တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ လုၵ်ႈလဵင်ႉၵေႃႉၼိုင်ႈ ၾၼ်းမႄႈလဵင်ႉလႄႈလုၵ်ႈယိင်း မၢတ်ႇၸဵပ်းလိူဝ်ႁႅင်း လႆႈသူင်ႇယူတ်းယႃတူဝ်ဝႆႉတီႈ ႁူင်းယႃမူႇၸေႊ တူဝ်ၵေႃႉၾၼ်းတႄႉ ၸဝ်ႈၼႃႈ တီႈတိုၵ်ႉၸွမ်းႁႃတူဝ်ယူႇ။


ဝၼ်းတီႈ 05/06/2017 ၸဝ်ႈလၢၼ်ႉၶၢႆၶိူင်ႈၶူဝ်းတႃႇႁဵတ်းႁိူၼ်း တီႈဝဵင်းၼမ်ႉၶမ်း ၺႃးလုၵ်ႈလဵင်ႉ (လုၵ်ႈၸၢင်ႈ) ၾၼ်း။ ၵေႃႉဢၼ်ၺႃးၾၼ်းၼၼ်ႉ ပဵၼ်ၼၢင်းသႅင်းမႂ်ႇ ဢႃယု40ပီလႄႈ လုၵ်ႈယိင်း မၼ်းၼၢင်း ယိင်းသႅင်ဢေး ဢႃယု 18ပီ ။ ၵေႃႉပဵၼ်မႄႈၺႃးၾၼ်းတီႈႁူဝ်မႃႇ၊ ၵွၵ်းႁူဝ်၊ တီႈၶႅၼ်တီႈ မိုဝ်းၸိူဝ်းၼႆႉ မၢတ်ႇၸဵပ်းလိူဝ်ႁႅင်း ယူတ်းယႃတူဝ်ဝႆႉတီႈႁူင်းယႃမူႇၸေႊ။

ၵူၼ်းၵေႃႉဢၼ်ၾၼ်းၼၼ်ႉၸိုဝ်ႈ တဵင်းထုၼ်းဢွင်ႇ (ၽူဝ်းတႃး) လုၵ်ႉမိူင်း မဵတ်ႉထိလႃႇ သေ မႃးႁဵတ်းၵၢၼ် တီႈသႅင်ႇလၢၼ်ႉၼႆႉလႆႈမွၵ်ႈ 3 လိူၼ်။  ယွၼ်ႉမၼ်းၸၢႆး မီးတၢင်းယၢမ်ႈမေႃလၵ်ႉ ၶူဝ်းၶွင်ၼႂ်းႁိူၼ်းလႄႈ ၸဝ်ႈႁိူၼ်းၸင်ႇလိုပ်ႈမၼ်းဢွၵ်ႇၵၢၼ် ပူၼ်ႉမႃးမွၵ်ႈ 10 ဝၼ်းပၢႆ။


လုင်းၸၢႆးမွၵ်ႇသႂ် ၽူႈၼမ်းၼႂ်း ၸုမ်းၶွတ်ႇလိူတ်ႈ UP ဝဵင်းၼမ်ႉၶမ်းလၢတ်ႈဝႃႈ- - “ လုၵ်ႈလဵင်ႉၶဝ်ၼႆႉ ယွၼ်ႉမၼ်းမီးတၢင်းယၢမ်ႈ မေႃလၵ်ႉၶူဝ်းၶွင် မိူၼ်ၼင်ႇရူတ်ႉၶိူင်ႈ၊ ၾူၼ်း၊ ငိုၼ်းၸိူဝ်းၼႆႉလႄႈ ၸဝ်ႈႁိူၼ်းၸင်ႇ လိုပ်ႈဢွၵ်ႇပႅတ်ႈ။ ဢွၵ်ႇၵႂႃႇယဝ်ႉၵေႃႈ ၶိုၼ်းမႃးယွၼ်းငိုၼ်း မႃးလွၵ်ႇငိုတ်ႈထႅင်ႈ ။ ၵူၺ်းၵႃႈ ၸဝ်ႈႁိူၼ်းသမ်ႉဢမ်ႇဝႆႉၼၵ်းၼႃ ဢမ်ႇၾၢင်ႉသတိလႄႈၸင်ႇပဵၼ်မႃးၸိူင်ႉၼႆ။


ၵွပ်ႈၼၼ်လႄႈ သိုပ်ႇၼႆႉၵႂႃႇ ပေႃးတေၸၢင်ႈၵူၼ်းမႃးႁဵတ်းၵၢၼ်ၸွမ်းႁဝ်းၸိုင် တၵ်းလႆႈ လဵပ်ႈႁဵၼ်း တူၺ်း တၢင်းယၢမ်ႈၶဝ်လီလီၵွၼ်ႇ ၼင်ႇႁိုဝ်ပေႃးတေမီးလွင်ႈလွတ်ႈၽေး တင်းၶူဝ်းၶွင်ငိုၼ်းၶမ်း လႄႈသၢႆၸႂ်ၼၼ်ႉ” ဝႃႈၼႆ။


တဵင်းထုၼ်းဢွင်ႇ(ၽူဝ်းတႃး) ၵူၼ်းဢၼ်ၾၼ်းၶိုၼ်းမႄႈလဵင်ႉလႄႈ လုၵ်ႈယိင်းမႄႈလဵင်ႉၼႆႉ ၸဝ်ႈ ၼႃႈတီႈပလိၵ်ႈဝဵင်းၼမ်ႉၶမ်း တိုၵ်ႉၶတ်းၸႂ်ၸွမ်းတီႉၺွပ်းမႃးပၼ်တူတ်ႈတၢမ်ႇ ၸွမ်းၼင်ႇပၵ်း ပိူင်မၢႆမီႈ ၼၼ်ႉယူႇ ဝႃႈၼႆ။