ၶွမ်ႊမတီႊငဝ်ႈငုၼ်း ၾၢႆႇၽွင်းငမ်း ပႃႇတီႇမႂ်ႇသုင်ၸိုင်ႈတႆး SSPP လူင်းႁူပ်ႉထူပ်းၵူၼ်းမိူင်း ၼႂ်းပိုၼ်ႉတီႈ၊ သပ်းလႅင်းလွင်ႈပိူင်ၵၢၼ် လႄႈ ငဝ်းလၢႆးဝၢၼ်ႈမိူင်း ၼႂ်းၼႃႈတီႈၵုမ်းၵမ်။

တင်ႈတႄႇဝၼ်းတီႈ 21/04/2017 ၼၼ်ႉ ယူႇတီႈၽူႈၸတ်းၵၢၼ် ၾၢႆႇၽွင်းငမ်း (ဢုပ်ႉပိူင်ႇ) ၸွမ်ႁၢၼ်ၸဝ်ႈသၢႆၾႃႉ လႄႈ ၵႅမ်ၽူႈၸတ်းၵၢၼ်ၾၢႆႇၽွင်းငမ်း ၸဝ်ႈသိုၵ်းထိူၼ်ႇမိူင်း ဢွၼ်ႁူဝ်ၼမ်းၼႃႈသေ လူင်းသူၼ်းတုမ် ႁူပ်ႉထူပ်းၵူၼ်းမိူင်း၊ သပ်းလႅင်းၼႄ ၶေႃႈယိူင်းဢၢၼ်း ပၢင်ႁူပ်ႉထူပ်းလႄႈ လွင်ႈတမ်းဝၢင်းမီးမႃးလွၵ်းပိူင် ၵၢၼ်ၽွင်းငမ်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ။


ဢိင်ၼိူဝ်ၽႅၼ်ၵၢၼ်ငဝ်ႈငုၼ်းသေ SSPP/SSA ၸတ်းႁဵတ်း ပၢင်ၵုမ်ၵူၼ်းမိူင်းၵူႈၸၼ်ႉၸၼ်ႉ တေႃႇပေႃးထိုင် ပၢင်ၵုမ်လူင်ၶွမ်ႊမတီႊငဝ်ႈငုၼ်း ၶူပ်ႇပီ 2 ပွၵ်ႈ၊ ပၢင်ၵုမ်လူင်ႁူဝ်ပီ လႄႈ ပၢင်ၵုမ်လူင်ႁူဝ်ႁုပ်ႈပီ။ မိူဝ်ႈဢွၼ်တၢင်းတႄႉ ယူႇတီႈၶွမ်ႊမတီႊၾၢႆႇၸႄႈဝဵင်းၶဝ်ၵူၺ်း ၸတ်းႁဵတ်းၵႂႃႇ။ ၵူၺ်းၵႃႈပီၼႆႉ ယူႇတီႈ ၽူႈၸတ်းၵၢၼ်ၾၢႆႇၽွင်းငမ်းလႄႈ ၵႅမ်ၽူႈၸတ်းၵၢၼ် ၾၢႆႇၽွင်းငမ်း လုၵ်ႉတီႈငဝ်ႈငုၼ်းဢွၼ်ႁူဝ် လူင်းႁူပ်ႉထူပ်းၵူၼ်းမိူင်း၊ လူင်းထွမ်ႇသဵင်ႁူဝ်ၸ်ႂၵူၼ်းမိူင်း၊ မီးၵူၼ်းမိူင်းၼႂ်းပိုၼ်ႉတီႈ မႃးၶဝ်ႈႁူမ်ႈ တီႈဢေႇသုတ်း ၼိုင်ႈၸႄႈဝဵင်းၸမ်သွင်ႁဵင်၊ ၼမ်သုတ်းသၢမ်ႁဵင်ပၢႆၵေႃႈမီး။

