ၸုမ်းၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း (EPRP) ပိုတ်ႇပၢင်သွၼ်ယဵပ်ႉၶူဝ်းတႆး တီႈဝဵင်းလူင် တူၼ်ႈတီး  ပွၵ်ႈၵမ်းႁႅၵ်ႈၼၼ်ႉ ယဝ်ႉတူဝ်ႈသေ ၸတ်းပွႆးလူင်းပၢင်သွၼ် ၽူႈၶဝ်ႈႁူမ်ႈပၢၵ်ႇပၢႆ။


ဝၼ်းတီႈ 05/06/2017 ၸုမ်းၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း (EPRP) ႁဵတ်းၸဝ်ႈတႃႇၼ ပဵၼ်ၵဝ်ႉပဵၼ်ၵၼ်းသေ ၸတ်းႁဵတ်းပွႆးလူင်းပၢင်သွၼ် ၵၢၼ်ယဵပ်ႉၶူဝ်းတႆး တီႈႁူင်းႁေႃၵေႃ လိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၼႂ်းပၢင်ၼႆႉမီးၸုမ်းEPRP၊ ၸုမ်းမႄႈႁိူၼ်း ၼုမ်ႇ၊ ၸုမ်းၶေမႃႇရတ်ႉ ၵဵင်းတုင်၊ ၸုမ်းသုၸႃႇတႃႇ၊ ၵေႃလိၵ်ႈလၢႆးလႄႈၾိင်ႈငႄႈတႆး၊ ၶူးသွၼ် ၊ လုၵ်ႈႁဵၼ်းဢိၵ်ႇ ၽူႈသူၼ်ၸႂ် ၶဝ်ႈႁူမ်ႈတင်းမူတ်း 100 ပၢႆ။

Photo By-  Noon Mo

ၼၢင်းၼူၼ်းမူဝ် ၶူးသွၼ်ယဵပ်ႉၶူဝ်း လၢတ်ႈဝႃႈ-“ ၶႂ်ႈပူၵ်းပွင်ပၼ်ၸၢတ်ႈပၢၼ်ၼၢင်းယိင်း ႁႂ်ႈၼၢင်းယိင်း ႁူႉၶိုတ်းတၼ်းၵၢပ်ႈပၢၼ်ဝၢၼ်ႈမိူင်း။  ၶႂ်ႈႁႂ်ႈၼၢင်းယိင်း မေႃယဵပ်ႉၶူဝ်း ႁဵတ်းပဵၼ်ၵၢၼ်ႁႃလဵင်ႉတွင်ႉ၊ လႆႈယူႇၼႂ်းႁူမ်ႈသေႁဵတ်းၵၢၼ်၊ ယႃႇႁႂ်ႈလႆႈပဵၼ်ၵူၼ်းယၢၼ်မိူင်း ၵႂႃႇႁဵတ်းၵၢၼ်မိူင်းပိူၼ်ႈ၊ ယိူင်းဢၢၼ်း ၸိူင်ႉၼႆသေ ႁွင်ႉၶဝ်မႃးသွၼ်ပၼ်။ ပေႃးဝႃႈၶဝ်ႁဵၼ်းသွၼ် ပွၵ်ႈမိူဝ်းယဝ်ႉ ႁႂ်ႈၶဝ်ပေႉတူဝ်၊ ႁႂ်ႈၶဝ်မေႃႁႃငိုၼ်းၶဝ်ႈၸွႆႈၼႃႈႁိူၼ်း။ သမ်ႉႁႂ်ႈၶဝ်မိူဝ်း မေႃၵၢၼ်ဢွၼ် ႁူဝ်ၼႂ်းဝၢၼ်ႈၼႂ်းဢိူင်ႇၶဝ်သေ တႃႇတေၶဝ်ႈႁူမ်ႈသၢင်ႈၵၢၼ်ၵူၼ်းတင်းၼမ် ၼႂ်းဝၢၼ်ႈၼႂ်းဢိူင်ႇ ၶဝ်ၸိူဝ်းၼၼ်ႉ”- ဝႃႈၼႆ။


ၼႂ်းပၢင်သွၼ်ၼၼ်ႉပူင်သွၼ်ပၼ် လၢႆလွင်ႈမိူၼ်ၼင်ႇ လၢႆးယဵပ်ႉၶူဝ်းတႆး၊ လွင်ႈပၢႆးယူႇလီ၊ လွင်ႈၵူၼ်း ၵႃႉၵူၼ်း၊ လွင်ႈႁႃလွၵ်းၵၢတ်ႇပၢႆးမၢၵ်ႈမီး၊ လွင်ႈယႃႈယႃတႆး၊ လွင်ႈတူမ်ႈႁုင်ၸိူဝ်းၼႆႉ။ ၶူးပူင်သွၼ်ပဵၼ် ၼၢင်းၼူၼ်းမူဝ်လႄႈဢိၵ်ႇ ၸုမ်းသုၸႃႇတႃႇ၊ We are Tai ၸိူဝ်းၼႆႉ သူင်ႇတူဝ်တႅၼ်းမႃး လႅၵ်ႈလၢႆႈ တၢင်းႁူႉတၢင်းႁၼ်။


ပၢင်သွၼ်ၼႆႉ တႄႇပိုတ်ႇမႃးမိူဝ်ႈဝၼ်းတီႈ 1 လိူၼ်မၢတ်ႊၶျ် တေႃႇထိုင်ဝၼ်းတီႈ 31 လိူၼ်မေႊ 2017 ၊ ၶၢဝ်းတၢင်း ႁိုင်3 လိူၼ်။ ပိုတ်ႇတီႈလုမ်း ၸုမ်းၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း (EPRP) သဵၼ်ႈတၢင်း မျႃႉရတၼႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။