တႆးႁွတ်ႈ ၵဵင်းမႆႇ ၸိုင်ႈထႆးၵေႃႉၼိုင်ႈ ႁဵတ်းၵၢၼ်ၵေႃႇသၢင်ႈ ယၢတ်ႇတူၵ်းႁိူၼ်းတိူၵ်ႈ ၽွင်းၵေႃႇသၢင်ႈ၊ လႆႈလူႉ တၢႆ ၵႂႃႇမိူဝ်ႈႁွတ်ႈႁူင်းယႃ သူၼ်ၻွၵ်ႇ ၵဵင်းမႂ်ႇ။


ဝၼ်းတီႈ 27/05/2017 ယၢမ်းၵၢင်ၶမ်ႈ 6 မူင်းပၢႆၼၼ်ႉ ၸၢႆးၶမ်း ႁဵတ်းၵၢၼ်ၵေႃႇသၢင်ႈ တီႈႁိမ်းၵၢတ်ႇရူမ်းၶျူၵ်ႉ မႄႈၵျူဝ်ႉ ၸႄႈဝဵင်းၵဵင်းမႆႇ ၸိုင်ႈထႆး။ မၼ်းၸၢႆးယၢတ်ႇတူၵ်းႁိူၼ်းတိူၵ်ႈမႂ်ႇ ၽွင်းတိုၵ်ႉၵေႃႇသၢင်ႈ၊ သဵပ်ႇၺႃးလဵၵ်း ပၵ်းသႂ်ႇ တီႈတူဝ်မၼ်း ၸၢႆး။ ယွၼ်ႉမၼ်းၸၢႆး တေၵႂႃႇယႃႉဢဝ် ပႅပ်ႊသိူဝ်ႇပိုၼ်ႉၸၼ်ႉ 5 သေ ယၢတ်ႇတူၵ်း ဝႃႈၼႆ။

ၸၢႆးသူႇၶျၢတ်ႉ ၽူႈၸွႆႈထႅမ်ပီႈၼွင်ႉႁႅင်းၵၢၼ် ၸုမ်းႁူမ်ႈတုမ်ႁႅင်းၵၢၼ် MWF လၢတ်ႈဝႃႈ “ ၸၢႆးၶမ်းၼႆႉ မၼ်းၸၢႆးတေၵႂႃႇယႃႉဢဝ် ပဵၼ်ပႅပ်ႊတီႈပိူၼ်ႈလေႃႇပိုၼ်ႉၸၼ်ႉ 5 ႁဵတ်းၼၼ်သေ ႁၢဝ်းမႆႉ/ႁၢဝ်းလဵၵ်း ယူႇႁိမ်းၶွပ်ႇတိူၵ်ႈသေ ၶႃၶွင်ႁၢဝ်းၼၼ်ႉ သမ်ႉလုတ်ႈတူၵ်းၵႂႃႇ ႁဵတ်းၼၼ်သေ တူဝ်ၸၢႆးၶမ်းၵေႃႈ ၸင်ႇလႆႈယၢတ်ႇတူၵ်းလူင်းၸွမ်း၊ လုၵ်ႉဢဝ်တိူၵ်ႈၸၼ်ႉ 5 ယၢတ်ႇတူၵ်းလူင်းမႃး ထိုင်ၸၼ်ႉ 1 ၊ တူဝ်မၼ်းၸၢႆး တူၵ်းလူင်းယၢတ်ႇသႂ်ႇလဵၵ်း၊ လဵၵ်းဢၼ်ပၵ်းသႂ်ႇတီႈတူဝ်ၸၢႆးၶမ်း တင်းမူတ်း သဵပ်ႇသႂ်ႇ 4 လႅမ်ႇ” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းၾၢႆႇၸွႆႈထႅမ်ၽေးၵိုင်ႉၵၢင်ႉ လႆႈႁပ်ႉၸႅင်ႈၶၢဝ်ႇၼႂ်းပိုၼ်ႉတီႈ ပွင်ႇထိုင်လႄႈ ၼႅတ်ႈၵႂႃႇၸွႆႈဢဝ် တူဝ်ၸၢႆးၶမ်း ဢွၵ်ႇမႃးသေ ၼႅတ်ႈၼမ်းဢဝ်တူဝ် သူင်ႇႁူင်းယႃ မႃႁႃရတ်ႉ/ႁူင်းယႃသူၼ်ၻွၵ်ႇ ဝဵင်းၵဵင်းမႆႇ ၵမ်းလဵဝ်သေတႃႉ ဢမ်ႇတၼ်းလႆႈယူတ်းယႃသေ လူႉသဵင်ႈၵႂႃႇ။


