ပၢင်ပွႆးယုၵ်ႉယွင်ႈၵုင်ႇမုၼ် သင်ၶတႆး ၸိူဝ်းလႆႈႁပ်ႉၸုမ်ႈၶူး ၼွၵ်ႈမိူင်း/ ၼႂ်းမိူင်း 15 တူၼ် ၸတ်းႁဵတ်းတီႈဝိႁၢရ် လူင်ၵျွင်းတူႇယႃး ဝဵင်းၵဵင်းတုင် တေမီးပီႈၼွင်ႉတၵ်ႉၵႃႇသတ်ႉထႃး တီႈၸမ်/ၵႆ ၶဝ်ႈႁူမ်ႈ ပၢင်ထၢပ်ႈၵၢမ်ႇၶဝ်ၸဝ်ႈ။


ပၢင်ယုၵ်ႉယွင်ႈၵုင်ႇမုၼ်ထၢပ်ႈၵၢမ်ႇၼႆႉ တေၸတ်းႁဵတ်းၼႂ်း ဝၼ်းတီႈ28-30/05/2017 တီႈဝိႁၢရ်လူင်ၵျွင်းတူႇယႃး ပွၵ်ႉ 1 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ၸၢႆးတၢၼ်း ၾၢႆႇၶွမ်ႊမတီႊပွင်ပဵၼ်ပၢင်ပွႆးယွင်ႈၵုင်ႇသင်ၶတႆး လၢတ်ႈဝႃႈ “ ပၢင်ယွင်ႈၵုင်ႇၼႆႉ ဢမ်ႇၸႂ်ႈၸတ်းႁဵတ်း တႃႇသင်ၶတႆး ၼႂ်းဝဵင်းၵဵင်းတုင်ၵူၺ်း၊ ၸတ်းႁဵတ်းယွင်ႈၵုင်ႇ သင်ၶတႆး တၢင်းပွတ်းဢွၵ်ႇၶူင်း ပတ်းပိုၼ်ႉ ၸိူဝ်းသင်ၶ ၸဝ်ႈၶဝ် ဢၼ်ႁဵၼ်းယဝ်ႉသေ လႆႈႁပ်ႉၸုမ်ႈၶူး ၼွၵ်ႈမိူင်း၊ ၼႂ်းမိူင်း တင်းသဵင်ႈ။ ၸဝ်ႈတူၼ်ၶူးလူင် ၸိူဝ်းဢၼ်လႆႈ ႁပ်ႉၸုမ်ႈၶူးသေ ႁဝ်းၶႃႈပႆႇလႆႈယွင်ႈၵုင်ႇၵေႃႈတိုၵ်ႉမီး၊ သင်ၶၸဝ်ႈ ၸိူဝ်းႁဝ်းၶႃႈလႆႈယွင်ႈၵုင်ႇယဝ်ႉ ႁိုင်ၼၢၼ်း ယဝ်ႉၸိူဝ်းၼၼ်ႉၵေႃႈတေ ၶိုၼ်းယွင်ႈၵုင်ႇထႅင်ႈ ” ဝႃႈၼႆ။


