ၼႂ်းတိုဝ်ႉတၢင်း ပွႆးလူႇတၢၼ်းယၢတ်ႇၼမ်ႉ ဝိႁၢရ်မႂ်ႇ သိမ်ႇမႂ်ႇ သႃလႃးမႂ်ႇ ႁူင်းထမ်းမႂ်ႇလႄႈ ပွႆးၶၢမ်ႇ သၢင်ႇ/ ၶၢမ်ႇၸၢင်း တီႈဝိႁၢရ်လႅင်းၶမ်း ဢိူင်ႇႁူၺ်ႈၵဵင် ၸႄႈဝဵင်းတၢင်ႉယၢၼ်း ၸတ်းႁဵတ်းပႃး ပၢင် ဢုပ်ႇၶႆႈ ပိုၼ်ႉႁူႉပၢႆးႁၼ် ပွၵ်ႈၵမ်းတီႈ 2 ။

ဝၼ်းတီႈ 7-8/5/2017 ယၢမ်းၵၢင်ၼႂ် ထိုင် ဝၢႆးဝၼ်း တီႈဝတ်ႉဝိႁၢရ်လႅင်းၶမ်း ဝၢၼ်ႈႁူၺ်ႈၵဵင် ဢိူင်ႇ ႁူၺ်ႈၵဵင် ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ မီးၵၢၼ်ၸတ်းႁဵတ်းပွႆး ယၢတ်ႇၼမ်ႉဝိႁၢရ်၊ သႃလႃးသိမ်ႇ ၸတ်းႁဵတ်းပႃးပၢင်ဢုပ်ႇၶႆႈ ၵဵဝ်ႇလူၺ်ႈၽႃႇသႃႇ သႃသၼႃႇ ၸိူဝ်ႉၸၢတ်ႈ မီး ပီႈၼွင်ႉၵူၼ်းဝၢၼ်ႈၵူၼ်းမိူင်း ၶဝ်ႈႁူမ်ႈထွမ်ႇငိၼ်းၼပ်ႉႁူဝ်ပၢၵ်ႇ  ဝႃႈၼႆ။


ႁိုၼ်းၵႃယၢင်း ၽူႈတႅမ်ႈလိၵ်ႈ လၢတ်ႈဝႃႈ “ ပၢင်ဢုပ်ႇၶႆႈဢၼ်ဝႃႈၼၼ်ႉ ၽူႈတႅမ်ႈလိၵ်ႈ၊ ၽူႈတႅမ်ႈဝွၵ်း၊ ၸဝ်ႈပၢႆးမွၼ်းၶဝ် ဢဝ်ပၢင်ဢုပ်ႇၶႆႈၼၼ်ႉ ႁဵတ်းၶူဝ်ၵၢႆႇသုတ်ႉၸူးၽူႈထွမ်ႇငိၼ်း ပွင်ႇဝႃႈတႄႉ ၵဵဝ်ႇၵပ်း ၵၢၼ်လိၵ်ႈလၢႆး ၵၢၼ်ပၢႆးမွၼ်း ၸိူဝ်းၼႆႉ ၼင်ႇႁိုဝ် ပီႈၼွင်ႉၵူၼ်းမိူင်းပေႃးတေတိုဝ်းႁူႉပွင်ႇ၊ တိုဝ်းသူၼ် ၸႂ်လိူဝ်မႃးထႅင်ႈ။ သင်ယူႇတီႈၼႂ်းလိၵ်ႈၼႂ်းလၢႆးသေ ၵပ်းသိုပ်ႇၵၼ်ၸိုင် မၼ်းပႆႇထိုင်တီႈ။ ယွၼ်ႉ ၼၼ် ၸင်ႇဢဝ်တၢင်တူဝ်ၶဝ် သဵင်ၶဝ်မႃးႁူပ်ႉထူပ်းတင်းၽူႈထွမ်ႇငိၼ်းသေ တေႃႉတႆႇၶႆႈ   ၼႄၵၼ် ပွင်ႇဝႃႈၸိူင်ႉၼၼ်” ဝႃႈၼႆ။


