ထိုင်မႃးဝၼ်းတီႈ 17/06/2014 ၸွမ်သိုၵ်းလူင်ၽူလ်း ဝၼႃးၵမူလ်း တင်းလုၵ်ႉၼွင်ႉသိုၵ်းထႆး သွင်ၵေႃႉ လႄႈတင်း လုၵ်ႈဢွၼ်ႇတႆးလၢႆၵေႃႉ ၶဝ်ႈၵႂႃႇတီႈႁူင်းပလိၵ်ႈသူၼ်လုမ်းၽေးၼီးသေ ဢုပ်ႇထၢမ်လွင်ႈပလိၵ်ႈၸၼ်ႉဢွၼ်ႇ ၼႂ်းႁူင်း ပလိၵ်ႈၼႆႉၵႂႃႇတီႉၺွပ်းမၢပ်ႇမႂ်ႇဢဝ်ငိုၼ်းၵူၼ်းတႆး။ ႁူမ်ႈဝႃႈၽွင်းၼၼ်ႉပလိၵ်ႈၵေႃႉၵႂႃႇမၢပ်ႇမႂ်ဢဝ်ငိုၼ်း ဢမ်ႇယူႇၵေႃႈ မိူဝ်ႈဢဝ်ၶႅပ်းႁၢင်ႈမႃးၼႄၼၼ်ႉ လုၵ်ႈဢွၼ်ႇၵူၼ်းတႆးၵေႃႉထုၵ်ႇမၢပ်ႇမႂ် ၸီႉၼႄတူဝ်ပလိၵ်ႈၵေႃႉၵႂႃႇမၢပ်ႇဢဝ်ငိုၼ်း ၶဝ်ၼၼ်ႉ ထုၵ်ႇမႅၼ်ႈၵေႃႉမၼ်းလီလီလႄႈ ၽူႈၵွၼ်းႁူင်းပလိၵ်ႈဢမ်ႇၸၢင်ႈတၵ်းသဵင်သင်သေဝႃႈ “တၢင်းႁူင်းပလိၵ်ႈ ဢမ်ႇလႆႈႁူႉၸွမ်း” ဝႃႈၼႆသေ ၸူၵ်းဢဝ်ငိုၼ်း ၼႂ်းလိၼ်ႉၸၵ်ႉၽိူၼ်မၼ်းၼၼ်ႉ မွပ်ႈပၼ်ၶိုၼ်း 1000 (1 မိုၼ်ႇ) ဝၢတ်ႇ။

ၸွမ်သိုၵ်းလူင်ၽူၼ်း ဝၼႃးၵမူလ်း ပွင်ႉႁင်းၸဝ်ႈၼႃႈတီႈပလိၵ်ႈထႆးဝႃႈ ဢမ်ႇထုၵ်ႇလီႁဵတ်းၸိူင်ႉၼႆ ၶဝ်ပဵၼ်တႆး ဢမ်ႇၸႂ်ႈမၢၼ်ႈ မိူဝ်ႈထုၵ်ႇသိုၵ်းမၢၼ်ႈမႃးပေႉၵိၼ် ႁဵတ်းႁၢႆႉၸႃႉ ၶီႇၼဵၵ်းတဵၵ်းတဵင် ပူၼ်ႉပႅၼ်လူလၢႆၵူၼ်းၼႂ်းမိူင်းတႆးႄလႈသိုၵ်းမၢၼ်ႈၶႂၢၵ်ႈဢဝ်မိူင်းၶဝ်ယဝ်ႉ ၶဝ်ၵေႃႈလႆႈမႃးႁဵတ်းႁႃၵိၼ် မႃးႁဵၼ်းလိၵ်ႈႁဵၼ်းလၢႆးၼႂ်းမိူင်းထႆး ၵွပ်ႈၼိူဝ်ႉ လိူတ်ႈၸိူဝ်ႉႁိူဝ်ႇသၢႆၶႆး ပဵၼ်ၸိူဝ်ႉသၢႆလဵဝ်ၵၼ်တင်းထႆးႁဝ်း မိူၼ်ၵဝ်ၶႃႈၼႆႉ ပဵၼ်ၼိူဝ်ႉလိူတ်ႈတႆး ၵိူတ်ႇၼိူဝ်ၽႅၼ်ႇလိၼ် ထႆး၊ ၶဝ်ၵေႃႈပဵၼ်ၼိူဝ်ႉလိူတ်ႈၸိူဝ်ႉသၢႆတႆး ႁိုဝ် သယၢမ် (SIAM)။ ၵူၺ်းၵႃႈၶဝ်ၵိူတ်ႇၼႂ်းၽႅၼ်လိၼ်တႆး ၵႃႈၼၼ်ႉၵူၺ်း ၵွပ်ႈၼႆယႃႇပေပေႉၵိၼ်လူလၢႆၵၼ်။ “ဢမ်ႇလႆႈယိၼ်းၼႄ? ၸဝ်ႈယွတ်ႈသိုၵ်း ဢၼ်ဝႃႈၼၼ်ႉ ႁဵတ်းၵၢၼ်ပိူဝ်ႈတႃႇ ပူတ်းပွႆႇဢဝ်ၵူၼ်းမိူင်းတႆး လႆႈမီးလွင်ႈထၢင်ႇႁၢင်ႈၵတ်းယဵၼ်လႄႈ မီးလွင်ႈၽဵင်ႇပဵင်းၵၼ်တင်းမၢၼ်ႈ ယူႇယၢမ်းလဵဝ်ၼႆႉ- ယင်းလၢတ်ႈၼႄၼင်ႇၼႆလူးၵွၼ်ႇ။