သင်ၶတႆး ဢၼ်တေယွင်ႈၵုင်ႇ 15 တူၼ် ၼႂ်းဝၼ်းတီႈ 28-30/05/2017 ၼႆႉ ပဵၼ်ၸဝ်ႈတူၼ်ၶူးလူင် ပၺ်ႇၺႃသႃႇမိ B.A Psychology ၵျွင်းတူႇယႃး ဝဵင်းၵဵင်းတုင်၊ ၸဝ်ႈတူၼ်ၶူးလူင် ပၺ်ႇၺႃႇၸႃႇရ  ဢၽိဝိသေသ လတ်ႉ ၸိပေႇသလသႃသၼ လင်ႇၵရ ၵျွင်းထၢတ်ႈပူင်ႇလူဝ်ႉ ဝဵင်းတႃႈၶီႈလဵၵ်း၊ ၸဝ်ႈတူၼ်ၶူးလူင် ၻွၵ်ႊတိူဝ်ႊ ပၺ်ႇၺႃဝမ်ႇ သ B.A- M.A., M.Phil(Ph.D-Buddhism-Sri Lanka) ၵျွင်းထမ်ႇမိၵပုပ်ႇၽႃႇရႃႇမၵၢတ်ႇတဝ်ႇ ဝဵင်းၵဵင်းတုင်၊ ၸဝ်ႈ တူၼ်ၶူး ၺႃႇၼသီႇရိ B.A., Buddhism ၊ M.A- Sri Lanka ၵျွင်းၵမ်ႇမထၢၼ်း မႁႃၽေႃးထိ ဝဵင်းတႃႈၶီႈလဵၵ်း၊ ၸဝ်ႈ တူၼ်ၶူး ၻွၵ်ႊတိူဝ်ႊ ထမ်ႇမသႃမိ (ၼေႃႇၶမ်းလႃႉ) B.A.,M.A.,M-Phil (Ph.D-Psychology. Sri. Lanka)၊ ၸဝ်ႈ တူၼ်ၶူးဢၵ်ႉၵသေၼ (လႅင်းတႆး) B.A Buddhism Thailand ၵျွင်းထမ်ႇမိၵပုပ်ႇၽႃႇရႃႇမ ၵၢတ်ႇတဝ်ႇ ဝဵင်းၵဵင်း တုင်၊ ၸဝ်ႈၶူးသုၸိတ်ႉတ (သႃသၼတၸထမ်ႇမႃႇၸရိယ) ၵျွင်းမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း၊ ၸဝ်ႈၶူးၵေႃးဝိတ (သႃသၼထ ၸထမ်ႇ ၸရိယ) ၵျွင်းထမ်ႇမေႃးတယ ဝဵင်းၵဵင်းတုင်၊ ၸဝ်ႈၶူးရႃႇၸိင်ႇတ (လသူၺ်ႇ) B.A-Thailand, M.A- Sri Lanka ၵျွင်းၵမ်ႇထၢၼ်းမႁၽေႃးထိ ဝဵင်းတႃႈၶီႈလဵၵ်း၊ ၸဝ်ႈၶူးဢိသ်ႉသရ (တိပ်ႉ) B.A-Philosophy-Thailand) ၵျွင်းထမ်ႇမေႃးတယ ဝဵင်းၵဵင်းတုင်၊ ၸဝ်ႈၶူးသေႃးၽၼ(သၢမ်ၶမ်း) B.A Philosophy-Thailand ၵျွင်းတူႇယႃး ၊ၸဝ်ႈၶူးဢိၼ်ႇတႃႇၸၵ်ႉၵ B.A-Buddhism-Thailand ဝဵင်းတူႇယႃး ဝဵင်းၵဵင်းတုင်၊ ၸဝ်ႈၶူးပၺ်ႇ ၺႃတိၸ်ႉသ (ၼုမ်ႇတႆး) B.A.,-Humanity Thailand ၵျွင်းထမ်ႇမေႃးတယ ဝဵင်းၵဵင်းတုင်၊ ၸဝ်ႈၶူးၸေႃး တႃႇလင်ႇ ၵႃႇရ သႃသၼထၸထမ်ႇမၸရိယ ၵျွင်းၵုင်းမူင်ႈ ဝဵင်းၵဵင်းတုင်လႄႈ ၸဝ်ႈၶူးဝိလိင်ႇတ သႃသၼထၸထမ်ႇမ ၸရိယ ၵျွင်းထမ်ႇမေႃးတယ ဝဵင်းၵဵင်းတုင် ၸဵမ်ၸိူဝ်းၼႆႉ။


ၶပ်းမၢႆပၢင်ပွႆးယွင်ႈၵုင်ႇသမ်ႉ ၼႂ်းဝၼ်းတီႈ 28/05/2017 ပီႈၼွင်ႉတၵ်ႉၵႃႇသတ်ႉထႃး ႁၢင်ႈႁႅၼ်းဢဝ်ၶူဝ်း လူႇ တၢၼ်း ၶိုၼ်ႈဝတ်ႉ၊ ဝၼ်းတီႈ 29/05/2017 သမ်ႉ ယွင်ႈၵုင်ႇသင်ၶၸဝ်ႈ 15 တူၼ် တီႈဝိႁၢရ်လူင်ၵျွင်းတူႇယႃး ဝဵင်းၵဵင်းတုင်၊ ဝၼ်းတီႈ 30/05/2017 လူႇတၢၼ်းယၢတ်ႇၼမ်ႉ ဝႃႈၼႆ။


ၼႂ်းပၢင်ပွႆးယွင်ႈၵုင်ႇၶၢဝ်းတၢင်း 3 ဝၼ်းၼႆႉ ယၢမ်းၵၢင်ၶမ်ႈ တေမီးတေႇသၼႃႇပၢင်ထွမ်ႇထမ်းတြႃး၊ မီး ပၢင်မူၼ်ႈသိူဝ်း ၸၢတ်ႈတႆးပၢႆးမွၼ်းပၢၼ်ၵဝ်ႇ/ပၢၼ်မႂ်ႇ ၸဵမ်ၸိူဝ်းၼႆႉ ဝႃႈၼႆ။


ပူၼ်ႉမႃး မိူဝ်ႈဝၼ်းတီႈ 21/05/2017 လုၵ်ႈႁဵၼ်းသင်ၶတႆးလႄႈ ၵူၼ်းႁိူၼ်း 26 ၵေႃႉ လႆႈၸုမ်ႈၶူး B.A-M.A တီႈၸၼ်ႉၸွမ်ဝၢင်းၼွႆႉ ဢယုတ်ႉတယႃး ၸိုင်ႈထႆး ဝႃႈၼႆ။