ၵူၼ်းမိူင်း ၼႂ်းဢိူင်ႇသၢႆးၶၢဝ် ၸႄႈဝဵင်းၼမ်ႉတူႈၸိူဝ်း ပၢႆႈၽေးမႃးယူႇတီႈ ဝတ်ႉၶမ်းမုင်ႈသႃႇၼၼ်ႉ ဢွၼ်ၵၼ် ပွၵ်ႈၶိုၼ်း ႁိူၼ်းယေးၽႂ်မၼ်းယဝ်ႉၼႆ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေး လၢတ်ႈ။


ဝၼ်းတီႈ 30/05/2017 တင်ႈတႄႇၵၢင်ၼႂ် ၵူၼ်းပၢႆႈၽေးသိုၵ်း ၸိူဝ်းမႃးယူႇသဝ်းဝႆႉတီႈ ဝတ်ႉၶမ်းမုင်ႈသႃႇ 147 ၵေႃႉ ဢွၼ်ၵၼ်ပွၵ်ႈၶိုၼ်း ႁိူၼ်းယေးၽႂ်မၼ်းၸိူဝ်းပွၵ်ႈမိူဝ်းၼၼ်ႉ ပဵၼ်ၵူၼ်းဢိူင်ႇသၢႆးၶၢဝ် ဝၢၼ်ႈပၢင်ဝူဝ်း၊ ဝၢၼ်ႈမႅင်း သေႃႉ၊ ဝၢၼ်ႈသၢႆးၶၢဝ်၊ ဝၢၼ်ႈၼမ်ႉၵၢၼ်ႇ ဝၢၼ်ႈႁၢၼ်ႇလႅင်၊ ဝၢၼ်ႈပၢင်မၢၵ်ႇၶိူဝ်၊ ဝၢၼ်ႈၵုင်း သႃႇလႄႈ ဝၢၼ်ႈပိင်းၺွင်း ၸဵမ်ၸိူဝ်းၼႆႉ ဝႃႈၼႆ။

လုင်းၸၢႆးပၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေး ၸႄႈဝဵင်းၼမ်ႉတူႈ လၢတ်ႈဝႃႈ “ ယူႇတီႈၶွမ်ႊမ တီႊၾၢႆႇၸွႆႈထႅမ်ၵူၼ်းပၢႆႈၽေး ၸႄႈဝဵင်းၼမ်ႉတူႈႁဝ်းသေ ဢဝ်ပုၼ်ႈၽွၼ်း တေႃႉသူင်ႇပၼ်ပီႈၼွင်ႉၵူၼ်းဝၢၼ်ႈ ၼႂ်းဢိူင်ႇသၢႆးၶၢဝ် ပွၵ်ႈမိူဝ်းၶိုၼ်းႁိူၼ်းၽႂ်မၼ်းယဝ်ႉ။ တီႈဝတ်ႉၶမ်း မုင်ႈသႃႇတႄႉ ဢမ်ႇမီးယဝ်ႉ ၵူၼ်းပၢႆႈၽေး ဢွၼ်ၵၼ်ပွၵ်ႈမိူဝ်းယဝ်ႉ။ ၵွၼ်ႇမိူဝ်ႈတေပွၵ်ႈမိူဝ်းၼၼ်ႉ ယူႇတီႈပီႈၼွင်ႉၵူၼ်းပၢႆႈၽေးႁဝ်း ၶဝ်ၵေႃႈ ဢွၼ်ၵၼ်ၵႂႃႇ လဵပ်ႈတူၺ်းတီႈၼႂ်းဢိူင်ႇဝၢၼ်ႈၶဝ်ယူႇၼင်ႇၵဝ်ႇ မိူၼ်ၼင်ႇ ၸွမ်းႁိမ်းႁွမ်းၸိူဝ်းၼၼ်ႉၵေႃႈ ၸိူဝ်းပဵၼ် ၸုမ်းတ ဢၢင်းၶဝ် ဢမ်ႇမီးယဝ်ႉ ၼႆလႄႈ ၶဝ်လႆႈမိူဝ်းၵႂႃႇ၊ ၶဝ်ယုမ်ႇယမ် ဝႃႈတီႈၶဝ်ၵတ်းယဵၼ်ယဝ်ႉၼႆ ၸင်ႇဢွၼ် ၵၼ်ပွၵ်ႈၶိုၼ်း မိူဝ်းမူတ်းယဝ်ႉ” ဝႃႈၼႆ။


