ၵူၼ်းၼုမ်ႇမိူင်းတႆး ၶိုၼ်ႈလွႆသၢမ်သိပ်း ၼပ်ႉႁူဝ်ပၢၵ်ႇ



ၵူၼ်းၼုမ်ႇတႆး ၸိုင်ႈတႆးပွတ်းႁွင်ႇ လၢႆလၢႆၸႄႈဝဵင်း တင်းမူတ်းႁူၵ်းပၢၵ်ႇပၢႆ ႁူမ်ႈၵၼ်ပႆၶိုၼ်ႈ လွႆသၢမ်သိပ်း ပူၵ်းတုင်း ၸၢတ်ႈတႆး၊ မွၵ်ႇလၢတ်ႈငဝ်းလၢႆးၸိုင်ႈတႆး။ ယိူင်းဢၢၼ်း ႁႂ်ႈၵူၼ်းၼုမ်ႇ လႆႈဢွၵ်ႇဢဵၼ်ႁႅင်း ႁၢင်ႇၵႆယႃႈမဝ်းၵမ်။


Photo: Sai Zin Min Aye Facebook
ၵူၼ်းၼုမ်ႇၼႂ်း 13 ၸႄႈဝဵင်း  ၸိုင်ႈတႆးပွတ်းႁွင်ႇ တင်းမူတ်း 600 ၵေႃႉပၢႆ ႁူပ်ႉထူပ်းၶွၼ်ႈတုမ်ၵၼ်သေ ဝၼ်းတီႈ 27/09/2014  ႁူမ်ႈၵၼ်ပႆၶိုၼ်ႈလွႆသၢမ်သိပ်း လုၵ်ႈဢၼ်သုင်သုတ်း ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ မီးၵၢၼ်ႁူမ်ႈၵၼ်ပူၵ်း/တၢင်ႇတုင်းၸၢတ်ႈတႆး ၼိူဝ်ၸိၵ်းလွႆသေ ဢုပ်ႇလၢတ်ႈလွင်ႈ ယၢမ်းလဵဝ် မိူင်းတႆးႁဝ်းပဵၼ်သင်ယူႇ ၸိူဝ်းၼႆႉ။ လွႆသၢမ်သိပ်းၼႆႉ ၵွပ်ႈၸမ်တၢင်းလူင်လႄႈ ၶိုၼ်ႈမိူဝ်ႈၸဝ်ႉ သေ လူင်းၶိုၼ်းၼႂ်းဝၼ်းၼၼ်ႉ။

ၵဵဝ်ႇၵပ်းလွင်ႈပႆၶိုၼ်ႈ လွႆသၢမ်သိပ်းၼႆႉ ဢၢၼ်းၶိုၼ်ႈၸဵမ်မိူဝ်ႈ ဝၼ်းတီႈ 21/09/2014 ဢၼ်ပဵၼ်ဝၼ်း လွင်ႈငမ်းယဵၼ် လုမ်ႈၾႃႉ၊ ပိူဝ်ႈတႃႇမၢႆတွင်း လွင်ႈငမ်းယဵၼ်လုမ်ႈၾႃႉ၊ ပိူဝ်ႈတႃႇယွၼ်းသူးႁႂ်ႈၸိုင်ႈတႆး ၵတ်းယဵၼ်။ ၵူၺ်းၵႃႈ ၵူၼ်းၼုမ်ႇ ၵမ်ႈၼမ် သမ်ႉပဵၼ်လုၵ်ႈႁဵၼ်းၸၼ်ႉၸွမ်လႄႈ ၽွင်းၼၼ်ႉ သမ်ႉမီးပၢင်တွပ်ႇလိၵ်ႈ၊ ၵွပ်ႈၼၼ် ၸင်ႇတေၶိုၼ်ႈ ဝၼ်းတီႈ 27 တႅၼ်း- ၼႆယဝ်ႉ။

Photo: Sai Zin Min Aye Facebook
ၸၢႆးသႅင်မိူင်း ၽူႈၶၢၼ်ပၢၵ်ႇ ၵေႃႁူမ်ႈသၢင်ႈၵူၼ်းၼုမ်ႇတႆး (Tai Youth Network) ၵေႃႈလၢတ်ႈဝႃႈ- ယိူင်းဢၢၼ်းတႄႉ မိူဝ်ႈဢၼ်ၵႂႃႇၶိုၼ်ႈလွႆလဵင်းၼၼ်ႉ ယွၼ်ႉပိူဝ်ႈပဵၼ်လွႆသုင်သုတ်း ၼႂ်းမိူင်းတႆး၊ ဢၼ်ၵႂႃႇၶိုၼ်ႈၵမ်းတီႈ 2 တီႈလွႆၶိူဝ်းၼႆႉ သမ်ႉပဵၼ်လွႆဢၼ်ၵိုၵ်းပိုၼ်းၵၢၼ်လုၵ်ႉၽိုၼ်ႉ ၸိုင်ႈတႆး၊ ၵမ်းတီႈ 3 ၼႆႉၵေႃႈ ပဵၼ်လွႆဢၼ်ၸိုဝ်ႈယႂ်ႇ ၼႂ်းတႆးႁဝ်း၊ ပေႃးဝႃႈ လွႆသၢမ်သိပ်းၼႆ ဢိင်ၼိူဝ်ၽဵင်းၵႂၢမ်းၸၢႆးၶမ်းလဵၵ်း တႅမ်ႈႁွင်ႉမၢၵ်ႇဝႆႉၼၼ်ႉသေ ပိူၼ်ႈႁူႉၸၵ်းၼမ်။

ၾၢႆႇၼိုင်ႈတၢင်းၼိုင်ႈၵေႃႈ ႁႂ်ႈၵူၼ်းၼုမ်ႇၼႂ်းပိုၼ်ႉတီႈၸိူဝ်းၼႆႉ ယွၼ်ႉပိူဝ်ႈလႆႈယူႇသဝ်းၼႂ်းၵႄႈ ၶၢင် လႄႈ ပလွင်ႈ (တဢၢင်း) မၢင်ၵေႃႉၵေႃႈၸႂ်လဵၵ်ႉ၊ မၢင်ၵေႃႉၵေႃႈဢမ်ႇပေႃး မီးႁႅင်းၸႂ် တႃႇတေတူင်ႉတိုၼ်ႇ ႁဵတ်းၵၢၼ်လိၵ်ႈလၢႆးလႄႈ ၵႂၢမ်းလၢတ်ႈတူဝ်ၵဝ်ႇ၊ ၵွပ်ႈၼၼ် ၸင်ႇလႆႈလိူၵ်ႈလွႆသၢမ်သိပ်း။ ယိူင်းဢၢၼ်း ႁႂ်ႈၵူၼ်းၼုမ်ႇမေႃဝႆႉၵႃႈၶၼ် သိင်ႇဝႅတ်ႉလွမ်ႉ၊ ႁႂ်ႈဢဝ်လွင်ႈဢွၵ်ႇမႃႇဢွၵ်ႇႁႅင်းၼႆႉသေ ႁၢင်ႇၵႆယၢၼ်ယႃႈမဝ်းၵမ်- ၸၢႆးသႅင်မိူင်း လၢတ်ႈၼင်ႇၼႆ။


Photo: Sai Zin Min Aye Facebook






 
© 2012 All Rights Reserved | Asean Celebrity | Fonts @ AtFonts | Free Templates