ၵႅမ်ၽူႈၸတ်းၵၢၼ်ၾၢႆႇၽွင်းငမ်း လၢတ်ႈဝႃႈ- ၵွပ်ႈပိူဝ်ႈငဝ်းလၢႆးဝၢၼ်ႈမိူင်းလႅၵ်ႈလၢႆႈမႃးယဝ်ႉလႄႈ ႁႂ်ႈၵူၼ်းဝၢၼ်ႈၵူၼ်းမိူင်းႁဝ်းၶႃႈ မေႃဝူၼ်ႉ ႁႂ်ႈၶိုတ်းတၼ်းၵၢၼ်မိူင်း၊ မိူၼ်ၼင်ႇတပ်ႉသိုၵ်းႁဝ်း ၾၢႆႇၽွင်းငမ်းႁဝ်း ၸိူဝ်းၼႆႉၵေႃႈ မၼ်းဢမ်ႇမိူၼ်ၵဝ်ႇယဝ်ႉ။ မိူဝ်ႈပူၼ်ႉမႃး ငဝ်ႈငုၼ်းႁဝ်းၶႃႈမီးတီႈသႅင်ၵႅဝ်ႉ။ ဢိင်ၼိူဝ်ငဝ်းလၢႆး မိူဝ်ႈၽွင်းပီ 2010 ၼၼ်ႉ ႁဝ်းၶႃႈလႆႈထုၵ်ႇတင်း သိုၵ်းမၢၼ်ႈၶဝ် မိပ်ႇငႅၼ်း ႁႂ်ႈႁဵတ်းတပ်ႉပႂ်ႉလႅၼ်လိၼ် ပီႇတုၸိတ်ႉၼႆလႄႈ တပ်ႉၸုမ်းၼိုင်ႈႁဝ်းၶႃႈ ဢမ်ႇယွမ်းႁဵတ်းလႄႈ ၸင်ႇလႆႈယိပ်းၵွင်ႈၵၢင်ႇ လုၵ်ႉၽိုၼ်ႉမႃးၵူႈပၢႆးပၢႆး တေႃႇထိုင်ႁၢၼ်ႉဝၼ်းမိူဝ်ႈၼႆႉယဝ်ႉ- ဝႃႈၼႆ။


ဢၼ်ႁဝ်းၶႃႈလူင်းႁူပ်ႉထူပ်းၵူၼ်းမိူင်း လူင်းထွမ်ႇသဵင်ၵၢင်ၸ်ႂၵူၼ်းမိူင်း ပွၵ်ႈၼႆႉ ဢမ်ႇၸႂ်ႈၾၢႆႇၽွင်းငမ်း ဢၼ်လဵဝ်ၵူၺ်း၊ ႁဝ်းၶႃႈမီးၾၢႆႇၼၢင်းယိင်း၊ ၾၢႆႇၸုမ်းၶၢဝ်ႇ၊ ၾၢႆႇယူႇလီၸိူဝ်းၼႆႉ။ လူင်းပၼ်ပိုၼ်ႉႁူႉလႄႈ ၸွႆႈယူတ်းယႃပၼ်ပေႃႈမႄႈၵူၼ်းမိူင်းပႃး ၼႆယဝ်ႉ။

လွင်ႈႁူပ်ႉထူပ်းၵူၼ်းမိူင်းပွၵ်ႈၼႆႉ ယွၼ်ႉၶႂ်ႈႁူႉသဵင်ၵၢင်ၸ်ႂၵူၼ်းမိူင်း၊ လွင်ႈယူႇၵိၼ်သၢင်ႈ လွင်ႈယၢပ်ႇၽိုတ်ႇ၊ လွင်ႈၶိုၼ်ႈယႂ်ႇ၊ လွင်ႈၾၢႆႇၽွင်းငမ်း၊ လွင်ႈၵူၼ်းမိူင်းယူႇသဝ်းၵိၼ်သၢင်ႈ ၸိူင်ႉႁိုဝ်ၸိူဝ်းၼႆႉ။ ၸတ်းႁဵတ်းပုင်း သဵင်ၵၢင်ၸႂ်ၵူၼ်းမိူင်းသေ ၽူႈလႂ်ၵေႃႉလႂ် ဢမ်ႇႁတ်းတၢင်ႇလၢတ်ႈၼႆၵေႃႈ ႁႂ်ႈတႅမ်ႈသႂ်ႇၼႂ်းမၢင်ၸေႈ၊ ဢမ်ႇတႅမ်ႈပႃးၸိုဝ်ႈသေ တွတ်ႈသႂ်ႇၼႂ်းပုင်း၊ ပၼ်တၢင်းႁၼ်ထိုင်မူၼ်ႉမႄး ၼိူဝ်ပႃႇတီႇ၊ ၼိူဝ်တပ်ႉသိုၵ်း၊ ၼိူဝ်ၾၢႆႇၽွင်းငမ်းၸိူဝ်းၼႆႉ လႆႈလွတ်ႈလွတ်ႈလႅဝ်းလႅဝ်း- ဝႃႈၼႆ။


