ထၢမ်- မိူဝ်ႈလဵဝ် မႃးထိုင်ၵၢပ်ႈပၢင် IT ၼႆႉ ၼႂ်းၶိူင်ႈ/ထူဝ်းရသပ်း မိုဝ်းထိုဝ်၊ ၼႂ်းၶွမ်းၽိဝ်ႇတိူဝ်ႇၸိူဝ်းၼႆႉ ပဵၼ်ပၼ်ႁႃ ဢၼ်ၼိုင်ႈ။ ပဵၼ်လိၵ်ႈတႆးၼင်ႇၵၼ်ယူႇ၊ ယူႇၼႂ်းၶိူင်ႈမိုဝ်းထိုဝ် ဢၼ်ၼိုင်ႈလႄႈဢၼ်ၼိုင်ႈတႅမ်ႈ လိၵ်ႈတႆးႁႃၵၼ် ဢမ်ႇပွင်ႇၵၼ်၊ ၼႆႉၵေႃႈပဵၼ်ပၼ်ႁႃဢၼ်လီမႆႈၸႂ်ဢၼ်ၼိုင်ႈ၊ လွင်ႈၼႆႉ ၸဝ်ႈႁဝ်း ႁၼ်ထိုင်ၸိူင်ႉႁိုဝ်။

တွပ်ႇ- ႁၵ်ႉၸိူဝ်ႉၶိူဝ်း၊ ႁၵ်ႉၽႅၼ်ႇလိၼ်လႄႈ ႁၵ်ႉလိၵ်ႈလၢႆးၼႆႉ ၵႂၢမ်းမၢႆတီႈပွင်ႇမၼ်းၵႂႃႇၵေႃႉဢၼ်ဢၼ်။ ၵမ်ႈၽွင်ႈဝႃႈ လေႃးလႄးၵၼ် မၼ်းဢမ်ႇၸႂ်ႈ။ ႁၵ်ႉလိၵ်ႈလၢႆးၼႆ ၵဝ်မႄးတၢင်းၼိုင်ႈ၊ မႂ်းမင်တၢင်းၼိုင်ႈ ၸိူဝ်းၼႆႉႁၵ်ႉလိၵ်ႈလၢႆး ယဝ်ႉႁႃႉ။ ၸၢင်ႈပႃးၵၼ်လူင်းလွႆ လူင်းပၢင်ႇလၢႆႇၵူၺ်း။ ၸင်ႇဝႃႈ ၵူၼ်းတႆးႁဝ်းၵူႈၵေႃႉၼႆႉ ထုၵ်ႇလီႁူႉတီႈပွင်ႇဝႃႈ ႁၵ်ႉၸိူဝ်ႉၶိူဝ်းၼႆႉ ႁၵ်ႉၸိူင်ႉႁိုဝ်။ ၸိူဝ်ႉၶိူဝ်းဢၼ်ဝႃႈၼႆႉ မၼ်းမီးၵူႈထၢၼ်ႈထၢၼ်ႈ၊ ႁၵ်ႉၸိူဝ်ႉၶိူဝ်းဢၼ်ဝႃႈၼႆႉ ႁဝ်းထုၵ်ႇ လႆႈပၼ်ၵိၼ်ပၼ်ယႅမ်ႉၵူၺ်းႁႃႉ၊ ႁၵ်ႉၵူၼ်းမီးၵူၺ်းႁႃႉ၊ ႁၵ်ႉၵူၼ်းထၢၼ်ႈ ၵၢင်ၵူၺ်းႁႃႉ။ ဢၼ်ႁၵ်ႉၸိူဝ်ႉၶိူဝ်းၼႆႉ ပေႃးႁဝ်းဢမ်ႇႁူႉတီႈပွင်ႇႁၵ်ႉၶိူဝ်း ယဵၼ်းၵၢႆပဵၼ်ၵူၼ်းယႃႉၶိူဝ်းၵႂႃႇပႅတ်ႈ။ လွင်ႈႁၵ်ႉၽႅၼ်ႇလိၼ်ဝၢၼ်ႈမိူင်းၼႆႉ ႁဝ်းဝႃႈ ႁဝ်းႁၵ်ႉၽႅၼ်ႇလိၼ်ဝၢၼ်ႈမိူင်း၊ ႁၵ်ႉၸိူင်ႉႁိုဝ် ပေႃးၼၼ် ဢဝ်လိၼ်မႃးသႂ်ႇထွင်းဝႆႉ ၼႆႉၵေႃႈႁၵ်ႉယဝ်ႉ ပေႃးဢမ်ႇႁူႉ တီႈပွင်ႇမၼ်း။ ႁၵ်ႉၽႅၼ်ႇလိၼ်ဝၢၼ်ႈမိူင်းၼႆႉ တင်ႈတႄႇဢဝ်မႆႉတူၼ်ႈၼိုင်ႈၵႂႃႇ၊ မႄႈၼမ်ႉမႄႈၼိုင်ႈၵႂႃႇၸိူဝ်းၼႆႉ ႁဝ်းထုၵ်ႇလီလႆႈႁၵ်ႉမူတ်း၊ တူၺ်းဢဝ်မိူင်းထႆး တႅပ်းတူၼ်ႈမႆႉတူၼ်ႈၼိုင်ႈၵေႃႈ ၺႃးၵိၼ်ယဝ်ႉ၊ မိူင်းလႂ်ၵေႃႈယဝ်ႉ ၼႂ်းၵမ်ႇၽႃႇၼႆႉ။

မိူင်းတႆးႁဝ်းလူး ၸွင်ႇပႃႈဝႆႉၵႃႈၶၼ်တူၼ်ႈမႆႉႁိုဝ်၊ ၶဝ်ဝႃႈတူၼ်ႈမႆႉမၼ်းဢွၵ်ႇမႃးႁင်းၵူၺ်း ဢမ်ႇဝႆႉၵႃႈၶၼ် တႅပ်းပႅတ်ႈ တီႇပႅတ်ႈမူတ်း။ ႁဝ်းႁၢမ်ႈပႅတ်ႈ တီႈၵဵင်းတွင်းၼႆႉ၊ ႁဝ်းၵႂႃႇလိုဝ်ႈပၢင်တီႈၼိုင်ႈ မႆႉသၵ်းၼႆႉမီးပဵၼ် 2-3 ပၢၵ်ႇ၊ တႅပ်ႈမႆႉ သၵ်း သေၽုၵ်ႇႁႆႈၶဝ်ႈ၊ မႆႉသၵ်း 1-2 တူၼ်ႈၵူၺ်း ပဵင်းၵႃႈၶဝ်ႈမၼ်း၊ ဢၼ်ၼႆႉႁဝ်းၵေႃႈ ဢမ်ႇၼႄးၵူၼ်းမိူင်းတႆးႁဝ်း ၵွပ်ႈပိူဝ်ႈၶဝ်ဢမ်ႇႁူႉ၊ ဢမ်ႇႁူႉႁၵ်ႉၽႅၼ်ႇလိၼ် ဢမ်ႇႁူႉႁၵ်ႉသၽႃႇဝ၊ ပေႃးဢမ်ႇႁူႉႁၵ်ႉၵေႃႈ ဢမ်ႇမေႃၵႅတ်ႇၶႄမၼ်း။ ဢၼ်ၼႆႉ ပဵၼ်တၢင်းၽိတ်းၵူၼ်းလုၵ်ႉၽိုၼ်ႉ၊ ပဵၼ်တၢင်းၽိတ်း ၵူၼ်းၵၢၼ်မိူင်း။ ၵူၼ်းလုၵ်ႉၽိုၼ်ႉဢၼ်ဝႃႈၼႆႉ မၼ်းလႆႈပိုင်ႈထိူၼ်ႇ၊ ပေႃးဢမ်ႇမီးထိူၼ်ႇမၼ်းဢမ်ႇယူႇလႆႈ၊ ပေႃးၸိူင်ႉၼႆ ၵၢၼ်လုၵ်ႉၽိုၼ်ႉ သမ်ႉၶိုၼ်းၵႂႃႇယႃႉထိူၼ်ႇ၊ ၵၢၼ်လုၵ်ႉၽိုၼ်ႉၵူႈၸုမ်းၸုမ်းယႃႉထိူၼ်ႇ၊ ပွတ်းႁွင်ႇၼႆႉ ႁဝ်းတူၺ်းပႃႇမႆႉပၢင်ႇမူတ်းယဝ်ႉ။ ဢၼ်ၼႆႉၵွပ်ႈလၢႆး လုၵ်ႉၽိုၼ်ႉ ႁၼ်ၶၢဝ်းပွတ်းဝႃႈတႃႇလႆႈငိုၼ်း ၵႄႈတပ်ႉ၊ မိူဝ်ႈလဵဝ် တႄႇပၢင်လုၵ်ႉၽိုၼ်ႉၶိုၼ်ႈ ဢမ်ႇမီးတီႈယူႇယဝ်ႉ၊ ဢၼ်ၼႆႉ ၶၢဝ်းပွတ်းၵူၺ်း ႁဝ်းပေႃးၵၢၼ်ႉပုၼ်ႈယဝ်ႉ၊ မၼ်းသမ်ႉထုၵ်ႇၶီႈၽႂ် ထုၵ်ႇၶီႈလူင်ပွင်ၸိုင်ႈၵူၺ်း။

