သင်ၶၸဝ်ႈၼႂ်းဢိူင်ႇမိူင်းၼုင်း ဢွၼ်ႁူဝ်ၼမ်းၼႃႈ ၸတ်းႁဵတ်းပွႆးလူင်းပၢင်သွၼ် လိၵ်ႈၽႃသႃၶိုၼ် ပိုၼ်ႉမိူင်း/ လိၵ်ႈတႆးၶိုၼ် ပဵၼ်ပွၵ်ႈၵမ်းႁႅၵ်ႈ တီႈဝတ်ႉၽရႃးၸဝ်ႈတိပ်ႉဢိၼ်းသၢၼ် ဢိူင်ႇမိူင်းၼုင်း ၸႄႈဝဵင်းမိူင်းၶၢၵ်ႇ ၸႄႈတွၼ်ႈၵဵင်းတုင် မီးပေႃႈမႄႈပီႈၼွင်း ၵူၼ်းမိူင်းလႄႈ လုၵ်ႈႁဵၼ်းၶဝ်ႈႁူမ်ႈ တင်းၼမ်လၢႆ။

ဝၼ်းတီႈ 18/05/2017 ယၢမ်းၵၢင်ၼႂ် 09:00-15:00 မူင်းဝၢႆးဝၼ်း သင်ၶၸဝ်ႈ ဢွၼ်ႁူဝ်ၸတ်း ႁဵတ်း ပွႆးလူင်း ပၢင်သွၼ်လိၵ်ႈတႆးၶိုၼ် တီႈဝတ်ႉၽရႃးၸဝ်ႈတိပ်ႉဢိၼ်းသၢၼ် ဢိူင်ႇမိူင်းၼုင်း ၸႄႈဝဵင်းမိူင်းၶၢၵ်ႇ လုၵ်ႈႁဵၼ်းၸိူဝ်းမႃးၶဝ်ႈႁူမ်ႈ ႁပ်ႉသူးရၢင်းဝလ်း မီး 152 ၵေႃႉ။ ပီၼႆႉ ၸတ်းႁဵတ်း ပၢင်သွၼ်လႄႈ ပွႆးလူင်းပၢင် ပဵၼ်ပွၵ်ႈၵမ်းႁႅၵ်ႈ။ ၼင်ႇႁိုဝ် လုၵ်ႈဢွၼ်ႇပေႃးတေမီးတၢင်းၶတ်းၸႂ်၊ ပေႃးတေၶဝ်ႈဢွၵ်ႇ ဝတ်ႉဝႃးလႄႈ ႁပ်ႉႁူႉလွင်ႈ ၾိင်ႈငႄႈႁိတ်ႈႁွႆးတူဝ်ၸဝ်ႈၵဝ်ႇ ၸဵမ်ၸိူဝ်းၼႆႉ ဝႃႈၼႆ။


ၶူးသွၼ်တူႉယီႈ ၽူႈၸတ်းၵၢၼ် ပၢင်သွၼ်လိၵ်ႈတႆးၶိုၼ် ၶၢဝ်းမႆႈ လၢတ်ႈဝႃႈ “ ယိူင်းဢၢၼ်း ဢၼ်လႆႈ ၸတ်းႁဵတ်း ပၢင်သွၼ်ၼႆႉ ၶႂ်ႈၾိုၵ်းသွၼ်ပၼ်လုၵ်ႈဢွၼ်ႇတႆးႁဝ်း ၸဵမ်လဵၵ်ႉ၊ ၾိုၵ်းၶဝ်ၸဵမ်လဵၵ်ႉယဝ်ႉ ၶဝ်ၵေႃႈတေႁူႉ လိၵ်ႈႁဝ်းသေ တေႁူႉၵၢၼ်ၶဝ်ႈဝတ်ႉၶဝ်ႈဝႃး၊ ႁႂ်ႈႁူႉလွင်ႈ ၾိင်ႈႁိတ်ႈႁွႆးၶွင်ႁဝ်း၊ လိၵ်ႈလၢႆးႁဝ်း ႁႂ်ႈမေႃဢၢၼ်ႇလႆႈ တႅမ်ႈလႆႈလႄႈ ႁႂ်ႈမေႃႁၵ်ႉသႃပႂ်ႉပႃးလိၵ်ႈႁဝ်း ၸဵမ်ၸိူဝ်းၼႆႉ” ဝႃႈၼႆ။


ၼႂ်းပွႆးလူင်းပၢင်သွၼ်လိၵ်ႈတႆးၶိုၼ် တီႈၼႂ်းဢိူင်ႇမိူင်းၼုင်း ပွၵ်ႈၵမ်းၼႆႉ မီးသင်ၶၸဝ်ႈ၊ ၽူႈယႂ်ႇၵူၼ်းလူင်ၼႂ်းဝၢၼ်ႈ ၼႂ်းဢိူင်ႇလႄႈ ၶူးသွၼ် မွၵ်ႇလၢတ်ႈၶေႃႈၵႂၢမ်းပၼ်ႁႅင်း လုၵ်ႈႁဵၼ်းလႄႈ တွၼ်ႈသူး ယွင်ႈၼမ်ႉၸႂ် လုၵ်ႈႁဵၼ်းၵႂႃႇ ဝႃႈၼႆ။


ပၢင်သွၼ်လိၵ်ႈတႆးၶိုၼ်ၼႆႉ တႄႇပိုတ်ႇပူင်သွၼ်ပၼ် လုၵ်ႈဢွၼ်ႇ မိူဝ်ႈဝၼ်းတီႈ 20/03/2017 ပိုတ်ႇသွၼ်ပၼ်တႃႇ 7 ဝၢၼ်ႈ မိူၼ်ၼင်ႇ ဝၢၼ်ႈပၢၵ်ႇၵၢင်၊ ဝၢၼ်ႈၵမ်ႉမႂ်ႇ၊ ဝၢၼ်ႈၶမ်းၼွႆႉ၊ ဝၢၼ်ႈဢၢင်ႈ၊ ဝၢၼ်ႈယၢင်းလူင်၊ ဝၢၼ်ႈၸူင်လႄႈ ဝၢၼ်ႈ ၸႅင်ႈ။ ၶူးပူင်သွၼ်ပၼ် တင်းမူတ်းမီး 13 တူၼ် ဝႃႈၼႆ။


ပၢင်တွပ်ႇလိၵ်ႈသမ်ႉ ဝၼ်းတီႈ 16/05/2017 တီႈဝတ်ႉၽရႃးၸဝ်ႈတိပ်ႉဢိၼ်းသၢၼ်၊ ထိုင်မႃး ဝၼ်းတီႈ 18/05/2017 တွၼ်ႈသူးရၢင်းဝလ်းယွင်ႈၼမ်ႉၸႂ် လုၵ်ႈႁဵၼ်း။