လွင်ႈၶွမ်ႊပၼီႊပျေႉဢွင်ႇႁိူင်း တင်း ႁိူင်းမဵတ်ႉတႃႇ ၶုတ်းထၢၼ်ႇႁိၼ် ၼႂ်းၸႄႈဝဵင်းမိူင်းၵိုင်ၼၼ်ႉ ယူႇတီႈပေႃႈမႄႈပီႈၼွင်ႉ ၵူၼ်းမိူင်းၼပ်ႉႁူဝ်ႁဵင်၊ ဢွၼ်ၵၼ်ဢွၵ်ႇၼႄၵၢင်ၸႂ်သၢၼ်ၶတ်း ဢမ်ႇႁၼ်လီၸွမ်း ၵၢၼ်ၶုတ်းထၢၼ်ႇႁိၼ်၊ တေႁဵတ်းႁႂ်ႈသၢႆမႄႈၼမ်ႉတဵင်း ဢၼ်ပဵၼ်သၢႆၵႄးမႄႈၼမ်ႉ ၼႂ်းၸိုင်ႈတႆးပွတ်းၸၢၼ်း ဢၼ်ၵူၼ်းမိူင်းၼပ်ႉႁူဝ်ႁဵင် ပိုင်ႈဢိင်ၼၼ်ႉ တေလူႉၵွႆဝူၺ်ႇႁင်ႈဢမ်ႇၸိုၼ်ႈသႂ်။


ဝၼ်းတီႈ 25/05/2017 ယူႇတီႈ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) လႆႈဢွၵ်ႇၽိုၼ်တၢမ်းငဝ်းလၢႆး သၢၼ်ၶတ်း ၵဵဝ်ႇၵပ်းလွင်ႈၶုတ်းထၢၼ်ႇႁိၼ် တီႈၾၢႆႇၼိူဝ်ဝၢၼ်ႈလွႆသဵဝ်ႈ ဢိူင်ႇဝၢၼ်ႈယၢတ်ႇ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ယွၼ်ႉဝႃႈတေတုမ်ႉတိူဝ်ႉၵူၼ်းဝၢၼ်ႈၵူၼ်းမိူင်းလႄႈ မႄႈၼမ်ႉတဵင်း ဢၼ်ၵူၼ်းမိူင်းလႆႈပိုင်ႈဢိင်ၸႂ်ႉတိုဝ်း ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ ယူႇတီႈႁဝ်းၶႃႈတႄႉ ၶႂ်ႈတုၵ်းယွၼ်းထိုင်တီႈၶွမ်ႊပၼီႊၶဝ် ႁႂ်ႈၵိုတ်းၶူင်းၵၢၼ်ၶုတ်းထၢၼ်ႇႁိၼ်၊ ႁႂ်ႈၶွမ်ႊပၼီႊၶဝ်ႈၸႂ်ဢၼ်ၵူၼ်းၼႂ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ။ ၵၢၼ်ၶုတ်းထၢၼ်ႇႁိၼ်ၼႆႉ တေပဵၼ်ၽေးသၽႃႇဝၼႂ်းမိူင်းႁဝ်း၊ ၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ တေႁူပ်ႉထူပ်းတၢင်းယၢပ်ႇၽိုတ်ႇ” ဝႃႈၼႆ။


သင်ဝႃႈၶွမ်ႊပၼီႊၶုတ်းထၢၼ်ႇႁိၼ် ၶုတ်းၵႂႃႇၸိုင် မႄႈၼမ်ႉတဵင်း ဢၼ်ၵူၼ်းမိူင်းတႆးပွတ်းၸၢၼ်း၊ ပီႈၼွင်ႉၵူၼ်းမိူင်းဝဵင်းလၢႆးၶႃႈ၊ ၼမ်ႉၸၢင်၊ ပၢင်လူင်၊ လၢင်းၶိူဝ်းလႄႈၵဵင်းတွင်းၸဵမ်ၸိူဝ်းၼႆႉ တေယၢပ်ႇၽိုတ်ႇၼမ်ႉၵိၼ်ၼမ်ႉၸႂ်ႉ ၼမ်ႉလဵင်ႉၼႃး ဝႃႈၼႆ။


ပိုၼ်ႉတီႈၶုတ်းထၢၼ်ႇႁိၼ်ၼႆႉ မီးယူႇဝႆႉၼႂ်းထိူၼ်ႇလွႆ ဢၼ်မီးႁွင်ႈမႄႈၼမ်ႉလၢႆလၢႆသၢႆ ၸိူင်ႉၼင်ႇၼမ်ႉႁူၺ်ႈသိမ်ႇ၊ ၼမ်ႉႁူၺ်ႈမႃလႄႈၼမ်ႉၵုင်းလူမ်း ဢၼ်လႆလေႃႇလူင်းၶဝ်ႈၸူးၼမ်ႉၶီႈသၢင်သေ လႆၶဝ်ႈၸူးမႄႈၼမ်ႉတဵင်းၼၼ်ႉယဝ်ႉ။ ၸွမ်းႁိမ်းႁွမ်းၼမ်ႉၶီႈသၢင်လႄႈ တၢပ်ႈႁူၺ်ႈလွႆၸိူဝ်းၼၼ်ႉ ၵူၼ်းမိူင်းၼႂ်းပိုၼ်ႉတီႈၶဝ်ႁဵတ်းသူၼ်တႅင်တဝ်ႈ၊ တႅင်ႁွမ်၊ မၢၵ်ႇၵဵင်၊ မၢၵ်ႇၸွၵ်း၊ ထူဝ်ႇလိၼ်လႄႈၶဝ်ႈၼႃးၸိူဝ်းၼႆႉ။ ၼိုင်ႈပီမီးငိုၼ်းၶဝ်ႈဢမ်ႇယွမ်း 150 လၢၼ်ႉပျႃး။