ႁၵ်ႉၽႅၼ်ႇလိၼ်ဢၼ်ဝႃႈၼၼ်ႉ ႁၵ်ႉၸိူင်ႉႁိုဝ်၊ ၵူၼ်းႁဝ်းၼႆႉ ယူႇလူၺ်ႈထၢတ်ႈသီႇပိူင် လိၼ် ၼမ်ႉ လူမ်း ၾႆး။ ပေႃးၼၼ် ဢၼ်ႁဝ်းႁၵ်ႉၽႅၼ်ႇလိၼ်ၵေႃႈ သီႇပိူင်ၼႆႉ ႁဝ်းတေႁဵတ်းႁိုဝ်ၵႅတ်ႇၶႄ။ ၵမ်ႈၽွင်ႈႁူႉဝႃႈ လိၼ် ၼမ်ႉ လူမ်း ၾႆးၼႆႉ ႁူႉဝႃႈပဵၼ်ထၢတ်ႈၵူၼ်းၵူၺ်း၊ ပေႃးၸိူင်ႉၼႆ ၸဝ်ႈၵဝ်ႇၼႆႉ ပေႃးဢမ်ႇမီးၼမ်ႉ ၸဝ်ႈၵဝ်ႇယူႇလႆႈႁႃႉ၊ ၼမ်ႉၼႆႉ ပေႃးဢမ်ႇမူတ်းသႂ် ၸဝ်ႈၵဝ်ႇၵိၼ်လႆႈယူႇႁႃႉ၊ တႃႇၼမ်ႉမူတ်းသႂ်ၼၼ်ႉ ၸဝ်ႈၵဝ်ႇထုၵ်ႇလႆႈလုမ်းလႃး ထုၵ်ႇလႆႈၵႅတ်ႇၶႄ၊ ႁဝ်းပိုင်ႈၼမ်ႉသေ ယူႇလႆႈ။ ပေႃးၼႆ လိၼ်၊ ၵွပ်ႈပိူဝ်ႈတႃႇၽုၵ်ႇသွမ်ႈႁဝ်း တႃႇႁဵတ်းသူၼ်ႁဝ်း၊ ပေႃးႁဝ်းဢမ်ႇမီး ၽႅၼ်ႇလိၼ်ဝၢၼ်ႈမိူင်း ႁဝ်းတေၵႂႃႇယူႇတီႈလႂ်။

ၵူၼ်းႁဵတ်းၵၢၼ် ၼႂ်းမိူင်းထႆးၼႆႉ ပိူၼ်ႈၸတ်းပၵ်းပိူင်ႁႅင်းၵၢၼ်ၼႆၵေႃႈ ထူပ်းၽေးမူတ်း၊ ၼႆႉပဵၼ်လွင်ႈလိၼ် ႁဝ်းဢမ်ႇ မေႃၵႅတ်ႇၶႄ။ လူမ်း ပေႃးႁဝ်းယႃႉသၽႃႇဝၵေႃႈ လူမ်းလီဢမ်ႇမႃး၊ ၸိူဝ်းၼႆႉၵေႃႈ ႁဝ်းတေထူပ်းၽေး။ ၾႆး ပေႃးႁဝ်း ဢမ်ႇမီးသၢႆလႅင်းၵေႃႈ ႁဝ်းဢမ်ႇမေႃယူႇ၊ တႃႇတေႁုင်တေတူမ်ႈၶွင်ၵိၼ်ၼႆႉ ႁဝ်းထုၵ်ႇလႆႈမီးၾႆး၊ ၸိူဝ်းၼႆႉမၼ်းယူႇ ၼႂ်းတူဝ်ၵူၼ်းႁဝ်းမူတ်း၊ ပေႃးႁဝ်းဢမ်ႇပိုင်ႈၵၼ်မၼ်းဢမ်ႇလႆႈ။ တႃႇတေပိုင်ႈၵၼ်ၼႆႉ ႁဝ်းမေႃၵႅတ်ႇၶႄမၼ်းၵႃႈႁိုဝ်၊ ၵူၼ်းမိူင်းႁဝ်း ထုၵ်ႇလႆႈမီးတၢင်းႁူႉၸိူဝ်းၼႆႉ။