ၵူၼ်းမိူင်းၵေႃႉၼိုင်ႈလၢတ်ႈဝႃႈ- ႁဝ်းၶႃႈယိၼ်းၸူမ်းတႄႉတႄႉ၊ ဢၼ်ၽူႈယႂ်ႇၵူၼ်းလူင်ငဝ်ႈငုၼ်း ႁဝ်းမႃးႁူပ်ႉထူပ်း ၵူၼ်းမိူင်းၸိူင်ႉၼႆ။ မႃးပၼ်ပိုၼ်ႉႁူႉၵူႈပၢႆးပၢႆး မိူၼ်ၼင်ႇပၢႆးပၺ်ၺႃ၊ ၾၢႆႇၼၢင်းယိင်း၊ ပၢႆးယူႇလီၸိူဝ်းၼႆႉ။ လိူဝ်သေၼၼ်ႉ မႃးၸွႆႈယူတ်းယႃ ဢမ်ႇဢဝ်ၵႃႈဢဝ်ႁူဝ်သင်ၸိူဝ်းၼႆႉ။ မိူဝ်ႈၵႃႈၵွၼ်ႇပူၼ်ႉမႃး လွင်ႈၸိူဝ်းၼႆႉ ပႆႇယၢမ်ႈမီးမႃး၊ မိူၼ်ၸိူင်ႉၼင်ႇ ၵူၼ်းမိူင်းႁဝ်းၶႃႈထူပ်းတၢင်းယၢပ်ႇၽိုတ်ႇလႄႈ ဢမ်ႇႁတ်းလၢတ်ႈႁတ်းၸႃၼၼ်ႉ ယူႇတီႈၵူၼ်းလူင်ႁဝ်းၶႃႈ မီးပုင်းသဵင်ၵူၼ်းမိူင်းပၼ်ၼႆႉ လွင်ႈယၢပ်ႇၽိုတ်ႇ၊ လွင်ႈၶိုၼ်ႈယႂ်ႇ/ယူပ်ႈယွမ်း ၸွမ်းၼင်ႇႁဝ်းၶႃႈၶႂ်ႈလၢတ်ႈ ပၼ်တၢင်းႁၼ်ထိုင်ၼၼ်ႉ ဢမ်ႇႁတ်းလုၵ်ႉလၢတ်ႈၼႆၵေႃႈ တႅမ်ႈသႂ်ႇၸေႈသေ ပၼ်သဵင်ၵၢင်ၸႂ်လႆႈလွတ်ႈလွတ်ႈလႅဝ်းလႅဝ်း၊ ႁဵတ်းၸိူင်ႉၼႆ ပဵၼ်ဢၼ်ၸူမ်းသိူဝ်းတႄႉတႄႉၶႃႈ- ဝႃႈၼႆ။

ယွၼ်ႉပိူဝ်ႈဝႃႈ ၸွမ်းပိုၼ်ႉတီႈ ဝၢၼ်ႈၼွၵ်ႈၼႃးပၢင်ႇ ၸၢဝ်းပီႈၼွင်ႉလွႆ ပီႈၼွင်ႉတႆး ၊ ပီႈၼွင်ႉဝႃႉ ၊ ဝၢၼ်ႈၸိူဝ်းဢၼ်ၵႆဝဵင်းၼၼ်ႉ ၵွပ်ႈပိူဝ်ႈၵမ်ႈၼမ် ၶၢတ်ႇပၢႆးပၺ်ၺႃၵေႃႈပိူင်ၼိုင်ႈ၊ ၶၢတ်ႇပၢႆးပိုၼ်ႉႁူႉၵေႃႈ ပိူင်ၼိုင်ႈလႄႈ လွင်ႈပၢႆးယူႇလီၼႆႉ မီးလွင်ႈယူပ်ႈယွမ်းႁႅင်းဝႆႉတႄႉတႄႉ။