သိုၵ်းလွႆ TNLA တင်းသိုၵ်းမၢၼ်ႈပဵၼ်ပၢင်တိုၵ်းၵၼ်၊ သိုၵ်းလွႆတင်းသိုၵ်း RCSS ၶဵင်ႈၶႅင်ၵၢၼ်သိုၵ်း ၵၼ်လႄႈ ၵူၼ်းမိူင်းၼႂ်းဢိူင်ႇသၢႆးၶၢဝ် ၸိူဝ်းပွၵ်ႈမိူဝ်းၸိူဝ်းၼၼ်ႉ ပၢႆႈမႃးယူႇတီႈဝတ်ႉၶမ်းမုင်ႈသႃႇ မိူဝ်ႈဝၼ်းတီႈ 11/05/2017 ၼၼ်ႉၵူၺ်း ဝႃႈၼႆ။


တေႃႈလဵဝ် ၵူၼ်းပၢႆႈၽေးသိုၵ်းဢၼ်တိုၵ်ႉမီးယူႇတီႈ ၼႂ်းၸႄႈဝဵင်းၼမ်ႉတူႈၼႆႉ တင်းမူတ်း မီး 5 တီႈ မိူၼ်ၼင်ႇ 1) တီႈဝၢၼ်ႈၵိဝ်ႇသေႃႉ လင်းႁိူၼ်းမီး 60 လင် ႁူဝ်ၵူၼ်း ၽူႈၸၢႆး 125 ၵေႃႉ၊ ယိင်း 127 ၵေႃႉ ႁူမ်ႈ 252 ၵေႃႉ။ 2) ၵျွင်းၶရိတ်ႉ လီႇသူး ပွၵ်ႉ 8 လင်ႁိူၼ်းမီး 23 လင်၊ ၸၢႆး 47 ၵေႃႉ၊ ယိင်း 50 ၵေႃႉ ႁူမ်ႈ 97 ၵေႃႉ။ 3) ၵျွင်းၶရိတ်ႉ (K.B.C 1 ) ၶၢင် လင်ႁိူၼ်း 36 လင်၊ ၸၢႆး 72 ၵေႃႉ၊ ယိင်း 88 ၵေႃႉ ႁူမ်ႈ 160 ၵေႃႉ။ 4) ၵျွင်းၶရိတ်ႉ(K.B.C 2) ၶၢင် လင်ႁိူၼ်းမီး 7 လင်၊ ၽူႈၸၢႆး 9 ၵေႃႉ၊ ၽူႈယိင်း 16 ၵေႃႉ ႁူမ်ႈ 25 ၵေႃႉ ပၢင်သဝ်းၵူၼ်းပၢႆႈၽေးသိုၵ်း 4 တီႈၼႆႉ ပဵၼ်ပီႈၼွင်ႉၼႂ်းၸႄႈ ဝဵင်းမၢၼ်ႈတူင်ႈ ဢွၼ်ၵၼ်ပၢႆႈၽေးမႃး မိူဝ်ႈပီ 2016 လိူၼ်ၵျုၼ်ႊတင်း လိူၼ်ၵျူႊလၢႆႊ ၸဵမ်ၸိူဝ်းၼႆႉ ႁူမ်ႈၵၼ် လင်ႁိူၼ်းတင်းမူတ်းမီး 126 လင်၊ ၵူၼ်းၸၢႆး 253 ၵေႃႉ၊ ယိင်း 281 ၵေႃႉ ႁူမ်ႈၵၼ် 534 ၵေႃႉ ဝႃႈၼႆ။


ၸုမ်းယိပ်းၵွင်ႈၵၢင်ႇၸၢဝ်းၶိူဝ်းဢၼ်တူင်ႉၼိုင်ၵႂႃႇမႃး တၢင်းပွတ်းၸႄႈဝဵင်းၵျွၵ်ႉမႄးသမ်ႉ တပ်ႉသိုၵ်းမၢၼ်ႈ၊ တပ်ႉသိုၵ်းတဢၢင်းလႄႈ တပ်ႉသိုၵ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး လိူဝ်ၼၼ်ႉ ဢိၵ်ႇထႅင်ႈလၢႆလၢႆ ၸုမ်း ဝႃႈၼႆ။


ၸုမ်း Myanmar Peace Monitor ႁၢႆးငၢၼ်းဝႃႈ - ၼႂ်းပီ 2016 ၵူၺ်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် 309 ပွၵ်ႈ ဝႃႈၼႆ။