ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ဢမ်ႇၼၼ် ပၢင်ၵုမ်လူင်ႁူဝ်ပၢၵ်ႇ21 ပၢင်လူင် ၵမ်းထူၼ်ႈ2 ဝၼ်းပိုတ်ႇပၢင်ၼၼ်ႉ ၸုမ်းဝႃႉ ဢွၼ်ႁူဝ်ၸုမ်းဢူၺ်းလီ 7 ၸုမ်း ၶဝ်ႈႁူမ်ႈယူႇသေတႃႉ ပၢင်ၵုမ်ဝၼ်း ထူၼ်ႈသွင်ၼၼ်ႉ   ဢမ်ႇသိုပ်ႇၶိုၼ်ႈထႅင်ႈယဝ်ႉ။


ၽူႈမီးၸၼ်ႉ ၼႂ်း7ၸုမ်း ၸဝ်ႈၼိုင်ႈလၢတ်ႈဝႃႈ - “ ႁဝ်းၶႃႈလႆႈလိၵ်ႈၽိတ်ႈမွၵ်ႇ (ၶိုၵ်ႉတွၼ်း) ယူႇသေ တႃႉ တီႈပၢင်ၵုမ်ၼၼ်ႉ တွၼ်ႈတႃႇႁဝ်းၶႃႈတႄႉ ဢမ်ႇမီးလွင်ႈၽဵင်ႇပဵင်း ဢမ်ႇမီးသုၼ်ႇလႆႈတႃႇဢုပ်ႇ ဢူဝ်း။  ထႅင်ႈလွင်ႈၼိုင်ႈၵေႃႈ ဢၼ်ၸွမ်ၸိၵ်းသိုၵ်းမၢၼ်ႈ မွၵ်ႇလၢတ်ႈၶေႃႈၵႂၢမ်းၵႂႃႇမိူဝ်ႈဝႃႈၼၼ်ႉ ဢၼ်ဢမ်ႇထုၵ်ႇမႅၼ်ႈၸႂ်မၼ်းၵေႃႈ မီးၼမ်။ ယွၼ်ႉၼၼ်လႄႈဢမ်ႇၶဝ်ႈႁူမ်ႈ” ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မွၵ်ႇလၢတ်ႈၶေႃႈၵႂၢမ်းၼႂ်းဝၼ်းပိုတ်ႇပၢင်ၼၼ်ႉဝႃႈ - “ ဢၼ်လႆႈ ႁၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း ႁဵတ်းမႃးၼႆႉ ဢမ်ႇသႂ်ႇၸႂ် ဢမ်ႇဝႆႉၼၵ်းပၵ်းၸႂ်ၼိူဝ် သဵၼ်ႈတၢင်း NCA လွင်ႈငမ်းယဵၼ်သေ ႁဵတ်းသဵၼ်ႈတၢင်းတၢင်ႇဢၼ် သဵၼ်ႈတၢင်းထူၼ်ႈသွင် ။ ႁၼ်ထိုင်ဝႃႈ ဢမ်ႇလႆႈၸႂ်တႃႇၵေႃႇတင်ႈမိူင်းႁူမ်ႈတုမ် တီႊမူဝ်ႊၶရေႊၸီႊလႄႈလွင်ႈငမ်းယဵၼ်။ ပေႃးၶႂ်ႈၵေႃႇတင်ႈမိူင်း ၵတ်းယဵၼ် တီႊမူဝ်ႊၶရေႊၸီႊတႄႉၸိုင် တၵ်းတေလႆႈပႆ ၸွမ်းသဵၼ်ႈတၢင်း NCA တမ်းဝၢင်းဝႆႉ သေဢမ်ႇၵႃး တေလႆႈပႅင်းမႅတ်ႇ ႁၵ်ႉသႃ ႁဵတ်းၵႂႃႇၸွမ်းလၵ်းပိူင်လွင်ႈငမ်းယဵၼ် တပ်ႉမတေႃႇ6 ၶေႃႈၼၼ်ႉ - ဝႃႈၼႆ။


