ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး (SSSNY) ဢၼ်လိူၵ်ႈသၢင် ႁပ်ႉဢဝ်ၵူၼ်းၼုမ်ႇၵူႈၸၢဝ်းၶိူဝ်း ၼႂ်းၸိုင်ႈတႆး ၶိုၼ်ႈႁဵၼ်းပိုၼ်ႉႁူႉတၢင်းမေႃလၢႆပၢႆးလၢႆလွင်ႈၼၼ်ႉ ပိုၼ်ၽၢဝ်ႇ ပိုတ်ႉႁပ်ႉလုၵ်ႈႁဵၼ်းၸုပ်ႈထီႉ 17 လႄႈ 18 တႃႇပီ 2017- 18 ။


မိူဝ်ႈဝၼ်းတီႈ 05/05/2017 ယူႇတီႈ ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး (SSSNY) ဢွၵ်ႇလိၵ်ႈပိုၼ်ၽၢဝ်ႇ ပိုတ်ႇႁပ်ႉလုၵ်ႈႁဵၼ်း ၸုပ်ႈထီႉ 17 လႄႈ 18 ။ တတ်းမၵ်းဝႆႉဝႃႈ တႃႇသူင်ႇၽိုၼ်တၢင်ႇ ယိုၼ်ႈယွၼ်း ၶဝ်ႈပဵၼ်လုၵ်ႈႁဵၼ်း ဝၼ်းလိုၼ်းသုတ်း ထိုင်ဝၼ်းတီႈ 20 လိူၼ်မေႊၼႆႉ။ ၽွင်းႁၢင်လိူၼ်မေႊၼႆႉ တေႃႇထိုင်ၽွင်းႁူဝ်လိူၼ်ၵျူၼ်ႊ တေမီးပၢင်တွပ်ႇလိၵ်ႈ လႄႈပၢင်တွင်ႈထၢမ် (ဢိၼ်ႊထိူဝ်ႊဝိဝ်ႊ)ၵႂႃႇ။ ၵပ်းၵၢႆႇလူၺ်ႈဝၼ်းလႄႈဢွင်ႈတီႈတွပ်ႇလိၵ်ႈၼၼ်ႉ တၢင်းႁူၼ်းႁဵၼ်း တေတိတ်းတေႃႇၵပ်းသိုပ်ႇ ထိုင်တီႈလုၵ်ႈႁဵၼ်းၽူႈၸိူဝ်းတေမႃးတွပ်ႇလိၵ်ႈၼၼ်ႉ ထႅင်ႈၵမ်းၼိုင်ႈ- ၼႆယဝ်ႉ။

ဝၼ်းပိုၼ်ၽၢဝ်ႇသၢႆမၢႆလုၵ်ႈႁဵၼ်း ၸိူဝ်းလႆႈႁပ်ႉလိူၵ်ႈၶိုၼ်ႈႁဵၼ်း ဝၼ်းတီႈ 16 လိူၼ်ၵျူၼ်ႊ။ ၶၢဝ်းယၢမ်းပၢင်သွၼ် ၸုပ်ႈ 17  တင်ႈတႄႇမွၵ်ႈလိူၼ်ဢေႃႊၵတ်ႊသ် ထိုင်လိူၼ်ၼူဝ်ႊဝႅမ်ႊၿိူဝ်ႊ 2017 ၊ မွၵ်ႈ 90 ဝၼ်း။ ၶၢဝ်းယၢမ်းပၢင်သွၼ်ၸုပ်ႈ 18 သမ်ႉ တင်ႈတႄႇမွၵ်ႈလိူၼ်ၵျႅၼ်ႊၼိဝ်ႊရီႊ ထိုင်လိူၼ်ဢေႊပရိူဝ်ႊ ပီ 2018 ၶၢဝ်းတၢင်းမွၵ်ႈ 90 ဝၼ်း-ၼႆယဝ်ႉ။


ၼႂ်းလိၵ်ႈပိုၼ်ၽၢဝ်ႇၼၼ်ႉ သပ်းလႅင်းၼႄပႃးလွင်ႈ ပိူင်ၵၢၼ်လိူၵ်ႈလုၵ်ႈႁဵၼ်း လႄႈ ပိူင်တႃႇတွပ်ႇၶဝ်ႈႁူင်းႁဵၼ်း။ ၵၢၼ်သွၼ်၊ လွၵ်းလၢႆးလႄႈ တၢင်းမုင်ႈမွင်းပၢင်သွၼ်။ ၵၢၼ်ပိုၼ်ၽၢဝ်ႇၶေႃႈမုလ်းလႄႈ လွင်ႈၽူႈၸိူဝ်းလႆႈႁပ်ႉလိူၵ်ႈ သိုပ်ႇၶၢဝ်းတၢင်းမႃးၶိုၼ်ႈႁဵၼ်း၊ ပႃးၸဵမ်လွင်ႈ ၽိုၼ်တၢင်ႇလိၵ်ႈ (Application) ၸိူဝ်းၼႆႉ။


