ႁွင်ႈၵၢၼ်ပၢႆးယူႇလီမိူင်းတႆး ယိုၼ်ႈယၢၼ်လၢတ်ႈဝႃႈ တီႈဝဵင်းတူၼ်ႈတီးၼႆႉ ၵူတ်ႇထတ်းၺႃး ၵူၼ်းမိူင်းၸပ်းတင်းပဵၼ် ၶႆႈဝတ်းယႂ်ႇ H1N1 4 ၵေႃႉလႄႈ ဢၼ်လႆႈထၢင်ႇထိူမ်ဝႃႈ မီးၸိူဝ်ႉမႅင်း H1N1 မီးယူႇ 3 ၵေႃႉ ဝႃႈၼႆ။


မိူဝ်ႈဝၼ်းတီႈ 09/08/2017 ၻွၵ်ႊတိူဝ်ႊ ၸၢႆးသေႃႇဝိၼ်းလၢႆႇဝႃႈ လႆႈႁပ်ႉႁူႉသဵၼ်ႈသၢႆမၢႆ ၵူၼ်းမိူင်းၸပ်းတင်းပဵၼ် ၸိူဝ်ႉမႅင်း မီး 4 ၵေႃႉ ၼႂ်းၼၼ်ႉ လုၵ်ႈဢွၼ်ႇယိင်း ဢႃယု 3 ၶူပ်ႇ ၼိုင်ႈၵေႃႉ၊  5 ၶူပ်ႇ ၼိုင်ႈၵေႃႉ၊ ၽူႈၸၢႆး ဢႃယု 37 ပီ ၼိုင်ႈၵေႃႉလႄႈ ၼၢင်းယိင်း ပႃးတွင်ႉ ဢႃယု 27 ပီ  ၼိုင်ႈၵေႃႉ။ တေႃႈလဵဝ် လုၵ်ႈဢွၼ်ႇယိင်း 2 ၵေႃႉလႄႈ ၼၢင်းယိင်းပႃးတွင်ႉၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလူင် ၼၢင်းယိင်းလႄႈ လုၵ်ႈဢွၼ်ႇ။ ၽူႈၸၢႆး ဢႃယု 37 ပီသမ်ႉ လႆႈယူတ်းယႃတူဝ်ဝႆႉတီႈ ႁူင်းယႃ ၸဝ်ႈၸၢမ်ႇထုၼ်း ၸႄႈဝဵင်းတူၼ်ႈတီး   ဝႃႈၼႆ။


ၻွၵ်ႊတိူဝ်ႊ ၸၢႆးသေႃႇဝိၼ်းလၢႆႇ ၵႅမ်ၽူႈၵွၼ်းႁွင်ႈၵၢၼ် ပၢႆးယူႇလီၵူၼ်းမိူင်း ၸႄႈမိူင်းတႆး လၢတ်ႈဝႃႈ “ တေႃႈလဵဝ်  လႆႈၵူတ်ႇထတ်းႁၼ်မႅၼ်ႈ ၵူၼ်းၸပ်းတင်းပဵၼ် ၶႆႈဝတ်းယႂ်ႇ H1N1 4 ၵေႃႉ ဢၼ်လႆႈထၢင်ႇထိူမ်ဝႃႈ မီးၸိူဝ်းမႅင်းသမ်ႉ မီး 3 ၵေႃႉ။ ၼႂ်းၶဝ် 3 ၵေႃႉၼႆႉ မိူဝ်ႈလဵဝ် တိုၵ်ႉၵူတ်ႇထတ်း ဝႆႉယူႇပႆႇလႆႈႁူႉၶေႃႈတွပ်ႇ” ဝႃႈၼႆ။

လုၵ်ႈဢွၼ်ႇယိင်း ဢႃယု 5 ၶူပ်ႇၼၼ်ႉ လႆႈတႄႇၵူတ်ႇထတ်းႁၼ်မႅၼ်ႈ ၾၢင်ႁၢင်ႈ တၢင်းပဵၼ် ၶႆႈဝတ်းယႂ်ႇ H1N1 တႄႇဝၼ်းတီႈ 04 လိူၼ်ဢွၵ်ႊၵၢတ်ႉသ် 2017 မႃး။ ၵူၺ်းၵႃႈ မိူဝ်ႈၼႆႉတႄႉ ငဝ်းလၢႆး လုၵ်ႈဢွၼ်ႇယိင်း ဢႃယု 5 ၶူပ်ႇ ၼၼ်ႉတေလႆႈဝႃႈ လီၶိုၼ်ႈမႃး။ လိူဝ်ၼၼ်ႉ လုၵ်ႈဢွၼ်ႇယိင်း ဢႃယု 3 ၶူပ်ႇတႄႉ တိုၵ်ႉလႆႈသႂ်ႇ ဢွၵ်ႊသိၼ်ႊ ၸိၼ်ႊဝႆႉယူႇ။ ၽူႈၸၢႆး ဢႃယု 37 ပီတႄႉ ယူႇလီၶိုၼ်ႈမႃးယဝ်ႉ ဝႃႈၼႆ။