ၸင်ႇဝႃႈၵၢၼ်လုၵ်ႉၽိုၼ်ႉႁဝ်း ဝၼ်းမိူဝ်ႈၼႆႉ 56 ပီ၊ ၵူၼ်းမိူင်းပွင်ႇၸႂ်ယဝ်ႉႁႃႉ၊ ၵၢၼ်ႁၵ်ႉၶိူဝ်းဢၼ်ဝႃႈၼႆႉ ပွင်ႇၸႂ် ၸိူင်ႉႁိုဝ်၊ ၵူၼ်းမိူင်းႁဝ်းလီလႆႈပွင်ႇၸႂ်ၵူႈၵေႃႉ။ ပေႃးဝႃႈႁၵ်ႉၶိူဝ်းဢိူဝ်ႈၼႆ ဝၼ်းမိူဝ်ႈၼႆႉႁဝ်းၵႅတ်ႇၶႄ ၶိူဝ်းဢီႈသင်ယဝ်ႉ ဢၼ်ႁဝ်းၶႄလႆႈၶိူဝ်းႁဝ်း၊ ႁဝ်းဢမ်ႇၶႄလႆႈသင်သေပိူင်လူး။ ၸွႆႈၶႄၶိူဝ်းၼႆႉ ယႃႇႁႂ်ႈၶိူဝ်းႁဝ်းလူႉၵွႆ၊ ႁႂ်ႈၽႄႈတိူၼ်းၵႂႃႇ၊ ယိုၼ်းယၢဝ်း၊ ယႃႇႁႂ်ႈၶိူဝ်းႁဝ်းၵႂႃႇလေႃးလႄးၶိူဝ်းတၢင်ႇၶိူဝ်း ၸဵမ်ၸိူဝ်းၼႆႉ ပဵၼ်ၵၢၼ်ႁၵ်ႉၶိူဝ်း ၵၢၼ်ၶႄၶိူဝ်းတင်းမူတ်း။ ၵမ်းၼႆႉ ထုၵ်ႇလႆႈမီးသိုၵ်း၊ ၵမ်းၼႆႉမီးသိုၵ်းယဝ်ႉ ထုၵ်ႇလႆႈတိုၵ်း၊ ပေႃးထၢမ် သိုၵ်းၼႆႉတေလႆႈတိုၵ်းယဝ်ႉ သမ်ႉတိုၵ်း ႁဵတ်းသင်၊ တေဝႃႈတိုၵ်းမၢၼ်ႈၵေႃႈတဵမ်မိူင်း၊ တေလႆႈၶႄမၢၼ်ႈ ယႃႇႁႂ်ႈၶိုၼ်ႈမိူင်းတႆးၵေႃႈ ၶိူဝ်းမၢၼ်ႈတဵမ်မူတ်းယဝ်ႉ။

ပေႃးမႃးတူၺ်း ၵၢၼ်လုၵ်ႉၽိုၼ်ႉ 56 ပီၼႆႉ ႁဝ်းဢမ်ႇၶႄလႆႈဢီႈသင်။ ၵမ်းၼႆႉ တေႃႉတႄႉပႃမီးၵၢင်ႈ ၼိူဝ်ႉမီးလုပ်ႇ ပိူၼ်ႈဢမ်ႇၵိၼ်လႆႈငၢႆႈငၢႆႈ။ ပိူၼ်ႈဢမ်ႇၵိၼ်လႆႈငၢႆႈငၢႆႈၵေႃႈ ပိူၼ်ႈၵိၼ်ၼိူဝ်ႉမၼ်းမူတ်းပႅတ်ႈသေ ၵမ်းလိုၼ်းမႃးၵိုတ်း လုပ်ႇမၼ်းၵူၺ်းယဝ်ႉ ပိူၼ်ႈၵေႃႈတႅပ်းသႂ်ႇၾႆးပႅတ်ႈ။ ၵွပ်ႈၼၼ် ၼိူဝ်ႉတင်းလုပ်ႇၼႆႉ မၼ်းပိူင်ႈၵၼ်၊ ပေႃးဝႃႈ ၼိူဝ်ႉတင်းလုပ်ႇပိုင်ႈၵၼ်ၵေႃႈ ယႃႇႁႂ်ႈၼိူဝ်ႉတင်းလုပ်ႇၼၼ်ႉတၢႆ၊ ႁဝ်းႁႂ်ႈမီးၸႂ်သေ ၵႅတ်ႇၶႄလႆႈတင်းၼိူဝ်ႉတင်းလုပ်ႇ၊ မိူဝ်ႈလဵဝ်ၼႆႉ ႁဝ်းဢမ်ႇၵႅတ်ႇၶႄလႆႈ၊ ပေႃးၼိူဝ်ႉမၼ်းၵႂႃႇမူတ်းယဝ်ႉၵေႃႈ လုပ်ႇမၼ်းၵေႃႈၵွႆ။

မိူဝ်ႈလဵဝ် ၵူၼ်းမိူင်းႁဝ်းထူပ်းၽေးယႃႈမဝ်းၵမ်၊ ၽေးဢၼ်ၼႆႉ ႁဝ်းတေၵႂႃႇၼႄးၽႂ်၊ ၵူၼ်းၵူႈၵေႃႉ လီလႆႈမီးတၢင်းႁူႉ ၵႅတ်ႇၶႄႁင်းၵူၺ်း၊ ၵေႃႉဢၼ်သူႇၵိၼ်ၵေႃႈ လီလႆႈမေႃမီးတၢင်းႁူႉႁင်းၵူၺ်း၊ ပေႃႈမႄႈၵေႃႈ ထုၵ်ႇလီမေႃၵႅတ်ႇၶႄ လုၵ်ႈလၢင်း၊ ၶူးသွၼ်ၵေႃႈထုၵ်ႇလႆႈမေႃၵႅတ်ႇၶႄလုၵ်ႈႁဵၼ်း၊ လိုၼ်းသုတ်း ၸဝ်ႈၼႃႈတီႈဝၢၼ်ႈမိူင်းၼႆႉ မီးပုၼ်ႈၽွၼ်း ယႂ်ႇတီႈသုတ်း၊ ၸဝ်ႈၼႃႈတီႈဝၢၼ်ႈမိူင်းသမ်ႉ လပ်းႁူလပ်းတႃသေပွႆႇႁဵတ်းယူႇ၊ ပွႆႇႁဵတ်းၵူၺ်းဢမ်ႇၵႃး ၸဝ်ႈၼႃႈတီႈ သမ်ႉႁဵတ်းသေၶၢႆဢွၵ်ႇပေႃးၼႆတႄႉ ၶိူဝ်းႁၢႆယဝ်ႉ။ တႆးႁဝ်းၼႆႉ ႁဝ်းႁူပ်ႉၽူႈလူင်ႉလႅၼ်ႇၵေႃႉၼိုင်ႈ မၼ်းပဵၼ်ၾၢႆႇ ၶူၼ်ႉၶႂႃႉ ၶိူဝ်းၵူၼ်းၼႂ်းၸိုင်ႈမိူင်းႁူမ်ႈတုမ် မိူင်းမၢၼ်ႈ ဝႃႈ ပေႃးမႃးထတ်းတူၺ်း တႆးၼႆႉမၼ်းသူင်(ၵျိူၵ်ႈ)လွင်ႈငမ်းယဵၼ်၊ သူင်လွင်ႈမူၼ်ႈသိူဝ်း၊ ဢၼ်သုမ်းမိူင်းမႃးၼႆႉ ပေႃးထတ်းတူၺ်း တင်ႈတႄႇပွတ်းႁွင်ႇ၊ တင်ႈတႄႇဢဝ်မိူင်းၶႄႇ လူင်းမႃး ၼႆႉ  မၼ်းဢမ်ႇၵၢၼ်ႉယွၼ်ႉ လွင်ႈသိုၵ်းယွၼ်ႉသိူဝ်၊ ၵၢၼ်ႉယွၼ်ႉလွင်ႈၵတ်းလွင်ႈယဵၼ်။