ပႃႇတီႇမႂ်ႇသုင်ၸိုင်ႈတႆး SSPP/SSA ၼႆႉ တေဢမ်ႇပႆသဵၼ်ႈတၢင်းၾၢႆႇလဵဝ်၊ တေဢမ်ႇပႅင်းၸင်းတၢင်ႇၸၢဝ်းၶိူဝ်း၊ ၵႂႃႇႁူမ်ႈမိုဝ်းတၢင်ႇၸၢဝ်းၶိူဝ်းၵေႃႈ တေဢမ်ႇပႅတ်ႈမၢင်ဝၢင်းႁဵဝ်ႇ ၵၢၼ်ၸိူဝ်ႉၸၢတ်ႈတႆး- ၸဝ်ႈၼႃႈတီႈ SSPP/SSA လၢတ်ႈ။

ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ဢၼ်တူင်ႉၼိုင် ၼႂ်းၸိုင်ႈတႆးပွတ်းၵၢင်လႄႈ ၸိုင်ႈတႆး ပွတ်းႁွင်ႇၼႆႉ တေဢမ်ႇဢၢၼ်းပႆတၢင်းလဵဝ် ဢၼ်ၸမ်ပႅၼ်ပႄႈႁႅင်းၽႅဝ်၊ တေဢမ်ႇပႅင်းၸင်းၸၢဝ်းၶိူဝ်းတၢင်ႇၶိူဝ်း၊ တေႁူမ်ႈမိုဝ်းႁဵတ်းၵေႃႉတၢင်ႇၸၢဝ်းၶိူဝ်းၵူၺ်းဢမ်ႇၵႃး လွင်ႈၵၢၼ်ၸိူဝ်ႉၸၢတ်ႈတႆးႁဝ်းၵေႃႈ တိုၼ်းတေ ဢမ်ႇပႅတ်ႈမၢင်ဝၢင်းႁဵဝ်ႇ- ယူႇတီႈ SSPP/SSA သူင်ႇၽိုၼ်လိၵ်ႈၸူးထိုင် တီႈပၢင်ၵုမ် ဢၼ်ၵူၼ်းၼုမ်ႇတႆး-တဢၢင်း ႁူမ်ႈၵၼ်ၸတ်းႁဵတ်းတီႈလႃႈသဵဝ်ႈ မိူဝ်ႈၽွင်းႁၢင်လိူၼ်ဢေႊပရိူဝ်ႊ ၼၼ်ႉၼင်ႇၼႆ။


ယိူင်းဢၢၼ်းၵူၼ်းၼုမ်ႇတႆး- တဢၢင်း ႁူမ်ႈၵၼ်ႁဵတ်းသၢင်ႈပၢင်ၵုမ်ၵႂႃႇပွၵ်ႈၼႆႉ ၼင်ႇႁိုဝ်ၸၢဝ်းၶိူဝ်းတႆး တင်းၸၢဝ်းၶိူဝ်းတဢၢင်း (ပလွင်ႈ) တေယူႇသဝ်းႁူမ်ႈၵၼ်ၵႂႃႇလႆႈ ၼႂ်းၽႅၼ်ႇလိၼ်ၸိုင်ႈတႆး ၵတ်းၵတ်းယဵၼ်ယဵၼ်။  လႆႈၸတ်းႁဵတ်းပၢင်ၵုမ် တီႈဝဵင်းလႃႈသဵဝ်ႈ မိူဝ်ႈဝၼ်းတီႈ 30/04/2017 ။ ၼႂ်းတိုဝ်ႉတၢင်းၼႆႉ ယူႇတီႈ SSPP/SSA  ဢၼ်ပဵၼ်တူဝ်ၸဝ်ႈသိုၵ်းလူင်ၵျေႃႇလႃႉ လႆႈလူင်းလၢႆးမိုဝ်းသေ သူင်ႇၽိုၼ်လိၵ်ႈယိုၼ်ႈၸူးထိုင်- ၼႆယဝ်ႉ။


ၼႂ်းၽိုၼ်လိၵ်ႈၼၼ်ႉပႃးဝႆႉဝႃႈ- လွင်ႈဢၼ် TNLA တင်း SSPP/SSA ဢၼ်ပဵၼ်ပၼ်ႁႃၵၼ်ယူႇၸိူဝ်းၼႆႉ လႆႈမႆႈၸႂ်ၸွမ်းဝႆႉယူႇ။ ထႅင်ႈၾၢႆႇၼိုင်ႈၵေႃႈ တေၵေႃႇသၢင်ႈလွင်ႈၽွမ်ႉႁူမ်ႈ ၼႂ်းၸိူဝ်ႉၸၢတ်ႈတႆးၵူၺ်းဢမ်ႇၵႃး တေဢၢၼ်းၵေႃႇသၢင်ႈလွင်ႈၽွမ်ႉႁူမ်ႈတင်း ၸၢဝ်းၶိူဝ်း ဢၼ်ယူႇသဝ်းၼႂ်းမိူင်းတႆးတင်းသဵင်ႈ၊ လွင်ႈၼႆႉ ပဵၼ်လၵ်းၵၢၼ် ပေႃႇလသီႇ တွၼ်ႈတႃႇ SSPP/SSA ယဝ်ႉ။


