မုၵ်ႉၸုမ်းၸၢဝ်းၶိူဝ်းတႆးမိူင်းၵွၵ်ႇ၊ ရယွင်းတင်း ၸုမ်းၵူၼ်းၼုမ်ႇတႆးTYO ႁူပ်ႉထူပ်းဢုပ်ႇၵၼ်ပိူဝ်ႈ သၢၼ်မိုဝ်းၵၼ် ႁဵတ်းၵၢၼ်ႁူမ်ႈမိုဝ်းၵၼ် ၵႂႃႇမိူဝ်းၼႃႈ။

ဝၼ်းတီႈ 07/05/2017 ၸၢႆးၼၼ်ႇတေႃး သၼ်လွႆတွၼ်း ႁူဝ်ၼႃႈၸုမ်းၸၢဝ်းၶိူဝ်းတႆး မိူင်းၵွၵ်ႇ၊ ၸၢႆးလႅင်းပၢင်ႇ ႁူဝ်ၼႃႈမုၵ်ႉၸုမ်းၸၢဝ်းၶိူဝ်းတႆး သၢႆရယွင်းလႄႈ ႁူဝ်ၼႃႈၸုမ်းၵူၼ်းၼုမ်ႇတႆး TYO ဢိၵ်ႇလုၵ်ႈၸုမ်း ႁူပ်ႉထူပ်ႉဢုပ်ႇဢူဝ်းၵၼ် တီႈလုမ်းမုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸိုင်ႈထႆး။


ႁူဝ်ၼႃႈၸုမ်းၵူၼ်းၼုမ်ႇတႆး TYO ၸၢႆးထုၼ်းလႃႉ လၢတ်ႈဝႃႈ - “ ၸွမ်းၼင်ႇဢၼ်ၵူၼ်းမိူင်းတုၵ်း ယွၼ်းၼၼ်ႉသေ ၶႂ်ႈႁႂ်ႈပႃႇတီႇ၊ တပ်ႉသိုၵ်းလႄႈမုၵ်ႉၸုမ်း တႆးလၢႆလၢႆၸုမ်းပဵၼ် ဢၼ်ၼိုင်ႈဢၼ် လဵဝ်ၵၼ်ၼႆၼၼ်ႉသေ သိုပ်ႇၼႆႉၵႂႃႇယႃႇဝႃႈၸုမ်းၵဝ်ၸုမ်းမႂ်းယဝ်ႉ ႁဝ်းလူဝ်ႇမေႃၽွမ်ႉႁူမ်ႈၵၼ် ၵႂႃႇယဝ်ႉ။ၽွၼ်းပၢင်းဢၼ်ႁဝ်းဢမ်ႇၽွၼ်ႉၵၼ်ၼၼ်ႉၵေႃႉလႆႈၶၢမ်ႇၸႃးမႃးၼမ်ယဝ်ႉ” ။


ၼႂ်းပၢင်ၼႆႉဢုပ်ႇဢူဝ်းၵၼ် ဝၢင်းၽႅၼ်ၵၼ်လၢႆလွင်ႈမိူၼ်ၼင်ႇ လွင်ႈပၢႆးပၺ်၊ လွင်ႈသုၼ်ႇလႆႈတႅပ်း တတ်း ၊လွင်ႈမၢႆၾၢင်(မၢတ်ႈပူင်ႇတိၼ်ႇ)လွင်ႈၵၢၼ်ၽွမ်ႉႁူမ်ႈ ၸိူဝ်းၼႆႉ။


ၸၢႆးလႅင်းပၢင်ႇ ႁူဝ်ၼႃႈၸုမ်းၸၢဝ်းၶိူဝ်းတႆး သၢႆရယွင်းၵေႃႈလၢတ်ႈဝႃႈ - “ ပၢင်ႁူပ်ႉထူပ်းၼႆႉတေလႆႈ ဝႃႈမီးၽွၼ်းလီတႄႉတႄႉ ။  ၵႃႇၵွၼ်ႇပူၼ်ႉမႃး ႁဵတ်းၽႂ်ႁဵတ်းမၼ်းၵူၺ်း မိူဝ်းၼႃႈမႃးႁႂ်ႈႁဝ်း ၸၢင်ႈ ၽွမ်ႉႁူမ်ႈၵၼ်မီးသင်ၵေႃႈၵပ်းသိုပ်ႇၵၼ် တၢင်းမိူင်းၶႄႇၵေႃႈလီ၊ မိူင်းတႆး၊ မိူင်းထႆးၵေႃႈ လီႁႂ်ႈၸၢင်ႈ လႆႈၵပ်းသိုပ်ႇၵွင်ႉသၢၼ်ၵၼ်ၵႂႃႇ ”။


ၸုမ်းၸၢဝ်းၶိူဝ်းတႆး ၼႂ်းမိူင်းထႆး သၢႆၵဵင်းမႆႇ၊ မိူင်းၵွၵ်ႇ ပႃးၸဵမ်ရယွင်း ဢိၵ်ႇၸုမ်းၵူၼ်းၼုမ်ႇတႆး TYO ၸိူဝ်းၼႆႉ ၵမ်ႈၼမ်ႁူႉဝႃႈ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၵမ်ႉယၼ် ပၼ်ႁႅင်း။


ၼႂ်းၸိုင်ႈတႆးၼႆႉၼွၵ်ႈသေ ၸုမ်းၵူၼ်းၼုမ်ႇတႆး TYO ယင်းမီးထႅင်ႈ TYN ၵေႃႁူမ်ႈသၢင်ႈၵူၼ်းၼုမ်ႇ တႆး ပတ်းပိုၼ်ႉမိူင်းႁူမ်ႈ ။  TYO တင်း TYN တေသၢၼ်မိုဝ်းၵၼ်ၵႂႃႇ ၸိူင်ႉႁိုဝ်?၊ ၸွင်ႇၸႂ်ႈၸုမ်းလဵဝ် ၵၼ်၊ ၵွပ်ႈသင်ၸုမ်းၵူၼ်းၼုမ်ႇတႆးမီးလၢႆလၢႆၸုမ်း ယင်းမီးၵူၼ်းၼုမ်ႇ ၸိူဝ်းပႆႇပွင်ႇၸႂ် ၵႆႉတွင်ႈၵႆႉ ထၢမ်ၵၼ် ။