ပူၼ်ႉမႃးမိူဝ်ႈဝၼ်းသဝ် တီႈ 28/06/2014 ၼႆႉ ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ ဢိၵ်ႇ ၽွင်းလူင် 5 ၵေႃႉ၊ ဢွၵ်ႇၶၢဝ်းတၢင်းႁွတ်ႈထိုင်ပွတ်းထုင်ႉမၢဝ်း၊ ၵႂႃႇႁူပ်ႉထူပ်းၸဝ်ႈႁႆႈၸဝ်ႈၼႃး၊ လူင်းပိုၼ်ႉတီႈႁူပ်ႉထူပ်း ပေႃႈမႄႈၵူၼ်း ဝၢၼ်ႈၵူၼ်းမိူင်းသေ ၸႂ်ႉထွၼ်ဢွၵ်ႇပႅတ်ႈလၵ်းၶႅၼ်ႈလႅၼ်လိၼ် ဢၼ်ၾၢႆႇတႅၵ်ႈၼႃႈလိၼ် သွင်ၸိုင်ႈမိူင်း ႁူမ်ႈၵၼ်မႃး ပၵ်းဝႆႉၼၼ်ႉ။

ၵဵဝ်ႇၵပ်းလွင်ႈၼႆႉ ၸွမ်ၽွင်းလူင်မိူင်းတႆး ၵႂႃႇထိုင်တီႈတႃႈႁိူဝ်း ဝၢၼ်ႈၵုင်းသႃႇသေ ႁူပ်ႉဢုပ်ႇၸဝ်ႈၼႃႈတီႈ ၾၢႆႇၵမ်ႉၸွႆႈ ၵၢၼ်ၽွင်းငမ်း ၸႄႈဝဵင်းၼမ်ႉၶမ်း၊ သြႃႇၸၢႆးဢွင်ႇဝိၼ်းၵေႃႈ သပ်းလႅင်းၼႄၵဵဝ်ႇၵပ်းလွင်ႈလႅၼ်လိၼ် ထိုင်ၸွမ်ၽွင်း လူင်မိူင်းတႆးႄလႈ ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ ၵေႃႈလၢတ်ႈဝႃႈတေၶပ်းၶိုင်ပၼ် ႁႂ်ႈၸွမ်းပိူင်ထုၵ်ႇမႅၼ်ႈ မၼ်း။ ၵွပ်ႈၼၼ် လၵ်းဢၼ်ပၵ်းဝႆႉၸူဝ်ႈၶၢဝ်းၸိူဝ်းၼႆႉ ထွၼ်ဢွၵ်ႇပႅတ်ႈမူတ်းမူတ်းသေ ၸႂ်ႉလၵ်းဢၼ်ၵဝ်ႇဝႆႉၵွၼ်ႇ။ သင်ၸိူဝ်ႉဝႃႈမီးပၼ်ႁႃမႃးၵေႃႈ ၸင်ႇၵွႆႈတႅၵ်ႈၵၼ်ၶိုၼ်းမႂ်ႇမႂ်ႇ- ၾၢႆႇၽွင်းငမ်းဢိူင်ႇၸႄႈႁႆး ၽူႈဢၼ်ၵႂႃႇၶဝ်ႈႁူမ်ႈ ပၢင်ႁူပ်ႉ ထူပ်း ၸွမ်ၽွင်းလူင်မိူင်းတႆး လၢတ်ႈ။