ၼင်ႇႁိုဝ်တင်းသွင်ၾၢႆႇ တေဢမ်ႇပဵၼ်ပၼ်ႁႃၵၼ်ယႂ်ႇၶိုၼ်ႈမႃး၊ ၼင်ႇႁိုဝ်လွင်ႈပႅင်းၸင်းၵၼ် ၼႂ်းၵႄႈၵၢင်တင်း သွင်ၾၢႆႇ တေဢမ်ႇယႂ်ႇၶိုၼ်ႈမႃးၼၼ်ႉ တင်းသွင်ၾၢႆႇလႆႈၸတ်းႁဵတ်းပၢင်ဢုပ်ႇဢူဝ်းၵၼ်သေ လႆႈဢွၵ်ႇၶေႃႈပိုၼ်ၽၢဝ်ႇၵႂႃႇယူႇ။


တွၼ်ႈတႃႇမိူင်းႁူမ်ႈတုမ်ၼႆၵေႃႈ တေႁူမ်ႈမိုဝ်းၵၼ်တင်းၸၢဝ်းၶိူဝ်းတၢင်ႇၶိူဝ်းသေ တေတူင်ႉၼိုင်ၸွမ်း တင်းတပ်ႉၽွမ်ႉႁူမ်ႈၼႂ်း UNFC ။ တေဢဝ်လၢႆးၵတ်းယဵၼ် ၵႄႈလိတ်ႈပၼ်ႁႃၵၢၼ်မိူင်းၵႂႃႇ။ တေဢမ်ႇဢဝ်လၢႆးၶိူင်ႈၵွင်ႈၵၢင်ႇ ၵႄႈလိတ်ႈပၼ်ႁႃၵၢၼ်မိူင်း၊ ဢမ်ႇၶႂ်ႈႁႂ်ႈၵူၼ်းမိူင်းတုၵ်ႉၶယၢပ်ႇၽိုတ်ႇ ထႅင်ႈယဝ်ႉလႄႈ တေဢဝ်လၢႆးၵတ်းၵတ်းယဵၼ်ယဵၼ် ၵႄႈလိတ်ႈၵၢၼ်မိူင်းၵႂႃႇၵူၺ်း- ၼႂ်းၽိုၼ်လိၵ်ႈပႃးဝႆႉၼင်ႇၼႆ။


လိူဝ်သေၼၼ်ႉ ၼႂ်းၽိုၼ်လိၵ်ႈယင်းပႃးထႅင်ႈဝႃႈ- တႅပ်းတတ်းသဵၼ်ႈၸႂ်ဝႃႈ ငဝ်းလၢႆးၵၢၼ်မိူင်း လႅၵ်ႈလၢႆႈမႃး ၵႃႈႁိုဝ်ၵေႃႈယဝ်ႉ ႁဝ်းတေယူႇၸွမ်းၵၼ်ၵႂႃႇ ၵတ်းၵတ်းယဵၼ်ယဵၼ်။ ၼင်ႇႁိုဝ်တေၵေႃႇသၢင်ႈလႆႈလွင်ႈၽွမ်ႉႁူမ်ႈၵေႃႈ ၸၢဝ်းၶိူဝ်း၊ ပႃႇတီႇၵၢၼ်မိူင်းလႄႈ ၵူၼ်းမိူင်းတင်းသဵင်ႈ တေႁူမ်ႈမိုဝ်းၵၼ်ၶတ်းသၢင်ႈႁၢင်ႈပွင်ၵႂႃႇ- ၼႆယဝ်ႉ။


ပၢင်ၵုမ်ၵူၼ်းၼုမ်ႇတႆး-တဢၢင်း ဢၼ်ၸတ်းႁဵတ်းၵႂႃႇတီႈဝဵင်းလႃႈသဵဝ်ႈပွၵ်ႈၵမ်းၼႆႉ ၸွမ်းၼင်ႇၶေႃႈလႆႈၸႂ်ၵၼ် ၼၼ်ႉ တေဢုပ်ႇဢူဝ်းၵဵဝ်ႇၵပ်းလွင်ႈ တႆးလႄႈတဢၢင်း တေႁူမ်ႈမိုဝ်းၵၼ်သေ ယူႇႁူမ်ႈလူၺ်ႈၵၼ်ၵႂႃႇ ၵတ်းၵတ်းယဵၼ်ယဵၼ် ဝႃႈၼႆသေတႃႉ တီႈပၢင်ၵုမ်ၼၼ်ႉ ၾၢႆႇတၢင်းၸုမ်းၵူၼ်းၼုမ်ႇတဢၢင်းၶဝ် ဢမ်ႇမႃးၶဝ်ႈႁူမ်ႈ-ၼႆယဝ်ႉ။