သင်ၶၸဝ်ႈ၊ ပီႈၼွင်ႉၵူၼ်းမိူင်းလႄႈ ၸုမ်းၵူၼ်းၼုမ်ႇတႆး ႁူပ်ႉထူပ်းၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းလၢႆးၶႃႈ တႃႇႁူမ်ႈမိုဝ်းႁဵတ်းၵၢၼ် ၵွင်ႉသၢၼ်ၵၼ် ပၼ်ပိုၼ်ႉႁူႉ ၵူၼ်းမိူင်း ၵဵဝ်ႇလူၺ်ႈလွင်ႈ ပဵၼ်ၽူႈဢွၼ် ႁူဝ်လီလႄႈလွင်ႈပၼ်ႁႃ ဢၼ်ဢမ်ႇမီးလွင်ႈၽဵင်ႇပဵင်း ၸဵမ်ၸိူဝ်းၼႆႉ ဝႃႈၼႆ။


ဝၼ်းတီႈ 01/08/2017 သင်ၶၸဝ်ႈ၊ ၵူၼ်းမိူင်းလႄႈ ၸုမ်းၵူၼ်းၼုမ်ႇတႆးလႄႈၸၢႆးၵျေႃႇၸေႇယ ၽူႈတႅၼ်း သၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1  ႁူပ်ႉထူပ်း ဢုပ်ႇဢူဝ်းတိူင်ႇပၢင်ႇလႅၵ်ႈလၢႆႈပၢႆးဝူၼ်ႉ တီႈဝတ်ႉ ဝိႁၢရ် ၵၢင်တူင်ႈ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ပၢင်ႁူပ်ႉထူပ်းၵၼ်ၼႆႉ မီးၽူႈၶဝ်ႈႁူမ်ႈဢုပ်ႇဢူဝ်း 20 ပၢႆ ။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းလၢႆးၶႃႈ လၢတ်ႈဝႃႈ “  တႃႇတေ ပဵၼ်လႆႈၽူႈဢွၼ်ႁူဝ်လီၵေႃႉၼိုင်ႈၼႆႉ လူဝ်ႇလႆႈလဵပ်ႈႁဵၼ်း၊ မီးလွင်ႈႁၢင်ႈႁႅၼ်းဝႆႉ။ ၸိူင်ႉၼင်ႇ တေလႆႈႁပ်ႉႁူႉ လွင်ႈပိုၼ်ႉထၢၼ်တီႇမူဝ်ႇၶရေႇသီႇ ၸိူင်ႉၼႆလူဝ်ႇလႆႈမီး။ လွင်ႈယူပ်ႈယွမ်းၼႂ်းဢိူင်ႇ ၼႂ်းဝၢၼ်ႈႁဝ်းၼၼ်ႉမီး သင်ၼႆလူဝ်ႇလႆႈႁူႉဢွၼ်တၢင်း။ ထႅင်ႈဢၼ်ၼိုင်ႈၵေႃႈ ႁဝ်းလူဝ်ႇမီးၵၢၼ်ႁၢင်ႈႁႅၼ်းဝႆႉ ယွၼ်ႉမိူင်းႁူမ်ႈတုမ် မိူင်းမၢၼ်ႈၼႆႉ တိုၵ်ႉပဵၼ်သိုၵ်းယိပ်းၵမ်ဝႆႉယူႇ မီးတိုဝ်ႉတၢင်းၸိူင်ႉႁိုဝ်ၵေႃႈလူဝ်ႇမေႃဝၵ်ႉဢဝ်၊ ပေႃးၵၢၼ်ဢုပ်ႉ ပိူင်ႇ ၺၢမ်ႉႁႅင်းၼႆ ဢိူင်ႇ၊ ဝၢၼ်ႈ ၵေႃႈဢမ်ႇၶိုၼ်ႈယႂ်ႇ။ တႃႇၽူႈဢွၼ်ႁူဝ်လီၼၼ်ႉ ပၢင်သွၼ်ၶၢဝ်းပွတ်းၼႆႉလူဝ်ႇလႆႈမီး ၊ မေႃသေဢမ်ႇမေႃသေ လူဝ်ႇလႆႈမီးၵၢၼ်ႁၢင်ႈႁႅၼ်းႁပ်ႉဢဝ်ဝႆႉပဵၼ်ပုၼ်ႈၽွၼ်းၵူၼ်းၼုမ်ႇ၊ လူဝ်ႇလႆႈႁူႉ လဵပ်ႈႁဵၼ်း လၵ်းမိူင်း 2008။ ၵၢၼ်မိူင်းဢၼ်ဝႃႈၼၼ်ႉ ၵၢၼ်ဢုပ်ႉပိူင်ႇဢိူင်ႇ ၊ ဝၢၼ်ႈ ၊ ဝဵင်း ၼႆႉ လုၵ်ႉတီႈၵူၼ်းမိူင်းသေ လိူၵ်ႈမႃး ယွၼ်ႉၼၼ် ဢႃႇၼႃႇၼၼ်ႉ ယူႇတီႈၵူၼ်းမိူင်း။ ပေႃးၽူႈဢွၼ်ႁူဝ် ဢမ်ႇႁွမ်ႁႅင်း ဢမ်ႇပၼ်လွင်ႈႁူမ်ႈမိုဝ်း ၊ဢမ်ႇပၼ် တိုဝ်ႉတၢင်း သႅၼ်းႁုၼ်ႈမႂ်ႇ ႁႂ်ႈၵႂႃႇၶိုၼ်ႈႁဵၼ်း၊ ၶိုၼ်ႈပၢင်သွၼ်သင်ၼၼ်ႉ တေႁဵတ်းႁိုဝ်ၶိုၼ်ႈယႂ်ႇၵႂႃႇမိူဝ်းၼႃႈ” ဝႃႈၼႆ။


