ၼႂ်းဝၼ်းလိူၼ်ႁူၵ်းမူၼ်း ဝၼ်းပုတ်ႉထၸဝ်ႈ ၵူၼ်းၼုမ်ႇၼႂ်းၸိုင်ႈတႆးလၢႆတီႈ ႁူမ်ႈၵၼ် ၽုၵ်ႇတူၼ်ႈမႆႉ ပိူဝ်ႈႁႂ်ႈၼမ်ႉလိၼ်ႁိၼ်ၽႃပႃႇမႆႉ ၸိုင်ႈတႆးၶဵဝ်ၸမ်ႉၼမ်ႉလိူင်ႇ။


ဝၼ်းတီႈ 10/05/2017 ၼႂ်းတူင်ႇဝဵင်းလႃႈသဵဝ်ႈၼၼ်ႉ ၸုမ်းၸဵင်ၼုမ်ႇလႄႈ ပီႈၼွင်ႉၼႂ်း ပိုၼ်ႉတီႈဢိူင်ႇၵုင်းသႃႇ ဢဵၼ်ႁႅင်းပၢၵ်ႇပၢႆ ႁူမ်ႈၵၼ်ၽုၵ်ႇတူၼ်ႈမႆႉပႅၵ်ႇ200 တူၼ်ႈ ဢိၵ်ႇ တူၼ်ႈမႆႉလၢႆလၢႆယၢင်ႇ။ မိူၼ်ၼင်ႇမႆႉႁူၵႂၢင် ၵမ်ႈၽွင်ႈႁွင်ႉမႆႉမီပုၺ်ႉ ၸဵမ်ၸိူဝ်းၼႆႉ။

Photo - Lao Htek Fa

Photo - Mr-Moon On

ယိူင်းဢၢၼ်းဢၼ်လႆႈၽုၵ်ႇတူၼ်ႈမႆႉၼႆႉ ႁႂ်ႈလႆႈပဵၼ်လွင်ႈႁူမ်ႈသၢင်ႈႁဵတ်းတၢင်းလီ ၼႂ်းဝၼ်း ပုတ်ႉထ လိူၼ်ႁူၵ်းမူၼ်းလႄႈ ႁႂ်ႈသၽႃႇဝ မိူင်းတႆး လိၼ်ၸမ်ႉၼမ်ႉလိူင်ႇ ။


ၸၢႆးသႅင်သွမ်ႇ ၵေႃႉဢွၼ်ႁူဝ်ၽုၵ်ႇတူၼ်ႈမႆႉလၢတ်ႈဝႃႈ -“တူၼ်ႈမႆႉၼႆႉ ပဵၼ်ဢူၺ်းလီၵူၼ်း ႁဝ်းၵေႃႈဝႃႈလႆႈ ပဵၼ်ၽူႈၵႅတ်ႇၵင်ႈပႂ်ႉပႃး ပၢႆးယူႇလီၵူၼ်းႁဝ်း၊ တူၼ်ႈမႆႉၼႆႉၸွႆႈႁႄႉၵင်ႈပၼ် တၢင်းမႆႈႁႅင်း၊ ၾူၼ်တူၵ်းႁႅင်း၊ မိူၼ်ၼင်ႇၵႂၢမ်းထုင်းႁဝ်းမီးဝႃႈ “မႆႉလီမီးၼိုင်ႈတူၼ်ႈ ၼူၵ်ႉ မူၼ်ႈမိုၼ်ႇသႅၼ်တူဝ် ” ၵွပ်ႈၼၼ်ယွၼ်းႁႂ်ႈၵူၼ်းမိူင်းတႆးၵူႈတီႈ ၵူၼ်းၼုမ်ႇတႆးၵူႈတၢင်းဢွၼ် ၵၼ်ႁူမ်ႈၵၼ် ၽုၵ်ႇတူၼ်ႈမႆႉ ၵၼ်ၼမ်ၼမ်သေၵမ်း ” ဝႃႈၼႆ။


ၸိူင်ႉၼၼ်ၼင်ႇၵဝ်ႇ ၸုမ်းၵူၼ်းၼုမ်ႇဝဵင်းလၢႆးၶႃႈလႄႈ ၸုမ်းၵူၼ်းၼုမ်ႇဝဵင်း ၶူဝ်လမ် (ၶူဝ် ၶမ်း) ၵေႃႈ ဢွၼ်ၵၼ်ၽုၵ်ႇတူၼ်ႈမႆႉ ၼႂ်းဝၼ်လိူၼ်ႁူၵ်းမူၼ်းတႃႇ 1,111တူၼ်ႈ တီႈၵွင်းမူး သၢၼ် လႄႈ ၵွင်းမူးၼွင်ၽႃ ဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်း။