ၶမ်ႈဝၼ်းၽိတ်ႈ လိူၼ်ႁူၵ်းၼၼ်ႉ ပီႈၼွင်ႉၵူၼ်းမိူင်း(ၵူၼ်းယူၼ်း)၊ ၵူၼ်းထႆးလႄႈ ပီႈၼွင်ႉတႆး ဢွၼ်ၵၼ်ပႆၶိုၼ်ႈလွႆထၢတ်ႈသူးထဵပ်ႈ ဝဵင်းၵဵင်းမႆႇသေ ယူႇတီႈၾၢႆႇၸဝ်ႈၼႃႈတီႈပလိၵ်ႈထႆး လႆႈၵူတ်ႇ ထတ်း ၵူၼ်းၼုမ်ႇတႆး ၸိူဝ်းပႆၶိုၼ်ႈလွႆ ၵူတ်ႇထတ်းႁၼ်မႅၼ်ႈ ၶိူင်ႈၸႂ်ႉ ၼႂ်းၵၢၼ် ၽိတ်းမေႃးၵၼ် မိတ်ႈ၊ တႃမိုဝ်းလဵၵ်း၊ ၵွင်ႈပွတ်း(ပွမ်) လႄႈ ၵူင်ႇၵွၼ် ၸဵမ်ၸိူဝ်းၼႆႉ။

ဝၼ်းတီႈ 09/05/2017 ယၢမ်းၵၢင်ၶမ်ႈ တီႈသဵၼ်ႈတၢင်းၶိုၼ်ႈလွႆထၢတ်ႈသူးထဵပ်ႈ(သုထဵပ်ႉ) ဝဵင်း ၵဵင်းမႆႇ ၸိုင်ႈ ထႆး ယူႇတီႈၸဝ်ႈၼႃႈတီႈပလိၵ်ႈ ၾၢႆႇႁူမ်ႇလူမ်ႈလႄႈ ၾၢႆႇၸဝ်ႈၼႃႈတီႈပလိၵ်ႈပႃႇမႆႉ ထၢင်ႇၽိူမ် သေ ႁွင်ႉၵူတ်ႇထတ်းၵူၼ်းၼုမ်ႇတႆး ၸိူဝ်းပႆၶိုၼ်ႈလွႆသူးထဵပ်ႈၼၼ်ႉ လႆႈၵူတ်ႇထတ်း ႁၼ်မႅၼ်ႈၸွမ်း တူဝ် မိူၼ်ၼင်ႇ တႃမိုဝ်းလဵၵ်း 3 ဢၼ်၊ မိတ်ႈ 10 ပၢႆ၊ ၵၢင်ႇၵွၼ် 3 ဢၼ်လႄႈ ၵွင်ႈပွတ်း (ဢၼ် ပွမ်) 1 လဝ်း။ ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈပလိၵ်ႈ ၾၢႆႇႁူမ်ႇလူမ်ႈ လႆႈၵုမ်းၶင်တူဝ်သေ ဢဝ်သူင်ႇႁူင်းပလိၵ်ႈၸႄႈဝဵင်းၵဵင်းမႆႇၵမ်းလဵဝ် ဝႃႈၼႆ။


ၵူၼ်းတူင်ႉၼိုင်တူင်ႇဝူင်းတႆး ၼႂ်းမုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇ ၵေႃႉၼိုင်ႈလၢတ်ႈဝႃႈ “  ပဵၼ်လုၵ်ႈ ဢွၼ်ႇတႆးႁဝ်း ၵမ်းလဵဝ်ယဝ်ႉ။ မၢင်ၵေႃႉပႃးမိတ်ႈ၊ တႃမိုဝ်းလဵၵ်း၊ ၵူင်ႇၵွၼ်လႄႈ ၵွင်ႈပွတ်း (ဢၼ်ပွမ်) ၸဵမ်ၸိူဝ်းၼႆႉ။ ၵူၼ်းၼုမ်ႇတႆး ထႅင်ႈၵေႃႉၼိုင်ႈတႄႉ သမ်ႉဢမ်ႇမီးဝတ်းဝႂ်သင်၊ သမ်ႉပႃး ဢၼ်ၽိတ်း ပၵ်းပိူင်မႃးၸွမ်းတူဝ်ထႅင်ႈလူးၵွၼ်ႇ၊ လွင်ႈၼႆႉၶႃႈၵေႃႈ ၵႂႃႇဢုပ်ႇၸွမ်း လၢတ်ႈၸွမ်း တီႈၸဝ်ႈၼႃႈတီႈ ၶဝ်ယူႇ” ဝႃႈၼႆ။