ယိူင်းဢၢၼ်းပၢင်ဢုပ်ႇၶႆႈတႄႉ ပိူင်ယႂ်ႇသုတ်းၶႂ်ႈႁႂ်ႈ ပေႃႈမႄႈပီႈၼွင်ႉၵူၼ်းမိူင်းတိုဝ်းလူလိၵ်ႈမႃး၊ သင် ပေႃႈမႄႈႁူႉပွင်ႇလႅင်း လုၵ်ႈလၢင်းၶဝ်ၵေႃႈ တေမေႃဝႆႉၵႃႈၶၼ်ၵၢၼ်လိၵ်ႈလၢႆးလႄႈ ပၢႆးပၺ်ၺႃ ဢိၵ်ႇ လူၺ်ႈ ၵၢၼ်ပိုၼ်းႁိုဝ်၊ ၵၢၼ်မိူင်းၸဵမ်ၸိူဝ်းၼႆႉ။ ၼင်ႇႁိုဝ် ၵူၼ်းမိူင်းႁဝ်း ပေႃးတေတိူဝ်း သူၼ်ၸႂ် မႃး လႄႈ ၸင်ႇလႆႈၸတ်းႁဵတ်းပၢင်ဢုပ်ႇၶႆႈမႃး ဝႃႈၼႆ။


ၼႂ်းပၢင်ဢုပ်ႇၶႆႈ ၵဵဝ်ႇလူၺ်းၽႃႇသႃႇ သႃႇသၼႃႇ ၸိူဝ်ႉၸၢတ်ႈတီႈဝတ်ႉလႅင်းၶမ်း ဝၢၼ်ႈႁူၺ်ႈၵဵင်ၼႆႉ မီးၽူႈယႂ်ႇၵူၼ်းလူင် ၽူႈမီးပိုၼ်ႉႁူႉၶဝ် မႃးဢုပ်ႇၶႆႈၼႄ မိူၼ်ၼင်ႇ ၸဝ်ႈတူၼ်ၶူး သီႇရိထမ်ႇမ ဝဵင်း ဢိၼ်း မွၵ်ႇလၢတ်ႈၵၢၼ်သႃႇသၼႃႇလႄႈ ၵၢၼ်ၸိူဝ်ႉၸၢတ်ႈ၊ ၸဝ်ႈတူၼ်ၶူး ၼေႃႇၶမ်းလႃႈ ထမ်ႇမ သႃမိ မိူင်းပဵင်း မွၵ်ႇလွင်ႈၵၢၼ်ႁဵၼ်းထမ်ႇမ ၸွင်ႇဢဝ်ႁဵတ်းၵၢၼ်လဵင်ႉတွင်ႉလႆႈ၊ ၸဝ်ႈတူၼ်ၶူး ၸၼ်ႇ တိမႃႇ ၸၼ်ႉၸွမ်ပုတ်ႉထၸိုင်ႈတႆး မွၵ်ႇလၢတ်ႈ ၵူၼ်းၸိူင်ႉႁိုဝ် ဢၼ်ႁဝ်းလူဝ်ႇလႆႈမီး၊ ၼမ်ႉၸႂ် ၸိူင်ႉ ႁိုဝ်ဢၼ်ႁဝ်းလူဝ်ႇလႆႈမီး။


ၸဝ်ႈၶူးသိရီထမ်ႇမႃႇ ၽိပႃလ ဝတ်ႉဝေႇလုဝၼ်ႇ ဝဵင်းတူၼ်ႈတီး မွၵ်ႇလၢတ်ႈလွင်ႈ သၢမ်ၶႃၵဵင်း ယၼ်မၼ်ႈ၊ ၶူးႁိုၼ်းၵႃယၢင်း ဢုပ်ႇၶႆႈလွင်ႈပၢႆးဝူၼ်ႉပိၼ်ႈၽူၼ်၊ ၼၢင်းႁိူၼ်းၶမ်း ၸုမ်းၼၢင်းယိင်းၸိုင်ႈတႆး SSWO ၶႆႈၼႄလွင်ႈ ၼၢင်းယိင်းလႄႈ ၵၢၼ်ၸိူဝ်ႉၸၢတ်ႈ၊ ၸရေးၵေႃႇမိူင်း ၼမ်ႉတႅၼ်ႈ ၶႂ်ႈၼႄလွင်ႈႁူမ်ႈ သၢင်ႈတူင်ႇ ဝူင်းၵူၼ်း၊ ၽူႈတႅၼ်းသၽႃးၸိူဝ်ႉၶိူဝ်း ၸၢႆးဝၼ်းလႅင်း လၢတ်ႈၼႄလွင်ႈ ပၢႆးပၺ်ၺႃ တၢင်းႁၢတ်းႁၢၼ်လႄႈ ၸူဝ်ႈပၢၼ် ၸဵမ်ၸိူဝ်းၼႆႉ။