ၸုမ်းဝႃႉဢမ်ႇၶဝ်ႈႁူမ်ႈပၢင်ၵုမ်ဝၼ်းထူၼ်ႈ2 ၸုမ်းဢူၺ်းလီ7ၸုမ်းၵေႃႈ ဢမ်ႇၶဝ်ႈႁူမ်ႈၸွမ်း။ ၵူၺ်းၵႃႈ ၸွမ်းၼင်ႇၶႄႇတုၵ်းယွၼ်းပၼ်လႄႈ တူဝ်တႅၼ်းၸုမ်းဝႃႉ တူဝ်တႅၼ်းၸုမ်းၸၢဝ်းၶိူဝ်း 7 ၸုမ်း တူဝ်တႅၼ်းၶႄႇ တင်းလူင်ပွင်ၸိုင်ႈမၢၼ်ႈ ၶဝ်တိုၵ်ႉဢုပ်ႇဢူဝ်းၵၼ် တီႈၼေႇပျီႇတေႃႇ - ဝႃႈၼႆ။


ယိင်းႁၢၼ်ၾႃႉ  ၸုမ်းတူင်ႉၼိုင်တူင်ႇဝူင်းၵူၼ်း CBO လၢတ်ႈဝႃႈ - “ ၵူႈမူႇၸုမ်းဢမ်ႇၶဝ်ႈႁူမ်ႈၸွမ်း လႄႈ ႁဝ်းၶႃႈၸႂ်ဢမ်ႇလီတႄႉတႄႉ တီႈတႄႉမၼ်းၸုမ်းဢူၺ်းလီ7ၸုမ်းၼၼ်ႉ ပဵၼ်ၵူၼ်းမိူင်းႁူမ်ႈ တုမ်မၢၼ်ႈယူႇ။ ၵူၺ်းၵႃႈသမ်ႉလႆႈပိုင်ႈဢိင်မိူင်းႁိမ်းႁွမ်းသေ မႃးမိူင်းႁဝ်းၶိုၼ်းဢၼ်ဝႃႈၼႆႉ တွၼ်ႈတႃႇၸိုင်ႈမိူင်းၵေႃႈ ဢမ်ႇမီးသရေႇၼႃႈတႃ ႁဵတ်းသင်လႄႈ လူင်ပွင်ၸိုင်ႈဢမ်ႇႁဵတ်းပၼ် ႁႂ်ႈၶဝ်လႆႈႁဵတ်းလွတ်ႈလွတ်ႈလႅဝ်းလႅဝ်း ႁင်းၵူၺ်းၶဝ် ႁဵတ်းသင်လႄႈ ႁႂ်ႈၶဝ်လႆႈၵႂႃႇပိုင်ႈ ဢိင်မိူင်း ႁိမ်းႁွမ်း။ ထႅင်ႈဢၼ်ၼိုင်ႈၵေႃႈလႆႈမႆႈၸႂ်လွင်ႈႁူမ်ႇလူမ်ႈၶဝ်။ ၾၢႆႇၼိုင်ႈၵေႃႈၸုမ်းဢူၺ်းလီ UNFC ၵေႃႈဢမ်ႇမႃၶဝ်ႈႁူမ်ႈ ပၢင်ၵုမ်လူင်ဢၼ်ၼႆႉၼႆလႄႈ တွၼ်ႈတႃႇလွင်ႈငမ်းယဵၼ်မိူဝ်းၼႃႈၼႆႉ ႁႅင်းဢေႇ တႄႉတႄႉ ယွၼ်ႉဢမ်ႇပႃးၵူႈပႃႈၵူႈၾၢႆႇ ”။


ပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ်ၵမ်းၼႆႉ ၽူႈၼမ်းၸၢဝ်းၶိူဝ်းဢၼ်ၸုၵ်းၾၢႆႇၸၢဝ်းၶိူဝ်းမႃးတႃႇသေႇ မိူၼ်ၼင်ႇ ၽူႈ ၼမ်းမွၼ်း ၼၢႆႇငူၺ်ႇတဵင်း၊ ၽူႈၼမ်းတႆး ၸဝ်ႈၶုၼ်ထုၼ်းဢူးၸိူဝ်းၼႆႉလႄႈသင် ဢၼ်ပဵၼ်ၽွင်းၶဵဝ်လွင်ႈငမ်းယဵၼ်မိူင်း ႁူမ်ႈတုမ်မၢၼ်ႈ ၸဝ်ႈႁၢၼ်ယွင်ႁူၺ်ႈၵေႃႈ ဢမ်ႇလႆႈႁပ်ႉလိၵ်ႈၽိတ်ႈမွၵ်ႇတႃႇၶဝ်ႈႁူမ်ႈပၢင်ၵုမ်လူင်ပွၵ်ႈၵမ်းၼႆႉ ဝႃႈၼႆ။