ပၢင်ႁူပ်ႉထူပ်း ဢုပ်ႇဢူဝ်းလႅၵ်ႈလၢႆးၵၼ်ၼႆႉ ယူႇတီႈၵူၼ်းၼုမ်ႇတႆး ဝဵင်းလၢႆးၶႃႈ တုၵ်းယွၼ်းထိုင် တီႈၽူႈတႅၼ်း ႁႂ်ႈႁူမ်ႈၵၼ် ၸတ်းႁဵတ်းပၢင်သွၼ် ပၼ်ၵူၼ်းမိူင်း ၵူၼ်းၼုမ်ႇ ၸွမ်းၼႂ်းဢိူင်ႇ/ ဝၢၼ်ႈ ၵဵဝ်ႇၵပ်းလူၺ်ႈ ၵၢၼ်ပဵၼ် ၽူႈဢွၼ်ႁူဝ်လီ၊ သုၼ်ႇလႆႈသုၼ်ႇပဵၼ် ၼႂ်းတူင်ႇဝူင်းၵူၼ်း၊ ပိုၼ်ႉထၢၼ်တီႇမူဝ်ႇၶရေႇသီႇ လႄႈၵၢၼ်ၶၢဝ်ႇ ၸဵမ်ၸိူဝ်းၼႆႉ ဝႃႈၼႆ။


