ပၢင်ၵုမ်သၽႃးမိူင်းတႆး ပွၵ်ႈၵမ်း 2 ၵမ်းထူၼ်ႈ 6 တေတႄႇၶိုၼ်း ၼႂ်းႁူဝ်လိူၼ်ၵျႃၼ်ႊ၊ မွၵ်ႇထိုင်ၽူႈတႅၼ်း သၽႃးၵူႈၵေႃႉ ႁႂ်ႈဢွၼ်ၵၼ်ႁွတ်ႈတူၼ်ႈတီး ၼႂ်းဝၼ်းတီႈ 5 လိူၼ်ၵျႃၼ်ႊ။


ဝၼ်းတီႈ 06/06/2017 သၽႃးမိူင်းတႆး တေၸတ်းႁဵတ်းပၢင်ၵုမ် ပွၵ်ႈၵမ်း  2 ၵမ်းထူၼ်ႈ 6 တီႈလုမ်း သၽႃးမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ယူႇတီႈလုမ်းသၽႃးမိူင်းတႆး ပွင်ႇလႅင်းထိုင် ၽူႈတႅၼ်း သၽႃးဢၼ်ၵဝ်ႇ/ မႂ်ႇ ၵူႈၸႄႈဝဵင်း။

ၼၢင်းၵွင်ၶမ်း ၽူႈတႅၼ်းသၽႃးမႂ်ႇ ပႃႇတီႇႁူဝ်သိူဝ် ၶဵတ်ႇလိူၵ်ႈတင်ႈမၢႆ(1) ၸႄႈဝဵင်းမိူင်းသူႈ လၢတ်ႈဝႃႈ “ လိူၼ်ၼႃႈဝၼ်းတီႈ 6 ၼႆႉ၊ ၶဝ်မွၵ်ႇႁွင်ႉႁဝ်း တႃႇတေႁပ်ႉၶေႃႈၵၢဝ်ႇၵိၼ်ႇ ၽူႈတႅၼ်းမႂ်ႇ ဢၼ်ပေႉပၢင်လိူၵ်ႈတင်ႈ သွမ်ႈမႃးတႃႇမႃးႁပ်ႉၼႃႈတီႈၽူႈတႅၼ်း။ လိၵ်ႈမွၵ်ႇတႄႉ ၶႃႈႁဝ်းလႆႈႁပ်ႉမိူဝ်ႈဝၼ်းတီႈ 17 လိူၼ်ၼႆႉ၊ ၼႂ်းလိၵ်ႈမွၵ်ႇၼၼ်ႉ ႁႂ်ႈၽူႈတႅၼ်းႁွတ်ႈၽႅဝ် တူၼ်ႈတီး ၼႂ်းဝၼ်းတီႈ 5 လိူၼ်ၵျႃၼ်ႊ” ဝႃႈၼႆ။


ၼွၵ်ႈလိူဝ်ၼၼ်ႉ ၼႂ်းပၢင်ၵုမ်သၽႃးၵူၼ်းမိူင်း တီႈၼေႇပျီႇတေႃႇၵေႃႈ မိူဝ်ႈဝၼ်းတီႈ 18/05/2017 ၼၼ်ႉ ၸတ်း ႁဵတ်းပၢင်ၵၢဝ်ႇၵိၼ်ႇ ၽူႈတႅၼ်းသၽႃး ၵူၼ်းမိူင်း ဢၼ်ပေႉပၢင်လိူၵ်ႈတင်ႈသွမ်ႈမႃးၼၼ်ႉ ယဝ်ႉတူဝ်ႈလီငၢမ်း ဝႃႈၼႆ။


ၽူႈတႅၼ်းသၽႃးမႂ်ႇ ဢၼ်ပေႉပၢင်လိူၵ်ႈတင်ႈသွမ်ႈ ၼႂ်းဝၼ်းတီႈ 01 လိူၼ်ဢေႊပရိူဝ်ႊ ပီ 2017 ၼၼ်ႉ- ၼႂ်းၸႄႈ ဝဵင်းၵဵင်းတုင် ပႃႇတီႇသၢင်ႇသီႈ ၶဵတ်ႇလိူၵ်ႈတင်ႈမၢႆ(2) ဢူးသျႃႇမူၺ်ႇလသျႅၼ်ႊ၊ ၼႂ်းၸႄႈဝဵင်းၵေးသီး ပႃႇတီႇႁူဝ်သိူဝ် ၽူႈတႅၼ်းသၽႃးၵူၼ်းမိူင်း ၸၢႆးဢွင်ႇၵျေႃႇ၊ ၶဵတ်ႇလိူၵ်ႈတင်ႈ မၢႆ (1) ၸၢႆးၸၢမ်ႇမိူင်း၊ ၶဵတ်ႇလိူၵ်ႈ တင်ႈမၢႆ(2) ၸဝ်ႈၶမ်းပိူင်ႇၾႃႉ။ ၼႂ်းၸႄႈဝဵင်းမိူင်းသူႈသမ်ႉ ၽူႈတႅၼ်းသၽႃးၵူၼ်းမိူင်း ၸၢႆးထုၼ်းဢေး၊ ၶဵတ်ႇလိူၵ်ႈတင်ႈ မၢႆ(1) ၼၢင်းၵွင်ၶမ်း၊ ၶဵတ်ႇလိူၵ်ႈတင်ႈ မၢႆ(2) ၸၢႆးလိူၼ်မျၢတ်ႈလႄႈ ၼႂ်းၸႄႈဝဵင်းယွင်ႁူၺ်ႈ ပႃႇတီႇၼူၵ်ႉယုင်း ၶဵတ်ႇလိူၵ်ႈတင်ႈမၢႆ(1) ဢူႇၶိၼ်ႇမွင်ႇဝိၼ်း ၸဵမ်ၸိူဝ်းၼႆႉ ။


ၽူႈတႅၼ်းၼႂ်းသၽႃးမိူင်းတႆးသမ်ႉ ၽူႈတႅၼ်းပႃႇတီႇသၢင်ႇသီႈ 32 ၵေႃႉ၊ ၽူႈတႅၼ်းပႃႇတီႇႁူဝ်သိူဝ် 24 ၵေႃႉ၊ ၽူႈတႅၼ်း ပႃႇတီႇၼူၵ်ႉယုင်း 21 ၵေႃႉ၊ ၽူႈတႅၼ်းပႃႇတီႇတဢၢင်း 7 ၵေႃႉ၊ ၽူႈတႅၼ်းပႃႇတီႇပဢူဝ်း 6 ၵေႃႉ၊ ၽူႈတႅၼ်း ပႃႇတီႇ လႃးႁူႇ 1 ၵေႃႉ၊ ၽူႈတႅၼ်းပႃႇတီႇၵူင်းၵၢင်ႉ 1 ၵေႃႉ၊  ၽူႈတႅၼ်းပႃႇတီႇ သိူဝ်ၽိူၵ်ႇ 1 ၵေႃႉ၊ ၽူႈတႅၼ်းၽွင်းလူင် ၾၢႆႇ ၸၢဝ်းၶိူဝ်း 7 ၵေႃႉလႄႈ ၽူႈတႅၼ်းတပ်ႉသိုၵ်းမၢၼ်ႈ 34 ၵေႃႉ။