ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵျွၵ်ႉမႄး ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ႁူပ်ႉထူပ်း မေႃသွၼ်လိၵ်ႈတႆး ၸိူဝ်းႁပ်ႉပုၼ်ႈၽွၼ်းတႃႇပူင်သွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ  ၼႂ်းပီ 2017-2018။


မေႃသွၼ်လိၵ်ႈတႆး ၸိူဝ်းတေပူင်သွၼ်လုၵ်ႈႁဵၼ်း ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ ႁူပ်ႉထူပ်းဢုပ်ႇဢူဝ်းၵၼ် မိူဝ်ႈဝၼ်းတီႈ 23/05/2017 ယၢမ်းၵၢင်ၼႂ် 09:00-15:00 မူင်း။ ပၢင်ႁူပ်ႉထူပ်းၼႆႉ ၸတ်းႁဵတ်းတီႈဝိႁၢရ်ၵျွင်းယွတ်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မေႃသွၼ်မႃးၶဝ်ႈႁူမ်ႈ မီး 65 ၵေႃႉ ဝႃႈၼႆ။

ပႃႈၼၢင်းၶိၼ်ႇမႃႇဢေး ၽူႈၼမ်းၼႂ်းၵေႃလိၵ်ႈလၢႆး/ၾိင်ႈငႄႈတႆး ၵျွၵ်ႉမႄး လၢတ်ႈဝႃႈ “ ယူႇတီႈမေႃသွၼ် ၼၢင်း လွၼ်ႉဢွမ် မႃးသပ်းလႅင်းၼႄ မေႃသွၼ် ၸိူဝ်းတေႁပ်ႉပုၼ်ႈၽွၼ်း တႃႇတေသွၼ်လိၵ်ႈတႆး ၼႂ်းႁူင်းႁဵၼ်း လူင်ပွင် ၸိုင်ႈမၢၼ်ႈ၊ လွင်ႈမေႃသွၼ်ႁဝ်း ၼမ်ႉၸႂ်ႁဝ်း တေလႆႈဝႆႉၸိူင်ႉႁိုဝ်၊ လွင်ႈပူင်သွၼ်ပၼ်လုၵ်ႈဢွၼ်ႇသမ်ႉ တေလႆႈႁဵတ်း ၸိူင်ႉႁိုဝ်၊ မိူၼ်ၼင်ႇဝႃႈ တွၼ်ႈလိၵ်ႈႁဝ်းမီး 6 တွၼ်ႈ လိူၼ်ၼႆႉသမ်ႉ ႁဝ်းသွၼ်ယဝ်ႉၵႂႃႇသင်ၽွင်ႈ၊ ၵူႈဝၼ်းၵူႈဝၼ်း ၼၼ်ႉ ႁဝ်းတေလႆႈမၢႆတွင်းသင်။ တေသွၼ်ႁဵတ်းႁိုဝ် ၼင်ႇႁိုဝ်လုၵ်ႈႁဵၼ်းတေသူင်ႁဵၼ်း-ၸဵမ်ၸိူဝ်းၼႆႉ” ဝႃႈၼႆ။


သိုပ်ႇလၢတ်ႈထႅင်ႈဝႃႈ မိူဝ်ႈသွင်ပီ ပူၼ်ႉမႃးလႆႈ ပိုတ်ႇသွၼ်ၵႂႃႇၼႂ်းႁူင်းႁဵၼ်းလူင်ပွင်ၸိုင်ႈ 125 ႁူင်းႁဵၼ်း။ မိူဝ်ႈပီပူၼ်ႉမႃးသမ်ႉ မီး 85 ႁူင်းႁဵၼ်း၊ ယွၼ်ႉပိူဝ်ႈ ဢဵၼ်ႁႅင်းလုၵ်ႈႁဵၼ်းၵႂႃႇမီးတီႈႁူင်းႁဵၼ်းလူင်ပွင်ၸိုင်ႈမူတ်း၊ ယွၼ်ႉၼၼ် တၵ်းလႆႈၽိုတ်ႉၸူးတီႈဢၼ်မီး ဢဵၼ်ႁႅင်းၼေႃႇတႅၼ်းၶိူဝ်း၊ ၸုင်ၸၼ်ၶဝ်၊ ၵူဝ်ၶဝ်ၵႂႃႇပဵၼ်ပိူၼ်ႈမူတ်း ဝႃႈၼႆ။


ပၢင်သွၼ်လိၵ်ႈတႆး ဢၼ်လႆႈၶႂၢင်ႉသွၼ်ၼႂ်းႁူင်းႁဵၼ်းလူင်ပွင်ၸိုင်ႈသမ်ႉ တႄႇဢဝ် ၶၢဝ်းယၢမ်း ၵၢင်ၼႂ် 07:30-8:30 မူင်း ၵူႈဝၼ်းၸၼ်ထိုင် ဝၼ်းသုၵ်း၊ ပပ်ႉႁဵၼ်းလိၵ်ႈတႆးဢၼ်ၸႂ်ႉတိုဝ်းသေ ပူင်သွၼ်ပၼ်လုၵ်ႈႁဵၼ်းသမ်ႉ ပဵၼ်ပပ်ႉ လိၵ်ႈတႆးမႁႃႈတူဝ်။ လိူဝ်ၼၼ်ႉ ဢၼ်ပူင်သွၼ်ပၼ်လုၵ်ႈဢွၼ်ႇသမ်ႉ မၵ်းမၼ်ႈ တႄႇဢဝ်ၸၼ်ႉၼိုင်ႈ၊ ၸၼ်ႉသွင် လႄႈ ၸၼ်ႉသၢမ် ၸဵမ်ၸိူဝ်းၼႆႉ ဝႃႈၼႆ။


မေႃသွၼ်လိၵ်ႈတႆး ဢၼ်ႁပ်ႉပုၼ်ႈၽွၼ်းသေ ပူင်သွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ မိူဝ်ႈပီ 2016-2017 ၼၼ်ႉ ဢဵၼ်ႁႅင်းမေႃသွၼ်မီး 145 ၵေႃႉ၊ ယူႇတီႈၾၢႆႇလူင်ပွင်ၸိုင်ႈသမ်ႉ ၵမ်ႉထႅမ်ငိုၼ်းလိူၼ်ပၼ်မေႃသွၼ် လိၵ်ႈတႆး ၼိုင်ႈလိူၼ်လႂ် 30000 ပျႃး ဝႃႈၼႆ။


ၼႂ်းပီ 2015-2016 ဢၼ်လႆႈပိုတ်ႇသွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ မီးယူႇ 125 တီႈ၊ မိူဝ်ႈပီ 2016-2017 သမ်ႉ မီး 85 ႁူင်းႁဵၼ်း။ ႁူင်းႁဵၼ်းလူင်ပွင်ၸိုင်ႈမၢၼ်ႈ ၼႂ်းၸႄႈဝဵင်းၵျွၵ်ႉမႄး ၸၼ်ႉငဝ်ႈ၊ ၸၼ်ႉၵၢင်လႄႈ ၸၼ်ႉသုင် တင်းမူတ်းမီး 222 ႁူင်းႁဵၼ်း ဝႃႈၼႆ။