ယူႇတီႈၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် ၸၢႆးသႅင်မိူင်း တၢင်ႇလၢတ်ႈၼႂ်းသၽႃး လွင်ႈၵၢၼ်ၶုတ်းထၢၼ်ႇ ႁိၼ် တီႈမိူင်းၵိုင် ဢၼ်ၵူၼ်းမိူင်းသၢၼ်ၶတ်းသေ ၶွမ်ႊပၼီႊသမ်ႉသိုပ်ႇၶုတ်းယူႇ။


ဝၼ်းတီႈ 31/05/2017 ၽွင်းလူင် ၾၢႆႇႁိၼ်ႁႄႈ ၶူဝ်းတိုၼ်းသၽႃႇဝ ဢူးဢူင်းမိၼ်ႉ တွပ်ႇလၢတ်ႈပၼ် ၼႂ်းပၢင်ၵုမ် သၽႃးၵူၼ်းမိူင်း တီႈၼေႇပျီႇတေႃႇ လွင်ႈၵၢၼ်ၶုတ်းထၢၼ်ႇႁိၼ်တီႈမိူင်းၵိုင် ဢၼ်ၽူႈတႅၼ်း သၽႃးၵူၼ်းမိူင်း ၸႄႈဝဵင်းမိူင်းၵိုင် ၸၢႆးသႅင်မိူင်း တၢင်ႇလၢတ်ႈ 3 ၶေႃႈၼၼ်ႉ။ ၵဵဝ်ႇၵပ်းလွင်ႈၼႆႉ ယူႇတီႈၽွင်းလူင် တွပ်ႇလၢတ်ႈဝႃႈ တေႃႈလဵဝ်ၼႆႉ သင်ႇၵိုတ်းယင်ႉဝႆႉယဝ်ႉၸူဝ်ႈၶၢဝ်း တေၶိုၼ်းဢုပ်ႇဢူဝ်းငူပ်ႉငီႉၸွမ်းလူင်ပွင်ၸိုင်ႈမိူင်းတႆးသေ ႁဵတ်းသၢင်ႈၵႂႃႇ  ဝႃႈၼႆ။

ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယူႇတီႈႁဝ်း တၢင်တူဝ်ၵူၼ်းမိူင်းသေ ထၢမ်ၵႂႃႇတီႈၼႂ်းသၽႃး 3 ၶေႃႈ 1) ႁဵတ်းသင်ဢမ်ႇလႆႈၵၢင်ၸႂ်ၵူၼ်းမိူင်း/ ဢမ်ႇဢဝ်လွင်ႈ ၵမ်ႉထႅမ်ၵူၼ်းမိူင်းသေ ပၼ်ၶႂၢင်ႉၶွမ်ႊပၼီႊၶုတ်းထၢၼ်ႇႁိၼ်။ 2) ဢၼ်ၵူၼ်းမိူင်းတုၵ်းယွၼ်း ႁႂ်ႈၶွမ်ႊပၼီႊ ထွၼ် ဢွၵ်ႇပၼ်ဝႆးဝႆး တေၶပ်းၶိုင်ပၼ်ၸိူင်ႉႁိုဝ်။ 3) ယွၼ်ႉပိူဝ်ႈ ၶုတ်းထၢၼ်ႇႁိၼ်သေလႄႈ လႆႈတုမ်ႉတိူဝ်ႉၵႂႃႇသိင်ႇဝႅတ်ႉ လွမ်ႉ၊ ပႃႇမႆႉၸိူဝ်းၼၼ်ႉ တေႁဵတ်းႁိုဝ် ပူၵ်းပွင်ပၼ်ၶိုၼ်း” ဝႃႈၼႆ။


