ၸုမ်းမၢဝ်ႇသၢဝ်တႆး မိူင်းလႃႈ/ၸၼ်းတႃ ထုင်ႉလိုမ်တႂ်ႈၶူင်း၊ ယုၼ်ၼၢၼ်၊ မိူင်းၶႄႇ ၵႂႃႇလဵပ်ႈႁဵၼ်း ဢွင်ႇတီႈႁူင်း တိုတ်းယႃႈမဝ်းၵမ် ၼႂ်းၸႄႈဝဵင်းမိူင်းလႃႈ တႃႇႁႂ်ႈၵူၼ်းၼုမ်ႇတႆး ပေႃးတေလႆႈႁပ်ႉႁူႉၽွၼ်းႁၢႆႉၸႃႉယႃႈမဝ်းၵမ်  ဝႃႈၼႆ။


ဝၼ်းတီႈ 12/06/2017 ယၢမ်းဝၢႆးဝၼ်း 14:30-17:30 မူင်း ၸုမ်းမၢဝ်ႇသၢဝ်ႇတႆး မိူင်းလႃႈ/ၸၼ်းတႃ 40 ၵေႃႉ ၵႂႃႇလဵပ်ႈႁဵၼ်း လွင်ႈၽေးယႃႈမဝ်းၵမ် တီႈႁူင်းတိုတ်းယႃႈမဝ်းၵမ်၊ ၸဝ်ႈၼႃႈတီႈၽူႈမီးပုၼ်ႈၽွၼ်းလၢႆၵေႃႉ ႁူမ်ၸူမ်းႁပ်ႉတွၼ်ႈ ၸွမ်းသူင်ႇသပ်းလႅင်းၼႄငဝ်းလၢႆးလႄႈ ၽေးၶဵၼ်၊ လွၵ်းလၢႆး ငိူင်ႉဝႄႈ ၵႆယၢၼ်ယႃႈမဝ်းၵမ် ၼႆယဝ်ႉ။

ၸၢႆးသိူဝ်ဢႅၼ် ၸုမ်းမၢဝ်ႇသၢဝ်တႆး မိူင်းလႃႈ လၢတ်ႈဝႃႈ “ႁဝ်းၶႃႈဢွၼ်ၵၼ်ၵႂႃႇ လဵပ်ႈႁဵၼ်းလွင်ႈၽေးယႃႈမဝ်းၵမ်၊ ၵဵဝ်ႇၵပ်းၵူၼ်းသူႇ၊ ၵိၼ်၊ သမ်း ယႃႈမ၊ ၽိူၵ်ႇ၊ လမ် ၸိူဝ်းၼႆႉ။ ၼင်ႇႁိုဝ်မၢဝ်ႇသၢဝ်တႆးႁဝ်း ပေႃးတေဢမ်ႇၸပ်းၸႂ် လွင်ႈ ၸိူင်ႉၼႆ။ ႁႂ်ႈမေႃယူႇမေႃၵိၼ် ၼင်ႇႁိုဝ်ပေႃႈမႄႈ ပေႃးတေဢမ်ႇလႆႈမႆႈၸႂ်ၸွမ်း” ဝႃႈၼႆ။


ၸၢႆးသိူဝ်ဢႅၼ် သိုပ်ႇလၢတ်ႈဝႃႈ ၼႂ်းမိူင်းၶႄႇလိူၼ်ၼႆႉ ပဵၼ်လိူၼ်ပၼ်တၢမ်ႇၵူၼ်းၵႃႉၶၢႆယႃႈ၊ ၵူၼ်းၵိၼ်ယႃႈ၊ ယွၼ်ႉၼၼ် ၶႂ်ႈယွၼ်းပၼ်သတိ ပီႈၼွင်ႉတႆး ၵူႈၵေႃႉ ႁႂ်ႈဢွၼ်ၵၼ်ၵႆယၢၼ်ယႃႈမဝ်းၵမ်သေၵမ်း- ဝႃႈၼႆ။


ယူႇတီႈၸဝ်ႈၼႃႈတီႈပလိၵ်ႈၶဝ် တေၵူတ်ႇ ထတ်း ႁၢဝ်ႈႁႅင်းၵေႃႈပိူင်ၼိုင်ႈ ၊ တေတင်ႈလၢၼ်ႇ ၵူတ်ႇထတ်း ၵူၼ်းၵႂႃႇမႃး တေၵူတ်ႇထတ်းၸႅတ်ႈယဵဝ်ႈ ၸွင်ႇၵိၼ် ဢမ်ႇၵိၼ်၊ ယဝ်ႉၵေႃႈ တေၵူတ်ႇထတ်းၵူၼ်းၵႃႉၶၢႆ ၸဵမ်ၸိူဝ်းၼႆႉ။


လိူၼ်ၵျုၼ်ႊ ဝၼ်းတီႈ 26 ပဵၼ်ဝၼ်းၵႆယၢၼ်ယႃႈမဝ်းၵမ်ၸၢတ်ႈၸိုင်ႈလုမ်ႈၾႃႉ။ ၼႂ်းလုမ်ႈၾႃႉ ဢွၼ်ၵၼ်ၼႄၾၢင် ႁၢင်ႈၵႂၢတ်ႇၽဵဝ်ႈယႃႈမဝ်းၵမ်၊ တိုၵ်းသူၼ်းႁႂ်ႈၵူၼ်းဝၢၼ်ႈၵူၼ်းမိူင်းၵႆယၢၼ်ယႃႈမဝ်းၵမ်။