သင်ၶၸဝ်ႈဢွၼ်ႁူဝ်ၼမ်းၼႃႈတၵ်ႉၵႃႇသတ်ႉထႃးတၢင်ႉယၢၼ်းလူင်းပိုၼ်ႉတီႈၸွမ်းဝၢၼ်ႈ ပိုတ်ႇႁူင်းႁဵၼ်းထမ်ႇမ ပူၵ်းပွင်ပၼ်လုၵ်ႈဢွၼ်ႇၼႂ်းဝၢၼ်ႈ/သူၼ် ႁႂ်ႈႁူႉၸၵ်းထမ်ႇမ ႁႂ်ႈမေႃႁၵ်ႉသႃၾိင်ႈႁိတ်ႈႁွႆးတႆး။


ဝၼ်းတီႈ 11/06/2017 ယၢမ်းၵၢင်ၼႂ် 09:00-11:00 မူင်းသင်ၶၸဝ်ႈဢွၼ်ႁူဝ်ၼမ်းၼႃႈပိုတ်ႇႁူင်းႁဵၼ်းထမ်ႇမ ပွၵ်ႈၵမ်းႁႅၵ်ႈ တီႈဝတ်ႉပႃႇသႃ ဢိူင်ႇႁူဝ်မင်း ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ လုၵ်ႈႁဵၼ်း၊ ၸဝ်ႈၶူးလႄႈၵူၼ်းဝၢၼ်ႈၵူၼ်းသူၼ်ၶဝ်ႈႁူမ်ႈတင်းၼမ်။

ၸဝ်ႈၶူးပုၺ်ႇၺဝမ်ႇသ ၽူႈဢွၼ်ႁူဝ်ႁူင်းႁဵၼ်းထမ်ႇမ တီႈဝတ်ႉပႃႇသႃ လၢတ်ႈဝႃႈ “ ဢၼ်ႁဝ်းၶႃႈ လႆႈပိုတ်ႇ ႁူင်း ႁဵၼ်းထမ်ႇမတီႈဝတ်ႉပႃႇသႃႁဝ်းၼႆႉ မီးယိူင်းဢၢၼ်းဝႆႉယူႇလၢႆလွင်ႈ၊ ဢၼ်လမ်ႇ လွင်ႈသုင်သုတ်းတႄႉ ၶႂ်ႈ ႁႂ်ႈလုၵ်ႈဢွၼ်ႇၼႂ်းဝၢၼ်ႈၼႂ်းသူၼ်ႁဝ်း ဢဝ်ထမ်ႇမ ပူၵ်းပွင်ၸၢတ်ႈပၢၼ်ၵႂႃႇၸွမ်းၵၢၼ်လေႃးၵီႇ၊ ယဝ်ႉၵေႃႈ ၶႂ်ႈႁႂ်ႈၶဝ်ႁူႉ ၾိင်ႈႁိတ်ႈႁွႆးတႆးႁဝ်း ၸဵမ်ၸိူဝ်းၼႆႉ။ လိူဝ်ၼၼ်ႉ ၼႂ်းႁူင်းႁဵၼ်းထမ်ႇမၼႆႉ ဢမ်ႇၵွမ်ႉၵႃႈဝႃႈ ပဵၼ်လွင်ႈ ထမ်ႇမ ဢၼ်လဵဝ်ၵူၺ်း မိူၼ်ၼင်ႇ ပိုၼ်း၊ ၾိင်ႈထုင်း ၸဵမ်ၵႂႃႇၸိူဝ်းၼႆႉ မၼ်းတေမီးပႃး ၸွမ်းၼင်ႇၸၼ်ႉလႂ် ၸၼ်ႉ ၼၼ်ႉၵႂႃႇ ဝႃႈၼႆ။


ပၢင်ပိုတ်ႇႁူင်းႁဵၼ်းထမ်ႇမ တီႈဝတ်ႉပႃႇသႃၼႆႉ မီးၸဝ်ႈၶူးမိၼ်ႇတၵ B.A သီရီလင်းၵႃ ၽူႈမၢႆၵေႃပွင်ၵၢၼ်ႁူင်း ႁဵၼ်း ထမ်ႇမ တူင်ႇဝဵင်းတၢင်ႉယၢၼ်း မႃးမွၵ်ႇလၢတ်ႈၶေႃႈၵႂၢမ်းပၼ်ႁႅင်းလုၵ်ႈႁဵၼ်း၊ ပၼ်ႁႅင်းပေႃႈမႄႈလုၵ်ႈဢွၼ်ႇႁဵၼ်း ၸဵမ်ၸိူဝ်းၼႆႉ။ ၼွၵ်ႈလိူဝ်ၼၼ်ႉ မီးၽူႈယႂ်ႇၵူၼ်းလူင် ၼႂ်းဢိူင်ႇ ၼႂ်းဝၢၼ်ႈလၢႆလၢႆၵေႃႉၵေႃႈ မွၵ်ႇလၢတ်ႈၶေႃႈၵႂၢမ်းၵႂႃႇ ဝႃႈၼႆ။


