ၽူႈတူင်ႉၼိုင်တူင်ႇဝူင်းၵူၼ်းလႄႈ သၽႃႇဝသိင်ႇဝႅတ်ႉလွမ်ႉ တီႈၼႂ်းပိုၼ်ႉတီႈၼမ်ႉမ ၸႄႈဝဵင်းသီႇပေႃႉ လႆႈလူႉတၢႆယွၼ်ႉတၢင်းပဵၼ်ပွတ်ႇ ဝႃႈၼႆ။


ၸၢႆးသီၶိူဝ်း ဢႃယု 24 ပီ ၵူၼ်းၼမ်ႉမ ၽူႈဢၼ်တူင်ႉၼိုင်လွင်ႈသၽႃႇဝ သိင်ႇဝႅတ်ႉလွမ်ႉ လႆႈလူႉတၢႆ မိူဝ်ႈဝၼ်းတီႈ 28/03/2017 တီႈႁိူၼ်းမၼ်းၸၢႆး ယွၼ်ႉတၢင်းပဵၼ်ပွတ်ႇ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF လၢတ်ႈဝႃႈ - “ လွင်ႈၵၢၼ်ၶုတ်းထၢၼ်ႇ ႁိၼ်တီႈၼမ်ႉမၼႆႉ မၼ်းတုမ်ႉတိူဝ်ႉ သၽႃႇဝ ၊ သူၼ်၊ ႁႆႈ၊ ၼႃး ႁဵတ်းႁႂ်ႈဢၢႆၵွင်ႉဢၢႆၵႂၼ်း တုမ်ႉတိူဝ်ႉၵူၼ်းမိူင်း လူမ်းတႃႇထူၺ်ႈၸႂ်ဢမ်ႇၸိုၼ်ႈသႂ်  ၸၢႆးသီၶိူဝ်းၼႆႉၵေႃႈ လႆႈလူႉသဵင်ႈယွၼ်ႉတၢင်းပဵၼ်ပွတ်ႇ မိူဝ်ႈလဵဝ်ၵူၼ်း ဢၼ်ဢမ်ႇယူႇလီဝႆႉၵေႃႉမီးမွၵ်ႈ 10 ၵေႃႉပၢႆ ”။


ၸၢႆးသီၶိူဝ်းၼႆႉ ပဵၼ်လုၵ်ႈႁဵၼ်းၵဝ်ႇႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး SSSNY လႄႈမိူဝ်ႈ ဝၼ်းတီႈ 02/08/2017 ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး SSSNY ဢွၼ်ႁူဝ်ၼမ်းၼႃႈ လၢႆၸုမ်းၸတ်းႁဵတ်း ပၢင်လူႇတၢၼ်း မီးၽူႈယႂ်ႇၵူၼ်းလူင်မိူၼ်ၼင်ႇ ဢႃးၸၼ်ၽိပ်ႉၽႃး၊ ၼၢင်းၸၢမ်တွင်း၊ ၶူးလႄႈလုၵ်ႈႁဵၼ်း ၊ ၸုမ်းတႆးလၢႆၸုမ်း ဢိၵ်ႇၽူႈသူၼ်ၸႂ်လၢႆၵေႃႉၶဝ်ႈႁူမ်ႈ တင်းမူတ်း20ပၢႆ။


ၸၢႆးဢွင်ႇပႃႉ ၽူႈၶဝ်ႈႁူမ်ႈၼႂ်းပၢင်လူႇတၢၼ်း လၢတ်ႈဝႃႈ - “ ၸၢႆးသီၶိူဝ်းၼႆႉ ပဵၼ်ၵူၼ်းၼုမ်ႇဢၼ်မီး တၢင်းၶတ်း ၸႂ် တူင်ႉၼိုင်ႁဵတ်းၵၢၼ်ၼႂ်းတူင်ႇဝူင်းၵူၼ်းလႄႈ ပႂ်ႉပႃးႁၵ်ႉသႃ သိင်ႇဝႅတ်ႉလွမ်ႉ ၸိူဝ်းၼႆႉ ဢၼ်မၼ်း ၸၢႆးလူႉ တၢႆၵႂႃႇၼႆႉ ပဵၼ်ဢၼ်မွင်ၸႂ်သေလၢႆတႄႉတႄႉ” ဝႃႈၼႆ။


ၼႂ်းပိုၼ်ႉတီႈၼမ်ႉမႃႉၼႆႉ ၶွမ်ႊပၼီႊ ငူၺ်ႇယီႊပရႄး ဢၼ်တင်ႈႁူင်းၵၢၼ်ဝႆႉတီႈ တိူင်းဝဵင်းလိူဝ်ႇ (မၼ်းတ လေး) တႄႇမႃးၶုတ်းထၢၼ်ႇႁိၼ် ပီ 2004။ မီးဢွင်ႈတီႈၶုတ်းထၢၼ်ႇႁိၼ်ယႂ်ႇလူင် 3 တီႈ။ တီႈၼိုင်ႈ တီႈပဵင်းသၢႆး လႆႈၵိုတ်းယင်ႉၵႂႃႇမိူဝ်ႈပီ 2015။ တႃႇသွင်တီႈ တီႈၼႃးၵုၼ် လႄႈပၢင်ငႃး တိုၵ်ႉၶုတ်းယူႇ တေႃႇဝၼ်းမိူဝ်ႈလဵဝ်။


ဢိူင်ႇၼမ်ႉမၼႆႉ မီးႁူဝ်ၵူၼ်းမွၵ်ႈ 1,500 ၊ တင်းမူတ်းမီးဝၢၼ်ႈၵူၼ်း 7 ဝၢၼ်ႈ၊ ႁဵတ်းၵၢၼ်လဵင်ႉတွင်ႉ လူၺ်ႈၵၢၼ်ႁႆႈ သူၼ် ၼႃး။


Photo by Sai Arntai & Aom Hseng