ပီၵၢၼ်သွၼ်ႁဵၼ်းလိၵ်ႈ 2017-18 ၼႆႉ တီႈႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိ ဝဵင်းလူင်တူၼ်ႈတီး ၼၼ်ႉ လုၵ်ႈႁဵၼ်းတိူဝ်းလိူဝ်မႃးထႅင်ႈ 4 ပုၼ်ႈ။ ထူပ်းတၢင်းယၢပ်ႇၽိုတ်ႇ လွင်ႈယူႇသၢင်ႈၵိၼ်သဝ်း၊ တုၵ်းယွၼ်းၽူႈမီး သတ်ႉထႃႇၼမ်ႉၸႂ်ၸွႆႈၵမ်ႉထႅမ် ႁႅင်းၶူဝ်းၶွင်ငိုၼ်းတွင်း။


ႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း၊ ပီၵၢၼ်သွၼ်ႁဵၼ်းလိၵ်ႈ 2017-18 ၼႆႉ လုၵ်ႈႁဵၼ်းၸၼ်ႉငဝ်ႈတေႃႇထိုင်ၸၼ်ႉသိပ်း မီးတင်းမူတ်း 270 ပၢႆ။ တၢင်းႁူင်းႁဵၼ်း လႆႈထူပ်းတၢင်းယၢပ်ႇၽိုတ်ႇ ပိူင်လူင်မၼ်း ပဵၼ်လွင်ႈၵိၼ်ယႅမ်ႉလႄႈ လွင်ႈယူႇသဝ်းတီႈလိုဝ်ႈၼွၼ်း- ၼႆယဝ်ႉ။

ၸဝ်ႈၶူးသီရိထမ်ႇမ ၽူႈၵေႃႇတင်ႈႁူင်းႁဵၼ်းပရႁိတ လၢတ်ႈဝႃႈ-"မၢႆမီႈမၼ်းတမ်းဝၢင်းဝႆႉဝႃႈ တႃႇတေမႃးယူႇသဝ်း လႆႈတီႈႁူင်းႁဵၼ်းၼႆႉ လုၵ်ႈႁဵၼ်းၶဝ်ႁႂ်ႈဢဝ်လိၵ်ႈၵမ်ႉထႅမ်တီႈၵူၼ်းလူင်ဝၢၼ်ႈ၊ လိၵ်ႈၵမ်ႉတီႈမုၼ်ၸဝ်ႈ၊ ဢဝ်လိၵ်ႈလၢႆးၵမ်ႉထႅမ်သွင်ဢၼ်သေမႃး ႁဝ်းၸင်ႇၵွႆႈၸၢင်ႈႁပ်ႉ။ ႁဵတ်းသင်လႄႈဝႃႈၼၼ်ၼႆၼႆႉ ၸိူင်ႉၼင်ႇၵႂၢမ်းတႆးႁဝ်းဝႃႈ ဝူဝ်းၼႆႉပေႃးဝႃႈၾုင်မၼ်းယႂ်ႇၵေႃႈ ၸၢင်ႈမီးဝူဝ်းလၢႆး။ ယိူင်းဢၢၼ်း ပူင်သွၼ်ပၼ် လုၵ်ႈဢွၼ်ႇၸိူဝ်းၽၢၼ်ပေႃႈမႄႈ၊ ၵူၺ်းၵႃႈ ၵမ်ႈၽွင်ႈၸိူဝ်းဢမ်ႇၽၢၼ်ပေႃႈမႄႈၵေႃႈ သမ်ႉၸၢင်ႈမႃးၶဝ်ႈႁဵၼ်းဢဝ် ၵႂႃႇၼႂ်းၵႄႈမၼ်းၵေႃႈၸၢင်ႈပဵၼ်လႆႈ"- ဝႃႈၼႆ။


ႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိၼႆႉ ႁပ်ႉလုၵ်ႈဢွၼ်ႇၸိူဝ်းဢၼ်ဢမ်ႇမီးပေႃႈမႄႈ၊ လုၵ်ႈဢွၼ်ႇမီးပေႃႈ ဢမ်ႇမီးမႄႈ ဢမ်ႇၼၼ် မီးမႄႈဢမ်ႇမီးပေႃႈ။ ၸိူင်ႉၼၼ်သေတႃႉၵေႃႈ လုၵ်ႈဢွၼ်ႇမီးပေႃႈမႄႈယူႇသေတႃႉ မီးတၢင်းယၢပ်ႇၽိုတ်ႇတႃႇၶိုၼ်ႈႁူင်းႁဵၼ်းၸိူဝ်းၼႆႉၵေႃႈ ၸၢင်ႈမႃးၶဝ်ႈႁဵၼ်းလႆႈ။ ၵႃႈၸႂ်ႉၸၢႆႇႁူင်းႁဵၼ်း၊ ၵႃႈၸႂ်ႉၸၢႆႇၵျူႊသျိၼ်ႊ (Tuition) ၸိူဝ်းၼႆႉ ယူႇတီႈႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိသေ ၸၢႆႇပၼ်မူတ်း။ ၵႃႈၶဝ်ႈမုၼ်းတႄႉ လုၵ်ႈႁဵၼ်းၶဝ်ဢွၵ်ႇႁင်းၵူၺ်း၊ ၵႃႈၸႂ်ႉၸၢႆႇႁူင်းႁဵၼ်းတင်းသဵင်ႈ ၼိုင်ႈလိူၼ်တူၵ်းမွၵ်ႈ 30 သႅၼ်ပျႃး။


ၼၢင်းသႅင်လူႇ ၵူၼ်းႁုင်မိုဝ်ႉၶဝ်ႈၽၵ်း လၢတ်ႈဝႃႈ-"ၵူၼ်းမိုဝ်ႉႁုင်ၶဝ်ႈၽၵ်းမီးၵေႃႉလဵဝ်ၵူၺ်း။ ၵူၺ်းၵႃႈ လုၵ်ႈႁဵၼ်းၶဝ်ၵေႃႈၸွႆႈၵမ်ႈၽွင်ႈယူႇ၊ မိူၼ်ၼင်ႇၸွႆႈလိူၵ်ႈၽၵ်းၸိူဝ်းၼႆႉ။ ၼိုင်ႈဝၼ်းႁုင်သၢမ်တႃႇ၊ ၼိုင်ႈတႃႇၽၵ်းသွင်မီႇ၊ ပေႃးၽၵ်းၶဵဝ်ၶူဝ်ႈၼိုင်ႈဝၢၼ်ႇၵေႃႈ ၼမ်ႉၽၵ်းၼိုင်ႈဝၢၼ်ႇ၊ ၼိုင်ႈတႃႇသဵင်ႈၶဝ်ႈ 18 ပေႇ။ ႁိူဝ်ႉတႄႉႁိူဝ်ႉယူႇ၊ ၵူၺ်းၵႃႈ ဢဝ်ၵုသူလ်မၼ်း"-ဝႃႈၼႆ။


တီႈႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိၼႆႉ ပူင်သွၼ်ပၼ်ၸၼ်ႉငဝ်ႈတေႃႇထိုင်ၸၼ်ႉ 7 ။ ၸၼ်ႉ 8 တေႃႇထိုင်ၸၼ်ႉ 10 သူင်ႇႁဵၼ်းတီႈႁူင်းႁဵၼ်းလူင်ပွင်ၸိုင်ႈ၊ ဢဝ်ပိူင်လၢႆးပူင်သွၼ်လူင်ပွင်ၸိုင်ႈသေ ပူင်သွၼ်ပၼ်၊ မေႃသွၼ်မီး 9 ၵေႃႉ၊ ပဵၼ်မေႃသွၼ်ႁူင်းႁဵၼ်းလူင်ပွင်ၸိုင်ႈ ၸိူဝ်းလိုဝ်ႈၵၢၼ်ၶုၼ်သေ ဢဝ်ပိၼ်ႇသိၼ်ႇဝႆႉ၊ မေႃသွၼ်ၸိူဝ်းပိုတ်ႉဝႆႉၵျူႊသျိၼ်ႊ လႄႈလုၵ်ႈႁဵၼ်းၵဝ်ႇ။ တႃႇမေႃသွၼ် ၼိုင်ႈလိူၼ်ၸွႆႈထႅမ်ငိုၼ်း ၼိုင်ႈသႅၼ် (100,000) ပျႃး။ ငိုၼ်းၸွႆႈထႅမ်ၸိူဝ်းၼၼ်ႉ လုၵ်ႉမႃးတီႈၸဝ်ႈတႃႇၼ ၸိူဝ်းမီးၼမ်ႉၸႂ်လႄႈ ၸုမ်းပရႁိတ။ ၵူၺ်းၵႃႈ ၸုမ်းယႂ်ႇၸုမ်းလူင် ဢၼ်မႃးၸွႆႈထႅမ်တႄႉပႆႇမီး- ၼႆယဝ်ႉ။