ၸွမ်သိုၵ်းလူင် ၽူၼ်း ဝၼႃးၵမူလ်း ပဵၼ်တႆး ၸႃႇတိမႄႈႁွင်ႈသွၼ် ၶဝ်ႈႁၢပ်ႇၵၢၼ်သိုၵ်းထႆးမႃးတေႃႇပေႃးပဵၼ် ၵႅမ်မႄႈတပ်ႉၽၢၵ်ႈ 3 (ႁွင်းမႄႈတပ်ႉၸိုင်ႈထႆးပွတ်းႁွင်ႇ) သေ တႆႇတဝ်ႉၶိုၼ်ႈထိုင်ၸၼ်ႉတၼ်းႁဵင်း ၸွမ်သိုၵ်းလူင်။ ၵူၼ်းၶိူဝ်းတႆးႁဝ်းၼႂ်းမိူင်းထႆးၼႆႉ မီးမၼ်းၸဝ်ႈၵေႃႉလဵဝ် ဢၼ်ၶဝ်ႈႁၢပ်ႇၵၢၼ် ၶႃႈႁၢပ်ႇၵၢၼ်ၶုၼ်ၾၢႆႇသိုၵ်း ၼႂ်းတပ်ႉ ၼႃႈလိၼ်တပ်ႉသိုၵ်းၸိုင်ႈထႆး။ ဝၢႆးသေမၼ်းၸဝ်ႈပူၼ်ႉၸူဝ်ႈၶူပ်ႇဢႃႇယုၸၼ်ႉၵၢၼ်သေ လိုဝ်ႈၵၢၼ် ၽွင်းဢႃႇယု မၼ်းၸဝ်ႈၶွပ်ႈထူၼ်ႈ 60 ပီ။

ၽွင်းၼၼ်ႉႁူဝ်ပဝ်ႈၸုမ်းၶိူဝ်းတႆးသႃမၵ်းၶီးမိူင်းၵွၵ်ႇ ၸၢႆးထုၼ်း လႆႈၵႂႃႇၸိူၼ်းဢဝ် မၼ်းၸဝ်ႈ မႃးၸွႆႈ ပဵၼ်ၽူႈယႂ်ႇၵူၼ်းလူင်တႆးလႄႈ ဢွၼ်ႁူဝ်ၸုင်ၸၼ်မုၵ်ႉၸုမ်းၶိူဝ်းတႆးသႃမၵ်းၶီး (ၶိူဝ်းတႆးသမႅၵ်းၵ) ႄလႈ ပီႈၼွင်ႉတႆးၼႆႄလႈ မၼ်းၸဝ်ႈလႆႈလူလွမ်တူၺ်းထိုင် ၸွႆႈထႅမ်ပီႈၼွင်ႉတႆးမႃးတေႃႇႁၢၼ်ႉၼႆႉ 10 ပၢႆယဝ်ႉ။

ၵႂၢမ်းဢတိထၢၼ်မၼ်းၸဝ်ႈမီးဝႆႉဝႃႈ - “ပိူဝ်ႈတႃႇၽႅၼ်ႇလိၼ်ၵိူတ်ႇႄတႉ ၵဝ်လႆႈတွပ်ႇတႅၼ်းမႃးယဝ်ႉ၊ ၵမ်းၼႆႉ ၵိုတ်းပိူဝ်ႈတႃႇတွပ်ႇတႅၼ်းၵုၼ်းမုၼ် သၢႆၼိူဝ်ႉလိူတ်ႈၸိူဝ်ႉၶိူဝ်းၵဝ်” - ဝႃႈၼႆ။