မိူင်းႁူမ်ႈတုမ်မၢၼ်ႈ ပႆႇၶိုတ်းၸၼ်ႉဢႃႊသျဵၼ်ႊလႆႈ ယွၼ်ႉလူင်ပွင်ၸိုင်ႈပႆႇၸၢင်ႈႁဵတ်းၵၢၼ်လီလီၼႆ ၸဝ်ႈႁၢၼ်ယွင်ႁူၺ်ႈ ၽူႈတူင်ႉၼိုင်ႈလွင်ႈငမ်းယဵၼ်လၢတ်ႈ။


ဝၼ်းတီႈ11/08/2017 ၸၼ်ႉၸွမ်ၵဵင်းမႆႇ ၾၢႆႇၵၢၼ်ႁဵၼ်းလွင်ႈပူၵ်းပွင်ဝၢၼ်ႈမိူင်း (คณะรัฐศาสตร์)  ၸတ်းႁဵတ်းပၢင်ဢုပ်ႇၵုမ်ငဝ်းလၢႆး လွင်ႈၶိုၼ်ႈယႂ်ႇမႂ်ႇသုင်ဢႃႊသျဵၼ်ႊ လႄႈလွင်ႈၸၢဝ်းၶိူဝ်း တီႈၸၼ်ႉ ၸွမ်ၵဵင်းမႆႇ ၸိုင်ႈထႆး။

ၼႂ်းပၢင်ၼႆႉမီးၽူႈလူင်ႉလႅၼ်လၢႆၵေႃႉၶဝ်ႈႁူမ်ႈမိူၼ်ၼင်ႇ ၶူးသွၼ်လူင် Dr.ၽိထယႃႊ သူႊဝၶၼ်ႊ ၊ ၶူးပူင်သွၼ်လူင် ထီႊတီႊဝုတ်ႊ ဝုၼ်ႊယဝူင်းဝီႊဝတ်ႊၶျရႃႊ ၊ ၸဝ်ႈႁၢၼ်ယွင်ႁူၺ်ႈ  ၊ ၸဝ်ႈၶိုၼ်းသႂ် ၸႂ်ယဵၼ် ၊ ၶူးသွၼ်ၼႂ်းၸၼ်ႉၸွမ်၊ လုၵ်ႈႁဵၼ်းၸၼ်ႉၸွမ် လႄႈ ၽူႈသူၼ်ၸႂ်ၶဝ်ႈႁူမ်ႈထွမ်ႇငိၼ်းမွၵ်ႈ 50 ပၢႆ။


ဢုပ်ႇဢူဝ်းၵၼ်လၢႆလွင်ႈမိူၼ်ၼင်ႇ လွင်ႈဢႃႊသျဵၼ်ႊလႄႈ မိူင်းၶႄႇ၊ ၵၢၼ်ဢုပ်ႇဢူဝ်းလွင်ႈငမ်းယဵၼ်း ၼႂ်းဢႃႊသျဵၼ်ႊ၊ လွင်ႈလႅၼ်လိၼ်၊ လွင်ႈၸၢဝ်းၶိူဝ်းၸိူဝ်းၼႆႉ။


ၸဝ်ႈႁၢၼ်ယွင်ႁူၺ်ႈလၢတ်ႈဝႃႈ - “ မိူင်းႁူမ်ႈတုမ်မၢၼ်ႈၼႆႉၶဝ်ပႆႇ ၶိုတ်းဢႃႊသျဵၼ်ႊ ယွၼ်ႉလူင်ပွင် ၸိုင်ပႆႇၸၢင်ႈႁဵတ်းၵၢၼ်တႄႉတႄႉ ။ ၵူၺ်းၵႃႈသင်ၶဝ်ပိုတ်ႇ ႁႂ်ႈဢႃႊသျဵၼ်ႊ ၶဝ်ႈၸွႆႈၼမ်ၼမ်ၸိုင် မၼ်းတေလီ၊ လွင်ႈငမ်းယဵၼ်ၸိုင်ႈမိူင်းၵေႃႈ ပေႃးဢဝ်ၵူၼ်းမိူင်းပဵၼ်ပိူင်လူင်သေ ဢုပ်ႇဢူဝ်းပွင်ၵၢၼ် ၵွင်ႇ ၸင်ႇတေမီးလွင်ႈငမ်းယဵၼ် ”ဝႃႈၼႆ ။


ၸုမ်းဢႃႇသျဵၼ်ႊ ၸဵင်ႇၸၢၼ်းဝၼ်းဢွၵ်ႇ ၵုၼ်ဢေးသျႃးၼႆႉ လႆႈၽွတ်ႈတင်ႈမႃး မိူဝ်ႈၼႂ်းဝၼ်းထီႉ 08 August 1967 တီႈၼႂ်းဝဵင်းလူင် မိူင်းၵွၵ်ႇ ၸိုင်ႈထႆး။ မိူဝ်ႈလဵဝ် ၼႂ်းၸုမ်းဢႃႊသျဵၼ်ႊ တင်းမူတ်း မီးယူႇ 10-မိူင်း၊ မိူၼ်ၼင်ႇ ဢိၼ်ႇတူဝ်ႇၼီးသီႊယိူဝ်ႊ၊ မလေးသီႊယိူဝ်ႊ၊ ၽီႊလိပ်ႊပိၼ်ႊ၊ သိင်ႇၵ ပူဝ်ႊ၊ ထႆး၊ ပရူၼၢႆး၊ ၶႅမ်ႊပေႃႊတီႊယိူဝ်ႊ ၊ လၢဝ်း၊ မျၢၼ်ႇမႃႇလႄႈ ဝႅတ်ႊၼမ်ႊၸိူဝ်းၼႆႉ။ မိူင်းႁူမ်ႈတုမ် မျၢၼ်ႇမႃႇ ၶဝ်ႈပဵၼ်လုၵ်ႈၸုမ်း ဢႃႇသီႊယၼ်ႊ ၶွပ်ႈတဵမ် 20-ပီ ဝႃႈၼႆ။


ပူၼ်ႉမႃးမိူဝ်ႈ 08 August 2017  ၸုမ်းဢႃႊသျဵၼ်ႊ 10 မိူင်း ၸတ်းပၢင်ပွႆးၶွပ်ႈတဵမ် 50-ပီ တီႈ ဝဵင်းလူင်မၼီႊလႃႊ ၸိုင်ႈမိူင်းၽီႊလိပ်ႊပိၼ်ႊ ။