ၸုမ်းၵူၼ်းၼုမ်ႇတႆး(Tai Youth Network) ၸတ်းႁဵတ်းပၢင်ၵုမ် ထတ်းသၢင်ၵၢၼ်ငၢၼ်း ဢၼ်တူင်ႉၼိုင်ႁဵတ်းမႃး လႄႈ ႁၢင်ႈႁႅၼ်းတႃႇၸတ်းပၢင်ၵုမ်ၶွၼ်ႊရၾႅၼ်ႊၵူၼ်းၼုမ်ႇမိူင်းႁူမ်ႈတုမ်ပတ်းပိုၼ်ႉ ဢၼ်တေၸတ်းႁဵတ်း ၼႂ်းပီ 2017 ၼႆႉ ဝႃႈၼႆ။


တႄႇဢဝ် ဝၼ်းတီႈ 16-18/06/2017 ယၢမ်းၵၢင်ၼႂ် 09:00-05:00 မူင်းတၢမ်းၶမ်ႈ ၸုမ်းၵူၼ်းတႆး (TYN) ၸတ်းႁဵတ်းပၢင်ၵုမ်ၶွပ်ႈႁူၵ်းလိူၼ် ပီထူၼ်ႈ 4 ၸုမ်း TYN ၶိုၼ်းမႄးထတ်းသၢင်ၵၢၼ်ငၢၼ်း ဢၼ်တူင်ႉၼိုင် မႃးၸိူဝ်းၼၼ်ႉလႄႈ တႃႇႁၢင်ႈႁႅၼ်းပၢင်ၵုမ်ၶွၼ်ႊရၾႅၼ်ႊၵူၼ်းၼုမ်ႇ။ ပၢင်ၵုမ်ၼႆႉ ၸတ်းႁဵတ်းတီႈႁူင်းသဝ်း သၵၢႆႊၼိဝ်ႊ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

Photo: Loi Kham Pang

ၸၢႆးၼေႃႇသႅင် ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇတႆး TYN လၢတ်ႈဝႃႈ “ ဢၼ်ႁဝ်းၶႃႈ ၸတ်းႁဵတ်းပၢင်ၵုမ်ၼႆႉ မီးဝႆႉယူႇ လၢႆလွင်ႈ မိူၼ် တွၼ်ႈၼိုင်ႈသမ်ႉ ႁဝ်းၶႃႈၸုမ်းဢွၼ်ႁူဝ် TYN ၵူၼ်းၵဝ်ႇ/ ၵူၼ်းမႂ်ႇ လႄႈ ၽူႈပွင်ၵၢၼ် မႃးႁူပ်ႉ ထူပ်းၵၼ် ထတ်းသၢင်ၶိုၼ်းၵၢၼ်ငၢၼ်း ဢၼ်လႆႈတူင်ႉၼိုင်မႃး ၸဵမ်ၸိူဝ်းၼႆႉ။ ထႅင်ႈတွၼ်ႈၼိုင်ႈသမ်ႉ တႃႇဝၢင်း ၽႅၼ်ၸတ်းႁဵတ်းပၢင်ၵုမ်ၶွၼ်ႊရၾႅၼ်ႊၵူၼ်းၼုမ်ႇ မိူင်းႁူမ်ႈတုမ်မိူင်းမၢၼ်ႈပတ်းပိုၼ်ႉ ပွၵ်ႈၵမ်း (3) ၸဵမ်ၸိူဝ်းၼႆႉ” ဝႃႈၼႆ။


ပၢင်ၵုမ်ၵူၼ်းၼုမ်ႇတႆး TYN ဢၼ်ၸတ်းႁဵတ်း ၶွပ်ႈႁူၵ်းလိူၼ် ပီထူၼ်ႈ 4 ၼႆႉ မီးတူဝ်တႅၼ်းၵူၼ်းၼုမ်ႇ၊ ၽူႈပွင်ၵၢၼ်၊ ၽူႈဢွၼ်ႁူဝ်ၸုမ်းလႄႈ ၽူႈၸွႆႈထႅမ် လၢႆမူႇလၢႆၸုမ်း မႃးၶဝ်ႈႁူမ်ႈ တင်းမူတ်း မီးႁိမ်း 40 ၵေႃႉ ဝႃႈၼႆ။


ၸၢႆးၼေႃႇသႅင် လၢတ်ႈဝႃႈ ပၢင်ၵုမ်ၶွၼ်ႊရၾႅၼ်ႊၵူၼ်းၼုမ်ႇ မိူင်းႁူမ်ႈတုမ်မိူင်းမၢၼ်ႈပတ်းပိုၼ်ႉၼႆႉ တေၸတ်းႁဵတ်း ၼႂ်းဝၼ်းတီႈ 27-29/12/2017 ႁၢင်ပီၼႆႉ။ ဢွင်ႈတီႈၸတ်းႁဵတ်းတႄႉ ပႆႇတႅတ်းတတ်းဝႃႈ တေၸတ်းႁဵတ်းတီႈလႂ်၊ လွင်ႈတေၸတ်းႁဵတ်းပၢင်ၵုမ်ၵူၼ်းၼုမ်ႇ ပွၵ်ႈၵမ်း 3 ၼႆႉ ႁဝ်းၶႃႈ ၸုမ်းပွင်ၵၢၼ်ၵူၼ်းၼုမ်ႇ တေသိုပ်ႇႁူပ်ႉထူပ်း ၵၼ်ၵႂႃႇထႅင်ႈယူႇတိၵ်းတိၵ်း။ ယွၼ်ႉဝႃႈ ၼႂ်းပီ 2018-2019 သမ်ႉ ၸုမ်းဢွၼ်ႁူဝ်မႂ်ႇတေမႃးပုတ်ႈႁဵတ်းၵႂႃႇ ဝႃႈၼႆ။


ပၢင်ၵုမ်ၵူၼ်းၼုမ်ႇမိူင်းႁူမ်ႈတုမ်မိူင်းမၢၼ်ႈပတ်းပိုၼ်ႉသမ်ႉ ပွၵ်ႈတီႈၼိုင်ႈ ၸတ်းႁဵတ်းၼႂ်းႁၢင်လိူၼ်ၻီႊသႅမ်ႊၿိူဝ်ႊ ပီ 2014 ။ ပွၵ်ႈၵမ်းသွင် ၸတ်းႁဵတ်းၼႂ်းႁၢင်လိူၼ်ၻီႊသႅမ်ႊၿိူဝ်ႊ ပီ 2015 ဢွင်ႈတီႈၸတ်းႁဵတ်းသမ်ႉ ပဵၼ်တီႈ ဝတ်ႉတႆးမူႇၸေႊ ဝဵင်းလိူဝ်ႇ ဝႃႈၼႆ။