ပႃႇတီႇမႂ်ႇသုင်ၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ လွင်ႈၽေးယႃႈမဝ်းၵမ်
ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ ၵႅတ်ႇၶႄႁႄႉၵင်ႈ
ၽေးယႃႈမဝ်းၵမ်။ ၽူႈၵဵဝ်ႇၶွင်ႈယႃႈ တေထုၵ်ႇဢဝ်လိူင်ႈ၊ ယူႇတီႈ SSPP/SSA
တေႁူမ်ႈမိုဝ်းၵူႈၾၢႆႇ ၽဵဝ်ႈယႃႈမဝ်းၵမ်ၵႂႃႇ။
မိူဝ်ႈဝၼ်းတီႈ 25/09/2014 ဝႃႈ-
ၶွမ်ႊမတီႊငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး
(SSPP/SSA) ဢွၵ်ႇၶေႃႈပိုၼ်ၽၢဝ်ႇ ဝႃႈ- ယႃႈမဝ်းၵမ်ၼႆႉ ပဵၼ်ၶဵၼ်တေႃႇ
ၵူၼ်းႁဝ်း၊ ၵူႈၸိူဝ်ႉၸၢတ်ႈၸၢဝ်းၶိူဝ်း တင်းလၢႆ၊ ၸၢင်ႈႁဵတ်းႁႂ်ႈ
ၸိူဝ်ႉမူင်ႈမႅင်း (HIV/AIDS) ၽႄႈတိူၼ်းတေႃႇၶိူဝ်းၵူၼ်းႁဝ်း/ ၵူၼ်းၼုမ်ႇ
ၼေႃႇတႅၼ်းၶိူဝ်းႁဝ်း/ ယႃႉၼႃႈႁိူၼ်းၵူၼ်းမိူင်းႁဝ်း။
ၵွပ်ႈၼႆ ယူႇတီႈငဝ်ႈငုၼ်းမီးၽႅၼ်ၵၢၼ်
ၶိုၵ်ႉတွၼ်း တေၵူတ်ႇထတ်း ႁႅတ်ႉႁၢမ်ႈ ၵႅတ်ႇၶႄႁႄႉၵင်ႈၵႂႃႇ။ တေႁူမ်ႈႁွမ်း
သၢၼ်မိုဝ်းတင်း ႁွင်ႈၵၢၼ်ၵဵဝ်ႇၶွင်ႈလႄႈ ပေႃႈမႄႈၵူၼ်းမိူင်းတင်းသဵင်ႈသေ
တိုၵ်းတေႃးၵႅတ်ႇၶႄ ႁႄႉၵင်ႈ။ ၼင်ႇႁိုဝ်ၸၢဝ်းၶိူဝ်းတႆးလႄႈ ၵူၼ်းယူႇသဝ်း
ၼႂ်းမိူင်းတႆးတင်းသဵင်ႈ ပေႃးတေႁၢင်ႇယၢၼ် ယႃႈမဝ်းၵမ်ၼၼ်ႉ
တေတိုၵ်းတေႃးၵႅတ်ႇၶႄႁႄႉၵင်ႈ။ ၸုမ်း/ လူင်ပွင်ၸိုင်ႈၸိူဝ်းလႂ်ဢမ်ႇဝႃႈ
ဢၼ်ၵႅတ်ႇၶႄႁႄႉ ၽေးယႃႈမဝ်းၵမ်ယူႇၼၼ်ႉ ၵႃႈၼင်ႇပဵၼ်လႆႈ
တေႁူမ်ႈႁွမ်းၵႅတ်ႇၶႄႁႄႉၵင်ႈၵႂႃႇ။
ယႃႈမဝ်းၵမ်ၼႆႉ ၵွပ်ႈပဵၼ်ၽေးၶဵၼ်တေႃႇ
ၸိူဝ်ႉၸၢတ်ႈၶိူဝ်းၵူၼ်းတင်းလၢႆ ၼႂ်းမိူင်းၸိုင်ႈတႆးၵူၺ်းပႆႇပေႃး၊
ပဵၼ်ၶဵၼ်တေႃႇၸိုင်ႈမိူင်းလုမ်ႈၾႃႉလႄႈ ၽူႈလႂ်ၽႂ်သေဢမ်ႇဝႃႈ ၸိူဝ်းသူႇ/ သမ်း/
ၵိၼ်/ ၶၢႆ ၵဵဝ်ႇၶွင်ႈ ယႃႈမဝ်းၵမ်ၼၼ်ႉ တေလႆႈထုၵ်ႇတၢင်းဢဝ်လိူင်ႈ ၼၵ်းၼႃ။
ၽူႈလႂ်ၽႂ်သေဢမ်ႇဝႃႈ ပေႃးႁူႉႁၼ်ၽူႈၸိူဝ်းသူႇ/ သမ်း/ ၵိၼ်/ ၶၢႆ
ၵဵဝ်ႇၶွင်ႈယႃႈမဝ်းၵမ်ယူႇသေ ႁူမ်ႇတူမ်းဝႆႉ ဢမ်ႇပွင်ႇၶၢဝ်ႇထိုင်တီႈ
ၾၢႆႇၵဵဝ်ႇၶွင်ႈ ၾၢႆႇၵႅတ်ႇၶႄႁႄႉႁၢမ်ႈယႃႈမဝ်းၵမ်ၸိုင် ပေႃးႁူႉႁၼ်
တေလႆႈထုၵ်ႇဢဝ်လိူင်ႈ ၸွမ်းမၢႆမီႈဢမ်ႇႁၢင်ႉ- ၼႆယဝ်ႉ။
Tags: Drug, News