သိုၵ်း၊ပလိၵ်ႈထႆး တင်ႈလၢၼ်ႇၵူတ်ႇထတ်း ၼိူဝ်သဵၼ်ႈတၢင်းသေ တီႉၺွပ်းၵူၼ်းမိူင်းမၢၼ်ႈ လၵ်ႉလွမ် ၶဝ်ႈမိူင်းထႆးႁိမ်း ၸမ် 30 ၵေႃႉ။


ဝၼ်းတီႈ 21/05/2017 ၸဝ်ႈၼႃႈတီႈပလိၵ်ႈ တင်ႈလၢၼ်ႇ (ၵဵတ်ႉ) ၵူတ်ႇထတ်း ႁိမ်းသဵၼ်ႈ တၢင်း ၼႂ်းၵႄႈၸႄႈဝဵင်းဢူမ်းၵွႆ - ဝၢၼ်ႇတိုၼ်ႇ ၸႄႈတွၼ်ႈၵဵင်းမႆႇ။ ၵူတ်ႇထတ်းတီႉလႆႈ ၵႃး2 လမ်း တၢင်ႇၵူၼ်းမိူင်းမၢၼ်ႈလၵ်ႉၶဝ်ႈမိူင်းထႆး - ဢမ်ႇမီးဝတ်းဝႂ်သင်တင်းမူတ်း27ၵေႃႉ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈႁႅင်းၵၢၼ်ယၢၼ်မိူင်း HRDF ယၢမ်ႈလၢတ်ႈဝႃႈ – “ ပီႈၼွင်ႉ မိူင်းႁူမ်ႈတုမ်ၵူႈၵေႃႉ ပေႃးတေဢွၵ်ႇမိူင်းၸိုင် ႁႂ်ႈဢွၼ်ၵၼ်လဵပ်ႈႁဵၼ်း လွင်ႈပၵ်းပိူင်မၢႆမီႈသေ ၶဝ်ႈမိူင်းႁႂ်ႈထုၵ်ႇမႅၼ်ႈၸွမ်းၼင်ႇပၵ်းပိူင်မၢႆမီႈ ။ ပေႃးဝႃႈတေမႃးႁဵတ်းၵၢၼ် ၼႂ်းမိူင်းထႆး ၵေႃႈႁႂ်ႈလဵပ်ႈႁဵၼ်းတူၺ်းဝႃႈ ၵၢၼ်ဢၼ်လႂ်ဢၼ်ႁဝ်းႁဵတ်းလႆႈ ၵၢၼ်ဢၼ်လႂ် ဢၼ်ႁဝ်း ဢမ်ႇႁဵတ်းလႆႈ ပေႃးႁူႉယဝ်ႉၵေႃႈ လိူၵ်ႈႁဵတ်းၵၢၼ်ဢၼ်ႁဝ်း ႁဵတ်းလႆႈၼၼ်ႉတေတိူဝ်းလီ ပေႃးႁဝ်းႁဵတ်းထုၵ်ႇမႅၼ်ႈ ၸွမ်းၼင်ႇပၵ်းပိူင်ဝၢၼ်ႈမိူင်းပိူၼ်ႈၸိုင် ပိူၼ်ႈၵေႃႈဢမ်ႇၸၢင်ႈမႃး ဢဝ်တၢင်း ၽိတ်းသင်တီႈႁဝ်း ”ဝႃႈၼႆ။


ၵူၼ်းလၵ်ႉလွမ်ၶဝ်ႈမိူင်း ထႆးပွၵ်ႈၵမ်းၼႆႉ ဢၢၼ်းတေဢွၼ်ၵၼ်ၶဝ်ႈၼႂ်း ဝဵင်းၵဵင်းမႆႇ ၸိုင်ႈထႆး တႃႇႁဵတ်းၵၢၼ်ႁႃငိုၼ်း ။ ယၢမ်းလဵဝ်ၸဝ်ႈၼႃႈတီႈ ၶဝ်တီႉၺွပ်းဝႆႉသေတေၶိုၼ်း သူင်ႇပွၵ်ႈ လႅၼ်လိၼ်။



ၼႂ်းၶၢဝ်းတၢင်း3-4 ပီပူၼ်ႉမႃးၼႆႉ ၵူၼ်းမိူင်းတႆးဢၼ်လၵ်ႉလွမ်ၶဝ်ႈမိူင်းထႆး ဢမ်ႇပေႃးမီး။ ၵမ်ၼမ်ယိပ်းပၢတ်ႊသပွတ်ႊသေ ၶဝ်ႈဢႅဝ်ႇယဵမ်ႈဝႆႈၽြႃးၼႂ်းမိူင်းထႆးတႄႉမီးၼမ်။ ဢၼ်တီႉ လႆႈပွၵ်ႈၵမ်းၼႆႉပဵၼ်ဢၼ်တီႉလႆႈၶိုၼ်းၵူၼ်းလၵ်ႉၶဝ်ႈမိူင်းထႅင်ႈၼမ်တႄႉတႄႉ  ပီႈၼွင်ႉတႆး ၸွမ်းလႅၼ်လိၼ်ထႆးၵေႃႉၼိုင်ႈလၢတ်ႈ။