ၵူၼ်းမိူင်းလၢႆးၶႃႈ ၸတ်းႁဵတ်းပၢင်ပွႆး ယွင်ႈၵုင်ႇယေႃးမုၼ် ၸဝ်ႈၶူးDr.ပၼ်တဝႃၽိပႃလ ဢၼ်လႆႈ ႁပ်ႉၸုမ်ႈ Ph.D (Mumbai) လႄႈ ပၢင်ပွႆးမွပ်ႈဝိႁၢရ် တိူၵ်ႈသွၼ်လိၵ်ႈ ဝတ်ႉပၢင်ႇ ဝဵင်းလၢႆးၶႃႈ။


ဝၼ်းတီႈ 08 – 09/06/2017 ၸုမ်းၵူၼ်းၼုမ်ႇလႄႈ ၵူၼ်းမိူင်းလၢႆးၶႃႈ ႁူမ်ႈၵၼ်ၸတ်းႁဵတ်း ပၢင်ပွႆး ယွင်ႈၵုင်ႇယေႃးမုၼ် ၸဝ်ႈၶူး Dr.ပၼ်တဝႃၽိပႃလ ဢၼ်လႆႈႁပ်ႉၸုမ်ႈ Ph.D (Mumbai  India ) မိူင်းၵြႃးဢိၼ်ႊတီႊယိူဝ်ႊ လႄႈပွႆးမွပ်ႈၵျွင်း တိူၵ်ႈသွၼ်လိၵ်ႈဝတ်ႉပၢင်ႇ မီးသင်ၶၸဝ်ႈ ၽူႈယႂ်ႇၵူၼ်း လူင်လႄႈ ၵူၼ်းဝၢၼ်ႈၶဝ်ႈႁူမ်ႈ တင်းၼမ်။

Photo By - Sai Lang Herng LaiKha

ၼႂ်းပၢင်ၼႆႉမီးပၢင်တၢၼ်ႈၶႆႈ ၸဝ်ႈၶူးဝိၸိတ်တႃၽိပႃလ (မေႃႇလမႅင်ႇ) ပွၼ်ႈထမ်းပၼ်လွင်ႈ ၽွၼ်း လီတူၼ်ႈမႆႉ၊ ၸဝ်ႈၶူးသီရိထမ်မ (ဝဵင်းဢိၼ်း) လွင်ႈငမ်းယဵၼ်၊ ၸဝ်ႈၶူး ဢၵ်ႉၵသေႇၼ (ၵဵင်းတုင်) လွင်ႈပုတ်ႉထ သႃသၼႃ ၵိူင်းယူၼ်း မီးၵူၼ်းဝၢၼ်ႈၵူၼ်းမိူင်းမႃးထွမ်ႇငိၼ်းႁိမ်း 500 ၵေႃႉ၊ ၵၢင်ၶမ်ႈ သမ်ႉ မီးၸဝ်ႈၶူးသုၶမ်း ပွၼ်ႈထမ်းတြႃး ၵူၼ်းၸမ် 1,000 ႁပ်ႉထွမ်ႇ။ ဝၢႆးၼၼ်ႉ မီးပၢင်မူၼ်ႈ သိူဝ်းပၢၼ် မႂ်ႇ/ၵဝ်ႇ။ ဝၼ်းထူၼ်ႈ2 ယွင်ႈၵုင်ႇယေႃးမုၼ်လႄႈ လူႇတၢၼ်းယၢတ်ႇၼမ်ႉ၊ ပၢင်ၶႄႉၶႅင်ႇ တႅမ်ႈတွပ်ႇလိၵ်ႈၸဝ်ႈသၢင်ႇ ၸိူဝ်းၼႆႉ။


ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇလၢႆးၶႃႈ လၢတ်ႈဝႃႈ - “ လွင်ႈပၢႆးပၺ်ၺႃၼႆႉ ဢမ်ႇဝႃႈမုၼ်ၸဝ်ႈ ၵူၼ်းႁိူၼ်း ႁဝ်းပဵၼ်ၵူၼ်းၶိူဝ်းယႂ်ႇသေတႃႉ ႁဝ်းတိုၵ်ႉတူၵ်းလိုၼ်းပိူၼ်ႈဝႆႉယူႇ ပေႃးႁဝ်းဢမ်ႇသႂ်ႇၸႂ် လွင်ႈပၢႆးပၺ်ၺႃၸိုင်ႁဝ်းတေတူၵ်းလိုၼ်းၵႂႃႇတိၵ်းတိၵ်းယဝ်ႉ။ ၵွပ်ႈၼၼ်လႄႈယွၼ်းႁႂ်ႈ ၵူၼ်းၼုမ်ႇ ၵူႈၵေႃႉ ပၢႆႈယၢၼ်ယႃႈမဝ်းၵမ်သေ ဢွၼ်ၵၼ် သႂ်ႇၸႂ်ပၢႆးပၺ်ၺႃႇ  သေၵမ်ဝႃႈၼႆ။


ယိူင်းဢၢၼ်းႁႂ်ႈပဵၼ်မၢႆတွင်း ပၢင်ပွႆးယွင်ႈၵုင်ႇယေႃးမုၼ် ၸဝ်ႈၶူး Dr.ပၼ်တဝႃၽိပႃလ သေမိူဝ်ႈဝၼ်း တီႈ 06/06/2017 ၸုမ်းၵူၼ်းၼုမ်ႇလႄႈၵူၼ်းမိူင်းလၢႆးၶႃႈ ႁူမ်ႈၵၼ်ၽုၵ်ႇတူၼ်ႈမႆႉ 600 တူၼ်ႈ ။ တီႈ ဝိႁၢရ်ႁူင်းႁဵၼ်း (ဘက ႁူင်းႁဵၼ်း ၵျွင်းမုၼ်ၸဝ်ႈ) ၵွင်းမႆႉႁုင်းၵၢင်ၵွင်း ဢၼ်မီးၾၢႆႇဢွၵ်ႇ ဝဵင်းလၢႆးၶႃႈ ယၢၼ်ၵႆမွၵ်ႈ 3 လၵ်း။