ၸၢႆးလိူၼ်ၶမ်း ၽူႈတူင်ႉၼိုင်ၼႂ်းတူင်ႇဝူင်းတႆး ၼႂ်းဝဵင်းၵဵင်းမႆႇ လၢတ်ႈဝႃႈ “ မိူဝ်ႈၼႆႉ ဝၼ်းတီႈ 30/05/2017 ယၢမ်း ၵၢင်ဝၼ်း 12 မူင်းၶိုင်ႈ ယူႇတီႈပီႈၼွင်ႉလုၵ်ႈမေး ဢဝ်ပူၼ်ႉၶၢပ်ႈတူဝ် တီႈပႃႇႁဵဝ်ႈလွႆသၵဵတ်း  ယူႇတီႈၸဝ်ႈ ၶွင်ၵၢၼ် ၵေႃႇသၢင်ႈ မႃးသၢႆႈတႅၼ်းပၼ် ငိုၼ်းထႆး သွင်သႅၼ်ႁႃႈမိုၼ်ႇ ဝၢတ်ႇလႄႈ ဢဝ်ပုၼ်ႈၽွၼ်းလဵင်ႉလူ ပၢင်ႁႅၼ်းသွမ်းပၼ် ၸၢႆးၶမ်းၵႂႃႇ” ဝႃႈၼႆ။


ၵဵဝ်ႇၵပ်းလွင်ႈၵႃႈသၢႆႈတႅၼ်းၼႆႉ ၸၢႆးလိူၼ်ၶမ်း လၢတ်ႈဝႃႈ ႁူဝ်ၼႃႈၵူၼ်းႁဵတ်းၵၢၼ်သမ်ႉ ပဵၼ်ၸၢႆးၵႃႉ ယူႇတီႈၸၢႆးၵႃႉ လႄႈ ပီႈၼွင်ႉၸၢဝ်းၶိူဝ်း ၸၢႆးၶမ်း ႁူမ်ႈၵၼ်သေ ယွၼ်းၵႃႈသၢႆႈတႅၼ်း ႁႃႈသႅၼ်ဝၢတ်ႇ။ ၵူၺ်းၵႃႈ လႆႈ သွင်သႅၼ်ႁႃႈ ၵူၺ်း ဝႃႈၼႆ။


ၸၢႆးၶမ်းၼႆႉ ၸိုဝ်ႈတႄႉႁွင်ႉဝႃႈ ၸၢႆးပၢၼ်းၶမ်း ဢႃယု 31 ပီ ပဵၼ်ၵူၼ်းၸႃတိ ဝၢၼ်ႈၼွင်တဝ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင်။ ၵေႃႉပဵၼ်မေးၼၢင်း ၸိုဝ်ႈႁွင်ႉဝႃႈ ဢေးၼၢင်း ဢႃယု 25 ပီ မီးလုၵ်ႈႁူမ်ႈၵၼ် 1 ၵေႃႉ ၸိုဝ်ႈႁွင်ႉ ဢေးၼွင်ႉၽွင် ဢႃယု 3 ၶူပ်ႇ ဝႃႈၼႆ။