လိူၼ် September 2017 တေမႃးၼႆႉ ၸုမ်းၵေႃတႆး ႁၢင်ႈႁႅၼ်းတေပိုတ်ႇၸၼ်ႉၸွမ် တူင်ႇဝူင်းၵူၼ်းတႆး တီႈ ၵႃလီႉ ၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း။


ဝၼ်းတီႈ 10/06/2017 ၽူႈမီးပိုၼ်ႉႁူႉပၢႆးႁၼ်လႄႈ ၸုမ်းၵေႃတႆး ၸတ်းႁဵတ်းပၢင်ဢုပ်ႇဢူဝ်းၵၼ်တီႈ ႁူင်း ႁဵၼ်းၵေႃတႆး ၵႃလီႉ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ မီးၽူႈယႂ်ႇၵူၼ်းလူင်မိူၼ် ၼင်ႇၸဝ်ႈၶူးသုၶမ်း၊ Dr. ၸၢႆးသၢင်ႇဢၢႆႈ၊ ၶူးပူင်သွၼ်လူင်လုင်းၸၢႆးၾႃႈ၊ ၸုမ်းၵေႃတႆး၊ တူဝ်တႅၼ်း ၵေႃလိၵ်ႈ လၢႆး 13 တူင်ႇဝဵင်း၊ ႁွင်ႈၵၢၼ်ပၢႆး ပၺ်ၺႃတပ်ႉၸုမ်းမၢႆ 7 ၸိူဝ်းၼႆႉ တင်းမူတ်းၽူႈၶဝ်ႈႁူမ်ႈ 53 ၵေႃႉ။

Photo: Kaw Dai Organization

ဢုပ်ႇဢူဝ်းတူၵ်းလူင်းလႆႈၸႂ်ၵၼ်ဝႃႈ - တေတႄႇႁပ်ႉလုၵ်ႈႁဵၼ်းဝၼ်းမိူဝ်ႈၼႆႉၵႂႃႇ တေႃႇထိုင်ဝၼ်းတီႈ 05/08/ 2017 သေတေတႄႇပိုတ်ႇသွၼ်ၵႂႃႇ ၼႂ်းဝၼ်းတီႈ 01/09/2017 ။


ၼၢင်းႁဵဝ်းသႅင် ၽူႈၶဝ်ႈပႃးၶပ်းၶိုင်တႃႇၵေႃႇတင်ႈၸၼ်ႉၸွမ် လၢတ်ႈဝႃႈ- “ ႁဝ်းၶႃႈၶတ်းၸႂ်ၶိုင်ပွင်တႃႇႁႂ်ႈမီး ၸၼ်ႉၸွမ်တႆးမႃးယဝ်ႉသေတႃႉ ပေႃးပီႈၼွင်ႉႁဝ်းဢမ်ႇၸူမ်းသိူဝ်းသေ ႁပ်ႉႁဵၼ်းဢဝ်ပၢႆးပၺ်ၺႃ တီႈၸၼ်ႉ ၸွမ်ႁဝ်းၶႃႈၼႆၸိုင် မၼ်းတေဢမ်ႇထိုင်တီႈယွတ်ႈႁွတ်ႈတီႈပၢႆလႆႈ။  ၵွပ်ႈၼၼ်လႄႈၼင်ႇ ႁိုဝ်ၸၼ်ႉၸွမ်ႁဝ်း ပေႃးတေဢွင်ႇမၢၼ် ယိုၼ်းယၢဝ်းၵႂႃႇၼၼ်ႉ ယူႇတီႈပီႈၼွင်ႉႁဝ်းၶႃႈ တေပၼ်ႁႅင်း သူင်ႇလုၵ်ႈလၢၼ်မႃးႁဵၼ်း ၵႃႈႁိုဝ်ၼၼ်ႉၶႃႈယဝ်ႉ။ ၵွပ်ႈၼၼ်လႄႈယွၼ်းႁႂ်ႈပီႈ ၼွင်ႉႁဝ်းၶႃႈ ဢွၼ် ၵၼ်သူင်ႇလုၵ်ႈ လၢၼ်မႃးႁဵၼ်းၼမ် ၼမ်သေၵမ်း ” ဝႃႈၼႆ။