ၵဵဝ်ႇၵပ်းလွင်ႈႁူင်းႁဵၼ်းၼႆႉ ၽူႈပွင်ၵၢၼ်ႁူင်းႁဵၼ်း ၼၢင်းၸၢမ်တွင်း ယၢမ်ႈမွၵ်ႇလၢတ်ႈၶေႃႈၵႂၢမ်းဝႃႈ- "မိူဝ်ႈလဵဝ် ၼႂ်းမိူင်းတႆးၼႆႉ ဢၼ်ၸဝ်ႈဢမ်းၼၢၸ်ႈ (ဢႃႇၼႃႇ) ၶဝ်ပူၼ်ႉပႅၼ်သုၼ်ႇလႆႈၵူၼ်းယူႇသေ ၵူၼ်းမိူင်းဢွၼ်ၵၼ် သၢၼ်ၶတ်းယူႇၼႆႉ မီးတင်းၼမ်။ ပိူင်လူင်မၼ်း မိူၼ်ၼင်ႇ ၶူင်းၵၢၼ်တဵင်ၾၢႆၼိူဝ်မႄႈၼမ်ႉၶူင်း မိူင်းတူၼ် ပိူဝ်ႈတႃႇႁဵတ်းဢွၵ်ႇႁႅင်းၾႆးၾႃႉ၊ ၶူင်းၵၢၼ်ထၢၼ်ႇႁိၼ် တီႈမိူင်းၵိုင်၊ ၶူင်းၵၢၼ်ၶုတ်းၶမ်း တီႈၼႂ်းၵိင်ႇၸႄႈဝဵင်းတႃႈလိူဝ်ႇ ၼႃးႁႆးလူင် ၸိူဝ်းၼႆႉ။ ယိူင်းဢၢၼ်းဢၼ်လႆႈပိုတ်ႇႁူင်းႁဵၼ်းၼႆႉ ယွၼ်ႉပိူဝ်ႈၶႂ်ႈပူၵ်းပွင်ၼမ်ႉၵတ်ႉၵူၼ်းၼုမ်ႇ၊ ႁႂ်ႈၵူၼ်းၼုမ်ႇၵတ်ႉၶႅၼ်ႇ မီးၼမ်ႉၵတ်ႉတဵမ်ထူၼ်ႈသေ ၸွႆႈလႆႈၼႂ်းတူင်ႇဝူင်းၵူၼ်း၊ ၼႂ်းဝၢၼ်ႈမိူင်းၸဝ်ႈၵဝ်ႇ"-  ဝႃႈၼႆ။


ပိူင်တႃႇတေလႆႈၶဝ်ႈႁူင်းႁဵၼ်းၼႆႉ တေလႆႈပဵၼ်ၵူၼ်းၼုမ်ႇဢၼ်ၵိူတ်ႇ/ ယူႇၼႂ်းမိူင်းတႆး၊ ၽူႈတေလႆႈၶဝ်ႈႁဵၼ်း သႅၼ်းဢႃႇယု 18 -26 ပီ၊ တေလႆႈမီးလိၵ်ႈ ဢၼ်မူႇၸုမ်းၵမ်ႉထႅမ် ဢမ်ႇၼၼ် ၽူႈယႂ်ႇၵူၼ်းလူင် ၵမ်ႉထႅမ်ၸွမ်း။ ၶေႃႈမုလ်း ပိုၼ်းၸဝ်ႈၵဝ်ႇ ဢၼ်ၸိုဝ်ႈၸႂ်ႈ ၊ တၵ်းလႆႈမီးၽႅၼ်ၵၢၼ် ၸႅင်ႈလႅင်း တႃႇမိူဝ်းၼႃႈ။ ၾၢႆႇႁူင်းႁဵၼ်း တင်းၾၢႆႇၵေႃၵမ်ၵၢၼ်ႁူင်းႁဵၼ်း တေၸွပ်ႇထတ်းၼမ်ႉၵတ်ႉသေ ၶတ်းလိူၵ်ႈသၢင်ဢဝ်လုၵ်ႈႁဵၼ်း တႃႈၶဝ်ႈႁဵၼ်း။ လုၵ်ႈႁဵၼ်းၵေႃႉလႂ်ဢမ်ႇဝႃႈ တၵ်းလႆႈပူၼ်ႉၵၢၼ်တွပ်ႇလိၵ်ႈ (Examination) လႄႈၶေႃႈတွင်ႈထၢမ် (Interview) ။


