ၵေႃလိၵ်ႈလၢႆးလႄႈ ၾိင်ႈငႄႈတႆး ၼမ်ႉၶမ်း ၸတ်းပၢင်သွၼ်ၾိင်ႈႁိတ်ႈႁွႆးတႆး လၢႆးပဝ်ႇပီႇမၢၵ်ႇ ၼမ်ႉတဝ်ႈ ၶၢဝ်းတၢင်းႁိုင် 10 ဝၼ်း ယဝ်ႉတူဝ်ႈသေ ၸတ်းပွႆးလူင်းပၢင် ၽူႈၶဝ်ႈႁူမ်ႈၸမ်ပၢၵ်ႇ။


ဝၼ်းတီႈ 18/05/2017 ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ၸတ်းပွႆးလူင်းပၢင်သွၼ် ၾိင်ႈႁိတ်ႈႁွႆးတႆး တီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ၸိုင်ႈတႆးပွတ်းၸၢၼ်း မီးၽူႈယႂ်ႇၵူၼ်းလူင်၊ ၶူး၊ လုၵ်ႈႁဵၼ်း ၶဝ်ႈႁူမ်ႈၸမ်ပၢၵ်ႇ။

ၸၢႆးသၢမ်မူၼ်ႇ ႁူဝ်ပဝ်ႈၵေႃလိၵ်ႈလၢႆး ၼမ်ႉၶမ်း လၢတ်ႈဝႃႈ- “ ယိူင်းဢၢၼ်းၵေႃလိၵ်ႈလၢႆးႁဝ်းမီးဝႆႉႁူဝ် ၶေႃႈ ၵဵပ်းႁွမ်၊ သိမ်းပႅင်း၊ ယုၵ်ႉယွင်ႈ၊ လိၵ်ႈလၢႆးလႄႈၾိင်ႈႁိတ်ႈႁွႆးၼႆလႄႈ ၸင်ႇလႆႈဢွၼ်ၵၼ်ၸတ်း ပၢင်သွၼ် ပၢင်ၾိုၵ်းၽွၼ်ႉပၼ်ႁႂ်ႈၵူၼ်းၼုမ်ႇၼေႃႇတႅၼ်းၶိူဝ်း မေႃႁၵ်ႉၸိူဝ်ႉၶိူဝ်း၊ ႁၵ်ႉဝၢၼ်ႈမိူင်း ၵႂႃႇ မိူဝ်းၼႃႈ ” ဝႃႈၼႆ။


ယိူင်းဢၢၼ်းပၢင်ၾိုၵ်းၽွၼ်ႉ ၾိင်ႈႁိတ်ႈႁွႆးတႆးၼႆႉ ၼင်ႇႁိုဝ်ၵူၼ်းၼုမ်ႇတႆး ပေႃးတေမေႃ သိုပ်ႇသၢၼ် ႁၵ်ႉသႃ ၾိင်ႈပဝ်ႇပီႇ ႁႂ်ႈသဵင်ပဝ်ႇပီႇပေႃးတေလင်ၸွတ်ႇတူဝ်ႈ ဝဵင်းၼမ်ႉၶမ်း ဝႃႈၼႆ။


ပၢင်သွၼ်ပဝ်ႇပီႇမၢၵ်ႇၼမ်ႉတဝ်ႈၼႆႉ တႄႇမိူဝ်ႈဝၼ်းတီႈ 09 – 18/05/2017 ၶၢဝ်းတၢင်းႁိုင် 10 ဝၼ်း ၶူး ပူင်သွၼ်ပဵၼ် ၼၢင်းဢေၾိၼ်ႉ ဢၼ်ယၢမ်ႈလႆႈႁပ်ႉၸုမ်ႈၶူး ၾၢႆႇပၢႆးမွၼ်း တီႈဝဵင်းၶုၼ်ႊမိင် ဢၼ် လူင်ပွင်ၸိုင်ႈၶႄႇ မွပ်ႈယိုၼ်ႈပၼ်ၼၼ်ႉ ၶိုၼ်းမႃးပူင်သွၼ်ပၼ်။ မီးလုၵ်ႈႁဵၼ်းၽူႈသူၼ်ၸႂ်ၼႂ်းဢိူင်ႇ ဝၢၼ်ႈမႃး ႁဵၼ်းဢဝ်ႁိမ်းၸမ်ပၢၵ်ႇ ။


တီႈဝဵင်းၼမ်ႉၶမ်းၼႆႉ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆးသေ ၸတ်းႁဵတ်းပၢင်သွၼ် လိၵ်ႈတႆး လႄႈ ၾိင်ႈႁိတ်ႈႁွႆးတႆးၵူႈလွင်ႈလွင်ႈမႃးၵူႈပီ ၼိုင်ႈပီလႂ်မီးပၢင်သွၼ် 2 ပွၵ်ႈ ၶၢဝ်းမႆႈလႄႈၶၢဝ်းၾူၼ် ။ ပၢင်သွၼ် ၾိင်ႈႁိတ်ႈႁွႆးၵၢၼ်ပဝ်ႇပီႇမၢၵ်ႇၼမ်ႉတဝ်ႈ ပွၵ်ႈၼႆႉပဵၼ်ပွၵ်ႈၵမ်း 2 ၵမ်းထူၼ်ႈ1 ၸတ်း ႁဵတ်းၵႂႃႇမိူဝ်ႈ 21-30 /03/2016 ဝႃႈၼႆ။