ၸၢႆးဢၢႆႈလဵၵ်ႉ ပဵၼ်ၵူၼ်းဝၢၼ်ႈလွႆသီႇမုင်ႈ ၸႄႈဝဵင်းမိူင်းယႆ ၸူမ်ၼမ်ႉတၢႆ တီႈႁူဝ်ပုမ်းမႆႉၶႆႉ ၾၢႆႇတၢင်းတူၵ်းၶူဝ်လူင် ဝၢၼ်ႈၸၢင်ႉ ယွၼ်ႉမၼ်းၸၢႆးၵႂႃႇႁႃပႃၼႆသေ ႁၢႆတူဝ်ၵႂႃႇၸဵမ်မိူဝ်ႈဝၼ်းတီႈ 15 လိူၼ်ၵျုၼ်ႊ ႁူဝ်ၶမ်ႈ။


ဝၼ်းတီႈ 16/06/2017 ယၢမ်းဝၢႆးဝၼ်း 2:45 မူင်းပၢႆၼၼ်ႉ ၵူၼ်းဝၢၼ်ႈၸၢင်ႉ ၵႂႃႇလမ်းၵႂၢႆးသေလႆႈႁၼ်မႅၼ်ႈ တူဝ်တၢႆ ၸၢႆးဢၢႆႈလဵၵ်ႉ ဢႃယု 48 ပီ ၼႂ်းႁွင်ႈမိူင်/ ႁွင်ႈၼမ်ႉ တၢင်းလိုၵ်ႉ 3 ထတ်း၊ တၢင်းၵႂၢင်ႈ 5 ထတ်း တီႈႁူဝ် ပုမ်းမႆႉၶႆႉ ၾၢႆႇတၢင်းတူၵ်းၶူဝ်လူင် ဝၢၼ်ႈၸၢင်ႉ ဢိူင်ႇႁူဝ်တိုဝ်ႉ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ။

ၵူၼ်းၼႂ်းပိုၼ်ႉတီႈ ဝၢၼ်ႈၸၢင်ႉ လၢတ်ႈဝႃႈ “ မိူဝ်ႈဝၼ်းတီႈ 15/06/2017 ၸၢႆးဢၢႆႈလဵၵ်ႉ ပဵၼ်ၵူၼ်းဝၢၼ်ႈလွႆသီႇမုင်ႈ ၸႄႈဝဵင်းမိူင်းယႆ မၼ်းၸၢႆးဢဝ်ဝူဝ်းလူင်းၵႂႃႇသူင်ႇတီႈၵူၼ်းၵေႃႉ ၸိုဝ်ႈဝႃႈ ဢွင်ႇလႃႉ ဝၢၼ်ႈၼွင်ၶႆႉ ဢိူင်ႇႁူဝ်တိုဝ်ႉ။ ႁဵတ်း ၼၼ်သေ ၶိုၼ်းဢဝ်ၵႂၢႆး ဢွင်ႇလႃႉ မိူဝ်းပိုၵ်ႉ။ ၽိူဝ်ႇမၼ်းၸၢႆးႁွတ်ႈၽႅဝ်တီႈ ဝၢၼ်ႈၸၢင်ႉ ယၢမ်းၵၢင်ၶမ်ႈ 7:25 မူင်း ဢဝ်ၵႂၢႆးမိူဝ်းၾၢၵ်ႇဝႆႉတီႈႁိူၼ်း ပီႈထုၼ်းၸိင်ႇသေ ၵႂႃႇသိုဝ်ႉၾႆးထၢတ်ႈ တီႈႁၢၼ်ႉၶၢႆ လုင်းထုၼ်းသႃႇ ၼႂ်းဝၢၼ်ႈ ၸၢင်ႉၵူၺ်းၼင်ႇၵဝ်ႇ ပၢႆၸိုၵ်းၵႃႈၾႆးထၢတ်ႈဝႆႉပေႃး 2 ဝၼ်း ၸင်ႇမႃးပၼ်။ ၸၢႆးဢၢႆႈလဵၵ်ႉသမ်ႉ မႃးၸူဝ်း လုင်းထုၼ်းသႃႇ ၵႂႃႇႁႃပႃဝႃႈၼႆ ၵူၺ်းၵႃႈ လုင်းထုၼ်းသႃႇ ဢမ်ႇၸွမ်းမၼ်း၊ ႁဵတ်းၼၼ်သေ မၼ်းၸၢႆးၵေႃႈ ဢဝ်ၾႆးထၢတ်ႈသေ ဢွၵ်ႇႁိူၼ်းၵႂႃႇ တၢင်းမႆႉႁုင်း ဢၼ်မီးတၢင်းႁွင်ႇဝၢၼ်ႈၸၢင်ႉ ၶၢဝ်းယၢမ်း 8:30 မူင်း ၵၢင်ၶမ်ႈ ဝႃႈၼႆ။


ယူႇတီႈၵူၼ်းဝၢၼ်ႈၸၢင်ႉ ပီႈၼွင်ႉၵမ်ႈၽွင်ႈဢၼ်လႆႈႁၼ်တႄႉ လၢတ်ႈဝႃႈ မိူဝ်ႈၽွင်းမၼ်းၸၢႆး တေဢွၵ်ႇၵႂႃႇ ႁႃပႃၼၼ်ႉ တူၺ်းမၼ်းၸၢႆးပႆၸွမ်းတၢင်း မိူၼ်မဝ်းလဝ်ႈၼမ်ႉဢီႇယႃဝႆႉ ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၸၢႆးမွင်ႇ ၵူၼ်းဝၢၼ်ႈၸၢင်ႉ ၵႂႃႇလမ်းၵႂၢႆးသေ လႆႈၵႂႃႇႁၼ်ၺႃး တူဝ်တၢႆ ၸၢႆးဢၢႆႈလဵၵ်ႉ ဢဝ် ၼွၼ်းတၢႆဝႆႉၼႂ်းႁွင်ႈၼမ်ႉလႆ ဝႆႉယူႇ။ ႁဵတ်းၼၼ်သေ ၸင်ႇႁွင်ႉၵူၼ်းဝၢၼ်ႈဢွၼ်ၵၼ်မႃး ဢဝ်တူဝ်တၢႆၸၢႆးဢၢႆႈလဵၵ်ႉ ဢွၵ်ႇမႃး။ ယူႇတီႈပီႈၼွင်ႉၵူၼ်းဝၢၼ်ႈၸၢင်ႉ ၸင်ႇပွင်ႇၶၢဝ်ႇၸူးပီႈၼွင်ႉၸိူဝ်ႉၶိူဝ်း ၸၢႆးဢၢႆႈလဵၵ်ႉ တီႈဝၢၼ်ႈလွႆသီႇမုင်ႈ ဝႃႈၼႆ။


ၸၢႆးဢၢႆႈလဵၵ်ႉၼႆႉ ပဵၼ်ၵူၼ်းဝၢၼ်ႈသီႇမုင်ႈ ၸႄႈဝဵင်းမိူင်းယႆ ပဵၼ်လုၵ်ႈၸၢႆး လုင်းၶိင်းယွတ်ႈငိုၼ်း- ပႃႈၼၢႆးၸုမ်ႇ၊ ၸိုဝ်ႈမေးႁွင်ႉဝႃႈ ဢေးၸၢမ် မီးလုၵ်ႈ 3 ၵေႃႉ ၸၢႆး 2 ၵေႃႉ၊ ယိင်း 1 ၵေႃႉ ဝႃႈၼႆ။