ၶွမ်ႊမတီႊလႅၼ်လိၼ် TBC မၢၼ်ႈ-ထႆးလႄႈ ၵူၼ်းဝၢၼ်ႈၵူၼ်းမိူင်း 2 ၽႅၼ်ႇလိၼ် ႁူမ်ႈၵၼ် ၽုၵ်ႇ တူၼ်ႈမႆႉ 2,000 တူၼ်ႈ ႁႂ်ႈလႅၼ်လိၼ်သွင်မိူင်းၶဵဝ်ၸမ်ႉ ၼမ်ႉလိူင်ႇ။


ဝၼ်းတီႈ 13/06/2017 သိုဝ်ႇၶၢဝ်ႇထႆး MaeSaiNews ပိုၼ်ၽၢဝ်ႇဝႃႈ -  ၶွမ်ႊမတီႊလႅၼ်လိၼ် TBC မၢၼ်ႈ-ထႆး ၸဝ်ႈသိုၵ်းလူင် ထူင်ႊၶျႆႊ မိုဝ်ႊၼၼ်ႊလႄႈ ၵႅမ်ၸွမ်ႁၢၼ်တၢၼ်းဢူး (သိုၵ်းမၢၼ်ႈ) ဢိၵ်ႇၽူႈမီးပုၼ်ႈၽွၼ်း ထႅင်ႈလၢႆၵေႃႉလႄႈ ၵူၼ်းဝၢၼ်ႈ ၵူၼ်းမိူင်းတင်းသွင်ၾင်ႇ ႁူမ်ႈၵၼ်ၽုၵ်ႇ တူၼ်ႈမႆႉ။

Photo: Mae Sai News

ၵူၼ်းမိူင်းၾၢႆႇတႃႈၶီႈလဵၵ်း 150 ၵေႃႉ၊ ၾၢႆႇမႄႈသၢႆ 350 ၵေႃႉတင်းမူတ်း 500ၵေႃႉ ႁူမ်ႈၵၼ် ၽုၵ်ႇတူၼ်ႈမႆႉ 2,000 တူၼ်ႈ တီႈဝၢၼ်ႈဝင်ႊလၢဝ်ႊ  ၸႄႈဝဵင်းၵဵင်းသႅၼ် ၸႄႈတွၼ်ႈ ၵဵင်းႁၢႆး တင်းတီႈ ဝၢၼ်ႈပုင်းထုၼ် ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။


ယိူင်းဢၢၼ်း ၼင်ႇႁိုဝ်ၵူၼ်းဝၢၼ်ႈၵူၼ်းမိူင်းတင်းသွင်ၾင်ႇ သွင်မိူင်း တေမီးလွင်ႈမိုတ်ႈၵိုဝ်း ၸမ်ၸႂ် ၵၼ် ၊ ၸွႆႈထႅမ်ၵၼ်၊ ႁႂ်ႈပႃႇမႆႉၶဵဝ်ၸမ်ႉၼမ်ႉလိူင်ႇ ၸွႆႈၵၼ်ႁၵ်ႉသႃသိင်ႇဝႅတ်ႉလွမ်ႉ ဝႃႈၼႆ။


ပၢင်ၵုမ် ၶွမ်ႊမတီႊ လႅၼ်လိၼ် TBC ပွၵ်ႈၵမ်းတီႈ 89  ဢၼ်ၸတ်းႁဵတ်းတီႈ တႃႈၶီႈလဵၵ်း ၸိုင်ႈတႆး ပွတ်းဢွၵ်ႇ မိူဝ်ႈဝၼ်းတီႈ 27/04/2017 ပူၼ်ႉမႃးၼၼ်ႉၵေႃႈ ဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇ လွင်ႈပႃႇမႆႉ (ၽိုၼ်ပႃႇ)ဢႃႊသျႅၼ်ႊ၊ ပၼ်ႁႃ ဢၢႆ ၵွင်ႉဢၢႆၵႂၼ်းလႄႈ ၵၢၼ်ၽဝ်ပႃႇ၊ တႃႇတေႁူမ်ႈ ၵၼ်ၽုၵ်ႇတူၼ်ႈမႆႉၸိူဝ်းၼႆႉ။


လႆႈႁူႉဝႃႈ ဝၼ်းတီႈ13-15/06/2017 ၼႆႉတင်းသွင်ၾၢႆႇ ႁူမ်ႈၵၼ် ၸတ်းႁဵတ်း ပၢင်ပိတ်ႉမၢၵ်ႇၼင် 2 ၽႅၼ်ႇလိၼ် တီႈဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်း။