ယူႇတီႈၽွင်းလူင် ဢူးဢူင်းမိၼ်ႉ တွပ်ႇလၢတ်ႈပၼ်ႁဝ်းတႄႉၵေႃႈ မၼ်းဢဝ်လၵ်းထၢၼ်ဢၼ်မီးလၢႆးမိုဝ်း ဢၼ်ၵႃႈ ပူၼ်ႉမႃး ၶႃႈႁၢပ်ႇၵၢၼ်ၶုၼ်ၶဝ် ၵမ်ႉထႅမ်လူင်းလၢႆးမိုဝ်း ဢဝ်မႃးၼႄ။ ပေႃးယဝ်ႉၵေႃႈ တေပူၵ်းပွင်ပၼ်ၶိုၼ်း တေၽုၵ်ႇ တူၼ်ႈမႆႉပၼ်ၶိုၼ်း။ ယဝ်ႉၵေႃႈ မၼ်းလၢတ်ႈထႅင်ႈဝႃႈ မၼ်းဢမ်ႇမီးလွင်ႈတုမ်ႉတိူဝ်ႉသင် ယူႇတီႈၽွင်းလူင်ၵေႃႈ ၵမ်ႉထႅမ်ထုၵ်ႇလီပၼ်ႁဵတ်းယူႇ။ ၵူၺ်းၵႃႈ ယွၼ်ႉၵူၼ်းမိူင်းသၢၼ်ၶတ်းတင်းၼမ်လႄႈ ၸွမ်းၼင်ႇၵၢင်ၸႂ်ၵူၼ်းမိူင်းသေ တေႃႈလဵဝ်ၼႆႉ လႆႈသင်ႇၵိုတ်းဝႆႉၸူဝ်ႈၶၢဝ်း။ ယဝ်ႉၵေႃႈ တေဢုပ်ႇၵၼ်တင်းလူင်ပွင်ၸိုင်ႈမိူင်းတႆးသေ တေႁဵတ်း သၢင်ႈၵႂႃႇ ဝႃႈၼႆ။


ၵဵဝ်ႇၵပ်းလွင်ႈၼႆႉ ၼႂ်းဝၼ်းတီႈ 24/04/2017 ၼၼ်ႉ သင်ႇၶွမ်ႊပၼီႊဢၼ်ၶုတ်းထၢၼ်ႇႁိၼ်တီႈၾၢႆႇၼိူဝ် ဝၢၼ်ႈ လွႆသဵဝ်ႈ ဢိူင်ႇဝၢၼ်ႈယၢတ်ႇ ၸႄႈဝဵင်းမိူင်းၵိုင် ၸႄႈ တွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၵိုတ်းယင်ႉဝႆႉ ၸူဝ်ႈၶၢဝ်း ဝႃႈၼႆ။


ယူႇတီႈသင်ၶၸဝ်ႈ ပီႈၼွင်ႉၵူၼ်းမိူင်း ၸႄႈဝဵင်းမိူင်းၵိုင် လႆႈၸတ်းႁဵတ်းပၢင်ၵုမ် မိူဝ်ႈဝၼ်းတီႈ 25/02/2017 ပူၼ်ႉမႃးၼၼ်ႉ ၵူၼ်းမိူင်း ၶိုၼ်ႈႁွတ်ႈ 700 ပၢႆ။ ၼႂ်းၼၼ်ႉ ၵူၼ်းမိူင်း 580 ၵေႃႉ လူင်းလၢႆးမိုဝ်း သၢၼ်ၶတ်း ႁႂ်ႈၵိုတ်းလိုဝ်ႈယင်ႉ ၵၢၼ်ၶုတ်းထၢၼ်ႇႁိၼ်ၼႆႉ ဝႃႈၼႆ။


ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်း 2 ဢၼ်ၸတ်းႁဵတ်းတီႈ ၼေႇပျီႇတေႃႇၼၼ်ႉ ဢုပ်ႇဢူဝ်းလႆႈၸႂ် တူၵ်းလူင်း လွင်ႈတီႈလိၼ်လႄႈ ၶူဝ်းတိုၼ်းသၽႃႇဝ မီး 10 ၶေႃႈ။ ၼႂ်း 10 ၶေႃႈၼၼ်ႉ မၢႆ 5 တႅမ်ႈဝႆႉဝႃႈ ၵဵဝ်ႇၵပ်းလွင်ႈၸတ်းၵၢၼ်လိၼ်သူၼ်ႁႆႈၼႃးၼႆႉ ႁႂ်ႈမီးပေႃႇလသီႇလူင်ႉလႅင်းပူင်ႇသႂ်။ မၢႆ 6 သမ်ႉ မိူဝ်ႈတမ်းဝၢင်းပေႃႇလသီႇ လွင်ႈလိၼ်သူၼ်ႁႆႈၼႃးၼၼ်ႉ တေလႆႈဢဝ်ၵၢင်ၸႂ် ၸဝ်ႈႁႆႈ/ၼႃး ပဵၼ်ပိူင်ယႂ်ႇ တေလႆႈထႅမ်ပၼ် ၵၢင်ၸႂ်ၸဝ်ႈႁႆႈ/ၼႃး ၶႂ်ႈပဵၼ်ၶႂ်ႈလႆႈ။


