ၽူႈတႅၼ်းသၽႃးၸိူဝ်ႉၸၢတ်ႈ၊ ၽူႈတႅၼ်းသၽႃးၵူၼ်းမိူင်းလႄႈ ၾၢႆႇၽွင်းငမ်းၸႄႈဝဵင်းမိူင်းယႆ လူင်းပိုၼ်ႉတီႈဝၢၼ်ႈဢိူင်ႇ ႁူပ်ႉထူပ်းတွင်ႈထၢမ် ႁႂ်ႈၸၢင်ႈလႆႈၸွႆႈထႅမ်တၢင်းယၢပ်ႇ ၵူၼ်းဝၢၼ်ႈၵူၼ်းသူၼ်ဝႃႈၼႆ။


ဝၼ်းတီႈ 9 – 11 /8/2017 ၶၢဝ်းတၢင်း 3 ဝၼ်း ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း၊ ၽူႈတႅၼ်းသၽႃးၵူၼ်းမိူင်း ၸၢႆးႁၵ်ႉ(ၸၢႆးသီႇႁၵျေႃႇ) ဢိၵ်ႇၾၢႆႇၽွင်းငမ်း၊ ၾၢႆႇၶိုင်သၢင်ႈသဵၼ်ႈတႃႈသၢႆတၢင်း၊ ၾၢႆႇၼမ်ႉ၊ ၾၢႆႇၽုၵ်ႇသွမ်ႈ၊ ဢိၵ်ႇလၢႆႁွင်ႈၵၢၼ် ပႃးၸဵမ်ၽူႈၵွၼ်းပွၵ်ႉယွမ်ႇဝၢၼ်ႈဢိူင်ႇလူင်းပိုၼ်ႉတီႈၸွမ်း။

ၸၢႆးႁၵ်ႉလၢတ်ႈဝႃႈ -“ၵူၼ်းမိူင်းႁူပ်ႉတၢင်းယၢပ်ႇၽိုတ်ႇၸိူင်ႉႁိုဝ်၊ ၶႂ်ႈႁႂ်ႈၾၢႆႇလူင်ပွင်ၸိုင်ႈၶိုင်သၢင်ႈပၼ်ၸိူင်ႉႁိုဝ် ႁဝ်းၶႃႈတေလႆႈၵႄႈလိတ်ႈပၼ်သင်၊ တေလႆႈဢဝ်ၵႂႃႇဢုပ်ႇလၢတ်ႈၼႂ်းသၽႃး မီးဢီႈသင်ၸိူဝ်းၼႆႉ။ လွင်ႈတၢင်းယၢပ်ႇ ဢၼ်ၵူၼ်းမိူင်းတုၵ်းယွၼ်းၼၼ်ႉ ဢၼ်ၵႄႈလိတ်ႈပၼ်လႆႈ ႁႂ်ႈၾၢႆႇလူင်ပွင်ၸိုင်ႈ ၶဝ်ၵႄႈလိတ်ႈပၼ်ၸွမ်းၵမ်းလဵဝ်၊ ၵူႈပွၵ်ႈၵူၼ်းမိူင်းဢမ်ႇႁတ်းလၢတ်ႈတီႈ ၽူႈမီးပုၼ်ႈၽွၼ်းၶဝ်၊ မိူဝ်ႈလဵဝ်ပႃးတႅၼ်းၽွင်း (ၽူႈတႅၼ်း) ၵူၼ်းမိူင်းမႃးၸွမ်းလႄႈ ၶဝ်ၵေႃႈမီးႁႅင်းၸ်ႂ ၶဝ်ၵေႃႈႁတ်းလၢတ်ႈႁတ်းၸႃ”- ဝႃႈၼႆ။