ၸၢႆးလႅင်းႁိူင်း ႁူဝ်ပဝ်ႈ ၸုမ်းၵူၼ်းၼုမ်ႇဝဵင်းလၢႆးၶႃႈ လၢတ်ႈဝႃႈ “ ၵူၼ်းၼုမ်ႇဢၼ်ဝႃႈၼႆႉ ပဵၼ်ၸုမ်းၵူၼ်းမိူင်း ဢၼ်ဢဵၼ်ႁႅင်းယႂ်ႇဢၼ်ၼိုင်ႈ။ ၸိူင်ႉၼင်ႇ လူင်ပွင်ၸိုင်ႈႁဵတ်းဢမ်ႇလီႁႃႉ ၊ ၸုမ်းလႂ်သေဢမ်ႇဝႃႈႁဵတ်း ဢမ်ႇလီႁႃႉ ၸိူဝ်းၼႆႉ တႃႇတေပူၵ်းပွင်မိူဝ်းၼႃႈၵေႃႈ ပဵၼ်ဢဵၼ်ႁႅင်းၵူၼ်း မိူင်းၵူၼ်းၼုမ်ႇမိူဝ်းၼႃႈ။ ပၢင်သွၼ်ၼႆႉ လမ်လွင်ႈ တႄႉ၊ သွၼ်ယဝ်ႉၵေႃႈ လူဝ်ႇလႆႈႁဵတ်းၵၢၼ်တႄႉတႄႉ ၊ သင်ႁဵၼ်းမႃးယဝ်ႉ ဢမ်ႇမႃးႁဵတ်း ၵၢၼ်တႄႉၼႆ တႃႇတေၶိုတ်းပိူၼ်ႈလႆႈၼၼ်ႉ တေဢမ်ႇမုင်ႈႁၼ်လႆႈ။ ဢၼ်ၶႂ်ႈပၼ်ႁႅင်းၸႂ်ၸုမ်းၵူၼ်းၼုမ်ႇ ထုင်ႉယိူင်းၶဝ် တႃႇ တေႃႇသူႈၶဵင်ႇတႃႉပၼ်ႁႃလႆႈၼၼ်ႉ လူဝ်ႇၵႅၼ်ႇၶႅင်လႆႈ လူဝ်ႇလႆႈမီးၸုမ်းၼႅၼ်ႈၼႃ  ၊ လူဝ်ႇလႆႈမီး ၵေႃႉလႂ်ၵေႃႉၼၼ်ႉ ႁပ်ႉဢဝ်ပုၼ်ႈၽွၼ်းတႅတ်ႈတေႃး ။ သင်မီးသဵၼ်ႈတၢင်းဢၼ် တၼ်ဢၼ်ဢမ်ႇပွင်ႇၼၼ်ႉ မီးၸုမ်းတင်းၼမ် တေယိုၼ်ႈမိုဝ်းၸွႆႈထႅမ်ယူႇ” ဝႃႈၼႆ။


လိူဝ်ၼၼ်ႉ ၽူႈၶဝ်ႈႁူမ်ႈၼႂ်းပၢင်ၵုမ် တၢင်ႇလၢတ်ႈ ၼႄလွင်ႈပၼ်ႁႃ မိူၼ်ၼင်ႇ ၵၢၼ်တူၺ်းထိုင် ဢမ်ႇမီးလွင်ႈ ၽဵင်ႇ ပဵင်း၊ လွင်ႈၶိုၼ်ႈယႂ်ႇဢမ်ႇမီး ဢမ်ႇလႅၵ်ႈလၢႆႈသင်၊ ဢၼ်ပၼ်လွင်ႈႁူမ်ႈမိုဝ်း တႃႇၶိုၼ်ႈယႂ်ႇ ဢမ်ႇမီး၊ လွင်ႈငိုၼ်း လူင်ပွင် ၸိုင်ႈပၼ်မႃးတႃႇမႄးဝၢၼ်ႈဢမ်ႇမီးလွင်ႈၸႅင်ႈလႅင်းတီႈၵူၼ်းမိူင်း ၊ ပၵ်းပိူင်ၼႂ်းဢိူင်ႇဝၢၼ်ႈမီးၸိူင်ႉႁိုဝ် ဢမ်ႇ ပွင်ႇထိုင် ၵူၼ်းဝၢၼ်ႈ ႁူႉ ၸဵမ်ၸိူဝ်းၼႆႉ။


ၵဵဝ်ႇၵပ်း လွင်ႈႁူပ်ႉထူပ်းၵၼ်ၼႆႉသေ ဢုပ်ႇဢူဝ်းလႆႈၸႂ် တႅပ်းတတ်းဝႃႈ တေၸတ်းႁဵတ်း ပၢင်သွၼ် ပၼ် ၵူၼ်းမိူင်းၵူၼ်းၼုမ်ႇၼႂ်းပိုၼ်ႉတီႈ ၸွမ်းဢိူင်ႇဝၢၼ်ႈ တႄႇဢဝ် ဝၼ်းတီႈ 17 - 20/08/2017 ဢွင်ႈတီႈ ဝတ်ႉၵၢင် တူင်ႈ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ။ ၽူႈတေ မႃးၶိုၼ်ႈပၢင်သွၼ်သမ်ႉ တေပဵၼ်ၽူႈတၢင်တူဝ် ၼႂ်းဢိူင်ႇ ၼႂ်းဝၢၼ်ႈ လၢႆလၢႆတီႈ ဝႃႈၼႆ။


Photo by ၽူၺ်း