ၸွမ်ၽွင်းလူင်မိူင်းတႆးလႄႈ ၽွင်းလူင်ၸိူဝ်းၼႆႉ ႁွတ်ႈမႃးတီႈထုင်ႉမၢဝ်း မိူဝ်ႈဝၼ်းတီႈ 28/06/2014 ။ ႁူပ်ႉထူပ်းၵူၼ်း ဝၢၼ်ႈၵူၼ်းမိူင်း ၼႂ်းၸႄႈတွၼ်ႈမူႇၸႄႈ မိူၼ်ၼင်ႇၼႂ်းၸႄႈဝဵင်းမူႇၸႄႈ / ၼမ်ႉၶမ်း / ၵူတ်ႉၶၢႆ ၸိူဝ်းၼႆႉ။ တီႈပၢင် ႁူပ်ႉထူပ်းၵူၼ်းမိူင်း ဢၼ်ၸတ်းတီႈႁူင်းႁေႃသိူဝ်ၽိူၵ်ႇ တီႈဝဵင်းၼမ်ႉၶမ်းၼၼ်ႉ မီးၸဝ်ႈၼႃႈတီႈၵူႈႁွင်ႈၵၢၼ်၊ ၾၢႆႇၵမ်ႉ ၸွႆႈၵၢၼ်ၽွင်းငမ်း ပႃးၸဵမ်ၾၢႆႇၽွင်းငမ်းပွၵ်ႉယွမ်ႇ ဝၢၼ်ႈဢိူင်ႇၸိူဝ်းၼႆႉ မႃးႁူပ်ႉမွၵ်ႈ 300 ။ ၼႂ်းတိုဝ်ႉတၢင်းၼႆႉ ၸွမ်ၽွင်းလူင်မိူင်းတႆး လႆႈၸွႆႈထႅမ်ပၼ်ၼိုင်ႈၸႄႈဝဵင်း ငိုၼ်းတႃႇ 400 သႅၼ်၊ ပပ်ႉလိၵ်ႈတႅမ်ႈတီႈႁူင်းႁဵၼ်း ၼိုင်ႈၸႄႈ ဝဵင်းလႂ် 300 လူဝ်- ၼႆယဝ်ႉ။

ဝၢႆးသေႁူပ်ႉဢုပ်ႇဢူဝ်းၵၼ်ယဝ်ႉ ၸွမ်ၽွင်းလူင်ၸိုင်ႈတႆး ၵႂႃႇဢႅဝ်ႇယဵမ်ႈၸွမ်းသၢပ်ႇၼမ်ႉမၢဝ်း တီႈဢၼ်ဝႃႈ လၵ်းၶႅၼ်ႈ လႅၼ်လိၼ်မိူင်းၶႄႇ လၢမ်းၶႂၢၵ်ႈမႃးပၵ်းၼႂ်းသူၼ်ႁႆႈၼႃး ၵူၼ်းဝၢၼ်ႈၵူၼ်းမိူင်း။ တီႈလိၼ်သူၼ် ႁႆႈ ၼႃး ၵူၼ်းဝၢၼ်ႈ ၵူၼ်းမိူင်း ၸိူဝ်းပႃးၵႂႃႇၼႂ်းမိူင်းၶႄႇၼၼ်ႉ ဝၢၼ်ႈၵေးၶုၼ်၊ ဝၢၼ်ႈၼွင်၊ ဝၢၼ်ႈၵုင်းသႃႇ ၸိူဝ်းၼႆႉ။ ၽွင်းၸွမ် ၽွင်းလူင် မိူင်းတႆး ၵႂႃႇယဵမ်ႈၼၼ်ႉ ၵူၼ်းဝၢၼ်ႈၵူၼ်းမိူင်း ဢွၵ်ႇမႃးပႂ်ႉႁူမ်ၸူမ်းႁပ်ႉတွၼ်ႈ တင်းၼမ်။ တႅမ်ႈလိၵ်ႈသေ ယုၵ်ႉလိၵ်ႈၼႄဝႃႈ တီႈလိၼ်ၼႆႉ ပဵၼ်ၶွင်ပူႇမွၼ်ႇၼၢႆးယႃႈႁဝ်း မႃးၸဵမ်မိုၼ်ႉသိုၼ်းၵွၼ်ႇ၊ ႁဝ်းၶႃႈဢမ်ႇၶႂ်ႈသုမ်း တီႈလိၼ်ႁဝ်း၊ ထတ်းသၢင်ပၼ်ႁႂ်ႈထုၵ်ႇမႅၼ်ႈပဵၼ်ထမ်းသေ  ႁႂ်ႈပဵၼ်ၶွင်ၵူၼ်းဝၢၼ်ႈၵူၼ်းမိူင်းႁဝ်းၶိုၼ်းသေၵမ်း- ၵူၼ်းဝၢၼ်ႈၵူၼ်းမိူင်း ၼႄၵၢင်ၸႂ်လူၺ်ႈလၢႆးၵတ်းယဵၼ်သေ ႁပ်ႉတွၼ်ႈၸွမ်ၽွင်းလူင်ၸိုင်ႈတႆး ၵႂႃႇၼင်ႇၼႆ။