႈတႃႈၽႃသွင်ႇၸိူဝ်းၼႆႉ SSA ဝၢၼ်ႈႁႆးၶဝ်ႈမႃးယူႇမိူဝ်ႈဝၼ်းတီႈ 27/08/2014
ၼႆႉၵူၺ်း၊ ဢမ်ႇၸႂ်ႈယူႇမႃးၸဵမ်လႂ်။ ၵွပ်ႈၼၼ် ၵူၼ်းဝၢၼ်ႈၵူၼ်းသူၼ်
ဢမ်ႇႁပ်ႉသိုၵ်းတႆးမႃးပၵ်းယူႇတီႈၼႆႈ၊ မၼ်းပဵၼ်ဢၼ်
ၵိတ်ႇၶႂၢင်ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် ႁဵတ်းႁႃၵိၼ်လဵင်ႉတွင်ႉယၢပ်ႇ၊
ၵွပ်ႈၼၼ်ဢမ်ႇႁပ်ႉလႆႈ၊ ႁႂ်ႈ SSA ဝၢၼ်ႈႁႆးထွၼ် ဢွၵ်ႇပၼ်-ဝႃႈၼႆ။
သိုၵ်းမၢၼ်ႈတႅမ်ႈလိၵ်ႈၼႆႉဢမ်ႇသႂ်ႇၸိုဝ်ႈတပ်ႉ၊
တႅမ်ႈပၼ်ၵူၼ်းဝၢၼ်ႈသေ ၸႂ်ႉၵူၼ်းဝၢၼ်ႈလူင်းလၢႆးမိုဝ်း။ လိၵ်ႈၽိုၼ်ၼႆႉ
မၼ်းသၢၼ်ၶတ်းလွင်ႈဢၼ်ပဵၼ်တႄႉမီးတႄႉ၊ ၵွပ်ႈၼၼ်ၵူၼ်းဝၢၼ်ႈၵူၼ်းသူၼ်ၵေႃႈ
ဢမ်ႇယွမ်းလူင်းလၢႆးမိုဝ်း။ လိၵ်ႈၼႆႉပဵၼ်သိုၵ်းမၢၼ်ႈတႅမ်ႈပၼ်ၵူၺ်း၊
ဢမ်ႇၸႂ်ႈၵၢင်ၸႂ်ႁဝ်းၶႃႈၵူၼ်းဝၢၼ်ႈၵူၼ်းမိူင်းတႅမ်ႈ၊ မၼ်းပဵၼ်လၢႆးလႅၼ်
ၶွင်သိုၵ်းမၢၼ်ႈၵူၼ်း- ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄၼင်ႇၼႆ။
ၵူၼ်းၼႂ်းပိုၼ်ႉတီႈသိုပ်ႇလၢတ်ႈဝႃႈ -
ၵူၼ်းဝၢၼ်ႈတုၵ်းယွၼ်းႁႂ်ႈသိုၵ်းမၢၼ်ႈထွၼ်ဢွၵ်ႇပၼ်
မီးၶၢဝ်းတၢင်းလိူၼ်ပၢႆယဝ်ႉ၊ မိူဝ်ႈလဵဝ်သိုၵ်းမၢၼ်ႈ
ဢမ်ႇထွၼ်ဢွၵ်ႇပၼ်ၵူၺ်းပႆႇပေႃး သမ်ႉတႅမ်ႈလိၵ်ႈပၼ်ၵူၼ်းဝၢၼ်ႈ
ႁႂ်ႈၵူၼ်းဝၢၼ်ႈလူင်းလၢႆးမိုဝ်း ဝႃႈဢမ်ႇႁပ်ႉသိုၵ်းတႆး။
ၾၢႆႇၼိုင်ႈၵေႃႈသိုၵ်းမၢၼ်ႈၼႆႉႁႅင်းသိုၵ်း ဢၼ်ၶဝ်ႈမႃးမႂ်ႇၵေႃႈမီးထႅင်ႈ၊
