ၶၢဝ်းတၢင်းပၢင်သွၼ်ၼိုင်ႈဝၼ်းၼႆႉ တႄႇၵၢင်ၼႂ် 8 မူင်း ထိုင် 11 မူင်းၵမ်းၼိုင်ႈ၊ ဝၢႆးဝၼ်း 3 မူင်းတေႃႇထိုင် 5 မူင်း ႁူဝ်ၶမ်ႈၵမ်းၼိုင်ႈ၊ သွၼ်ပၼ်ဝၼ်းၸၼ်ထိုင်ဝၼ်းသုၵ်း၊ ဝၼ်းသဝ် တင်းဝၼ်းဢႃးတိတ်ႉ လိုဝ်ႈ။

ၵဵဝ်ႇၵပ်းလွင်ႈၼႆႉ သၢဝ်တႆးမၢဝ်းၵေႃႉၼိုင်ႈ  လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- တႆးၵေႃႉၶႃႈၼၢင်းၵေႃႈလႆႈ ၵႂႃႇဢေႃႈ၊ မီးမႃးဝူင်ႈၼိုင်ႈယဝ်ႉ၊ လႆႈႁူႉဝႃႈၾိုၵ်းပၼ် ၵဵဝ်ႇၵပ်းပၢႆးပၺ်ႇၺႃႇ ၵၢၼ်သိုၵ်း၊ လၢႆးယိုဝ်းၵွင်ႈ၊ လၢႆးၵႅတ်ႇၵင်ႈတူဝ်ၵဝ်ႇ၊ လၢႆးထုပ်ႉၽူႈၶဵၼ် ႁႂ်ႈပေႃးလူမ်ႉသေတီႉမတ်ႉႁႂ်ႈပေႃးလႆႈ၊ ၼႂ်းဝူင်ႈၼႆႉတႄႉ တေသွၼ်လၢႆးတီႉမတ်ႉၽူႈၶဵၼ်၊ ၵူၺ်းၵႃႈ တေႁိုင်ထႅင်ႈလၢႆဝၼ်းတႄႉၵေႃႈပႆႇႁူႉ- ဝႃႈၼႆ။

ၵူၼ်းဢၼ်ၸမ်ၸႂ် ၾၢႆႇႁူမ်ႇလူမ်ႈလႅၼ်လိၼ်မိူင်းၶႄႇ ၸၢႆးၵေႃး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ဢၼ်ပၼ်ပၢင် သွၼ်ယူႇယၢမ်းလဵဝ်ၼႆႉ ၵူႈပွၵ်ႈၵေႃႈယၢမ်ႈပၼ်မႃးယူႇ။ ၵႃႈပူၼ်ႉမႃးၼႆႉ ပၼ်တွၼ်ႈတႃႇ ႁဵတ်းပီႇတုၸိတ်ႉသေ ပႂ်ႉဢဝ်ႁူမ်ႇလူမ်ႈလႅၼ်လိၼ်။ ၾၢႆႇၼိုင်ႈၵေႃႈ ဢဝ်ႁူမ်ႇလူမ်ႈဝၢၼ်ႈဢိူင်ႇၽႂ်မၼ်း ၼင်ႇႁိုဝ်ၵူၼ်းတၢင်ႇၸိူဝ်ႉ တၢင်ႇ ၸၢတ်ႈ၊ ၼင်ႇႁိုဝ်ၽူႈႁၢႆႉၵူၼ်းၸူၼ် တေဢမ်ႇမႃးၵဝ်း ၸိူဝ်းၼႆႉ။ ဢၼ်ပၼ်ယူႇ ယၢမ်းလဵဝ်ၼႆႉ ပိူဝ်ႈတႃႇတေၵႅတ်ႇၵင်ႈ ၵူၼ်းႁဵတ်းၵၢၼ်တုၸရိူၵ်ႈ (ၵၢၼ်ႁၢႆႉ) ဢၼ်လၵ်ႉၶၢမ်ႈလႅၼ်လိၼ် ၵႃႉယႃႈၸိူဝ်းၼႆႉ။ သင်ၸိူဝ်ႉဝႃႈ ၶၢမ်ႈလႅၼ်လိၼ် မႃးၵေႃႈ ႁႂ်ႈၸၢင်ႈၸွႆႈၽူႈမီးပုၼ်ႈၽွၼ်းၶဝ်သေ တီႉၺွပ်းႁႂ်ႈလႆႈ။ ၾၢႆႇၼိုင်ႈၵေႃႈ ပိူဝ်ႈတႃႇၵႅတ်ႇၵင်ႈ ပွၵ်ႉယွမ်ႇ ဝၢၼ်ႈဢိူင်ႇၸဝ်ႈၵဝ်ႇ- ဝႃႈၼႆ။

ၼႂ်းဝူင်ႈဝၢင်ႈပူၼ်ႉမႃးၶၢဝ်းတၢင်းဢမ်ႇႁိုင်ၼႆႉ လူင်ပွင်ၸိုင်ႈမိူင်းၶႄႇ တီႉၺွပ်းဝႆႉၵူၼ်းၸိုင်ႈမိူင်းႁူမ်ႈတုမ်မၢၼ်ႈ ဢၼ်ၵႂႃႇ ႁဵတ်းႁႃၵိၼ်တၢင်းမိူင်းၶႄႇ 600 ပၢႆ။ ၶၢဝ်ႇဢၼ် ဢမ်ႇယိုၼ်ယၼ်လၢတ်ႈဝႃႈ- ၵူၼ်းဢၼ်ထုၵ်ႇတီႉ ၸိူဝ်းၼႆႉ ထုၵ်ႇဢဝ် သူင်ႇၵႂႃႇႁဵတ်းတၢင်းလူတ်ႉၾႆး ဢၼ်သၢင်ႈမႃးၸူးတၢင်းမိူင်းမၢၼ်ႈ၊ ထုၵ်ႇၸႂ်ႉၵိၼ်ႁႅင်းလၢႆ- ၼႆယဝ်ႉ။