မေႃယႃ ဢၼ်လႆႈယူတ်းယႃပၼ် ၵူၼ်းမိူင်း ၵေႃႉၼိုင်ႈလၢတ်ႈဝႃႈ- ၵူၼ်းမိူင်းဢၼ်ႁဝ်းၶႃႈ ယူတ်းယႃမႃး ပွတ်းတွၼ်ႈတၢင်းၼႆႉ ၵမ်ႈၼမ် ပဵၼ်တၢင်းပဵၼ် ၶူမ်း ၊ ႁဝ်ႈ ၊ လိူတ်ႈၶိုၼ်ႈ ၊ တႃႇလႅင် တႃၸဵပ်း ၸိူဝ်းၼႆႉ ၼမ်လိူဝ်ပိူၼ်ႈယဝ်ႉ၊ တၢင်းပဵၼ် ဢၼ်ပဵၼ်ယူႇၸိူဝ်းၼႆႉ ယွၼ်ႉပိူဝ်ႈဝႃႈ ၼမ်ႉၵိၼ် ၼမ်ႉဢၢပ်ႇဢမ်ႇၸိုၼ်ႈသ်ႂ ၵေႃႈပိူင်ၼိုင်ႈ၊ လွင်ႈတၢင်းၵိၼ်ယႅမ်ႉ ဢမ်ႇမူတ်းသႂ်ၵေႃႈပိူင်ၼိုင်ႈ၊ ၵွပ်ႈၵူၼ်းမိူင်းႁဝ်း ၶၢတ်ႇလွင်ႈပိုၼ်ႉႁူႉလႄႈ ၸင်ႇပဵၼ်ၸိူင်ႉၼႆယဝ်ႉ- ဝႃႈၼႆ။

ပိုၼ်ႉတီႈဢၼ်ၾၢႆႇၽွင်းငမ်း ငဝ်ႈငုၼ်းဝၢၼ်ႈႁႆး လူင်းသူၼ်းတုမ်ပွၵ်ႈၵမ်းၼႆႉ ပဵၼ်ပွတ်းတွၼ်ႈပွတ်းႁွင်ႇ မိူၼ်ၼင်ႇသၢႆ တၢင်ႉယၢၼ်း၊ မိူင်းၵၢဝ်၊ ၼမ်ႉလဝ်း မႃးတၢင်းမိူင်းသူႈ ၵေးသီး ၵႂႃႇတၢင်း ပွတ်းတွၼ်ႈ မိူင်းယႆ သီႇပေႃႉ  ၸိူဝ်းၼႆႉ။ မိူဝ်းၼႃႈမႃးၵေႃႈ တေၶတ်းၸ်ႂ လူင်းၵႂႃႇထႅင်ႈယူႇ၊ ၸိူဝ်းပွတ်းတွၼ်ႈၼႃႈတီႈ ဢၼ်ႁဝ်းၶႃႈ ဢမ်ႇပႆႇလႆႈၵႂႃႇၵေႃႈမီးတင်းၼမ်၊ ၼင်ႇႁိုဝ်ၵူၼ်းမိူင်းႁဝ်းၶႃႈ ပေႃးတေပွင်ႇၸႂ်ၼိူဝ်ပွင်ၵၢၼ်ပၢႆးၽွင်းငမ်း ႁဝ်းၶႃႈၼၼ်ႉ တေသိုပ်ႇၶတ်းၸႂ်ႁဵတ်းသၢင်ႈၵႂႃႇတိၵ်းတိၵ်းၼႆ- ၽူႈယႂ်ႇၵူၼ်းလူင် ၼႂ်းပႃႇတီႇမႂ်ႇသုင်ၸိုင်ႈတႆး ၸဝ်ႈၼိုင်ႈလၢတ်ႈၼႄၵႂႃႇၼင်ႇၼႆ။