တေႃႈလဵဝ် ႁူင်းႁဵၼ်းထမ်ႇမတီႈဝတ်ႉပႃႇသႃၼႆႉ လုၵ်ႈဢွၼ်ႇႁဵၼ်းဢၼ်မႃးၶိုၼ်ႈႁဵၼ်းသွၼ်ဢဝ်သမ်ႉ တင်း မူတ်းမီး 40 ပၢႆၶၢဝ်းယၢမ်းပူင်သွၼ် တႄႇၵၢင်ၼႂ် ထိုင်ဝၢႆးဝၼ်း ၵူႈဝၼ်းဢႃးတိတ်ႉၵႂႃႇ ဝႃႈၼႆ။


ၸဝ်းၶူးပုၺ်ႇၺဝမ်ႇသ လၢတ်ႈဝႃႈ ၼႂ်းတူင်ႇဝဵင်းတၢင်ႉယၢၼ်းႁဝ်း ဢၼ်လႆႈပိုတ်ႇႁူင်းႁဵၼ်းထမ်ႇမၵႂႃႇ တေမီးမွၵ်ႈ 60 ႁူင်းႁဵၼ်းယဝ်ႉ။ ၵေႃပွင်ၵၢၼ်ႁူင်းႁဵၼ်းထမ်ႇမ တူင်ႇဝဵင်း တၢင်ႉယၢၼ်းသမ်ႉ ၸဝ်ႈၶူးပၺ်ၺႃႇသႃႇမိ ၵျွင်းၵၢင်ဝဵင်း တၢင်ႉယၢၼ်း ပဵၼ်ၽူႈၸတ်းၵၢၼ်၊ ၸဝ်ႈၶူးၵေႃသၼ်ႇလ ၵျွင်းၽြႃးလူင် တၢင်ႉယၢၼ်း ပဵၼ်ၵႅမ်ၽူႈၸတ်းၵၢၼ်၊ ၸဝ်ႈၶူးမိၼ်ႇတၵ ၵျွင်းလူင်မူႉ ၽူႈမၢႆၵေႃပွင်ၵၢၼ်ႁူင်းႁဵၼ်း ထမ်ႇမ လႄႈ ဢိၵ်ႇလၢႆလၢႆၸဝ်ႈ ဝႃႈၼႆ။


လွင်ႈလႆႈပဵၼ်မႃးႁူင်းႁဵၼ်းထမ်ႇမၼႆႉ လုၵ်ႉမႃးတီႈငဝ်ႈငုၼ်းမုၵ်ႉၸုမ်းလူင် သင်ၶၸဝ်ႈၸိုင်ႈတႆး ဢွၼ်ႁူဝ်တႄႇ တင်ႈ မႃး ၼင်ႇႁိုဝ်ပီႈၼွင်ႉၸၢဝ်းၶိူဝ်း ဢၼ်ယူႇၼႂ်းမိူင်းၸိုင်ႈတႆး၊ ပေႃးတေႁူႉၸၵ်းၵိူဝ်းယမ် ပုတ်ႉထထမ်ႇမ၊ သင်ၶ ဝတ်ႉဝႃး ပဵၼ်တီႈပိုင်ႈဢိင် ဝႃႈၼႆ။


မိူဝ်ႈလဵဝ်ၼႆႉ ဝတ်ႉဝႃးလႄႈၵူၼ်းၼုမ်ႇ ႁၢင်ႇၵႆၵၼ်မႃး ၵူႈမိုဝ်ႉၵူႈဝၼ်းလႄႈ ၼင်ႇႁိုဝ်ပေႃး တေၽိူမ်ႉထႅမ်ပၼ်တီႈယူပ်ႈ ယွမ်းၼႆသေ ၸင်ႇသၢင်ႈမႃးႁူင်းႁဵၼ်းထမ်ႇမၼႆႉ- ဝႃႈၼႆ။


ႁူင်းႁဵၼ်းထမ်ႇမၼႆႉ ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆးပဵၼ်ငဝ်ႈသေ ၸဝ်ႈၶူးၸိူဝ်းၵႂႃႇႁဵၼ်း လိၵ်ႈတီႈသီႇ ႁူဝ်ႇပွၵ်ႈမႃး  ၶဝ်ၸဝ်ႈပၢၵ်ႈတၢင်း-ၶဵၼ်ႇတႅမ်ႈလၵ်းသုတ်ႇၵၢၼ်ႁဵၼ်းတႄႇပူင်သွၼ်မႃး မိူဝ်ႈပီ 2014။ ယၢမ်းလဵဝ် ၶႂ်ႈတူဝ်ႈၸိုင်ႈတႆးယဝ်ႉ ဝႃႈၼႆ။