ၼၢင်းယိင်းပႃးတွင်ႉ ဢႃယု 27 ပီတႄႉ လႆႈၽႃႇတွင်ႉသေဢဝ် လုၵ်ႈဢွၼ်ႇဢွၵ်ႇမႃးယဝ်ႉ။ ယၢမ်းလဵဝ်တႄႉဢဝ်လုၵ်ႈဢွၼ်ႇလႄႈမႄႈမၼ်းဝႆႉၵေႃႉတီႈသေ ယူတ်းယႃဝႆႉယူႇ။


ဢၼ်လႆႈထၢင်ႇထိူမ်ဝႃႈ  ၸပ်းၸိူဝ်ႉမႅင်း H1N1 ဝႆႉယူႇ 3 ၵေႃႉၼၼ်ႉတႄႉ ပဵၼ်ၽူႈယိင်းၵေႃႉၼိုင်ႈလႄႈ လုၵ်ဢွၼ်ႇယိင်း 2 ၵေႃႉလႆႈႁူႉၼင်ႇၼႆ။


မိူဝ်ႈၼႂ်း လိူၼ်ၵျုႊလၢႆႊ ပူၼ်ႉမႃးၼၼ်ႉ တီႈႁူင်းယႃသိုၵ်းၵဵင်းတုင် ၸိုင်ႈတႆးပွတ်းဢွၵ်ႇ ၵေႃႈၵူတ်းထတ်းၺႃး ၵူၼ်းၸပ်း တင်းပဵၼ် ၶႆႈဝတ်းယႂ်ႇ H1N1   သွင်ၵေႃႉ ဝႃႈၼႆ။


ၾၢင်ႁၢင်ႈတင်းပဵၼ်ၶႆႈဝတ်းယႂ်ႇ H1N1 ၼႆႉ မီးလူမ်းၼၢဝ်၊ ဢႆ၊ ၶေႃးၸဵပ်း၊ ၶူႈၼင်ၶူမ်း၊ မီးၼမ်ႉမုၵ်ႈ၊ ၸဵပ်းၸွမ်းၼိူဝ်ႉၸွမ်းတူဝ်၊ ႁူဝ်ၶႆႈ၊ ႁူဝ်ၸဵပ်း၊ ၵတ်းသၼ်ႇ၊  ထူၺ်ႈၸႂ်ႁႅင်း၊ ထူၺ်ႈၸႂ်ၵပ်ႉ၊ သူပ်းၶဵဝ်၊ မိုဝ်းမၢၼ်ႉၶဵဝ် ထိုင်တီႈလိုမ်းတူဝ် ၸဵမ်ၸိူဝ်းၼႆႉ။ ၽူႈဢၼ်ၸၢင်ႈၸပ်းတင်းပဵၼ် လႆႈငၢႆႈသမ်ႉ ၼၢင်းယိင်းပႃးတွင်ႉ မႄႈပုမ်လူင်၊ လုၵ်ႈဢွၼ်ႇဢႃယု 2 ပီ လူင်းတႂ်ႈ ၵူၼ်းလူင် ဢႃယု 65 ပီ ၶိုၼ်ႈၼိူဝ် ၸဵမ်ၸိူဝ်း ဝႃႈၼႆ။


ၼႂ်းပီ 2017 ၼႆႉ ၼႂ်းမိူင်းမၢၼ်ႈပတ်းပိုၼ်ႉ ၵူၼ်းပဵၼ်ၶႆႈဝတ်းယႂ်ႇၼမ်လိူဝ်ၵူႈပီ။ ၸွမ်းၼင်ႇၾၢႆႇ ပၢႆးယူႇလီၶဝ်ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ တေႃႇထိုင်ဝၼ်းတီႈ 9 လိူၼ်ဢေႃးၵတ်ႉသ်ၼႆႉ ၵူၼ်းၸပ်းၸိူဝ်ႉမႅင်း H1N1  ၼႂ်းမိူင်းမၢၼ်ႈပတ်းပိုၼ်ႉမီး 166 ၵေႃႉသေ ၵူၼ်းတၢႆယွၼ်ႉတၢင်းပဵၼ်ၼႆႉ မီးယူႇ 17 ၵေႃႉဝႃႈၼႆ။