ထိူၼ်ႇပႃႇပႅၵ်ႇတီႈၶွမ်ႊပၼီႊၶဝ်ၶုတ်းထၢၼ်ႇႁိၼ်ၼၼ်ႉ ၵူႈပွၵ်ႈၵူၼ်းဝၢၼ်ႈယၢမ်ႈႁၢမ်ႈၵၼ်ဝႆႉဝႃႈ တေဢမ်ႇလႆႈပွမ်ႈ။ ပႃႇထိူၼ်ႇပႅၵ်ႇၼႆႉ ၵူၼ်းမိူင်းလႆႈပိုင်ႈဢိင်ယႂ်ႇၼမ် မိူၼ်ၼင်ႇႁႃၵိၼ်ၽၵ်းၶဵဝ်၊ ႁႃၵဵပ်းႁဵပ်းလႄႈၽၵ်းယိူဝ်ႈၼၢင်းၶဵဝ်တၢင်ႇၸိူဝ်း။ ၵူၼ်းမိူင်းတိုၼ်းႁၢမ်ႈ ဢမ်ႇပၼ်ၽႂ်ပွမ်ႈၽႂ်တႅပ်းယႃႉပႃႇပႅၵ်ႇ၊ ၵူၺ်းၵႃႈပေႃးလူဝ်ႇၸႂ်ႉတႃႇၼႃႈႁိူၼ်းဢိတ်းဢွတ်းတႄႉလႆႈယူႇ ဝႃႈၼႆ။


တင်ႈတႄႇလိူၼ် ၾႅပ်ႊပိဝ်ႊရီႊပီၼႆႉမႃး ၶွမ်ႊပၼီႊမႃးပွမ်ႈမႃးတႅပ်းမႆႉတၢင်းၵႂၢင်ႈ 5 တိုင်ႇသေ မႆႉဢၼ်ၶဝ်တႅပ်းၼၼ်ႉၵေႃႈ ဢဝ်ႁဵတ်းသုမ်ႉသေၶၢႆပၼ်ၵူၼ်းမိူင်းၼႂ်းပိုၼ်ႉတီႈ လူၺ်ႈၶၼ်ထုၵ်ႇထုၵ်ႇ။


ၼင်ႇႁိုဝ်တေၵႄႈလိတ်ႈပၼ်ႁႃၼႆႉ ပူၼ်ႉမႃးမိူဝ်ႈဝၼ်းတီႈ 13/04/2017  မီးၵၢၼ်ႁူပ်ႉထူပ်းဢုပ်ႇၵုမ်ၵၼ် ဝူင်ႈၵၢင်ပေႃႈမႄႈၵူၼ်းမိူင်း သင်ၶၸဝ်ႈလႄႈ တူဝ်တႅၼ်းၶွမ်ႊပၼီႊၶုတ်းထၢၼ်ႇႁိၼ် ႁႅင်းၵူၼ်းမွၵ်ႈ  50 ၊  တီႈဝတ်ႉ/ၵျွင်းၵၢင် ပွၵ်ႉ 4 ဝဵင်းမိူင်းၵိုင်။ ၼၢင်းႁၢၼ်ႇ၊ လုင်းထုၼ်း ၾၢႆႇတူဝ်တႅၼ်းၶွမ်ႊပၼီႊပျေႉဢွင်ႇႁိူင်း တင်းႁိူင်းမဵတ်ႉတႃႇၶဝ်လၢတ်ႈဝႃႈ တေထွၼ်တူဝ်ဢွၵ်ႇၼႂ်းပိုၼ်ႈတီႈ ဝႆႉပၼ်ၶၢဝ်းယၢမ်း သိမ်းၶူဝ်းၶွင် ၶိူင်ႈၸၢၵ်ႈ တႃႇၼိုင်ႈလိူၼ် ဝႃႈၼႆ။


ၵူၺ်းၵႃႈ တေႃႇထိုင်ယၢမ်းလဵဝ် လႆႈလိူၼ်ပၢႆယဝ်ႉ ၶွမ်ႊပၼီႊယင်းပႆႇထွၼ်ဢွၵ်ႇ သေဢမ်ႇၵႃး ယင်းပၢႆဢဝ်ၵူၼ်းယိပ်းၵွင်ႈ မႃးဢဝ်ႁူမ်ႇလူမ်ႈၼႂ်းၼႃႈတီႈၶူင်းၵၢၼ်ၶဝ်ဝႆႉ ထႅင်ႈလူးၵွၼ်ႇ-ဝႃႈၼႆ။