ၵူၼ်းမိူင်းၼႂ်းပိုၼ်ႉတီႈပွတ်းဝၢၼ်ႈဢိူင်ႇ - ဢိူင်ႇဝၢၼ်ႈၽႅတ်ႈ၊ ၶူဝ်သၢႆး၊ ၼႃးၶူဝ်၊ မိူင်းႁႃႉ၊ မိူင်းႁႅင်း ၊ဝၢၼ်ႈၵိဝ်ႇ၊ ဝၢၼ်ႈၾၢႆႇ၊ မိူင်းၵၢဝ်၊ ဝၢၼ်ႈၸၢင်ႉ၊ ႁူဝ်တိုဝ်ႉ၊ ပၢင်လၢင်း၊ ၵုင်းၸူင်၊ ႁူဝ်ယႃႉ၊ ၼွင်မူဝ်၊ ၵွင်းမွင်၊ လွႆငိုၼ်း ၸိူဝ်းၼႆႉ။


ၸၢႆးႁၵ်ႉလၢတ်ႈထႅင်ႈဝႃႈ-“ ဢၼ်ၵူၼ်းမိူင်းတုၵ်းယွၼ်းတႄႉ ပဵၼ်လွင်ႈၼမ်ႉၵိၼ်ၼမ်ႉၸႂ်ႉ၊ ထႅင်ႈဢၼ်သမ်ႉလွင်ႈသဵၼ်ႈတႃႈသၢႆတၢင်း၊ ထီႉသၢမ်တႄႉပဵၼ်လွင်ႈႁူင်းႁဵၼ်း၊ မၢင်တီႈႁူင်းႁဵၼ်းၵႅပ်ႈ၊လဵၵ်ႉ၊ မၢင်တီႈသမ်ႉယွၵ်းၽင်ႉၾူၼ်ႁူဝ်ႈ - လူဝ်ႇႁဵတ်းပၼ်ဢၼ်မႂ်ႇ။ မိူၼ်ၼင်ႇၼႂ်းဢိူင်ႇၶူဝ်သၢႆး သမ်ႉဢမ်ႇမီးႁူင်းယႃ ဢမ်ႇမီးမေႃယႃၸိူဝ်းၼႆႉ။ ယွၼ်ႉၾိင်ႈၾႃႉဢမ်ႇၽဵင်ႇၾူၼ်ဢမ်ႇတူၵ်း ဢမ်ႇမီးၼမ်ႉတႃႇၽုၵ်ႇသွမ်ႈၸိူဝ်းၼႆႉ တီႈဢၼ်ႁဵတ်းပၼ်လႆႈၵေႃႈ တေၶိုင်ပၼ်ႁႂ်ႈမီးတႅၼ်ႈမီးၾၢႆႁွင်ႈမိူင်ၸိူဝ်းၼႆႉ “ - ဝႃႈၼႆ။


ၼႂ်းၸႄႈဝဵင်းမိူင်းယႆၼႆႉ မၢင်ဝၢၼ်ႈၺႃးတၢမ်ႇသိုၵ်းတၢမ်ႇသိူဝ်၊ မၢင်ဝၢၼ်ႈယူႇပိၵ်ႇထိူၼ်ႇႁၢင်ၶိူဝ်း၊ လူင်ပွင်ၸိုင်ႈပၢၼ်သိုပ်ႇပၢၼ်ဢမ်ႇလူင်းပိုၼ်ႉတီႈ တူၺ်းထိုင် ဝႆႉမၢင်ဝၢင်းႁဵဝ်ႇ၊ ၵၢၼ်ၵႂႃႇမႃးၵေႃႈယၢပ်ႇ၊ ၵမ်ႈၼမ်ႁဵတ်းၵၢၼ်ႁႆႈၵၢၼ်သူၼ် - လွင်ႈယၢပ်ႇၽိုတ်ႇၵူၼ်းမိူင်း၊ ဢၼ်ၵူၼ်းမိူင်းၶႂ်ႈလႆႈၶႂ်ႈပဵၼ်ၸိူဝ်းၼႆႉ ၼင်ႇႁိုဝ်ပေႃးတေၸၢင်ႈၵႄႈလိတ်ႈၸွႆႈထႅမ်လႆႈၼၼ်ႉ တေသၢၼ်မိုဝ်းတင်းၽူႈမီးပုၼ်ႈၽွၼ်း ၼႂ်းလူင်ပွင်ၸိုင်ႈသေ တေၵႆႉလူင်းပိုၼ်ႉတီႈၵႂႃႇၼႆ ၸၢႆးႁၵ်ႉလၢတ်ႈၼႄၼင်ႇၼႆ။