သိုၵ်းမၢၼ်ႈဢၼ်ယူႇ ႁိမ်းႁွမ်းတႃႈၽႃသွင်ႇၵေႃႈလိူင်း၊ ဝူတ်ႈၽႃႈတူင်ႇ/
ထွတ်ႇၵူၼ်ၶဝ်ၼႄၵူၼ်းဝၢၼ်ႈ ၵူၼ်းသူၼ်၊ တင်ႈၸႂ်ယဵဝ်ႈတေႃႇၼႃႈ
ၽူႈယိင်းၸိူဝ်းၼႆႉ။ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ်
ၸိူဝ်းပွၵ်ႈမိူဝ်းယူႇတီႈႁိူၼ်းၶိုၼ်းၵမ်ႈၽွင်ႈ ၵႂႃႇမႃးယူႇၵိၼ်ယၢပ်ႇ- ဝႃႈၼႆ။
ပူၼ်ႉမႃးၽွင်းႁၢင်လိူၼ်ဢေႃႊၵတ်ႊသ်
(2014) ၼႂ်းလိၵ်ႈပိုၼ်ၽၢဝ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF)
လၢတ်ႈဝႃႈ- ဝၼ်းထီႉ 26/08/2014 ၵူၼ်းပၢႆႈၽေး မွၵ်ႈ 300 ပၢႆ
လႆႈယိုၼ်ႈလိၵ်ႈတုၵ်းယွၼ်းထိုင်တီႈ လူင်ပွင်ၸိုင်ႈ တဵင်းၸဵင်ႇ
ႁႂ်ႈသိုၵ်းမၢၼ်ႈ ထွၼ်ဢွၵ်ႇတီႈ ဝၢၼ်ႈၽႃသွင်ႇ၊ ၸႄႈဝဵင်းၵေးသီး လႄႈ
တုၵ်းယွၼ်းပႃး လွင်ႈသၢႆႈတႅၼ်း ၵႃႈႁိူၼ်းၶဝ်လုလႅဝ် ဢိၵ်ႇ
ၶူဝ်းသူၼ်ၶူဝ်းႁိူၵ်ႈ ၼႂ်းၶၢဝ်းတၢင်း သွင်လိူၼ်ပူၼ်ႉမႃး။
လၢတ်ႈဝႃႈ- မိူဝ်ႈဝၼ်းတီႈ 26/06/2014
သိုၵ်းမၢၼ်ႈ ယိုတ်းဢဝ်တီႈလိၼ်/ ႁိူၼ်းၵူၼ်းမိူင်း၊ ဢဝ်ၵွင်ႈလူင်ယိုဝ်းသႂ်ႇ
ၼႂ်းဝၢၼ်ႈ ၽႃသွင်ႇ၊ ႁဵတ်းႁႂ်ႈၵူၼ်းဝၢၼ်ႈ ၵူဝ်ႁႄ
ပၢႆႈၵႂႃႇသဝ်းပိုင်ႈဝၢၼ်ႈႁိမ်းႁွမ်း တီႈဝၢၼ်ႈဝၢပ်ႈ မွၵ်ႈ 300 ပၢႆ။
တပ်ႉသိုၵ်းမၢၼ်ႈၵေႃႈ မႃးပၵ်းသဝ်းထင်ယူႇဝႆႉၼႂ်း ဝၢၼ်ႈၽႃသွင်ႇလႄႈ
ႁိမ်းႁွမ်းဝၢၼ်ႈၽႃသွင်ႇ ဢဵၼ်ႁႅင်းမွၵ်ႈ 500 ပၢႆ ယႃႉတဝ်ဢဝ်
ၶူဝ်းႁိူၼ်းၶူဝ်းယေး မၢၵ်ႇတဝ်ႈၶဝ်ႈၼမ်ႉၵူၼ်းဝၢၼ်ႈၸိူဝ်းၼႆႉ - ၼႆယဝ်ႉ။
Tags: Military, News