ဢၼ်မီးၶၢဝ်ႇလိုဝ်းဢွၵ်ႇမႃးဝႃႈ တၢင်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တဵၵ်းၶိၼ် (ဢထမ်ႇမ) ၵဵပ်းသိုၵ်းသေ ႁဵတ်းႁႂ်ႈၵူၼ်းၼုမ်ႇၼႂ်းပိုၼ်ႉတီႈ လႆႈဢွၼ်ၵၼ်ငိူင်ႉဝႄႈပၢႆႈယၢၼ် ႁိူၼ်းယေး ဝၢၼ်ႈသူၼ် ၼႆၼႆႉ ၸႂ်ႈတႄႉဢမ်ႇၸႂ်ႈတႄႉ တေၵူတ်ႇထတ်းတူၺ်းလီလီ။ ပေႃးဝႃႈၸိုဝ်ႈၸႂ်ႈၵေႃႈ ၵွပ်ႈပိူဝ်ႈပဵၼ် ၵၢၼ်ပူၼ်ႉပႅၼ် မၢႆမီႈသိုၵ်းလႄႈ RCSS/SSA တေပၼ်တူတ်ႈ(တၢမ်ႇ) - ႁူဝ်ပဝ်ႈလူင် RCSS ၸွမ်သိုၵ်းယွတ်ႈသိုၵ်းလၢတ်ႈ။

မၼ်းၸဝ်ႈလၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ၵူၼ်းၼုမ်ႇမိူင်းႁဝ်းၼႆႉ ပေႃးဝႃႈဢႃႇယု 18 ပီတဵမ်ယဝ်ႉၼႆ တေလႆႈႁဵၼ်းပၺ်ၺႃၾၢႆႇၵၢၼ်သိုၵ်းၼႆတႄႉ မီးပေႃႇလသီႇဝႆႉယူႇ၊ ပေႃးဝႃႈထုၵ်ႇလႆႈမႃးႁွင်ႉမႃးပၼ်ပၢင်သွၼ်ၵၢၼ် သိုၵ်း ၶၢဝ်းတၢင်းႁိုင် 1 လိူၼ်ၵူၺ်း၊ ပေႃးပၢၼ်ပၢင်သွၼ်ၵၢၼ်သိုၵ်းယဝ်ႉတူဝ်ႈယဝ်ႉၵေႃႈ ၶိုၼ်းသူင်ႇမိူဝ်းႁိူၼ်း ႁႂ်ႈမိူဝ်းၸွႆႈၵၢၼ်ႁိူၼ်းၵၢၼ်ယေး ပေႃႈမႄႈၶိုၼ်းယူႇ။ ပေႃးဝႃႈ ဢမ်ႇၶႂ်ႈပွၵ်ႈမိူဝ်းႁိူၼ်းၶိုၼ်း၊ ၶႂ်ႈသိုပ်ႇယူႇတီႈ ငဝ်ႈငုၼ်း ၼႆၵေႃႈသိုပ်ႇယူႇလႆႈ။ ဢၼ်ႁွင်ႉၵူၼ်းမႃးၸိူဝ်းၼႆႉၵေႃႈ ဢမ်ႇၸႂ်ႈတီႉၺွပ်းမႃး၊ လွင်ႈၼႆႉ လႆႈၵႂႃႇႁူပ်ႉၵူၼ်းမိူင်း တွင်ႈထၢမ်ၵၢင်ၸႂ်ၵူၼ်းမိူင်းလီလီယဝ်ႉ ၸင်ႇႁွင်ႉမႃးၵူၺ်း။

ဢၼ်ၶၢဝ်ႇလိုဝ်းဝႃႈမိူဝ်ႈလဵဝ် RCSS/SSA တီႉၺွပ်းၵူၼ်း၊ တီႉၺွပ်းလုၵ်ႈဢွၼ်ႇမႃးႁဵတ်းသိုၵ်းၼႆၼၼ်ႉ မၼ်းတေပဵၼ် လွင်ႈၶဝ်ႈၸႂ်ၽိတ်းၼိူဝ်ၵၼ်။ လွင်ႈၼႆႉ ႁဝ်းၶႃႈတေၸွပ်ႇထၢမ်တူၺ်းလီလီ၊ သင်ၸိူဝ်ႉဝႃႈ မီးၵၢၼ်ပူၼ်ႉပႅၼ်တႄႉယူႇၼႆ ၸဝ်ႈၼႃႈတီႈၵေႃႉဢၼ်ၵဵပ်းသိုၵ်းၼႆႉ မၼ်းမီးတၢင်းၽိတ်း၊ ႁဝ်းၶႃႈတေႁွင်ႉမၼ်းသေ ပၼ်တူတ်ႈၸွမ်းၼင်ႇမၢႆမီႈသိုၵ်း မီးဝႆႉ- ၸဝ်ႈယွတ်ႈသိုၵ်း လၢတ်ႈၼင်ႇၼႆ။