တီႈၸၼ်ႉၸွမ်တူင်ႇဝူင်းၵူၼ်းတႆး (College ) ၼႆႉပီဢွၼ်တၢင်းသုတ်းတေတႄႇသွၼ် 2 ပၢႆး မိူၼ် ၼင်ႇ 1. ပၢႆးသၢႆႈတူင်ႇဝူင်းၵူၼ်း Social Science ၊ 2. ပၢႆးၸတ်းပွင်ၵၢၼ်မၢၵ်ႈမီး Business Administration မိူဝ်းၼႃႈ မႃးတေၽိူမ်ႉၼမ်မႃးလိူဝ်ၼႆႉ။ ၶူးပူင်သွၼ်ပဵၼ်ၵူၼ်းၼႂ်းၸုမ်း ၵေႃတႆး ဢၼ်ၵႂႃႇယဝ်ႉ ၸၼ်ႉၸွမ် ၼွၵ်ႈမိူင်းမႃး မိူၼ်ၼင်ႇ ၼၢင်းၶႅမ်ဝၼ်း၊ ၼၢင်းႁဵဝ်းသႅင်၊ ၸၢႆးထုၼ်းသႃႇ ၊ ၼၢင်းမူၺ်သႅင်၊ ၼၢင်းဝၼ်းလီ ၸိူဝ်းၼႆႉ တင်းမူတ်း မီးမွၵ်ႈ 16 ၵေႃႉ။


လုၵ်ႈႁဵၼ်းဢၼ်တေၸၢင်ႈမႃးၶိုၼ်ႈ တေလႆႈယဝ်ႉၸၼ်ႉ 10 ၊ ပီတီႈၼိုင်ႈတေႁပ်ႉ60 ၵေႃႉ ၼိုင်ႈ ၵေႃႉလႆႈ သဵင်ႈၵႃႈၸႂ်ႉၸၢႆႇ 10 သႅၼ် တေႃႇ1 ၼိုင်ႈထိူမ်ႊ (ၼိုင်ႈထိူမ်ႊ5လိူၼ် 1 ပီ2ထိူမ်ႊ)  ႁူမ်ႈပႃးၵႃႈၵိၼ်ၵႃႈ ယူႇၵႃႈဢွၵ်ႇတၢင်း ၶၢဝ်းႁိုင် ႁဵၼ်း တေႃႇယဝ်ႉ 3 ပီ ။


တႃႇတေပဵၼ်မႃးၸၼ်ႉၸွမ်ၼႆႉ မိူဝ်ႈဝၼ်းတီႈ22/02/2017 ၸုမ်းၵေႃတႆး Kaw Dai Organization ၸတ်းႁဵတ်းပၢင်ႁူပ်ႉထူပ်း ဢုပ်ႇၵုမ်ၵၼ် တႃႇႁၢင်ႈႁႅၼ်းလၵ်းသုတ်ႇၵၢၼ်ႁဵၼ်း ၸၼ်ႉၸွမ် တႆး မီး ၶူး Dr.ၸၢႆးသၢင်ႇဢၢႆႈ၊ Dr.ၸၢႆးၼေႃႇၶိူဝ်း၊ Dr.ၸၢႆးၶမ်းမိူင်း၊ လုင်းၸၢႆးဢေးမွင်ႇ၊ ၶူးပူင်သွၼ်လူင်ၸၢႆးၾႃႈ၊ ၸၢႆးၽူင်းၶွင်ႇ ၶူးသွၼ်ၼႂ်းၵေႃတႆး ဢိၵ်ႇၽူႈသူၼ်ၸႂ် ၶဝ်ႈႁူမ်ႈၸမ် 20ၵေႃႉ။ ပၢင်ဢုပ်ႇဢူဝ်း ၸတ်းႁဵတ်းတီႈ ႁူင်းႁဵၼ်းၵေႃတႆး ၵႃလီႉ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။