ဝၢႆးၸဝ်ႈသၢင်ႇ 8 တူၼ် ၵႂႃႇၵဵပ်းမၢၵ်ႇသိုၵ်းမၢၼ်ႈ ဢၼ်ၶမ်ဝႆႉၼႂ်းလိၼ်ၼၼ်ႉ မႃးလဵၼ်ႈတႅၵ်ႇ တိူဝ်ႉမၢတ်ႇၸဵပ်းယဝ်ႉ ၽူႈၵွၼ်းဢိူင်ႇ၊ ၽူႈၵွၼ်းဝၢၼ်ႈလႄႈ တပ်ႉသိုၵ်းမၢၼ်ႈ ႁူမ်ႈၵၼ် သွၵ်ႈႁႃ မၢၵ်ႇၾင်လိၼ် ႁိမ်းဝတ်ႉၸေႇယသုၶ ဝဵင်းၼမ်ႉတူႈ ထူပ်းႁၼ်ထႅင်ႈ 23 လုၵ်ႈ။

ဝၼ်းတီႈ 09/05/2017 ယၢမ်းၵၢင်ၼႂ် ထိုင် ၵၢင်ဝၼ်း ၽူႈၵွၼ်းဢိူင်ႇမိူင်းယဵၼ်တင်း တပ်ႉသိုၵ်း မၢၼ်ႈ ဢၼ်တူင်ႉၼိုင်ၵႂႃႇမႃးတၢင်းပွတ်းတွၼ်ႈၼၼ်ႉ လႆႈႁူမ်ႈၵၼ်သေ ၵႂႃႇၵူတ်ႇထတ်းတူၺ်း ဢွင်ႇတီႈၾၢႆႇဢွၵ်ႇဝတ်ႉၸေႇယသုၶ ဢိူင်ႇမိူင်းယဵၼ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ၊ ထူပ်းႁၼ်မၢၵ်ႇဢၼ်ၾင်လိၼ်ထႅင်ႈ ဝႃႈၼႆ။


ၼၢင်းၶမ်းၽူင်း ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၸႄႈဝဵင်းၼမ်ႉတူႈလၢတ်ႈဝႃႈ “ ဝၢႆးလင်ၸဝ်ႈ သၢင်ႇၶဝ် လဵၼ်ႈမၢၵ်ႇတႅၵ်ႇသေ မၢတ်ႇၸဵပ်း 8 တူၼ်ၼၼ်ႉ၊ ထိုင်မႃး ဝၼ်းတီႈ 9 ယူႇတီႈၽူႈ ၵွၼ်းဢိူင်ႇ၊ ၽူႈမီးပုၼ်ႈၽွၼ်းၶဝ်ႁူမ်ႈလူၺ်ႈတပ်ႉသိုၵ်းမၢၼ်ႈ ဢွၼ်ၵၼ်ၵႂႃႇသွၵ်ႈႁႃထႅင်ႈ ၸွမ်းႁိမ်း ႁွမ်းဝတ်ႉၼၼ်ႉ လႆႈထူပ်းႁၼ်ထႅင်ႈ မၢၵ်ႇၾင်လိၼ် 20 လုၵ်ႈပၢႆ၊  မၢၵ်ႇၸိူဝ်းၼၼ်ႉ သိုၵ်းမၢၼ်ႈၵူႈ ၵႂႃႇယဝ်ႉ” ဝႃႈၼႆ။


သိုပ်ႇလၢတ်ႈထႅင်ႈဝႃႈ လွၵ်းလိၼ်ႁိမ်းဝတ်ႉၼၼ်ႉ မီးၾၢႆႇဢွၵ်ႇဝတ်ႉၸေႇယုသုၶ၊ မိူဝ်ႈလၢႆလၢႆပီ ၼၼ်ႉ သိုၵ်းမၢၼ်ႈမႃး တင်ႈတပ်ႉသေ ထွၼ်ဢွၵ်ႇၵႂႃႇ၊ ပီႈၼွင်ႉၵူၼ်းဝၢၼ်ႈသမ်ႉ ဢဝ်တီႈလိၼ်ၼၼ်ႉ ၸႅၵ်ႇပၼ်ၵၼ်ၶိုၼ်း ယွၼ်ႉဝႃႈ ပဵၼ်တီႈလိၼ်ပူႇမွၼ်ႇၼၢႆးယႃႈ ၽုၵ်ႇသွမ်ႈမႃးၸဵမ်လႂ်” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၾၢႆႇတပ်ႉသိုၵ်းမၢၼ်ႈ ဢၼ်တူင်ႉၼိုင်တၢင်းပွတ်းတွၼ်ႈၼၼ်ႉ လၢတ်ႈဝႃႈ “  တီႈၼႂ်းသူၼ်ဢၼ်ၼႆႉ ႁဝ်းၵေႃႈဢမ်ႇၸွမ်းႁူႉလႆႈထႅင်ႈ ယူဝ်ဝႃႈတေမီးထႅင်ႈဢၼ်ၾင်ဝႆႉ မၢၵ်ႇၶိူဝ်း ႁိုဝ်၊ ႁဝ်းၵေႃႈဢမ်ႇၸၢင်ႈဝႃႈ ႁဝ်းၶႃႈဢမ်ႇၸၢင်ႈဢဝ်ပုၼ်ႈၽွၼ်း” ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 8/5/2017 ယၢမ်းၵၢင်ၼႂ် 10:00 ၼၼ်ႉ ၸဝ်ႈသၢင်ႇဢွၼ်ႇ တီႈဝိႁၢရ် ၸေႇယသုၶ ဢိူင်ႇမိူင်းယဵၼ် ၵႂႃႇၵဵပ်းဢဝ်မၢၵ်ႇပွမ်းၵဝ်ႇဢၼ်ၶုတ်းႁၼ်ၼႂ်းလိၼ်ၼၼ်ႉ မႃးလဵၼ်ႈ။ မၢၵ်ႇၼၼ်ႉၵူၼ်း ဝၢၼ်ႈၶုတ်း ၵိူင်လိၼ် တပ်ႉႁၢမ်း တပ်ႉၵဝ်ႇ သိုၵ်းလူင်ပွင်ၸိုင်ႈမၢၼ်ႈ။ ဢၢၼ်းဢဝ် တီႈလိၼ်ၼၼ်ႉ ႁဵတ်းႁူင်းႁေႃ(ၵျွင်းၽြႃး) တီႈဝႆႉႁုၼ်ႇႁၢင်ႈၽြႃး။  ၸဝ်ႈသၢင်ႇဢွၼ်ႇၶဝ် သမ်ႉၵႂႃႇၵဵပ်း ဢဝ်မႃး ဝိုတ်ႉလူင်းၵျွင်းလဵၼ်ႈလႄႈ တႅၵ်ႇတိူဝ်ႉ မၢတ်ႇၸဵပ်း 8 တူၼ်။ တေႃႈလဵဝ် လႆႈသူင်ႇယႃတူဝ် ဝႆႉတီႈ ႁူင်းယႃလူင်ၵူၼ်းမိူင်းလႃႈသဵဝ်ႈ ဢၼ်လႆႈသူင်ႇယႃတီႈဝဵင်းလိူဝ်ႇၵေႃႈမီး။