ဝၼ်းပုတ်ႉထၸဝ်ႈ ဝၼ်းဝိသႃၶပူၸႃ လိူၼ်ႁူၵ်းမူၼ်းၼႆႉ ပီႈၼွင်ႉတႆးၸိူဝ်းႁွတ်ႈၵဵင်းမႆႇ ၼပ်ႉႁဵင်ႁူမ်ႈ ပီႈၼွင်ႉထႆး ဢွၼ်ၵၼ်ပႆတၢင်းၶိုၼ်ႈဝႆႈၽြႃး “ၽရႃႉထၢတ်ႈလွႆသူးထဵပ်ႈ။ ၵမ်ႈၽွင်ႈၸိူဝ်းပဵၼ်မူႇၸုမ်း ၶိုၼ်ႈၸႅၵ်ႇၸႃႇၵၶဝ်ႈ ၼမ်ႉတၢင်းၵိၼ်။


ဝၼ်းတီႈ09/05/2017  လိူၼ် 6 မႂ်ႇ14 ၶမ်ႈၼႂ်းဝၼ်းၽိတ်ႈ လိူၼ်ႁူၵ်းမူၼ်းၼၼ်ႉ ပဵၼ်ၾိင်ႈႁိတ်ႈ ႁွႆးပီႈၼွင်ႉဝဵင်းၵဵင်းမႆႇ ပႆၶိုၼ်ႈလွႆသူးထဵပ်ႈၼႆလႄႈ ပီႈၼွင်ႉတႆးၸိူဝ်း ႁွတ်ႈၵဵင်းမႆႇၵေႃႈ ဢွၼ်ၵၼ် ပႆၶိုၼ်ႈတင်းၼမ် လိူဝ်ၼၼ်ႉဢွၼ်ၵၼ်ၸႅၵ်ႇဝၢၵ်ႈလဵင်ႉလူ ၶဝ်ႈၼမ်ႉတၢင်းၵိၼ်၊ မွၵ်ႇ၊မၢၵ်ႇ၊ ၶဝ်ႈမုၼ်း ၸိူဝ်းၼႆႉ။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 MHz လၢတ်ႈဝႃႈ - “ ၾိင်ႈထုင်းပႆၶိုၼ်ႈလွႆၼႆႉ ပီႈၼွင်ႉၼႂ်းဝဵင်းၵဵင်းမႆႇ ဢွၼ်ၵၼ်ပႆမႃးႁိုင်ၼၢၼ်းၼႃႇယဝ်ႉ ဢၼ်ပီႈၼွင်ႉႁဝ်းၶႃႈမႃး ၶဝ်ႈႁူမ်ႈၼႆႉ တေလႆႈဝႃႈပဵၼ်လွင်ႈလီတႄႉ ၼင်ႇႁိုဝ်တေလႆႈလွင်ႈလီတဵမ်ထူၼ်ႈၼၼ်ႉ ႁဝ်းၶႃႈၵေႃႈၸွႆႈ ႁဵတ်းလွင်ႈ မူတ်းသႂ် ပႅတ်ႈယုၵ်းယၵ်းပဵၼ်တီႈပဵၼ်တၢင်းသေၵမ်း ” ဝႃႈၼႆ။


လိူဝ်သေပီႈၼွင်ႉၼႂ်းဝဵင်းၵဵင်းမႆႇယဝ်ႉ ၵူၼ်းၼုမ်ႇတႆး ဢၼ်ႁွတ်ႈၽႅဝ်ဝႆႉၼႂ်းဝဵင်းၵဵင်းမႆႇၵေႃႈ ၶွၼ်ႈ တုမ်ၵၼ်သေပႆၶိုၼ်ႈပဵၼ်မူႇပဵၼ်ၸုမ်း၊ ၶိုၼ်ႈၽႂ်ၶိုၼ်ႈမၼ်းၵေႃႈမီး။


ၸၢႆးၸွမ်လႅင်း ႁူဝ်ၼႃႈၵူၼ်းၼုမ်ႇ လၢတ်ႈဝႃႈ - “ ႁၼ်ထိုင်ဝႃႈ ပဵၼ်ၾိင်ႈႁိတ်ႈႁွႆးဢၼ်လီ ႁဝ်းၶႃႈပီႈ ၼွင်ႉလႆႈမႃးၶဝ်ႈႁူမ်ႈၼႆၵေႃႈ ပဵၼ်ဢၼ်ယိၼ်းၸူမ်း ႁဵတ်းႁႂ်ႈႁဝ်းပီႈၼွင်ႉမီးလွင်ႈၸမ်ၸႂ်ၵၼ် ၾၢႆႇ ၼိုင်ႈၵေႃႈ ႁဝ်းၶႃႈႁူမ်ႈၵၼ်ႁဵတ်းတၢင်းလီ ပိူဝ်ႈတွပ်ႇတႅၼ်းၵုၼ်းမုၼ်ၸဝ်ႈမုၼ်ယႂ်ႇ ၶုၼ်ႁေႃ ၶမ်းမိူင်း ထႆးလႄႈ ၽႅၼ်ႇလိၼ်မိူင်းထႆး ဢၼ်ႁႂ်ႈႁဝ်းၶႃႈလႆႈယူႇသဝ်းပိုင်ႈႁူမ်ႈၽူၺ်းႁႃၵိၼ်လဵင်ႉတွင်ႉ ” ဝႃႈၼႆ။


ယိင်းသႅင်လၢဝ် ၽူးၶဝ်ႈႁူမ်ႈပႆၶိုၼ်ႈလွႆလၢတ်ႈဝႃႈ -“ မီးတၢင်းသိူဝ်းၸႂ်တႄႉ တီႈလႆႈၶဝ်ႈႁူမ်ႈပႆၶိုၼ်ႈလွႆ ႁဝ်းၶႃႈမႃးယူႇမိူင်းပိူၼ်ႈသေတႃႉၵေႃႈ ပေႃးႁဝ်းၶႃႈပဵၼ်ၵူၼ်းလီၼႆၸိုင် ပိူၼ်ႈၵေႃႈတေႁၵ်ႉႁူမ်ၸူမ်း ပႅင်းႁဝ်း ၼင်ႇဢၼ်ႁဝ်းၶႃႈပွင်ပဵၼ်လႆႈၼၼ်ႉ ၶတ်းၸႂ်ၶဝ်ႈႁူမ်ႈႁဵတ်းတၢင်းလီၶႃႈ “ ဝႃႈၼႆ။


ပေႃးထိုင်မႃးလိူၼ်ႁူၵ်းမႂ်ႇ14ၶမ်ႈ ဝၼ်းၽိတ်ႈလိူၼ်ႁူၵ်းမူၼ်းၸိုင် ပီႈၼွင်ႉၵဵင်းမႆႇ ဢွၼ်ၵၼ်ပႆ ၶိုၼ်ႈလွႆ ပိူဝ်ႈၶိုၼ်ႈႁဵတ်းသၢင်ႈတၢင်းလီမႃးၶၢဝ်းတၢင်းႁိုင်ၼပ်ႉႁူဝ်ပၢၵ်ႇပီ ၊ လုၵ်ႉတီႈတိၼ်လွႆၶိုၼ်ႈ ထိုင်ၸိၵ်းလွႆ ၶၢဝ်းတၢင်းမီးမွၵ်ႈ 11 ၵီႊလူဝ်ႊမဵတ်ႉ။