ဢွၼ်ႇယိင်းဢွၼ်ႇ ဢႃႇယု 6 လိူၼ်ပၢႆ၊ ၵေႃႉဢၼ်ပေႃႈမႄႈပဵၼ်ၵူၼ်း ပွတ်းသီႇပေႃႉ ၸိုင်ႈတႆးပွတ်းႁွင်ႇ၊ ၵိူတ်ႇမႃး မီးၵႃႇယၶၼ်ႇထႃႇတူဝ်ၶိင်း သွင်တူဝ်၊ မီးႁူဝ်လဵဝ်၊ ဢၼ်တူဝ်ၶိင်းတူဝ်ၼိုင်ႈ ငွၵ်ႈၵွပ်ႈဢွၵ်ႇမႃးတီႈဢိုၵ်း တူဝ်ၼိုင်ႈၼႆႉ လႆႈၽႃႇတတ်း ယဝ်ႉတူဝ်ႈၵႂႃႇလီငၢမ်း၊ တီႈႁူင်းယႃလူင် မႁႃရၢတ်ႉၶျ် (သူၼ်ၻွၵ်ႇ) ဝဵင်းၵဵင်းမႆႇ ဝၼ်းတီႈ 24/06/2014 (မိူဝ်ႈဝႃး) ၊ ၸႂ်ႉၶၢဝ်းယၢမ်းၽႃႇတတ်း တင်းႁိုင် 5 ၸူဝ်ႈမူင်း။

ၵေႃႉပဵၼ်ပေႃႈမၼ်း ၸၢႆးလႃႉမိၼ်ႉ လၢတ်ႈဝႃႈ- လုၵ်ႈဢွၼ်ႇၵေႃႉၼႆႉ တူဝ်ၶိင်းမၼ်းဢၼ်ၼိုင်ႈ ငွၵ်ႈၵွပ်ႈဢွၵ်ႇမႃး တီႈဢူၵ်းမၼ်း၊ မီးၶႃလႄႈၶႅၼ် တင်းတူဝ်မၼ်းၶိုင်ႈၼိုင်ႈသေ ၸင်ႇလႆႈဢဝ်မႃးၽႃႇတတ်း။ မိူဝ်ႈဝႃးၼႆႉ ၽႃႇတတ်း တႄႇၵၢင်ၼႂ် 8 မူင်းထိုင်ဝၢႆးဝၼ်း 1 မူင်း၊  ပေႃးၽႃႇတတ်းယဝ်ႉၵေႃႈ ဢဝ်မႃးသႂ်ႇဝႆႉ ၼႂ်းႁွင်ႈ ICU သေ မေႃယႃလူင် ၶဝ်ၵေႃႈ ပႂ်ႉတူၺ်းယူႇ ဢမ်ႇပၼ်ၽၢတ်ႇတႃ။ မိူဝ်ႈလဵဝ်ၼႆႉ မေႃၶဝ်လၢတ်ႈဝႃႈ တွၼ်ႈတႃႇပၢႆးယူႇလီလုၵ်ႈဢွၼ်ႇၼႆႉ ဢမ်ႇတၢပ်ႈမႆႈၸႂ်သင်ယဝ်ႉ၊ ဝၢႆးဝၼ်းၼႆႉ လုၵ်ႈဢွၼ်ႇႁူႉတူဝ်မၼ်း မႃးၶိုၼ်းသေ မေႃယႃၶဝ် ပၼ်ပေႃႈမႄႈမၼ်း ၶဝ်ႈႁူပ်ႉယဝ်ႉ။ ၵူၺ်းၵႃႈ ပႆႇပၼ်ၵိၼ်ၼူမ်းမႄႈ၊ ထၢင်ႇတႄႉ တေလႅပ်ႈလႆႈယူႇၼႂ်းႁွင်ႈ ICU ထႅင်ႈ 3-4 ဝၼ်းယူႇ၊ ႁဝ်းၶႃႈၵေႃႈယွၼ်းပွလ်း မုင်ႈမွင်းဝႃႈ တေလွတ်ႈၽေး ၼႆၵူၺ်းယဝ်ႉဢေႃႈ- ဝႃႈၼႆ။

ပေႃႈမႄႈလုၵ်ႈဢွၼ်ႇၼႆႉ ပဵၼ်ၵူၼ်းၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ပိူဝ်ႈတႃႇလႆႈၽႃႇတတ်း လုၵ်ႈဢွၼ်ႇၼႆႉ ပဵၼ်ၸုမ်းၼၢင်းယိင်း (SWAN) လႆႈမႃးၵပ်းသၢၼ်ပၼ် တၢင်းႁူင်းယႃလူင် သူၼ်ၻွၵ်ႇၵဵင်းမႆႇသေ ၵႃႈၽႃႇတတ်း တင်းမူတ်းၼၼ်ႉ ႁူင်းယႃလူင်သူၼ်ၻွၵ်ႇ ၵဵင်းမႆႇ ဢဝ်ပုၼ်ႈၽွၼ်း။ သင်ဝႃႈၽႃႇတတ်းယဝ်ႉတူဝ်ႈၵႂႃႇ၊ ပၢႆးယူႇလီ လုၵ်ႈဢွၼ်ႇလီၶႅမ်ႉမႃးယဝ်ႉ၊ ပေႃးထိုင်ၶၢဝ်းၼၼ်ႉမႃး တၢင်းႁူင်းယႃလူင် တေႁဵတ်းပၢင်သပ်းၸႅင်ႈၶၢဝ်ႇ ပဵၼ်တၢင်းၵၢၼ် ယူႇ- ၽူႈမီးပုၼ်ႈၽွၼ်း ၸုမ်းၼၢင်းယိင်းတႆး (SWAN) ၼၢင်းသႅင်မူၼ်း လၢတ်ႈ။