ၸဝ်ႈၼႃႈတီႈပလိၵ်ႈ လၢတ်ႈဝႃႈ “ ႁဝ်းတႄႉၶႂ်ႈႁႂ်ႈပွႆႇပၼ်တူဝ်ၶဝ်ၶိုၼ်းယူႇ ၵူၺ်းၵႃႈဝႃႈ ၶဝ်သမ်ႉ ပႃးၵႂႃႇၶိူင်ႈၶႃႈႁႅမ်ၵူၼ်းၸိူဝ်းၼႆႉ ဝၼ်းပိူၼ်ႈ ၵႂႃႇ ႁဵတ်းၵၢၼ်လီၵုသူလ်။ ၸိူင်ႉႁိုဝ်ၵေႃႈ ႁႂ်ႈဢဝ်သူင်ႇ ႁူင်းပလိၵ်ႈသေ ပၼ်တူတ်ႇတၢမ်ႇယဝ်ႉ ၸင်ႇၵွႆႈပွႆႇပၼ်ၶိုၼ်း ၸွမ်းၼင်ႇပၵ်းပိူင်မီး ၼၼ်ႉလီ သေပိူၼ်ႈ။ လိူဝ်ၼၼ်ႉ ၵူၼ်းၼုမ်ႇတႆး၊ ထႆး ဢၼ်ပႃးၶိူင်ႈ ၽိတ်း မေႃးၵၼ်သေ ပႆၶိုၼ်ႈထၢတ်ႈ သူးထဵပ်ႈၼၼ်ႉ ယင်းမီးတင်းၼမ်ယူႇ”  ဝႃႈၼႆ။


ၵူၼ်းၼုမ်ႇတႆး 8 ၵေႃႉ ဢၼ်တီႉၺွပ်းလႆႈ ၶိူင်ႉၸႂ်ႉၽိတ်းမေႃးၵၼ်ၼၼ်ႉ ပဵၼ်ၵူၼ်းၼုမ်ႇသႅၼ်း ဢႃယု 15-18 ပီ ၵမ်ႈၼမ်။ ၼွၵ်ႈလိူဝ်ၼၼ်ႉ ၸဝ်ႈၼႃႈတီႈပလိၵ်ႈၶဝ် ၵူတ်ႇထတ်းတီႉၺွပ်းလႆႈ ၵူၼ်းၸိူဝ်းပႃး သူႇရႃႇၼမ်ႉလဝ်ႈ၊ ပီႊယိူဝ်ႊ ၸဵမ်ၸိူဝ်းၼႆႉၵေႃႈမီး။ ၵူၺ်းၵႃႈ လွင်ႈၼႆႉတႄႉ ၸဝ်ႈၼႃႈ တီႈၶဝ် ႁႂ်ႈထွၵ်ႇပႅတ်ႈသေ ပွႆႇတူဝ်ၶိုၼ်း ဝႃႈၼႆ။


ပေႃးထိုင်မႃး ၼႂ်းဝၼ်းၽိတ်ႈလိူၼ်ႁူၵ်းမႂ်ႇ 14 ၶမ်ႈၼႆႉ ပီႈၼွင်ႉၵူၼ်းထႆး၊ ၵူၼ်းမိူင်းလႄႈ ပီႈ ၼွင်ႉတႆး ဢွၼ်ၵၼ်ပႆၶိုၼ်ႈထၢတ်ႈသူးထဵပ်ႈၵူႈပီ။ ယွၼ်ႉၸွမ်းၼင်ႇထုင်းပီႈၼွင်ႉထႆး၊ ပီႈၼွင်ႉမိူင်း တၢင်းပွတ်း ၵဵင်းမႆႇ မီးဝႆႉ ၶွပ်ႈၶူပ်ႇပီလႂ်ၼိုင်ႈပွၵ်ႈ ဢွၼ်ၵၼ်ပႆၶိုၼ်ႈဝၢႆႈသႃ ထၢတ်ႈၵွင်းမူး သူးထဵပ်ႈ ဝႃႈၼႆ။