ၵေႃၵမ်ၵၢၼ်ပွင်ၵၢၼ်လူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS) ဢွၵ်ႇလိၵ်ႈပိုၼ်ၽၢဝ်ႇ ၼႂ်းတိုဝ်ႉတၢင်း ဝၼ်းလုၵ်ႉၽိုၼ်ႉ ၶွပ်ႈၶူပ်ႇ 59 ပီ၊ မေႊ 21 ဝၼ်း။ ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ဢၼ်တေၸတ်းၼႆႉ ယွၼ်ႉပိူဝ်ႈပဵၼ်ၸုမ်းလူင်းလၢႆးမိုဝ်း NCA သေ  တေသူင်ႇတူဝ်တႅၼ်းၶဝ်ႈႁူမ်ႈ၊ ၵူၺ်းၵႃႈ ယွၼ်ႉပိူဝ်ႈပႆႇလႆႈၸတ်းႁဵတ်း ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆးလႄႈ  တေဢမ်ႇမီးၶေႃႈတၢင်ႇထိုင်သင်လႄႈ တေဢမ်ႇလူင်းလၢႆးမိုဝ်း ႁၼ်လီၵမ်ႉထႅမ်ၸွမ်း ၶေႃႈလႆႈၸႂ်ပၢင်ၵုမ်လူင်။

လိၵ်ႈပိုၼ်ၽၢဝ်ႇၼၼ်ႉမီးဝႃႈ- တီႈပၢင်ဢုပ်ႇဢူဝ်းၵၢၼ်မိူင်းလႄႈ ၵၢၼ်ၵေႃႇသၢင်ႈလွင်ႈငမ်းယဵၼ်ၼၼ်ႉ ဢိင်ၼိူဝ် လိၵ်ႈႁူမ်ႈမၢႆၵိုတ်းတိုၵ်း တူဝ်ႈမိူင်း (NCA) မီးမႃးသေ RCSS လႆႈၶဝ်ႈႁူမ်ႈႁဵတ်းသၢင်ႈမႃး ဢမ်ႇထၢတ်ႇဢမ်ႇဝၢႆး။ ပၢင်ၵုမ်လူင်ငမ်းယဵၼ် ဢၼ်လူင်ပွင်ၸိုင်ႈသွင်သိုပ်ႇ ၸတ်းႁဵတ်းၼၼ်ႉၵေႃႈ လႆႈၶဝ်ႈႁူမ်ႈဢုပ်ႇဢူဝ်းမႃး။


ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်းထူၼ်ႈ 2 ဢၼ်တေၸတ်းႁဵတ်း ၼႂ်းဝၼ်းတီႈ 24 လိူၼ်မေႊၼႆႉၵေႃႈ ႁူမ်ၸူမ်းႁပ်ႉတွၼ်ႈလႄႈ တေသူင်ႇၽူႈတၢင်တူဝ်ၵႂႃႇၶဝ်ႈႁူမ်ႈၸွမ်း။ ၵူၺ်းၵႃႈ ယွၼ်ႉပႆႇလႆႈၸတ်းႁဵတ်း ပၢင်ဢုပ်ႇဢူဝ်းၵၢၼ်မိူင်း ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး) ပႆႇလႆႈၵၢင်ၸႂ် လွင်ႈၶႂ်ႈလႆႈၶႂ်ႈပဵၼ်ၵူၼ်းမိူင်းတႆးလႄႈ တေဢမ်ႇမီးၶေႃႈတၢင်ႇထိုင်သင်။ ဢိင်ၼိူဝ်ၵၢင်ၸႂ်ၵူၼ်းမိူင်း ဢမ်ႇပႃးတဵမ်ထူၼ်ႈသေ လွင်ႈတမ်းဝၢင်းပိူင်ၵၢၼ် ၵေႃႇတင်ႈမိူင်းႁူမ်ႈတုမ်ၾႅတ်ႊၻရႄႊၼၼ်ႉၵေႃႈ RCSS တေဢမ်ႇပႆႇၸၢင်ႈ လူင်းလၢႆးမိုဝ်းၸွမ်း- ၼႆယဝ်ႉ။


ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်း ၶွပ်ႈၶူပ်ႇ 59 ပီ ၼႂ်းဝၼ်းတီႈ 21 မေႊ 2017 ၼႆႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ၸတ်းႁဵတ်းပၢင်ၵႅဝ်ႈ ၶုၵ်းထူပ်းဢဝ်ၵုၼ်းမုၼ် တီႈငဝ်ႈၸိုင်ႈ လွႆတႆးလႅင်း။ ပၢင်ၵႅဝ်ႈ တႄႇၶၢဝ်းၵၢင်ၼႂ် 9 မူင်း၊ မီးပီႈၼွင်ႉၵူၼ်းမိူင်း ၵူၼ်းသိုၵ်းလႄႈ ပီႈၼွင်ႉၶႅၵ်ႇ တီႈၸမ်ဢိၵ်ႇတီႈၵႆ မႃးၶဝ်ႈႁူမ်ႈမွၵ်ႈသၢမ်ႁဵင်- ၼႆယဝ်ႉ။