ၸဝ်ႈၶူးသီရိထမ်ႇမ လၢတ်ႈပႃးဝႃႈ-"တၢင်းယၢပ်ႇၽိုတ်ႇတႄႉၵေႃႈ မီးယူႇတင်းၼမ်တင်းလၢႆ။ ၵူၺ်းၵႃႈ တၢင်းယၢပ်ႇၽိုတ်ႇဝၼ်းမိူဝ်ႈၼႆႉ ပဵၼ်တီႈယူႇတီႈၼွၼ်းလႄႈ လွင်ႈၵိၼ်ယႅမ်ႉ၊ သွင်ဢၼ်ၼႆႉမီးတၢင်း ယၢပ်ႇၽိုတ်ႇတႄႉတႄႉဝႃႈဝႃႈ။ ၵွပ်ႈဝႃႈ ၵူၼ်းၼမ်မႃးလႄႈ တီႈလိုဝ်ႈၼွၼ်းဢၼ်ႁဝ်းႁဵတ်းဝႆႉၼၼ်ႉ မၼ်းဢမ်ႇၵုမ်ႇထူၼ်ႈ။ လွင်ႈၵိၼ်လွင်ႈယႅမ်ႉတႄႉ ဢဝ်မၼ်းသုၼ်ႇမၼ်းတေႃႇဝႃႈ၊ မီးသင်ၵေႃႈလဵင်ႉၵၼ်ၵႂႃႇ ဢမ်ႇမီးပၼ်ႁႃယႂ်ႇၵႃႈႁိုဝ်။ တၢင်ႇၸိူဝ်ႉတၢင်ႇပိူင် ၵဵဝ်ႇၵပ်းလွင်ႈပၢႆးယူႇလီၸိူဝ်းၼႆႉတႄႉၵေႃႈ ဢၼ်ပဵၼ်ၸုမ်းပရႁိတၶဝ်လၢႆလၢႆမူႇၸုမ်းၵေႃႈ မႃးၵွင်ႉသၢၼ်ၸဝ်ႈႁဝ်းသေ ၼင်ႇၶဝ်ပွင်ပဵၼ်လႆႈၼၼ်ႉ ၼိုင်ႈလိူၼ်သွင်ပွၵ်ႈ တေမႃးထတ်းပၼ်ပၢႆးယူႇလီလုၵ်ႈဢွၼ်ႇႁဝ်း"- ဝႃႈၼႆ။


ႁူင်းႁဵၼ်းပရႁိတ လွႆလူင်ပၺ်ႇၺႃႇၽေႃးထိ တူၼ်ႈတီးၼႆႉ ပိုတ်ႇမႃးမိူဝ်ႈ ဝၼ်းတီႈ 6 လိူၼ်မေႊ 2016 ။ မိူဝ်ႈပီၵၢႆ တီႈႁူင်းႁဵၼ်းၼႆႉ ပိုတ်ႇသွၼ်ပၼ်ၸၼ်ႉငဝ်ႈ (ၸၼ်ႉမူႇလ)ၵူၺ်း၊ ၸၼ်ႉ 5 တေႃႇထိုင်ၸၼ်ႉ 10 သူင်ႇႁဵၼ်းတီႈ ႁူင်းႁဵၼ်းလူင်ပွင်ၸိုင်ႈ။ လုၵ်ႈႁဵၼ်းတင်းသဵင်ႈမီး 60 ပၢႆ-ၼႆယဝ်ႉ။


သင်ဝႃႈပီႈၼွင်ႉ ၸဝ်ႈၽူႈၵူၼ်းလီ ၽူႈမီးၼမ်ႉၸႂ်ႁဝ်းၶဝ် ၶႂ်ႈလူႇတၢၼ်း ၶူဝ်းၶွင်ဝတ်ႉထုငိုၼ်းတွင်း ၸွႆႈထႅမ်တၢင်းႁူင်းႁဵၼ်းၸိုင် တိတ်းတေႃႇၵပ်းသိုပ်ႇလႆႈတီႈ ၸဝ်ႈၶူးသီရိထမ်ႇမ မၢႆၾူၼ်ႊ 095 241 770 လႄႈမၢႆ 097 652 147 70 ။