ၼႂ်းပိုၼ်ႉတီႈ ဢၼ်ၵူၼ်းဝၢၼ်ႈၵူၼ်းမိူင်း ထုၵ်ႇတီႉၺွပ်းႁဵတ်းသိုၵ်းၼႆႉ ပဵၼ်ၼႂ်းၸိုင်ႈတႆးပွတ်းၸၢၼ်း၊ မိူၼ်ၼင်ႇ ၼႂ်းၸႄႈတွၼ်ႈလၢင်းၶိူဝ်း၊ ၸႄႈဝဵင်းလၢင်းၶိူဝ်း၊ ၸႄႈဝဵင်းမိူင်းၼၢႆး၊ ၵိင်ႇၸႄႈဝဵင်းၵဵင်းတွင်း ၸိူဝ်းၼႆႉ ပဵၼ်ၼႂ်းပိုၼ်ႉတီႈ ၸွမ်းဝၢၼ်ႈၼွၵ်ႈၼႃးပၢင်ႇ။ ၼႂ်းဝၢၼ်ႈၼႂ်းဢိူင်ႇ ၼႂ်းၸႄႈတွၼ်ႈတူၼ်ႈတီး မိူၼ်ၼင်ႇၼႂ်းၸႄႈဝဵင်းလွၵ်ႈၸွၵ်ႇ၊ ၼႂ်းၵိင်ႇ ၸႄႈဝဵင်းဢၢင်ႇတေႃး ၸိူဝ်းၼႆႉ။ ယွၼ်ႉသိုၵ်းတႆးမႃးတီႉၺွပ်းၵႂႃႇႁဵတ်းသိုၵ်းလႄႈလုၵ်ႈဢွၼ်ႇၵူၼ်းၼုမ်ႇၶဝ် လႆႈပၢႆႈ ယၢၼ်ဢွၵ်ႇပိုၼ်ႉတီႈ- ၵူၼ်းၼႂ်းပိုၼ်ႉတီႈၶဝ် ပွင်ႇလၢတ်ႈမႃးၼင်ႇၼႆ။

ၵူၼ်းၼႂ်းပိုၼ်ႉတီႈၵဵင်းတွင်း ပေႃႈမႄႈလုၵ်ႈဢွၼ်ႇၵေႃႉၼိုင်ႈၵေႃႈလၢတ်ႈဝႃႈ- လုၵ်ႈၸၢႆးၶႃႈ တိုၵ်ႉယူႇႁူင်းႁဵၼ်းၸၼ်ႉ 8 ၵူၺ်း၊ ၸိုဝ်ႈသဵင်မၼ်းပႃးၵႂႃႇၼႂ်းသၢႆမၢႆပိူၼ်ႈတေမႃးၵဵပ်းၵူၼ်းသိုၵ်းမႂ်ႇယဝ်ႉ၊ တိုၼ်းတေလႆႈသူင်ႇပၼ်ဝႃႈၼႆ။ မိူဝ်ႈလဵဝ် ၼႆႉ တိုၵ်ႉၶဝ်ႈႁူင်းႁဵၼ်းယူႇလႄႈလႆႈၵႂႃႇဢွၼ်ႈယွၼ်းသေ သူင်ႇၵႂႃႇၶဝ်ႈႁူင်းႁဵၼ်းတီႈၼႂ်းဝဵင်းဝႆႉ။ ၵမ်ႈၽွင်ႈၵေႃႈ လႆႈၸၢင်ႈၵူၼ်းၵႂႃႇႁဵတ်းသိုၵ်း၊ ၼိုင်ႈၵေႃႉလႆႈ ပၼ်ဢမ်ႇယွမ်း 20 သႅၼ်ပျႃး။ ၼင်ႇႁိုဝ်ႁဝ်းၶႃႈတေလႆႈယူႇၵတ်းၵတ်း ယဵၼ်ယဵၼ်ၵႂႃႇမိူဝ်းၼႃႈၼၼ်ႉ ၶႂ်ႈတုၵ်းယွၼ်းထိုင်တီႈၽူႈမီးၸၼ်ႉပႃႈၼိူဝ် တပ်ႉသိုၵ်းၸိုင်ႈတႆးႁႂ်ႈၵူတ်ႇထတ်းတူၺ်း ပၼ်လွင်ႈၼႆႉလီလီ၊ ဢွၼ်ႈယွၼ်း (တွင်းပၢၼ်ႇ) မႃးယႂ်ႇယႂ်ႇၼမ်ၼမ်- ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး(RCSS/SSA)ၼႆႉ လူင်းလၢႆးမိုဝ်းၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် တင်းလူင်ပွင်ၸိုင်ႈမၢၼ်ႈဝႆႉ။ ၸဵမ်မိူဝ်ႈ လူင်းလၢႆးမိုဝ်းၵေႃႇသၢင်ႈလွင်ႈငမ်းယဵၼ် ၸၼ်ႉၸႄႈမိူင်းၼၼ်ႉ ၵေႃႈ လႆႈမီးပေႃႇလသီႇဝႆႉဝႃႈ တေဢမ်ႇၵဵပ်းသိုၵ်းၵူၼ်းမႂ်ႇ၊ တေဢမ်ႇၵဵပ်းၶွၼ်ႇတီႈ ၵူၼ်းၵႃႉၶၢႆၶဝ်၊ လိူဝ်သေၵူၼ်းၵႃႉ ယႂ်ႇၵႃႉလူင်ၶဝ်ၼႆၼၼ်ႉ လႆႈဢွၵ်ႇလိၵ်ႈပိုၼ်ၽၢဝ်ႇဝႆႉ။