ၸုမ်းၵပ်းသၢၼ်လွင်ႈၼၢင်းယိင်းတႆး SWAN ၸတ်းႁဵတ်းပၢင်ၾိုၵ်းၽွၼ်ႉ ယုၵ်ႉမုၼ်းၼမ်ႉၵတ်ႉတႃႇ ႁႂ်ႈပဵၼ်မႃး ၽူႈဢွၼ်ႁူဝ်မိူဝ်းၼႃႈလႄႈ မေႃႁဵတ်းၵၢၼ်ႁူမ်ႈၼႂ်းတူင်ႇဝူင်း ၽူႈၶိုၼ်ႈလဵပ်ႈႁဵၼ်းၸမ် 20 ၵေႃႉ။

Photo: SWAN  Kenneri

ၸုမ်းၵပ်းသၢၼ်လွင်ႈၼၢင်းယိင်းတႆး Shan Women's Action Network (SWAN) ၸတ်းႁဵတ်း ပၢင်ၾိုၵ်းၽွၼ်ႉ ယုၵ်းမုၼ်းၼမ်ႉၵတ်ႉၼၢင်းယိင်း တီႈၵဵင်းမႆႇ။ မီးတူဝ်တႅၼ်းၼၢင်းယိင်းလၢႆတီႈ မိူၼ် ၼင်ႇ ၼၢင်းယိင်းၼႂ်းပႃႇတီႇႁူဝ်သိူဝ်၊ သိူဝ်ၽိူၵ်ႇ၊ ပႃႇတီႇတႆးလႅင် ဢိၵ်ႇၽူႈသူၼ်ၸႂ်ၶဝ်ႈႁူမ်ႈ ၸမ် 20 ၵေႃႉ။ ပၢင်သွၼ်ၸတ်းဝၼ်းတီႈ 29 /05 – 16 /06/2017 တီႈၵဵင်းမႆႇ ၸိုင်ႈထႆး။


ၼႂ်းပၢင်ၼႆႉ ပူင်သွၼ်ပၼ်မိူၼ်ၼင်ႇ လၢႆးႁဵတ်းၵၢၼ်ပဵၼ်မူႇၸုမ်း၊ သုၼ်ႇလႆႈၼၢင်းယိင်း၊ လွင်ႈၵၢၼ် မိူင်း၊ ၶၵ်ႉတွၼ်ႈလွင်ႈငမ်းယဵၼ်၊ လွင်ႈၽူႈဢွၼ်ႁူဝ်၊ လွင်ႈပိုၼ်းၸိူဝ်းၼႆႉ၊ ၽူႈပူင်သွၼ်ပၼ်ပဵၼ် ၼၢင်းၶမ်းယၢတ်ႇ၊ ၼၢင်းယိင်းလၢဝ်၊ ၶူးၶိုၼ်းသႂ် ၸႂ်ယဵၼ် ၸိူဝ်းၼႆႉ။


ၽူႈမီးပုၼ်ႈၽွၼ်း ၼႂ်းၸုမ်းၵပ်းသၢၼ်ၼၢင်းယိင်းတႆး လၢတ်ႈဝႃႈ - “ ယိူင်းဢၢၼ်းဢၼ်ႁဝ်းၶႃႈ ၸတ်းႁဵတ်းတႄႉၵေႃႈ ပိူဝ်ႈတႃႇတေၽိူမ်ႉထႅမ်ၼမ်ႉၵတ်ႉ ၼၢင်းယိင်း ၼင်ႇႁိုဝ်တေပဵၼ်မႃးလႆႈ ၽူႈဢွၼ်ႁူဝ်မိူဝ်းၼႃႈ ၊ၸွႆႈထႅမ်ၼႂ်းတူင်ႇဝူင်းၵူၼ်း၊ ႁဵတ်းၵၢၼ်ႁူမ်ႈၼႂ်းတူင်ႇဝူင်းၵူၼ်း၊ မီးသုၼ်ႇ ၶဝ်ႈႁူမ်ႈပႃးၼႂ်းၶၵ်ႉတွၼ်ႈလွင်ႈငမ်းယဵၼ်ၸိူဝ်းၼႆႉ ” ဝႃႈၼႆ။


ၸုမ်းၵပ်းသၢၼ် လွင်ႈၼၢင်းယိင်းတႆး (SWAN) ၼႆႉ ၵေႃႇတင်ႈမႃးမိူဝ်ႈ 28 March 1999 ပၵ်းလုမ်း တီႈဝဵင်းၵဵင်းမႆႇ ၸိုင်ႈထႆး။ တႄႇပၢၼ်လူင်ပွင်ၸိုင်ႈ တဵင်းၸဵင်ႇမႃးၶဝ်ႈပၵ်းလုမ်းၼႂ်းမိူင်းတႆးသေ တူင်ႉ ၼိုင်ၵၢၼ်ငၢၼ်းလၢႆလွင်ႈ ပိူင်လူင်တႄႉတူင်ႉၼိုင် - ပူၵ်းပွင်ႁႂ်ႈၼၢင်းယိင်းတႆးမီးၼမ်ႉၵတ်ႉ၊ ႁႂ်ႈၼၢင်း ယိင်းတႆးမီးသုၼ်ႇလႆႈၽဵင်ႇပဵင်း။