ၼႂ်းႁူဝ်ၶေႃႈ ၵၢၼ်ပၢႆးမၢၵ်ႈမီးသမ်ႉ ဢုပ်ႇဢူဝ်းလႆႈၸႂ်တူၵ်းလူင်းၵၼ် မီး 11 ၶေႃႈ ၼႂ်းၼၼ်ႉ မၢႆ 1.င တႅမ်ႈဝႆႉဝႃႈ တေလႆႈၵႅတ်ႇၶႄႁႄႉၵင်ႈပၼ်ပၢႆးမၢၵ်ႈမီးၵူၼ်းမိူင်း လူၺ်ႈပၵ်းပိူင်မၢႆမီႈမီးဝႆႉ ၼင်ႇႁိုဝ် တေဢမ်ႇလႆႈလူႉသုမ်း ယွၼ်ႉပၢႆးမၢၵ်ႈမီးယႂ်ႇလူင်ဢၼ်ပိူၼ်ႈမႃးႁဵတ်း ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 11/04/2017 ၼၼ်ႉ သင်ၶၸဝ်ႈ၊ ပေႃႈမႄႈပီႈၼွင်ႉၵူၼ်းမိူင်း ၼပ်ႉႁူဝ်ႁဵင် ႁူမ်ႈၵၼ်သေ ဢွၵ်ႇၼႄၵၢင်ၸႂ် သၢၼ်ၶတ်းၵၢၼ်ၶုတ်းထၢၼ်ႇႁိၼ်ၼႆႉ ႁၢဝ်ႈႁၢဝ်ႈႁႅင်းႁႅင်း။


ၼင်ႇႁိုဝ်တေၵႄႈလိတ်ႈပၼ်ႁႃၼႆႉ ပူၼ်ႉမႃးမိူဝ်ႈဝၼ်းတီႈ 13/04/2017  မီးၵၢၼ်ႁူပ်ႉထူပ်း ဢုပ်ႇၵုမ်ၵၼ် ဝူင်ႈၵၢင် ၵူၼ်းမိူင်း သင်ၶၸဝ်ႈလႄႈ တူဝ်တႅၼ်းၶွမ်ႊပၼီႊၶုတ်း ထၢၼ်ႇႁိၼ်။ ဢုပ်ႇၵၼ်တီႈဝတ်ႉ/ၵျွင်းၵၢင် ပွၵ်ႉ 4 ဝဵင်းမိူင်းၵိုင်။ ၼၢင်းႁၢၼ်ႇ၊ လုင်းထုၼ်း ၾၢႆႇတူဝ်တႅၼ်းၶွမ်ႊပၼီႊပျေႉဢွင်ႇႁိူင်း တင်းႁိူင်းမဵတ်ႉတႃႇၶဝ် လၢတ်ႈဝႃႈ တေထွၼ်တူဝ်ဢွၵ်ႇ ၼႂ်းပိုၼ်ႈတီႈဝႆႉပၼ်ၶၢဝ်းယၢမ်း သိမ်းၶူဝ်းၶွင် ၶိူင်ႈၸၢၵ်ႈ တႃႇၼိုင်ႈလိူၼ် ဝႃႈၼႆ။


ၵူၺ်းၵႃႈ ႁိုင်မႃးလိူၼ်ပၢႆသေတႃႉ ၶွမ်ႊပၼီႊယင်းပႆႇထွၼ်ဢွၵ်ႇ ၼႂ်းပိုၼ်ႉတီႈၶုတ်းထၢၼ်ႇႁိၼ်ၼၼ်ႉ ဝႃႈၼႆ။