ႁူင်းႁဵၼ်း SSSNY ၼႆႉ ဢမ်ႇၸႅၵ်ႇၽႄ  ၽႃသႃ၊ သႃသၼႃ၊ ၸၢဝ်းၶိူဝ်း ၊ ယိင်း/ၸၢႆး၊ သီၽိဝ်လမ်ၶၢဝ်။ ၾိုၵ်းသွၼ်ပၼ် ၵၢၼ်ပူၵ်းပွင် လွင်ႈၽဵင်ႇပဵင်းၸွမ်းထမ်းတြႃး၊ တူင်ႇဝူင်းၵူၼ်း၊ သုၼ်ႇလႆႈၵူၼ်း၊ လွင်ႈၻီႊမူဝ်ႊၶရေႊသီႊ ၸဵမ်ၸိူဝ်းၼႆႉ။ ၵၢၼ်ၾိုၵ်းသွၼ် ၼႂ်းႁူင်းႁဵၼ်း ၽႃသႃဢိင်းၵလဵတ်ႈပဵၼ်လၵ်းလႄႈ ၽူႈၶဝ်ႈတွပ်ႇတင်းသဵင်ႈ တၵ်းလႆႈႁၢင်ႈႁႅၼ်းတူဝ် ၾၢႆႇတႅမ်ႈ၊ ၾၢႆႇလၢတ်ႈ၊ ၾၢႆႇထွမ်ႇ ၽႃသႃဢိင်းၵလဵတ်ႈ။ လုၵ်ႈႁဵၼ်းၸိူဝ်းဢၼ်တေမႃးႁဵၼ်းၼႆႉ တေလႆႈပဵၼ်ၵူၼ်းၼုမ်ႇၸၢဝ်းၶိူဝ်း ၼႂ်းမိူင်းတႆး၊ မီးၵၢင်ၸႂ်ၶႂ်ႈပူၵ်းပွင်ၾၢႆႇ လွင်ႈငမ်းယဵၼ်ၼႂ်းတူင်ႇဝူင်း မိူၼ်ၼင်ႇလွင်ႈၻီႊမူဝ်ႊၶရေႊသီႊလႄႈ လွင်ႈသုၼ်ႇလႆႈသုၼ်ႇပဵၼ်ၵူၼ်း ၸိူဝ်းၼႆႉ။


ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး (SSSNY-School for Shan State Nationalities Youth) ၼႆႉ ပူၵ်းတင်ႈမႃးမိူဝ်ႈလိူၼ်မေႊ 21 ဝၼ်း 2001 ။ ၽူႈယႂ်ႇၵူၼ်းလူင်ၸိူဝ်းမီးၼမ်ႉၵတ်ႉ ပၺ်ႇၺႃႇ တၢင်းႁူႉ ယိုၼ်းၶိုတ်း ပွင်ပဵၼ်ႁႃတၢင်းၵမ်ႉထႅမ်လႆႈ တင်းၵူၼ်းၼုမ်ႇတႆးၸိုင်ႈတႆး ႁူမ်ႈၵၼ်ပူၵ်းတင်ႈပဵၼ်မႃး။


ပိုတ်ႇႁပ်ႉၵူၼ်းၼုမ်ႇၸိုင်ႈတႆးၵူႈၸၢဝ်းၶိူဝ်း (တႆး၊ ဝႃႉ၊ ပဢူဝ်း၊ ပလွင်ႈ၊ လႃးႁူႇ၊ ၶၢင်) ၸိူဝ်းၼႆႉၶဝ်ႈႁဵၼ်း။  ပိုတ်ႇႁပ်ႉလုၵ်ႈႁဵၼ်းမႃးၵူႈပီ လႄႈ လုၵ်ႈႁဵၼ်းၵဝ်ႇ ဢၼ်ယဝ်ႉႁူင်းႁဵၼ်းၵႂႃႇမီးမွၵ်ႈဝူင်ႈၵၢင်  500-600 ၵေႃႉ။ ၵမ်ႈၼမ် ပွၵ်ႈၸွႆႈထႅမ် ၵၢၼ်ၼႂ်းမူႇၸုမ်း၊ ၼႂ်းတူင်ႇဝူင်းၽႂ်မၼ်းၶိုၼ်း။


ယိူင်းဢၢၼ်းဝႃႈ ၼင်ႇႁိုဝ်ၵူၼ်းၼုမ်ႇၸိုင်ႈတႆးၵူႈၸၢဝ်းၶိူဝ်း ၸိူဝ်းလႆႈထုၵ်ႇၸုမ်းသိုၵ်းမၢၼ်ႈတဵၵ်းတဵင်ပေႉၵိၼ် ပူၼ်ႉပႅၼ်သုၼ်ႇလႆႈၵူၼ်း၊ ပၢႆႈၶဝ်ႈသေႃႉႁူမ်ႈမိူင်းထႆး ၼႂ်းပၢင်သဝ်းလႅၼ်လိၼ်တႆး-ထႆး၊ ၸိူဝ်းၶဝ်ႈ ႁဵတ်းၵၢၼ်ၼႂ်းမိူင်းထႆး ပေႃးမီးတိုဝ်ႉတၢင်းႁဵၼ်းႁူႉပၢႆးပၺ်ႇၺႃႇ ၶိုၼ်းပိုတ်ႇပၢင်ႇသွၼ်ႁဵၼ်းပၼ်ၵူၼ်းၼုမ်ႇ ၸုပ်ႈသႅၼ်းလင် ဢိၵ်ႇႁဵတ်းပၼ်ၽွၼ်းလီၵူၼ်းမိူင်းၸိုင်ႈတႆး။


သင်ဝႃႈၶႂ်ႈႁူႉလၢႆးႁူဝ်ယွႆႈမၼ်းၸိုင် ၶဝ်ႈလဵပ်ႈႁဵၼ်းလႆႈတီႈ ဝႅပ်ႉသၢႆႉ www.sssny.org