တီႈပၢင်ၵႅဝ်ႈၼၼ်ႉ ၸွမ်သိုၵ်းလူင်ယွတ်ႈသိုၵ်း ၽူႈၼမ်း RCSS/SSA မွၵ်ႇလၢတ်ႈၶေႃႈၵႂၢမ်းဝႃႈ- "ၶွင်ႇသီႇဢဝ်ၶိုၼ်း ၸိုင်ႈတႆး တပ်ႉသိုၵ်းၸိုင်ႈတႆးၼႆႉ ပဵၼ်ၸုမ်းလူင်းလၢႆးမိုဝ်းၵိုတ်းတိုၵ်း NCA ၊ ပဵၼ်ၸုမ်းၼႂ်းပၵ်းပိူင်မၢႆမီႈ လူင်ပွင်ၸိုင်ႈယဝ်ႉလႄႈ သင်ဝႃႈ ဝၢၼ်ႈလႂ် ဢိူင်ႇလႂ် ၽႂ်သေဢမ်ႇဝႃႇ ၼႂ်းမိူင်းတႆးၼႆႉ ပေႃးသိုၵ်းမၢၼ်ႈ၊ လူင်ပွင်ၸိုင်ႈမၢၼ်ႈတီႉၺွပ်း ၸီႉၼႄးဝႃႈ ၵပ်းသိုပ်ႇတိတ်းတေႃႇၸုမ်းၼွၵ်ႈမၢႆမီႈ ၽိတ်းပၵ်းပိူင် 17/1 ၼႆၸိုင် ႁႂ်ႈဢွၼ်ၵၼ်သူင်ႇၶၢဝ်ႇ ၸူးတီႈလုမ်းၵပ်းသၢၼ် RCSS/SSA သေၵမ်း၊ ယွၼ်ႉပိူဝ်ႈၼႂ်းလိၵ်ႈႁူမ်ႈမၢႆၼၼ်ႉပႃးဝႆႉဝႃႈ တပ်ႉသိုၵ်းမၢၼ်ႈၵေႃႈလီ၊ တပ်ႉသိုၵ်းၸၢဝ်းၶိူဝ်း ဢၼ်လူင်းလၢႆးမိုဝ်းဝႆႉၵေႃႈလီ တေဢမ်ႇလႆႈပေႉၵိၼ် တဵၵ်းတဵင်ၵူၼ်းဝၢၼ်ႈၵူၼ်းမိူင်း" - ဝႃႈၼႆ။


ဢၼ်လၢၵ်ႇလၢႆးမၼ်းသမ်ႉ ပီၼႆႉ မႄႈၶၢဝ်လူႇ (ၵေႃႉယၢမ်ႈပဵၼ်မေးၼၢင်း ၽူႈဢွၼ်ႁူဝ်ၼမ်းၼႃႈ တႄႇလၢႆးလုၵ်ႉၽိုၼ်ႉတႆး) ၸဝ်ႈၼွႆႉ (သေႃးယၼ်ႇတ)ၵေႃႈ မႃးၶိုၼ်ႈႁွတ်ႈၶဝ်ႈႁူမ်ႈ မွၵ်ႇလၢတ်ႈၶေႃႈၵႂၢမ်း ၶႆႈၼႄပႃးပိုၼ်း ဢၼ်လႆႈၵေႃႇတင်ႈတပ်ႉသိုၵ်းၸိုင်ႈတႆး-ၼႆယဝ်ႉ။


လိူဝ်သေၼၼ်ႉ တီႈပၢင်ၵႅဝ်ႈၼႆႉ ယင်းမီးၵၢၼ်မွပ်ႈယိုၼ်ႈ ၶႅပ်းယုၵ်ႉယွင်ႈဢဝ်မုၼ် ပၼ်တီႈလုၵ်ႈလၢင်းမေးၼၢင်း ၽူႈႁတ်းငၢၼ် ဢၼ်လႆႈလူႇတၢၼ်းၼိူဝ်ႉလိူတ်ႈသၢႆၸႂ်ၵႂႃႇပုၼ်ႈတႃႇၸိူဝ်ႉၸၢတ်ႈဝၢၼ်ႈမိူင်း ၽွင်းယၢမ်းသိုၵ်း တိုၵ်းဢဝ်သုၼ်ႇလႆႈ လွင်ႈထၢင်ႇႁၢင်ႈၵတ်းယဵၼ်ၶိုၼ်ႈယႂ်ႇ သုၼ်ႇလႆႈလွင်ႈၽဵင်ႇပဵင်း။ ဝၢႆးၼၼ်ႉ ၽူႈယႂ်ႇၵူၼ်းလူင် ၸၼ်ႉၽူႈၼမ်း ၵႂႃႇဝၢင်းတူင်ႇမွၵ်ႇမွင်ၸႂ် တၵ်ႉယမ်ၽူႈႁတ်းငၢၼ်သေ ၵိုတ်းလိုဝ်ႈပၢင်ၵႅဝ်ႈ- ၼႆယဝ်ႉ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ တီႈၼေႇပျီႇတေႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး။ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၵမ်းထူၼ်ႈသွင် ဢၼ်တေၸတ်းႁဵတ်း တႄႇဝၼ်းတီႈ 24-27/05/2017 ၼႆႉၵေႃႈ တေၵႂႃႇၶဝ်ႈႁူမ်ႈ 29 ၵေႃႉ၊ ၽူႈၶဝ်ႈၸုမ်းပွင်ၵၢၼ်လူင် RCSS/SSA ၵႅမ်ၸွမ်ႁၢၼ်ပွင်ၶိူဝ်း တေဢွၼ်ႁူဝ်ၼမ်းၼႃႈၵႂႃႇ-ၼႆယဝ်ႉ။